Josue 1–8; 23–24: Leksiyon 63

Josue 23–24

“Magpili Kamo Niining Adlawa”

Sa hinapos sa iyang kinabuhi, gipahinumdoman ni Josue ang mga Israelinhon kon kinsa ang Ginoo ug kon unsay Iyang gihimo para nila. Gidapit sila ni Josue nga mopili sa pagserbisyo sa Ginoo imbes sa mini nga mga dios. Kini nga leksiyon makatabang sa mga estudyante nga mopili sa pagserbisyo sa Ginoo kay sa ubang mga impluwensiya.

Pagpangandam sa estudyante: Dapita ang mga estudyante sa pagdala og gagmayng bato sa klase. Gamiton kini nila isip usa ka pahinumdom sa plano nga ilang himoon diha sa leksiyon.

Posibleng mga Kalihokan sa Pagkat-on

Ang impluwensiya sa mga makabalda

Ikonsiderar ang pagdapit sa mga estudyante sa paghimo og listahan sa nag-unang lima ka butang nga makabalda sa kabatan-onan nga pilion ang pagserbisyo sa Ginoo. Pwede kining himoon sa mga estudyante nga tagsa-tagsa o isip usa ka grupo. Hangyoa ang mga estudyante sa pagpakigbahin sa ilang listahan.

• Unsay naa niining mga makabalda nga morag mas nindot o mas importante man ning tan-awon kay sa pagserbisyo sa Ginoo?

  Pwede nimong ipasabot nga, kon dili ta mag-amping, kining mga makabalda mahimo nang modernong bersiyon sa pagsimba ug pagserbisyo sa mga dios-dios imbes sa Ginoo.

• Unsa kaha ang ngadto-ngadto nga epekto kon padayon ang pagpili niini nga mga impluwensiya kay sa Ginoo?

  Dapita ang mga estudyante sa pagpamalandong sa mosunod nga mga pangutana o sa pagrekord sa ilang mga tubag diha sa ilang mga journal sa pagtuon.

• Sa unsang paagi nga ikaw nagserbisyo sa Ginoo o nagserbisyo sa usa ka butang o usa ka tawo pinaagi sa imong inadlaw nga mga pagpili?

• Unsa kaha ang ngadto-ngadto nga epekto kon padayon nimong himoon kini nga mga pagpili?

Dapita ang mga estudyante sa pagtinguha sa tabang sa Espiritu aron mailhan kon unsa nga mga pagpili ang ilang himoon aron sa pagserbisyo sa Ginoo.

Ang Ginoo nga atong Dios

Pwedeng basahon sa usa ka estudyante ang mosunod nga parapo sa pagpamubo sa Josue 5–24.

Human giyahi ang mga Israelinhon patabok sa Suba sa Jordan agi sa uga nga yuta (tan-awa sa Josue 3–4), gipanalanginan sa Ginoo ang mga Israelinhon sa ilang daghang mga pagpakigubat batok sa mga Canaanhon. Gipanag-iya sa mga Israelinhon ang yuta nga gisaad sa Dios kanila (tan-awa sa Josue 5–12). Ang yuta gibahin sa dose ka tribo (tan-awa sa Josue 13–22). Sa hinapos sa iyang kinabuhi, mihatag si Josue og kataposang mensahe sa mga Israelinhon (tan-awa sa Josue 23–24).

Para sa mosunod nga kalihokan, pwede nimong dapiton ang katunga sa klase nga basahon ang Josue 23:3–11, ug ang laing katunga sa pagbasa sa Josue 24:3–11. Pwedeng markahan sa mga estudyante ang ilang makaplagan diha sa ilang mga kasulatan.

Basaha ang Josue 23:3–11; 24:3–11, nga pangitaon kon unsay gihimo ug himoon sa Ginoo para sa Israel.

Dapita ang mga estudyante sa pagpakigbahin. Pwede nimo kining himoon pinaagi sa pagsulat sa ilang mga tubag diha sa pisara samtang nakigbahin sila o hangyoon ang mga estudyante nga mopaduol ngadto sa pisara aron isulat ang ilang nakaplagan.

Dayon, tabangi ang mga estudyante nga pamalandongan kon sa unsang paagi nila nakita nga naglihok ang Ginoo sa ilang kinabuhi, ipangutana ang mosunod. Pwede nimo silang dapiton nga maghunahuna og mga pananglitan gikan sa kasaysayan sa Simbahan, kinatibuk-ang komperensiya, sa kaugalingon nilang kinabuhi, o sa kinabuhi sa usa ka tawo diha sa ilang ward o pamilya.

