Exodo 7–13: Leksiyon 44

Pagbansay 3 sa Doktrinal nga Kahanas

Pagsag-ulo sa Mahinungdanong Hugpong sa mga Pulong ug sa Paggamit sa mga Baroganan sa Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante sa pagsag-ulo sa mahinungdanong hugpong sa mga pulong sa kasulatan diha sa mga tudling sa doktrinal nga kahanas ug sa paggamit sa balaanong mga baroganan sa pag-angkon og espirituhanong kahibalo.

Pagpangandam sa estudyante: Dapita ang mga estudyante sa pagpili og usa o duha ka mga tudling sa doktrinal nga kahanas gikan sa Daang Tugon ug sa pagsag-ulo sa pakisayran ug mahinungdanong hugpong sa mga pulong sa kasulatan. Kon gusto sila, pwede nilang sag-ulohon ang tibuok tudling. Dapita sila sa pagpamalandong kon sa unsang paagi makatabang nila ang pagsag-ulo sa mahinungdanong hugpong sa mga pulong o mga tudling diha sa ilang kinabuhi.

Posibleng mga Kalihokan sa Pagkat-on

Pagrebyo sa doktrinal nga kahanas: Sag-uloha

Ang unang bahin niini nga leksiyon mao ang pagtandi sa pagsag-ulo og kasulatan ngadto sa pagbaton og bag-ong higala. Paghunahuna og kalihokan aron maandam ang mga estudyante alang niini nga pagtandi. Pananglitan, kon dako ang imong klase diin dili kaayo magkailhanay ang mga estudyante, pwede nimong dapiton ang mga estudyante nga magngalan og daghang tawo diha sa klase kutob sa mahimo. Pwede nila kining himoon sa indibiduwal o sa ginagmay nga grupo. Dapita ang mga estudyante sa pagpamalandong kon kinsa ang ilang nailhan pag-ayo.

• Unsay pipila ka rason kon nganong maayo nga makaila sa mga tawo niini nga klase?

• Unsay mga kaayohan sa pagbaton og mga higala?

Basaha ang mosunod nga pamahayag ni Elder Richard G. Scott (1928–2015) sa Korum sa Napulog Duha ka Apostoles:

“Talagsaong gahom moabot gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala.” (“Ang Gahum sa Kasulatan,” Liahona, Nob. 2011, 6)

• Sa imong hunahuna, sa unsang paagi ang nasag-ulo nga hugpong sa mga pulong o tudling sa kasulatan mahimong susama sa usa ka higala?

Samtang nagpakigbahin ang mga estudyante, pwede nimong isulat ang ilang mga tubag diha sa pisara. Dapita ang mga estudyante sa pagbasa og dugang sa mosunod nga pamahayag ni Elder Scott, nga pangitaon ang dugang mga tubag. Pwede usab nimong itudlo nga ang mga pulong sa kasulatan gikan o gidasig sa Ginoo. Sa daghang paagi, ang mga kasulatan sama sa pagbaton sa Langitnong Amahan ug ni Jesukristo isip naggiya nga mga higala.

Mipadayon si Elder Scott:

Sama kini sa pagdiskobre og bag-ong tawo nga makatabang sa panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban. (Richard G. Scott, “Ang Gahum sa Kasulatan,” Liahona, Nob. 2011, 6)

• Kanus-a ang usa ka nasag-ulo nga kasulatan o hugpong sa mga pulong nahimong sama sa usa ka higala nganha kanimo sa bisan hain niini nga mga paagi?

• Unsa ang pipila ka butang nga imong gihimo o mahimo nga makatabang aron makasag-ulo ka og importanteng hugpong sa mga pulong o mga tudling sa kasulatan?

Ang mga tubag naglakip sa pagbalikbalik sa hugpong sa mga pulong o mga tudling, pagsulat niini, o paggamit og mga flashcard o mga papel nga gihimo sa mga estudyante sa Leksiyon 15: “Pagbansay 1 sa Doktrinal nga Kahanas.”

Ikonsiderar ang pagpakita o paghatag sa kada estudyante og mga tudling sa doktrinal nga kahanas nga ila nang natun-an. Ang lista sa mga pakisayran sa doktrinal nga kahanas ug sa mahinungdanong hugpong sa mga pulong sa kasulatan sa Daang Tugon makita sa Mahinungdanon nga Dokumento sa Doktrinal nga Kahanas (2023).

