Josue 1–8; 23–24: Leksiyon 61

Josue 1

Ang Ginoo Dili Gayod Mopakyas o Mobiya Kanato

Isip pinili nga propeta sa Ginoo, giordinahan ni Moises si Josue nga mahimong pangulo sa Israel paingon sa gisaad nga yuta. Bisan pa og morag lisod kaayo kini nga buluhaton, ang Manluluwas misugo ni Josue nga magmalig-on ug magmaisog, uban sa saad nga Siya dili mopakyas o mobiya sa Iyang propeta (tan-awa sa Josue 1:5–6). Kini nga leksiyon makatabang aron dugangan ang pagsalig sa mga estudyante nga makatabang ang Ginoo aron mahimo silang lig-on ug maisogon kon mag-atubang sila og mga hagit.

Pagpangandam sa estudyante: Dapita ang mga estudyante nga maghunahuna og mga sitwasyon diin gikinahanglan tingaling magpakita og kaisog ang usa ka batan-on. Pwedeng pangutan-on sa mga estudyante ang usa ka sakop sa pamilya o higala bahin sa ilang mga kasinatian diin nagkinahanglan sila og kaisog.

Posibleng mga Kalihokan sa Pagkat-on

Kaisog dihang mag-atubang og mga hagit

Sa pagsugod sa klase, ikonsiderar ang pagsulat sa pulong nga Kaisog diha sa pisara. Samtang tubagon sa mga estudyante ang mosunod nga mga pangutana, dapita sila sa pagsulat sa ilang mga tubag diha sa pisara.

• Sa unsang paagi si Jesukristo ehemplo sa kaisog?

• Unsa ang pipila ka sitwasyon nga mahimong atubangon sa usa ka tin-edyer nga nagkinahanglan og kaisog?

Sa imong journal sa pagtuon, isulat ang pipila sa mga hagit nga imong giatubang karon o posibleng atubangon sa umaabot nga nagkinahanglan og kaisog.

Makatabang ang pagsukod sa kaugalingon aron masusi sa mga estudyante ang ilang kahimtang karon ug makahatag og higayon sa Espiritu Santo nga aron mahatag ang ilang indibidwal nga mga panginahanglan panahon sa tibuok leksiyon. Usa ka paagi sa pagbuhat niini mao ang pagdapit sa mga estudyante nga tubagon ang mosunod nga mga pag-aghat diha sa ilang mga journal sa pagtuon.

• Dihang naay ipabuhat kanako nga morag lisod, sagad mobati ko nga .

• Sa sukod nga 1 (ubos) hangtod 5 (taas), unsa ko ka masaligon nga tabangan ko sa Langitnong Amahan ug ni Jesukristo nga atubangon ang akong mga hagit uban ang kaisog? Ngano man?

Samtang magtuon ka karon, hatagi og pagtagad ang mga impresyon gikan sa Espiritu Santo nga makatabang nimo nga magmaisogon ug makadugang sa imong pagsalig nga nag-uban nimo ang Ginoo.

Gi-orden si Josue nga mangulo sa mga anak sa Israel

Ikonsiderar ang pagpakita og imahe ni Moises nga nag-orden ni Josue, sama sa imahe sa sinugdanan niini nga leksiyon (tan-awa sa Deuteronomio 34:9).

Bisan pa og kauban na sa mga anak sa Israel si Moises sukad nga giluwas sila gikan sa Ehipto, ang Ginoo mitawag ni Josue aron mangulo kanila paingon sa gisaad nga yuta.

• Unsa ang pipila sa mga hagit nga giatubang tingali ni Josue isip propeta sa Ginoo ug lider sa kasundalohan sa Israel?

Tabangi ang mga estudyante nga masabtan nga responsibilidad ni Josue ang espirituwal nga pagpangulo sa Israel. Si Josue mao usab ang komander sa kasundalohan ug pangulohan ang Israel aron maangkon ang yuta gikan sa mga Canaanhon nga grabe ang pagkadaotan (tan-awa sa 1 Nephi 17:31–40). Gisaad sa Ginoo kini nga yuta ngadto kang Abraham ug sa iyang matarong nga mga kaliwat (tan-awa sa Josue 1:1–4).

Basaha ang Josue 1:5–9, nga markahan ang balikbalik nga mga saad ug mga instruksiyon gikan sa Ginoo nga makatabang kang Josue sa pagpunting Kaniya dihang mag-atubang og mga hagit.