• Unsa ang pipila sa mga pananglitan kon sa unsang paagi gipanalanginan kita sa Ginoo karon?

Ang Josue 24:15 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas aron dali ra nila kining makita.

Aron tabangan ang mga estudyante nga masabtan ang Josue 24:14–15, pwede nimo silang dapiton nga isulat pag-usab ang gitudlo ni Josue sa kaugalingon nilang mga pulong. Pwede nilang isulat pag-usab ang mga bersikulo uban sa kapares o sa gagmayng mga grupo.

Basaha ang Josue 24:14–15. Isulat pag-usab ang gitudlo ni Josue nga morag gitudlo niya ang samang butang karon.

Dapita ang mga estudyante sa pagpakigbahin kon giunsa nila pagsulat pag-usab sa tambag ni Josue. Pwedeng isulat sa mga estudyante ang sama sa “Undangi ang pagsunod sa tanang uban pang impluwensiya nga naa sa imong palibot ug pilia ang pagsunod sa Ginoo! Makapili ka sa imong gusto, pero ako magserbisyo ko sa Ginoo.”

Aron tabangan ang mga estudyante nga mailhan ang klarong pahayag sa kamatuoran, pwede nimong ipangutana ang sama sa mosunod.

• Unsaon nimo pagpamubo ang mga pagtulun-an ni Josue diha sa bersikulo 15?

  Pwedeng ipamubo sa mga estudyante ang bersikulo 15 gamit ang mga pulong nga sama sa pwede natong gamiton ang atong kabubut-on nga mopili sa pagserbisyo sa Ginoo.

  Samtang ipangutana nimo ang mosunod, ikonsiderar ang pag-refer sa mga estudyante sa mga tubag nga ilang gilista diha sa tsart.

• Sa unsang mga paagi nga kita makaserbisyo sa Ginoo karon?

• Sa unsang paagi nga ang unsay imong nahibaloan bahin sa Ginoo makatabang nimo nga mopili sa pagserbisyo Kaniya?

Pagpili nga moserbsiyo sa Ginoo

Basaha ang Josue 24:24–25, nga pangitaon kon unsay gipili nga buhaton sa mga Israelinhon.

Aron tabangan ang mga estudyante nga ikonektar ang ilang nakat-onan diha sa kaugalingon nilang mga pagpili, ikonsiderar ang paghangyo nila nga isulat ang mga tubag sa mosunod nga mga pangutana.

Sa imong journal sa pagtuon, tubaga ang usa sa mosunod nga mga hugpong sa mga pangutana:

• Unsay gusto nimong hinumdoman bahin sa Ginoo nga makatabang nimo sa pagserbisyo Kaniya bisan dihang lisod tingali ning himoon? Sa unsang paagi sa imong hunahuna makatabang ang paghinumdom sa Ginoo niadtong mga higayona?

• Unsay sugdan o undangan nimo og himo aron makapili sa pagserbisyo sa Ginoo? Unsang mga panalangin ang imo tingaling masinatian tungod sa paghimo niana?

Pwede nimong hangyoon ang andam nga mga estudyante nga ipakigbahin ang ilang gisulat. Pahinumdomi sila nga dili ipakigbahin ang bisan unsa nga personal ra kaayo. Pwede sab nimong ipakigbahin ang imong pagpamatuod sa Ginoo ug ipasabot kon nganong mipili ka sa paghigugma ug pagserbisyo Kaniya imbes sa laing mga butang.

Basaha ang Josue 24:26–27, nga pangitaon kon unsay gihimo ni Josue aron pahinumdoman ang mga Israelinhon sa ilang gipili nga moserbsiyo sa Ginoo.

Kon ang mga estudyante nagdala og bato diha sa klase, pwede na nila kining kuhaon karon. O pwede silang magdrowing og litrato sa usa ka bato. Hisgoti kon diin gipahimutang ni Josue ang bato (ilawom sa kahoyng tugas) ug kon nganong didto niya kini gibutang (aron pahinumdoman ang mga anak sa Israel sa pakigsaad nga ilang gihimo nga moserbisyo sa Ginoo). Pangutan-a ang mga estudyante kon asa nila pwedeng ibutang ang ilang bato aron pahinumdoman ang ilang kaugalingon sa ilang plano sa pagserbisyo sa Ginoo. Dapita silang ibutang ang ilang bato sa prominenteng lugar diin regular nila kining makita. Pwede usab nilang sulatan ang bato og usa ka butang nga magpahinumdom nila sa Ginoo o sa ilang plano sa pagserbisyo Kaniya, sama sa “Mag-alagad ko sa Ginoo.”

