Josue 1–8; 23–24: Leksiyon 62

Josue 2–4

Pagpakita og Hugot nga Pagtuo kang Jesukristo

Human sa panaw sa mga Israelinhon diha sa kamingawan, gisugo sa Ginoo si Josue nga giyahan sila paingon sa gisaad nga yuta. Aron makasulod sa gisaad nga yuta, kinahanglan silang magpakita og hugot nga pagtuo kang Jesukristo. Ang mga anak sa Israel ug usa ka babaye nga ginganlan og Rahab mipakita sa ilang hugot nga pagtuo kang Jesukristo. Kini nga leksiyon makatabang sa mga estudyante nga masabtan kon sa unsang paagi sila makapakita og hugot nga pagtuo kang Jesukristo.

Pagpangandam sa estudyante: Dapita ang mga estudyante sa pagpangita og mga kasulatan nga motabang nila sa pagsabot kon unsa ang kahulogan sa pagbaton og hugot nga pagtuo kang Jesukristo. Hangyoa sila sa pagsulod sa klase nga andam nga mopakigbahin. Kon kinahanglan, pwede nilang tan-awon ang “Hugot nga Pagtuo” diha sa Giya ngadto sa mga Kasulatan.

Posibleng mga Kalihokan sa Pagkat-on

Hugot nga Pagtuo kang Jesukristo

Ikonsiderar ang pagsugod sa klase pinaagi sa pagdapit sa mga estudyante sa paghunahuna og usa ka pulong nga nagrepresentar sa ilang mga kalingawan o gikainteresan—pananglitan, basketball o pagkanta. Hangyoa ang mga estudyante nga ihulagway ang ilang mga pulong nga dili gamiton ang mismong pulong. Pwedeng tagnaon sa mga sakop sa klase ang pulong.

Dayon, isulat sa pisara ang hugot nga pagtuo, ug dapita ang mga estudyante nga ihulagway ang hugot nga pagtuo kang Jesukristo. Pwede nilang ipakigbahin ang ilang nakaplagan isip kabahin sa ilang pagpangandam para sa klase. Pwede nimong ipasabot nga gusto sa Langitnong Amahan nga ipakita nato ang atong hugot nga pagtuo kang Jesukristo aron Siya makaluwas ug makapanalangin kanato (tan-awa sa 2 Nephi 26:13; Ether 12:12, 18; Moroni 7:33).

Pahinumdomi ang mga estudyante nga usa sa mga tahas sa Espiritu Santo mao ang paggiya nato ngadto sa kamatuoran (tan-awa sa Juan 16:13). Dasiga ang mga estudyante nga dapiton ang Espiritu Santo aron tabangan silang mas masabtan ang hugot nga pagtuo kang Jesukristo.

• Sa unsang paagi ang pagpalambo sa imong hugot nga pagtuo ni Jesukristo makatabang nimo sa imong kahimtang karon?

Basaha ang gitudlo ni Elder David A. Bednar sa Korum sa Napulog Duha ka Apostoles bahin sa hugot nga pagtuo kang Jesukristo, o tan-awa ang bidyo nga “Paningkamot sa Pagkat-on pinaagi sa Hugot nga Pagtuo” gikan sa time code 3:15 hangtod 4:33. Ang bidyo naa sa ChurchofJesusChrist.org.

Si Apostol Pablo mipasabot sa hugot nga pagtuo isip “ang hugot nga pagtuo mao ang kasiguroan sa mga butang nga gilaoman, ang katin-awan sa mga butang nga dili makita” (Mga Hebreohanon 11:1). Si Alma mipahayag nga ang hugot nga pagtuo dili mao ang pagbaton sa hingpit nga kasayoran; hinoon, kon kita adunay hugot nga pagtuo, kita “naglaom sa mga butang nga dili makita, [apan] tinuod” (Alma 32:21). Dugang pa, atong nakat-onan gikan sa Lectures on Faith nga ang hugot nga pagtuo mao ang … “ang baroganan sa buhat sa tanang intelihenting mga binuhat.”