Dapita ang mga estudyante sa paggahin og pipila ka minuto sa mosunod nga kalihokan:

Sunda ang tambag ni Elder Scott sa “paghulma … og bag-ong [mga] pakighigala” pinaagi sa pagsag-ulo sa mga pakisayran ug mahinungdanong hugpong sa mga pulong para sa pipila ka kasulatan sa doktrinal nga kahanas. Pwede usab nimong sag-ulohon ang tibuok tudling.

Pagpili og usa sa mga hugpong sa mga pulong o tudling nga imo nang nasag-ulo, ug tubaga ang mosunod nga pangutana:

• Sa unsang paagi kini nga hugpong sa mga pulong o tudling sama sa usa ka higala kanimo? (Sa unsang paagi kini makatabang panahon sa panginahanglan, makahatag og inspirasyon o kahupayan, o mahimong tinubdan sa gikinahanglan nga kausaban?)

Dapita ang daghang estudyante sa pagpakigbahin. Ikonsiderar usab ang pagpakigbahin sa kaugalingon nimong hunahuna. Pangita og mga paagi sa pag-awhag sa mga estudyante nga magpadayon sa pagsag-ulo og mga kasulatan.

Pagkat-on ug paggamit sa mga baroganan sa pag-angkon og espirituhanong kahibalo

Ang nahibiling bahin sa leksiyon nagtutok sa pagtabang sa mga estudyante sa paggamit sa mga baroganan sa pag-angkon og espirituhanong kahibalo sa haom nga mga sitwasyon. Sa dili pa mopadayon, makatabang tingali ang pagdapit sa mga estudyante sa pagrebyo nini nga mga baroganan. Ang abilidad sa mga estudyante nga mahinumdoman dayon ug magamit kini nga mga baroganan sa pag-angkon og espirituhanong kahibalo molambo pinaagi sa balik-balik nga pagrebyo ug pagpraktis. Ang gisugyot nga mga kalihokan sa pagrebyo makita diha sa seksiyon sa apendiks nga giulohan og “Mga Kalihokan sa Pagrebyo sa Doktrinal nga Kahanas.” Ang mga deskripsiyon sa mga baroganan makita sa mga parapo 5–12 sa Mahinungdanon nga Dokumento sa Doktrinal nga Kahanas (2023).

Pamalandonga ang mga panginahanglan sa imong mga estudyante ug tinguhaa ang tabang sa Ginoo sa pagpili og usa sa mosunod nga mga senaryo o sa pagpahaom o paghimo og usa nga mas haom sa mga panginahanglan sa imong mga estudyante. O basaha og kusog ang duha o tulo ka senaryo ug dapita ang klase sa pagpili og usa nga para nila mas maayong tutokan.

• “Nadunggan nako ang ubang batan-on nga nag-istorya bahin sa pagpadala og dili tarong, dili angay, o gani hubo nga mga litrato sa ilang kaugalingon o sa uban diha sa ilang mga selpon. Makaingon ko nga wala sila maghunahuna nga seryoso kini. Basig normal ra kini nga bahin sa mga relasyon, o basin og nagbinuang lang sila.”

• “Morag normal ra nga makakita ug makadungog og sekswal nga mga butang. Adunay sekswal nga mga basehan diha sa mga komedya, mga eksena sa pelikula, mga online nga mga bidyo, ug uban pa. Ang gihunahuna sa mga lider sa Simbahan nga angay lahi sa unsay giingon sa kadaghanan nga mga tawo nga normal. Sa akong hunahuna lahi na ang panahon karon ug dili na kaayo kini seryuso kay sa sauna.”

• “Naa koy leksiyon sa miagi bahin sa balaod sa kaputli, pero morag daghang tin-edyer karon kon asa ko nagpuyo ang aktibo sa sekswal nga paagi o wala gani magplano nga maghulat hangtod nga maminyo. Morag nakasabot ko kon nganong giingnan ta sa mga lider sa Simbahan nga mahimong putli sa sekswal nga paagi, ug dunay daghang kaayohan niini, pero usahay makahunahuna ko kon angay ba kini.”

