Josue 1–8; 23–24

Josue 1–8; 23–24

Kinatibuk-ang Pagpasabot

Pagkahuman ni Moises, si Josue ang nahimong sunod nga propeta ug lider sa nasod sa Israel. Ang Ginoo miingon kang Josue nga iyang giyahan ang mga anak sa Israel padulong sa gisaad nga yuta. Samtang nagpakita og hugot nga pagtuo diha kang Jesukristo ang mga Israelinhon, milagroso Niya silang gipanalanginan. Gipahunong sa Ginoo ang katubigan sa Suba sa Jordan aron makatabok sa uga nga yuta ang mga Israelinhon. Dihang gituman sa kasundalohan sa Israel ang Ginoo, gipanalanginan Niya sila aron modaog sila sa gubat. Gihatagan ni Josue ang matag tribo sa Israel og yuta nga panulundon. Sa wala pa siya mamatay, gipahinumdoman ni Josue ang mga Israelinhon sa tanang gibuhat sa Ginoo para nila. Gidasig niya ang katawhan nga pilion ang pagserbisyo sa Ginoo.

Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw. Ang pagtuon sa kasulatan maghatag nato og higayon nga madungog ang tingog sa Manluluwas. Ang pagdapit nga basahon ang mga kasulatan maoy usa ka imbitasyon aron mailhan si Jesukristo. Samtang imong tudloan ang imong mga estudyante bahin sa pagtuon sa kasulatan, awhaga sila nga dili lang basta pangitaon kon unsay gitudlo sa kasulatan bahin sa Manluluwas, kondili pangitaon Siya. Aron makakat-on pa og dugang, tan-awa sa “Giawhag sa Manluluwas ang Uban sa Pag-ila Kaniya pinaagi sa Pagtuon sa Iyang Pulong” (Pagtudlo Sumala sa Pamaagi sa Manluluwas [2022], 25). Ang usa ka pananglitan sa paghimo niini makita sa Leksiyon 61: “Josue 1.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Josue 1

Katuyoan sa leksiyon: Aron dugangan ang pagsalig sa mga estudyante nga makatabang ang Ginoo kanila aron makabaton og kaisog kon mag-atubang sila sa mga hagit.

• Pagpangandam sa estudyante: Dapita ang mga estudyante nga maghunahuna og mga sitwasyon diin gikinahanglan tingaling magpakita og kaisog ang usa ka batan-on. Pwedeng pangutan-on sa mga estudyante ang usa ka sakop sa pamilya o higala bahin sa ilang mga kasinatian diin nagkinahanglan sila og kaisog.

• Imahe: Si Moises nga nag-orden ni Josue

Josue 2–4

Katuyoan sa leksiyon: Aron tabangan ang mga estudyante nga masabtan kon sa unsang paagi sila makapakita og hugot nga pagtuo kang Jesukristo.

• Pagpangandam sa estudyante: Dapita ang mga estudyante sa pagpangita og mga kasulatan nga motabang nila sa pagsabot kon unsa ang kahulogan sa pagbaton og hugot nga pagtuo kang Jesukristo. Hangyoa sila sa pagsulod sa klase nga andam nga mopakigbahin. Kon kinahanglan, pwede nilang tan-awon ang “Hugot nga Pagtuo” diha sa Giya ngadto sa mga Kasulatan.

• Mga bidyo: “Paningkamot sa Pagkat-on pinaagi sa Hugot nga Pagtuo” (33:35) gikan sa time code 3:15 hangtod 4:33; “Pagpakita og Hugot nga Pagtuo kang Kristo” (1:43)

• Imahe: Pagpakita og Hugot nga Pagtuo kang Jesukristo

• Handout: “Mga Pananglitan sa Hugot nga Pagtuo kang Jesukristo gikan sa Josue 2–4”

• Mga materyal: Pula nga tanod, usa ka paresan sa sapatos, ug usa ka bato

Josue 23–24

Katuyoan sa leksiyon: Aron tabangan ang mga estudyante nga mopili sa pagserbisyo sa Ginoo kay sa ubang mga impluwensiya.

• Pagpangandam sa estudyante: Dapita ang mga estudyante sa pagdala og gagmayng bato sa klase. Gamiton kini nila isip usa ka pahinumdom sa plano nga ilang himoon diha sa leksiyon.

• Mga materyal: Usa ka gamayng bato para sa kada estudyante (ingkaso og naay mga estudyante nga walay dalang bato); mga materyal nga sama sa mga permanent marker aron isulat diha sa mga bato

Pagbansay 4 sa Doktrinal nga Kahanas

Katuyoan sa leksiyon: Aron tabangan ang mga estudyante sa paggamit sa mga kamatuoran nga makita sa mga tudling sa doktrinal nga kahanas ug sa pagkat-on ug paggamit sa balaanong mga baroganan alang sa pag-angkon og espirituhanong kahibalo.

• Pagpangandam sa estudyante: Dapita ang mga estudyante sa pagpili og usa sa mga tudling sa doktrinal nga kahanas nga ilang gitun-an karong tuiga. Dasiga silang maghunahuna og tinuod nga sitwasyon diin makabenepisyo ang usa ka tin-edyer sa pagggamit sa mga pagtulun-an sa maong tudling. Ang lista sa mga tudling makita diha sa Mahinungdanon nga Dokumento sa Doktrinal nga Kahanas (2023).

• Mga imahe: Mga butang nga nailhan sa daghang tin-edyer apan wala masayod kon unsaon paggamit; usa ka tawo nga naa sa nagsanga nga mga dalan

• Mga materyal: Mga papel alang sa matag grupo

• Sulod nga ipakita: Mga baroganan sa pag-angkon og espirituhanong kahibalo