Pwede nimong ipakigbahin ang mosunod nga pamahayag ngadto sa mga estudyante. Ipamatuod ang ngadto-ngadto nga epekto sa pagpili nga moserbsiyo sa Ginoo.

Si Elder Dale G. Renlund sa Korum sa Napulog Duha ka Apostoles mitudlo bahin sa ngadto-ngadto nga epekto sa pagpili nga moserbsiyo sa Ginoo:

Kinahanglang pilion nato kon kinsa ang atong serbisyohan. Ang gidak-on sa atong mahangtorong kalipay mag-agad sa pagpili sa buhi nga Dios ug sa pag-apil Kaniya sa Iyang buhat. …

Ang pagpili sa pagsunod sa plano sa Amahan mao ang bugtong paagi nga mahimo kitang mga manununod sa Iyang gingharian. (“Magpili Kamo Niining Adlawa,” Liahona, Nob. 2018, 106)

Pagsag-ulo

Pwede nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanong hugpong sa mga pulong sa kasulatan para sa Josue 24:15 mao ang “Pagpili karong adlawa kon kinsay alagaran ninyo.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Nganong gipuo ang mga Canaanhon?

Sa Deuteronomio 7:1–2, gisugo sa Ginoo ang mga Israelihanon nga “puohon” ang mga Hitihanon, mga Girgasihanon, mga Amorihanon, mga Canaanhon, mga Perisihanon, mga Hibihanon, ug mga Jebusihanon (nga sa katibuk-an gitawag og mga Canaanhon tungod kay nagpuyo sila sa Canaan, ang gisaad nga yuta). Gipakita sa mga kasulatan ang pipila ka mga rason alang niini nga sugo. Gitudlo sa Deuteronomio 9:4–5 nga gihinginlan sa Ginoo ang mga Canaanhon gikan sa yuta tungod sa ilang pagkadaotan (tan-awa usab sa Deuteronomio 20:16–18). Sa Basahon ni Mormon, gitudlo ni Nephi sa iyang mga igsoon nga kining mga tawhana “misalikway sa matag pulong sa Dios, ug sila hinog na sa kadaotan; ug ang kahingpitan sa kasuko sa Dios diha kanila” (1 Nephi 17:35).

Ang yawan-ong mga buhat sa mga Canaanhon hilabihan ka makatakod ug makalaglag nga kon tugotan silang magpabilin sa yuta, moresulta kini og espirituwal nga kadaot sa Israel. Ang kasaysayan sa Israel nagmatuod niini nga tinuod. Kay napakyas sila sa pagsunod sa sugo sa Ginoo nga “puohon” ang mga Canaanhon (tan-awa sa Josue 1:21–36), mipahiangay ang Israel sa ilang sayop nga pagtuo ug daotan nga mga buhat paglabay sa panahon, nga sa katapoan miresulta sa espirituwal nga kadaot ug pisikal nga kalaglagan sa Israel. (Tan-awa sa Manwal sa Estudyante sa Daang Tugon Genesis–2 Samuel, 3rd. ed. [2003], 219.)

Kon wala pa nako gipili ang Ginoo, ulahi na ba nga pilion nako Siya karon?

Si Elder Dale G. Renlund sa Korum sa Napulog Duha ka Apostoles mitudlo:

Kon atong madiskobrihan nga mipalayo kita sa dalan, mahimo kitang magpabilin nga anaa sa layo, o tungod sa Pag-ula ni Jesukristo, makapili kita sa pagbali sa atong mga lakang ug mobalik sa dalan. …

Bisan unsa kita kadugay nga nahilayo sa dalan o unsa ka layo kita nga nahisalaag, sa higayon nga modesisyon kita sa pag-usab, ang Dios motabang kanato nga makabalik. Gikan sa panglantaw sa Dios, pinaagi sa sinsero nga paghinulsol ug sa pagpadayon sa unahan uban ang pagkamakanunayon kang Kristo, sa higayon nga mabalik na sa dalan, sama ra kini nga wala gayod kita mopalayo. (“Magpili Kamo Niining Adlawa,” Liahona, Nob. 2018, 106)