• Unsay imong nakita nga importante gikan niini nga mga bersikulo?

• Unsaon nimo pag-summarize ang usa ka kamatuoran aron tabangan ang usa ka tawo nga nag-atubang og mga hagit?

Samtang ipakigbahin sa mga estudyante ang mga kamatuoran nga ilang nailhan, tabangi sila sa pag-ila nga dihang mahibalo kita nga nag-uban nato ang Ginoo, mahimo kitang lig-on ug maisogon. Pwede nimong gamiton ang pipila o ang tanan sa mosunod nga mga pangutana aron tabangan ang mga estudyante nga masabtan kini nga kamatuoran. Pwedeng magtrabaho ang mga estudyante nga magpares o sa gagmayng grupo ug dayon ipakigbahin diha sa klase ang ilang nahisgotan.

Hunahunaa ang mahagiton nga mga kahimtang nga nakalista sa pisara ug sa imong journal.

• Unsa kahay ipasabot sa pagkahimong lig-on ug adunay kaisog dihang atubangon kini nga mga hagit?

• Unsay imong nahibaloan bahin sa Ginoo nga makatabang sa usa ka tawo nga mahimong lig-on ug maisogon? Giunsa nimo kini pagkahibalo?

Basaha ang Doktrina ug mga Pakigsaad 84:88, nga pangitaon ang mga paagi nga ang Ginoo nag-uban kanato.

Mga paagi sa pagdapit sa tabang sa Ginoo

Ang mosunod nga mga kalihokan makatabang sa mga estudyante nga mailhan ang mga paagi sa pagdapit sa tabang sa Ginoo dihang kinahanglan nilang mahimong lig-on ug maisogon. Dapita ang mga estudyante sa pagpili og usa sa mosunod nga mga kalihokan. Human ang igong panahon, pwedeng ipakigbahin sa mga estudyante ang ilang nakat-onan niadtong mipili og lahi nga kalihokan.

Pwede nimong ihatag ang usa sa mga pahayag nga naa sa Dugang nga mga Kapanguhaan nga pwedeng tun-an sa mga estudyante para sa kada kalihokan.

Kalihokan A: Pagsunod sa balaod sa Dios

Basaha ang Josue 1:7 ug ang usa o kapin pa sa mosunod nga mga kasulatan: Juan 15:10; 1 Nephi 3:7; Mosiah 2:41; Doktrina ug mga Pakigsaad 93:20.

• Unsang mga koneksyon ang imong nakita tali sa pagsunod sa mga sugo sa Dios ug sa pagkahimong lig-on ug maisogon?

• Unsa ang pipila sa mga paagi nga pwede kitang panalanginan sa Langitnong Amahan ug ni Jesukristo tungod sa atong pagkamasulondon?

Kalihokan B: Pagpamalandong sa pulong sa Dios

Basaha ang Josue 1:8 ug ang usa o kapin pa sa mosunod nga mga kasulatan: 2 Timoteo 3:15–17; 2 Nephi 31:20; 32:3.

• Unsay makatabang nimo sa pagpamalandong sa mga kasulatan?

• Sa imong hunahuna, sa unsang paagi makatabang ang pagpamalandong sa mga pulong sa Dios aron mobati ka nga duol Kaniya?

Ang pagrebyo sa mga tumong makatabang sa mga estudyante nga mailhan ang ilang pag-uswag nga nahimo ug sa paghimo sa bisan unsang gikinahanglan nga mga kausaban sa ilang tumong. Dasiga ang mga estudyante nga rebyohon ang tumong sa pagtuon sa kasulatan nga ilang gitakda. Dayon dapita sila nga susihon ang ilang pag-uswag ug mohimo og mga kausaban sa ilang tumong. (Alang sa dugang nga pagbansay sa pagpahinumdom sa mga estudyante sa ilang mga tumong sa pagtuon sa kasulatan, tan-awa sa “Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw—tumong sa pagtuon” diha sa Pagpalambo sa mga Kahanas sa Magtutudlo [2022], 31.)

Paghinumdom nga ang Ginoo nagauban kanato

• Unsa ang pipila ka paagi nga imong gibati nga nag-uban nimo ang Ginoo panahon sa imong mga hagit?

Hatagi og higayon ang mga estudyante nga pamalandongan ang ilang nakat-onan ug gibati karong adlawa. Pwede nilang dapiton ang Espiritu nga tabangan sila nga makita kon sa unsang paagi ang ilang mga paningkamot nagpadako sa ilang pagsalig nga mag-uban nila ang Ginoo.