Kini nga mga pagtulun-an miklaro sa tulo ka sukaranang mga elemento sa hugot nga pagtuo: (1) ang hugot nga pagtuo isip kasiguroan sa mga butang nga atong gilaoman nga tinuod, (2) ang hugot nga pagtuo isip ang ebidensya sa mga butang nga dili makita, ug (3) ang hugot nga pagtuo isip ang baruganan sa paglihok sa tanang intelehente nga mga binuhat. Akong gihulagway kining tulo ka bahin sa hugot nga pagtuo sa Manluluwas nga nagdungan og atubang sa umaabot, pagtan-aw sa nangagi, ug pagpasiugda og paglihok sa karon. (“Paningkamot sa Pagkat-on pinaagi sa Hugot nga Pagtuo,” Liahona , Sep. 2007, 61–62)

Ang imahe nga “Pagpakita og Hugot nga Pagtuo kang Jesukristo” makatabang sa mga estudyante nga masabtan ang gipasabot ni Elder Bednar sa hugot nga pagtuo kang Jesukristo. Idrowing ang imahe diha sa pisara o ipakita kini aron mahimong basehan sa mga estudyante sa tibuok leksiyon.

• Unsay gihimo sa Dios sa nangagi nga makatabang nimo sa pagbaton og hugot nga pagtuo Kaniya?

• Sa unsang paagi ang paglaom sa gisaad nga mga panalangin sa Dios makatabang nimo sa pagpakita og hugot nga pagtuo Kaniya?

• Unsaon nimo pagpamubo sa mga pagtulun-an ni Elder Bednar bahin sa hugot nga pagtuo kang Jesukristo?

Tabangi ang mga estudyante nga mailhan ang kamatuoran nga sama sa: Nagpakita kita og hugot nga pagtuo kang Jesukristo samtang kita nag-atubang sa umaabot, molantaw sa nangagi, ug molihok karon.

Mga ehemplo sa hugot nga pagtuo

Ang mga istorya sa Josue 2–4 nagpakita sa usa o kapin pa niini nga mga elemento sa pagpakita og hugot nga pagtuo kang Jesukristo.

Tabangi ang mga estudyante nga tun-an kini nga mga istorya. Usa ka paagi mao ang paghimo og estasyon sa pagkat-on para sa kada kapitulo. Pwede kang magbutang og usa ka seksiyon sa handout nga “Mga Pananglitan sa Hugot nga Pagtuo kang Jesukristo gikan sa Josue 2–4” diha sa tulo ka lainlaing dapit sa klasrom. Pwedeng liboton sa mga estudyante ang kada estasyon ug sundon ang mga instruksiyon diha sa handout. Para sa mas dagkong klase, pwede kang maghimo og daghang estasyon sa pagkat-on para sa kada seksiyon. Tugoti ang mga estudyante nga tagsa-tagsa nga moapil o sa gagmayng grupo.

Kon posible, pwede nimong ipakita ang mosunod sa kada estasyon sa pagkat-on:

• Pula nga tanod para sa Josue 2

• Usa ka paresan sa sapatos para sa Josue 3

• Usa ka bato para sa Josue 4

Kon naay pangutana ang mga estudyante bahin sa pagkalaglag sa mga tawo sa Jerico, pwede nimong i-refer sa pangutana nga “Nganong gilaglag ang mga Canaanhon?” diha sa seksiyon nga Dugang nga mga Kapanguhaan sa Leksiyon 63: “Josue 23–24.”

Human sa igong panahon, dapita ang mga estudyante nga ipakigbahin sa klase ang ilang nakat-onan bahin sa hugot nga pagtuo kang Jesukristo. Pwedeng gunitan sa mga estudyante ang pula nga tanod, ang sapatos, o ang bato samtang nagpakigbahin sila. Mga pangutana nga sama sa mosunod mahimong makatabang.

• Unsay imong nakat-onan bahin sa pagpakita og hugot nga pagtuo kang Jesukristo? Sa unsang paagi ang imong nakat-onan makatabang sa kabatan-onan karon?

Ikonsiderar ang pagdapit sa mga estudyante sa pagpakigbahin kon sa unsang paagi sila o ang ilang nailhan nagpakita og hugot nga pagtuo kang Jesukristo pinaagi sa pag-atubang sa umaabot, paglihok karon, ug paglantaw sa nangagi. Pwede usab kang magpakigbahin og personal nga kasinatian bahin sa pagpakita og hugot nga pagtuo kang Jesukristo.

Dugang nga mga Kapanguhaan

Sa unsang paagi makapakita ko og hugot nga pagtuo kang Jesukristo?