Dugang nga mga Kalihokan sa Pagkat-on

Kapilian nga bidyo

Para sa modernong pananglitan sa pagpili nga moserbsiyo sa Ginoo, pwede nimong ipasalida ang bidyo nga “Ang Sinserong Tinguha sa Kalag” (3:28). Pwede nimong sugdan ang klase pinaagi sa bidyo ug hisgotan ang mga pagpili nga atong gihimo matag adlaw. O pwede nimo kining ipasalida dihang imong pangutan-on ang mga estudyante kon unsa ang mga paagi nga makaserbisyo sa Ginoo ang usa ka batan-on.

Si Jesukristo mao ang Bato

Dihang hisgotan ang Josue 24:24–27, pwede nimong dapiton ang mga estudyante sa pag-cross reference o pag-link sa Salmo 18:2 ug Helaman 5:12. Hangyoa sila sa pagpakigbahin kon nganong maayong simbolo para kang Jesukristo ang usa ka bato o kon sa unsang paagi Siya nahimong bato para nila.

Josue 6. Ang mga panalangin sa pagkamasulundon

Aron makakat-on bahin sa mga panalangin sa pagsunod sa Ginoo, pwedeng tun-an sa mga estudyante ang asoy sa gubat sa Jerico. Ikonsiderar ang pagpangutana sa mga estudyante kon unsa kahay mahitabo kon naay usa ka tawo nga dili mosunod sa protokol—pananglitan, usa ka tig-opera [surgeon] nga dili limpyohan pag-ayo ang iyang mga galamiton, usa ka mag-uuma nga dili ayohon og daro ang iyang uma, ug uban pa. Dapita ang mga estudyante sa paghunahuna kon nganong importante ang tukma nga pasunod sa atong madawat nga mga instruksiyon.

Dayon, pwede nimong dapiton ang mga estudyante sa pagbasa sa Josue 6:1–5, 10. Hangyoa sila nga markahan ang mga instruksyon nga gihatag sa Ginoo sa Israel panahon sa ilang gubat sa Jerico. Pangutan-a ang mga estudyante kon unsa kahay ilang hunahunaon kon usa sila sa mga Israelinhon nga nakadawat niini nga mga instruksyon.

Dapita ang mga estudyante nga basahon ang Josue 6:12–16, 20, nga pangitaon kon unsay tubag sa mga Israelinhon. Dapita ang mga estudyante sa pagpakigbahin sa unsay nakapadani nila bahin sa gubat ug kon unsang mga kamatuoran ang ilang mailhan gikan niini nga asoy. Mailhan tingali sa mga estudyante ang kamatuoran nga sama sa mosunod: Samtang matinud-anon natong sundon ang Ginoo sa tukma nga paagi, Siya mopanalangin kanato. Pwede nimong dapiton ang mga estudyante sa pagpakigbahin kon sa unsang paagi nila nakita nga gipanalanginan sila sa Ginoo o ang uban tungod sa pagkamasulundon.

Josue 7. Mga sangpotanan sa pagkamasinupakon

Aron hisgotan ang negatibong mga sangpotanan sa pagsupak sa Ginoo, pwede nimong tabangan ang mga estudyante nga tun-an ang asoy ni Acan. Ipasabot nga gisugo sa Ginoo ang mga Israelinhon nga wala silay tipigan nga bisan unsa para sa ilang kaugalingon human nila mapildi ang siyudad sa Jerico (tan-awa sa Josue 6:18–19). Apan, usa ka Israelinhon nga tawo nga ginganlan og Acan ang mikuha og pipila ka sinina, bulawan, ug plata gikan sa siyudad para sa iyang kaugalingon (tan-awa sa Josue 7:1, 21).

Dapita ang mga estudyante nga basahon ang Josue 7:1–7, 10–13, nga pangitaon kon sa unsang paagi ang pagkamasinupakon ni Acan nakaapektar sa katawhan sa Israel. Dayon tabangi ang mga estudyante sa pag-ila og usa ka kamatuoran nga sama sa mosunod: Dihang pilion nato nga supakon ang sugo sa Ginoo, magdala kita og negatibong mga sangpotanan sa atong kaugalingon ug sa uban. Hangyoa ang mga estudyante nga hunahunaon kon sa unsang paagi ang ginagmayng pagsupak makaapektar kanato o sa mga tawo sa atong palibot paglabay sa panahon.