Sa imong journal sa pagtuon, hunahunaa ang mga hagit nga imong giatubang karon o posibleng atubangon sa umaabot.

• Unsay imong nakat-onan o gibati bahin sa Langitnong Amahan ug ni Jesukristo nga makatabang nimo nga mahimong lig-on ug maisogon dihang mag-atubang og mga hagit?

• Gikan sa imong nakat-onan o gibati bahin sa Langitnong Amahan ug ni Jesukristo, unsay gusto nimong hinumdoman sa sunod higayon kon mobati ka nga dili segurado sa imong abilidad sa pagdumala og lisod nga sitwasyon?

Ikonsiderar ang pagpakigbahin sa imong pagsaksi nga tumanon sa Ginoo ang Iyang saad nga kanunay nga mag-uban kanato, nga dili mopakyas o mobiya kanato, sama sa Iyang gisaad kang Josue.

Dugang nga mga Kapanguhaan

Unsay atong nasabtan bahin sa kamatayon ni Moises? (Deuteronomio 34:5–7; Josue 1:1–2)

Bisan og daghang bersikulo sa Daang Tugon ang naghisgot bahin sa kamatayon ni Moises, atong nahibaloan gikan sa pagpahiuli sa kasulatan nga si Moises wala makatagamtam og kamatayon (tan-awa sa Alma 45:19) apan hinuon nabalhin sa pagkahimaya. Ang mga tawo nga nabalhin sa pagkahimaya dili makasinati og kasakit o kamatayon sa nahibiling bahin sa ilang mortal nga pagkinabuhi. Unya banhawon sila dayon ngadto sa pagka-imortal (tan-awa sa 3 Nephi 28:8). Ang nabalhin sa pagkahimaya nga mga binuhat mopahigayon og piho nga mga buluhaton nga nagkinahanglan og pisikal nga lawas. Mipakita si Moises didto sa Bukid sa Transpigurasyon sa wala pa ang Pagkabanhaw ni Jesus (Marcos 9:2–4). Kon espiritu lang si Moises, dili unta niya mahatag ang mga yawe sa pagkapari sa mortal nga sila si Pedro, Santiago, ug Juan diha sa bukid (tan-awa ang “Moises” diha sa Giya ngadto sa mga Kasulatan).

Sa unsang paagi si Josue usa ka sama ni Kristo?

Isip temporal ug espirituhanon nga lider sa mga Israelinhon, si Josue usa usab ka matang ug anino ni Jesukristo. Ang ngalan nga Jesus mao “ang Griyego nga porma sa ngalan nga Josue o Jeshua, ‘Ang Dios maoy tabang’ o ‘Manluluwas’” (Bible Dictionary, “Jesus”). Si Josue/Jeshua/Jesus ang usa nga mangulo sa Israel paingon sa gisaad nga yuta.

Sa unsang paagi ang pagkamasulundon makadugang sa atong pagsalig sa Ginoo?

Si Brother M. Joseph Brough sa Kinatibuk-ang Kapangulohan sa Young Men mipasabot:

Sa among pamilya, duna kami panultihon nga nahimong importante nga bahin sa among misyon. Taud-taod nang gitudlo ni Presidente Russell M. Nelson ang mao nga konsepto. Miingon siya sa ingon niini nga paagi: “Ang kamasulundon magdala og kalamposan; ang tukma nga kamasulundon magdala og mga milagro.” (R. Scott Lloyd, “Elder Nelson Delivers Spiritual Thanksgiving Feast to MTCs,” newsroom.ChurchofJesusChrist.org)

Wala ko makasabot sa hingpit kon unsay ipasabut sa tukma nga kamasulundon, apan kini ang akong nasabtan. Wala kini magpasabot nga hingpit ang atong kamasulundon karon gayod sa tanang butang, bisan og posibleng mahingpit ang atong pagsunod sa daghang sugo sa Ginoo. Mao nga, ang paghinulsol kinahanglan nga mahimong usa ka bahin sa tukma nga kamasulundon. Apan ang tukma nga kamasulundon nagkinahanglan og hugot nga pagtuman sa pagsunod sa tanang pasidaan ug mga pag-aghat ug sa mga sugo nga gihatag sa Langitnong Amahan kanato. (“Hinay, Hinagawhaw nga Tingog taliwala sa Dagkong mga Desisyon,” Liahona, Dis. 2018, 44)

Sa unsang paagi ang pagtuon sa kasulatan makadugang sa atong pagsalig sa Ginoo?

