Josue 1–8; 23–24: Leksiyon 64

Pagbansay 4 sa Doktrinal nga Kahanas

Gamita ang mga Baroganan sa Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante sa paggamit sa mga kamatuoran nga anaa sa mga tudling sa doktrinal nga kahanas ug sa pagkat-on ug paggamit sa balaang mga baroganan alang sa pag-angkon og espirituhanong kahibalo.

Pagpangandam sa estudyante: Dapita ang mga estudyante sa pagpili og usa sa mga tudling sa doktrinal nga kahanas nga ilang gitun-an karong tuiga. Dasiga silang maghunahuna og tinuod nga sitwasyon diin makabenepisyo ang usa ka tin-edyer sa pagggamit sa mga pagtulun-an sa maong tudling. Ang lista sa mga tudling makita diha sa Mahinungdanon nga Dokumento sa Doktrinal nga Kahanas (2023).

Posibleng mga Kalihokan sa Pagkat-on

Pagrebyo sa doktrinal nga kahanas: Paggamit

Aron sugdan ang panaghisgot sa kaimportante sa paggamit sa mga tudling sa doktrinal nga kahanas, ikonsiderar ang pagdala o pagpakita og mga hulagway sa mga butang nga nailhan sa daghang tin-edyer pero wala mahibaloi kon unsaon paggamit. Sa ubos ang posible nga mga pananglitan. Pangutan-a ang mga estudyante kon unsa ang kada aytem ug kon kahibalo ba sila nga mogamit niini.

• Nganong importante nga makahibalo dili lang kon unsa ang usa ka butang apan usab kon unsaon kini paggamit?

• Sa unsang paagi magamit kini nga baroganan sa atong pagtuon sa mga tudling sa doktrinal nga kahanas?

Karon magpraktis ka kon unsaon paggamit sa mga tudling sa doktrinal nga kahanas ug sa mga baroganan sa pag-angkon og espirituhanong kahibalo diha sa tinuod nga mga sitwasyon sa kinabuhi. Tinguhaa ang pag-aghat sa Espiritu Santo aron tabangan ka nga makat-on niini nga mga tudling ug sa mga baroganan ug gamita kini sa imong kinabuhi.

Ikonsiderar ang pagdapit sa mga estudyante sa paglista sa mga tudling sa doktrinal nga kahanas ug sa mahinungdanong mga hugpong sa mga pulong sa kasulatan nga ilang gitun-an niining tuiga. Kon kinahanglan, tan-awa ang Mahinungdanon nga Dokumento sa Doktrinal nga Kahanas (2022).

Bahina ang mga estudyante sa gagmayng grupo, ug hatagi ang matag grupo og usa ka pirasong papel. Tahasi o dapita ang mga grupo nga mopili og usa ka tudling sa doktrinal nga kahanas. Hangyoa sila sa paghimo og senaryo (o sitwasyon) diin ang usa ka tawo makabenepisyo sa paggamit sa doktrina niana nga tudling. Pananglitan, ang mga estudyante nga mipili sa Josue 24:15 mahimong mosulat sa mosunod nga sernaryo: “Diha sa usa ka party, ang usa ka batan-ong babaye natental sa paghimo sa usa ka butang nga gihimo sa tanan pero nahibalo siya nga ang Ginoo dili mouyon niini.” Dasiga ang mga estudyante nga dili isulat ang pakisayran sa kasulatan diha sa papel apan mangandam sa pagpakigbahin sa pakisayran unya.

Kolektaha ang mga papel. Pwede nimong basahon ang mga senaryo ngadto sa klase o iapod-apod kini ngadto sa lainlaing grupo.

Dapita ang mga estudyante sa pagpakigbahin og usa ka tudling sa doktrinal nga kahanas nga makatabang sa tawo nga naa sa senaryo. Tabangi silang masabtan nga sobra pa sa usa ka tudling ang tingali may kalabotan para sa kada senaryo. Pwede usab nga hisgotan sa mga estudyante kon sa unsang paagi makatabang sa tawo ang doktrina nga gitudlo diha sa tudling aron palig-onon ang iyang relasyon ngadto sa Langitnong Amahan ug kang Jesukristo. Kon gikinahanglan, pwedeng ipakigbahin sa grupo nga misulat sa senaryo ang orihinal nga pakisayran sa kasulatan nga ilang gipili ug ipasabot kon sa unsang paagi kini makatabang sa ilang napili nga senaryo.