Si Elder David A. Bednar sa Korum sa Napulog Duha ka Apostoles mitudlo:

Ang hugot nga pagtuo isip pasalig sa mga butang nga gilaoman nagtan-aw sa umaabot. …

Ang hugot nga pagtuo kang Kristo dili mabulag, ug moresulta, sa paglaom diha kang Kristo alang sa atong katubsanan ug kahimayaan. Ug ang kasiguroan ug paglaom makahimong posible nga kita makalakaw sa ngilit sa kahayag ug mohimo og pipila ka lakang ngadto sa kangitngit—naglaom ug nagsalig sa kahayag nga mopadayon ug modan-ag sa agianan. Ang kombinasyon sa pasalig ug paglaom nagpasiugda og paglihok sa karon.

Ang hugot nga pagtuo isip ebidensya sa mga butang nga dili makita mopahinumdom sa nangagi ug mopamatuod sa atong pagsalig sa Dios ug sa atong pagsalig sa katinuod sa mga butang nga dili makita. Motikang kita ngadto sa kangitngit uban sa kasiguroan ug paglaom, ug makadawat kita og ebidensya ug panghimatuod samtang ang kahayag molihok ug mohatag og kahayag nga atong gikinahanglan. Ang saksi nga atong naangkon human sa pagsulay sa atong hugot nga pagtuo (tan-awa ang Ether 12:6) ebidensya nga mopadako ug mopalig-on sa atong kasiguroan.

Ang kasiguroan, paglihok, ug ebidensya moimpluwensya sa usag usa sa nagpadayon nga proseso. Kini nga pagtuyok sama sa usa ka rolyo, ug samtang kini magtuyok padulong sa itaas kini modako ug molapad. Kining tulo ka elemento sa hugot nga pagtuo—kasiguroan, paglihok, ug ebidensya—dili bulag ug lahi; hinoon, kini may kalabotan sa usag usa ug nagpadayon ug nagtuyok pataas. Ug ang hugot nga pagtuo nga mosugnod niining nagpadayon nga proseso molambo, motubo, ug mausab. Samtang kita mobalik ug moatubang sa walay kasiguroan nga umaabut, ang kasigurohan mosangpot sa pagtuyok ug makahatag og ebidensya, nga makapadugang sa kasigurohan. Ang atong pagsalig mas molig-on, pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto. (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 17−19)

Sa unsang paagi makapakita ko og hugot nga pagtuo pinaagi sa pagtan-aw sa nangagi ug sa umaabot?

Si Presidente Jeffrey R. Holland sa Korum sa Napulog Duha ka Apostoles mipasabot:

Ang nangagi angay nga makat-unan apan dili puy-an. Kita motan-aw sa kagahapon aron sa pagkat-on sa maayong mga kasinatian ug dili ang mga bati nga mga kasinatian. Ug kon kita makakat-on kon unsa ang kinahanglan nga makat-unan ug atong gibuhat ang atong labing maayo sa atong nasinati, dayon kita molantaw sa unahan ug mohinumdom nga ang hugot nga pagtuo kanunay nagtumong ngadto sa umaabot. Ang hugot nga pagtuo kanunay adunay kalabotan sa mga panalangin ug sa mga kamatuoran ug sa mga panghitabo nga moabot pa nga mobunga og maayong mga resulta sa atong kinabuhi. (“Ang Labing Maayo Moabut Pa,” Liahona, Ene. 2010, 18)

Unsa ang akong buhaton aron madugangan ang akong hugot nga pagtuo diha ni Jesukristo?

Si Presidente Russell M. Nelson midapit:

Unsay inyong buhaton kon kamo adunay dugang nga hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo. …

Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto kanila nga magatuo.

Ang inyong nagtubo nga hugot nga pagtuo Kaniya makabalhin og mga bukid—dili mga bukid nga bato nga pangpatahom sa yuta—apan mga bukid sa kasub-anan sa inyong kinabuhi. Ang inyong nagmalamboon nga hugot nga pagtuo makatabang kaninyo sa pagbalhin sa inyong mga hagit ngadto sa dili hitopngan nga kalamboan ug oportunidad. (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103, 104)

Si Presidente Henry B. Eyring sa Unang Kapangulohan mipahayag:

Mga kaigsoonan, magkinahanglan og hugot nga pagtuo ang pagkamasulundon ngadto sa mga sugo sa Ginoo. Magkinahanglan og hugot nga pagtuo kang Jesukristo ang pag-alagad sa uban alang Kaniya. Magkinahanglan og hugot nga pagtuo ang pagtudlo sa Iyang ebanghelyo ug pagtanyag niini ngadto sa mga tawo kinsa wala mobati sa tingog sa Espiritu o molimod gani sa pagkatinuod sa mensahe. Apan kon kita mogamit sa atong hugot nga pagtuo kang Kristo—ug mosunod sa Iyang buhi nga propeta—ang hugot nga pagtuo molambo sa tibuok kalibotan. (“Ang Hugot nga Pagtuo alang sa Pagpangutana ug Dayon sa Paglihok,” Liahona, Nob. 2021, 75)