Si Presidente Russell M. Nelson miingon:

Kon maghunahuna ako sa Basahon ni Mormon, makahunahuna ako sa pulong nga gahom. Ang mga kamatuoran sa Basahon ni Mormon adunay gahum sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag. …

Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona. (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62–63)

Dugang nga mga Kalihokan sa Pagkat-on

Pagpraktis sa “pagpamalandong” sa mga pulong ni Kristo

Kon makabenepisyo ang mga estudyante sa kahigayonan nga magpraktis sa pagpamalandong sa usa ka kasulatan, pwede nimong ipakigbahin ang mosunod nga pahayag gikan kang Elder D. Todd Christofferson sa Korum sa Napulong Duha ka Apostoles:

Sa pagsulti ko nga “tun-an,” nagpasabot ko nga labaw pa kay sa pagbasa lang. Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulogan sa mensahe niini, pero sa pagkakabig, kinahanglan mas hatagan nimo og gibug-aton ang kadugayon sa panahon nga imong gigahin sa mga kasulatan kay sa kadugayon nga nagbasa ka nianang panahona. Naobserbahan nako nga usahay magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabot niini, mag-ampo para sa panabot, mangutana diha sa inyong hunahuna, maghulat sa espirituhanong mga impresyon, ug mosulat sa mga impresyon ug mga panghunahuna nga moabot aron mo makahinumdom ug makat-on og dugang pa. Sa pagtuon niining paagiha, mahimong dili daghan ang inyong mabasa nga mga kapitulo o mga bersikulo sulod sa tunga sa oras, pero makahatag kamo og luna sa inyong kasingkasing alang sa pulong sa Dios, ug Siya makigsulti kaninyo. (“Kon Makabig na Kamo,” Liahona, Mayo 2004, 11)

Dapita ang mga estudyante sa pagpili og usa ka kasulatan nga praktisan og pamalandong. Andama ang klasrom, nga tangtangon ang mga pwedeng makadisturbo kutob sa mahimo.

Pwedeng maghimo og lista ang mga estudyante sa mga butang nga pwede nilang himoon base sa gikutlo ni Elder Christofferson. Kon nagkinahanglan sila og dugang nga tabang, pwede nimong ihatag ang pipila sa mosunod:

• Basaha ug balika og basa ang tudling nga imong gipili uban ang tinguha nga makakat-on gikan niini kaysa basta mahuman lang og basa.

• Pamalandongi ang imong gibasa, ang kahulogan sa mga pulong, ug kon sa unsang paagi nimo kini magamit. Hunahunaa kini pag-ayo sa makadaghan.

• Sulayi nga himoong aktibo ang imong proseso sa paghunahuna, mental nga pangitaon ug hunahunaon ang kasulatan, mga pulong ug hugpong sa mga pulong, ug kon sa unsang paagi makatabang nimo ang mensahe sa bersikulo.

• Isulat ang imong mga hunahuna ug mga pagbati nga resulta sa imong pagpraktis.

Human ang igong panahon, sinserong pasalamati ang mga estudyante sa ilang pagkaandam nga moapil sa kalihokan. Pwede nimo silang pahinumdoman nga ang Ginoo ray mag-igo kon sa unsang paagi ug kon kanus-a Niya panalanginan ang atong mga paningkamot nga pamalandongan ang Iyang pulong. Dapita sila nga mangita og mga kahigayonan sa pagpraktis niini nga kahanas isip kabahin sa ilang regular nga pagtuon sa ebanghelyo.

Mga ehemplo sa kaisog ug pagsalig sa Ginoo

Kon makabenepisyo ang mga estudyante gikan sa ehemplo sa Ginoo sa pagpauswag sa atong kaisog ug pagsalig, pwede nimong ipasalida ang bidyo nga “Barog Bisag Nag-inusara” (4:20). Kini nga bidyo naghulagway sa istorya ni Presidente Monson, nga nakakaplag og pagsalig diha sa Ginoo samtang gibati niya nga nag-inusara siya sa pagbarog.

Ang bidyo nga “Ang Imong Dakong Adbentyur: Pagbuntog sa mga Babag sa Kinabuhi” gikan sa time code 5:48 hangtod 8:19 mahimong gamiton sa paghulagway kon sa unsang paagi gipauswag sa Ginoo ang kaisog ug pagsalig sa usa ka batan-ong lalaki aron maatubang ang mga hagit sa kinabuhi.