Pagbilin og 20–30 minutos para sa kalihokan nga “Kat-oni ug gamita ang mga baroganan sa pag-angkon og espirituhanong kahibalo” sa ubos.

Dugang nga mga ideya sa pagtabang sa mga estudyante sa paggamit sa mga tudling sa doktrinal nga kahanas anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Pagkat-on ug paggamit sa mga baroganan sa pag-angkon og espirituhanong kahibalo

Ang nahibilin sa leksiyon nagpunting sa pagtabang sa mga estudyante sa paggamit sa mga baroganan sa pag-angkon og espirituhanong kahibalo nga may kalabotan sa mga sitwasyon. Pwede nimong irebyo una ang mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip diha sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.” Ang mga deskripsiyon sa mga baroganan makita diha sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

Pamalandonga ang mga panginahanglan sa imong mga estudyante ug tinguhaa ang tabang sa Ginoo sa pagpili o pagpahiuyon sa usa sa mosunod nga mga senaryo o paghimo og usa sa imong kaugalingon.

Dili kompleto ang duha ka senaryo. Tabangi ang mga estudyante nga butangan ang blangko sa napili nga senaryo sa haom ug makahuloganon nga paagi.

• Usa ka batan-ong lalaki nga ginganlan og [ngalan sa tin-edyer] ang gipresyur ni/sa [usa ka tawo o grupo] nga supakon ang sugo sa Ginoo nga [usa ka sugo nga ang tin-edyer mahimong tinuod nga matental sa pagsupak]. Kanunay siyang ingnon nga dili dako nga butang ang pagsupak niini nga sugo tungod kay [rason kon nganong mobati tingali ang usa ka tawo nga okay rang supakon kini nga sugo]. Nalibog si [ngalan sa tin-edyer] ug wala masayod kon unsay buhaton.

• Usa ka batan-ong babaye nga ginganlan og [ngalan sa tin-edyer] ang mahinamon kay igo na ang iyang edad nga mobiya sa balay sa iyang mga ginikanan ug magkinabuhi nga siya ra. Sa balay sa iyang mga ginikanan, kinahanglan niyang tumanon ang sugo nga [usa ka sugo nga mahimong tinuod nga dili gustong tumanon sa usa ka tin-edyer]. Gusto siyang mahimong maayong tawo, pero wala siya makahibalo kon padayon ba niyang tumanon kana nga sugo inig biya niya sa ilang balay. Tungod kay kini [rason kon nganong dili gusto tumanon sa usa ka tawo kini nga sugo].

  Gamiton na karon sa mga estudyante ang mga baroganan sa pag-angkon og espirituhanong kahibalo aron tabangan ang tawo sa gipili nga senaryo. Pwedeng himoon sa mga estudyante nga magpares o sa gagmayng grupo.

  Ipakita ang tulo ka baroganan sa pag-angkon og espirituhanong kahibalo:

  • Lihokon uban ang hugot nga pagtuo.

  • Susiha ang mga konsepto ug mga pangutana nga adunay mahangtorong panglantaw.

  • Tinguhaa ang dugang nga panabot pinaagi sa balaanong gitudlo nga mga tinubdan.

  Dapita ang mga estudyante sa paghisgot sa mosunod nga mga pangutana.

• Hain nga baroganan sa pag-angkon og espirituhanong kahibalo sa imong hunahuna ang labing makatabang sa tawo diha sa senaryo? Ngano man?

• Hain sa tudling sa doktrinal nga kahanas o uban pang mga tudling sa kasulatan ang para nimo makatabang sa tawo diha sa senaryo? Ngano man?

Human sa igong panahon, dapita ang mga estudyante sa pagpakigbahin sa unsay ilang nahisgotan.

Ipakita ang litrato gikan sa sinugdanan sa leksiyon. Bahina ang mga estudyante nga magkapares aron kompletohon ang mosunod nga kalihokan.