Dugang nga mga Kalihokan sa Pagkat-on

Josue 3:5. “Himoang putli ang inyong kaugalingon”

Makabenepisyo tingali ang imong mga estudyante sa pagtuon kon sa unsang paagi ang pagputli sa atong kaugalingon makatabang nato sa pagpakita og hugot nga pagtuo kang Jesukristo ug pagsinati og mga milagro. Basaha ang Josue 3:5. Dayon pwede nimong ipasalida ang bidyo nga “Himoang Putli ang Inyong Kaugalingon” (4:37). Dapita ang mga estudyante nga pangiton kon sa unsang paagi gigamit sa Ginoo ang batan-on ug takos nga naghupot sa Melchizedek nga Pagkapari sa pagpahigayon og milagro. Dayon, hisgoti kon unsay ipasabot sa pagputli sa atong kaugalingon ug kon sa unsang paagi kana makapasarang kanato nga masinati ang mga milagro sa Ginoo. Kon kinahanglan, tabangi ang mga estudyante nga masabtan nga ang pagputli nagkahulogan nga himoong balaan o limpyo sa espirituhanong paagi.

Josue 3:6. “Dad-a ang sudlanan sa kasabotan ug pag-una sa katawhan”

Ang mosunod makatabang sa mga estudyante nga motan-aw kang Jesukristo samtang magpakita sila og hugot nga pagtuo Kaniya ug mopadayon. Dapita ang mga estudyante nga basahon ang Josue 3:6–16, nga pangitaon kon unsay gihimo sa mga pari sa sudlanan sa kasabotan.

Pahinumdomi ang mga estudyante nga ang sudlanan sa kasabotan pwedeng magsimbolo kang Jesukristo. Dayon dapita ang mga estudyante nga tan-awon pag-usab ang mga bersikulo, nga maghunahuna kon unsay ilang nakat-onan bahin ni Jesukristo. Hisgoti ang mga paagi nga makapadayon kita ug makadahom kita og mga milagro kon kita adunay hugot nga pagtuo nga si Jesukristo mag-una kanato. Ikonsiderar ang pag-cross reference niini nga mga bersikulo sa Josue 3 sa Isaias 52:12 ug Doktrina ug mga Pakigsaad 84:88.

Josue 4. Mga handomanan sa hugot nga pagtuo

Ikonsiderar ang pagtabang sa mga estudyante nga pangitaon ang kaugalingon nilang mga handomanan sa hugot nga pagtuo. Human matun-i ang Josue 4, pwede nimong dapiton ang mga estudyante nga hunahunaon ang kabilin sa hugot nga pagtuo nga gibilin sa ilang pamilya o sa mga Santos sa Ulahing mga Adlaw sa inyong nasod. Mahimong makig-istorya sa (tingali kontakon panahon sa klase) usa ka ginikanan o apohan, o pwede nilang gamiton ang Family Tree nga app aron mapangita ang mga handomanan sa pamilya. Pwede pod maghunahuna ang mga estudyante og dapit diin naa silay importanteng espirituwal nga kasinatian.

Pwede usab pangitaon sa mga estudyante sa Global Histories sa ChurchofJesusChrist.org aron pangitaon ang mga asoy sa matinud-anong mga Santos sa Ulahing mga Adlaw sa inyong nasod.

Dapita ang mga estudyante sa pagpakigbahin sa unsay ilang nakaplagan.

Ether 12:6. Ang pagsaksi moabot human sa pagsulay sa hugot nga pagtuo

Aron tabangan ang mga estudyante kon unsay ilang gitun-an sa Basahon ni Mormon, dapita sila sa pagbasa sa Ether 12:6. Hisgoti kon nganong sagad moabot ang pagsaksi human sa pagsulay sa hugot nga pagtuo. Dapita ang mga estudyante sa pagpakigbahin kon unsa kini ka tinuod sa kinabuhi ni Rahab (tan-awa sa Josue 2; Josue 6:25) ug sa mga Israelinhon nga mitabok sa Suba sa Jordan (tan-aw sa Josue 3). Hangyoa ang mga estudyante sa pagpakigbahin og mga kasinatian dihang nakadawat sila og pagsaksi human sa pagsulay sa hugot nga pagtuo.