Hunahunaa ang tawo diha sa senaryo nga gipili nga balewalaon ang doktrina sa Manluluwas. Tinoa kon unsay mahitabo nila. Dayon tinoa kon unsay mahitabo kon pilion nila nga molihok niana nga doktrina ug sa mga baroganan sa pag-angkon og espirituhanong kahibalo.

Human ang mga estudyante adunay igong panahon sa paghisgot sa senaryo, dapita sila nga ipakigbahin ang ilang mga hunahuna ngadto sa klase. Samtang nagpakigbahin ang mga estudyante, ikonsiderar ang pagpangutana nga sama sa mosunod aron makatabang sa paggiya og makahuloganong panaghisgot ang klase:

• Unsa pay imong madugang sa gipakigbahin sa imong klasmeyt?

• Sa unsang paagi nga ang mga baroganan sa pag-angkon og espirituhanong kahibalo makatabang sa tawo diha sa senaryo kon mopili sa pagsunod ni Jesukristo?

• Unsay imong nahibaloan bahin sa Langitnong Amahan o ni Jesukristo nga importante tingaling hinumdoman sa tawo diha sa senaryo?

Dapita ang mga estudyante nga pamalandongan kon sa unsang paagi ang mga tudling sa doktrinal nga kahanas o ang mga baroganan sa pag-angkon og espirituhanong kahibalo nakatabang diha sa ilang personal nga mga desisyon. Pwede nimong dapiton ang mga estudyante nga isulat o ipakigbahin ang ilang mga hunahuna.

Dugang nga mga Kalihokan sa Pagkat-on

Mga ehemplo sa nakompleto nga mga senaryo

Imbes dapiton ang mga estudyante nga kompletohon ang usa sa mga senaryo, pwede nimong gamiton ang usa o ang duha sa mosunod nga mga senaryo:

Usa ka batan-ong lalaki nga ginganlan og Franco ang gipresyur sa iyang mga teammate nga mamalikas ug mokatawa sa dili angay nga mga komedya. Sagad siyang ingnon nga dili usa ka dako nga butang ang pagpamalikas tungod kay kadaghanan sa mga tawo nagsulti sa ingon niana. Naglibog si Franco ug wala siya masayod kon unsay buhaton.

Usa ka batan-ong babaye nga ginganlan og Maria ang naghinam-hinam kay igo na ang iyang edad nga mobiya sa balay sa iyang mga ginikanan ug magkinabuhi nga siya ra . Sa balay sa iyang mga ginikanan, kinahanglan niyang tumanon ang sugo nga Pulong sa Kaalam. Gusto siyang mahimong maayong tawo, pero wala siya makahibalo kon mosunod ba siya niini nga sugo human siya mibiya sa ilang balay. Pipila ra sa iyang mga higala ang nagsunod niini, ug morag okay ra man sila.

Ang alternatibo nga senaryo

Kon hunahuna nimo makabenepisyo ang imong mga estudyante gikan sa usa ka senaryo nga lahi ang pagpunting, pwede nimong gamiton o ipahiuyon ang mosunod nga senaryo:

Matag higayon nga motambong si Samantha sa simbahan, makadawat siya og daghang notipikasyon sa iyang selpon. Siya motan-aw ug motubag sa mga notipikasyon atol sa miting sa sakramento ug sa iyang mga klase sa simbahan. Dapiton siya sa lider o magtutudlo nga itago ang iyang selpon o gamiton lang kini para sa leksiyon. Nagpanuko siya sa pagtago niini sulod sa pipila ka minuto, apan mobati siya og kalagot. Maghunahuna siya, “Importante ba gyod kon giunsa nako paggamit ang akong selpon sa simbahan basta wala lang koy gihimong daotan?” Maglagot na dayon siya sa maong lider o magtutudlo, ug dili na gyod siya ganahang moadto sa simbahan.

Tabangi ang mga estudyante nga hisgotan ang mga baroganan sa pag-angkon og espirituhanong kahibalo nga morag giatubang nila ang susama nga kahimtang ni Samantha.