  Dapita ang mga estudyante nga hunahunaon nga kauban nila ang tawo nga nagsulti diha sa senaryo. Ipasabot nga kining tawhana adunay sinsero nga kasingkasing. Pahinumdomi ang mga estudyante nga kinahanglan kitang maningkamot nga trataron ang tanang tawo sa samang gugma ug pagtahod parehas sa gibuhat sa Langitnong Amahan ug ni Jesukristo.

• Unsa nga mga pangagpas bahin sa balaod sa kaputli ang imong namatikdan niini nga senaryo?

  Ipasabot nga mangandam ang klase aron tabangan kini nga tawo. Samtang hisgotan sa mga estudyante ang mosunod nga pangutana, pasaligi sila pag-usab nga walay sayop nga mga tubag.

• Kon gusto nimong tabangan kining tawhana, unsa nga baroganan sa pag-angkon og espirituhanong kahibalo ang imong unang tutokan? Ngano man?

Pag-andam og paagi nga gamiton kini nga baroganan sa pag-angkon og espirituhanong kahibalo aron tabangan kini nga tawo. Mahimong maglakip kini sa:

• Usa ka pangutana nga mahimo nimong ipangutana niini nga tawo.

• Mga kasulatan, lakip ang mga tudling sa doktrinal nga kahanas, o mga pamahayag sa mga lider sa Simbahan nga tingali makatabang.

• Kaugalingon nimong mga hunahuna, mga pagbati, o pagpamatuod.

Kon makatabang, ipakita ang mosunod nga mga pangutana aron tabangan ang mga estudyante. Sa laing paagi, pwedeng mangandam ang mga estudyante sa kaugalingon nilang paagi sa paggamit sa usa ka baroganan sa pag-angkon og espirituhanong kahibalo. Dayon pwede nilang gamiton ang mosunod nga mga pangutana sa pag-andam og paagi sa paggamit og dugang nga baroganan.

Susiha ang mga Konsepto ug mga Pangutana nga adunay Mahangtorong Panglantaw

• Sa unsang paagi ang pagsabot sa pagbati sa Dios bahin sa sekswal nga kaputli makatabang sa tawo diha sa senaryo? (tan-awa sa Genesis 39:9; 1 Mga Taga-Corinto 6:18–19; Jacob 2:28).

• Sa imong hunahuna, unsa kahay himoon nga mga pagpili niini nga tawo base sa iyang kinaiya?

Tinguhaa ang Dugang nga Panabot pinaagi sa Balaanong Gitudlo nga mga Tinubdan

• Sa unsang paagi makatabang ang Genesis 39:9 ug ang ehemplo ni Jose sa Ehipto niini nga sitwasyon?

• Unsang uban pang kasulatan o pamahayag gikan sa mga lider sa Simbahan ang tingali makatabang? (Pananglitan, Alma 38:12; Alma 39:9; Doktrina ug mga Pakigsaad 42:23; ang seksiyon nga giulohan og “Ang inyong lawas sagrado” diha sa Alang sa Kalig-on sa mga Kabatan-onan; ang seksiyon nga giulohan og “Mga Panalangin sa Pagkaputli” sa pakigpulong ni Elder David A. Bednar sa kinatibuk-ang komperensiya “Kita Nagtuo sa Pagkaputli,” [Liahona, Mayo 2013, 43–44])

Lihok inubanan sa Hugot nga Pagtuo

• Niini nga sitwasyon, unsa kahay mahitabo kon molihok ta uban ang hugot nga pagtuo diha sa Manluluwas nga si Jesukristo?

• Kon anaa ka sa susama nga sitwasyon, unsay imong mahimo sa pagdapit sa tabang ug gahom sa Manluluwas diha sa imong kinabuhi?

Human ang mga estudyante adunay igong panahon sa pagpangandam, hangyoa sila sa pagpakigbahin. Ikonsiderar ang paghatag og follow-up nga mga pangutana nga sama sa “Naa bay gustong modugang sa unsay gipakigbahin?” “Unsa kahay reaksyon sa tawo nga atong gitabangan sa unsay gipakigbahin?” “Unsaon nato pagtabang kini nga tawo aron mas mabati niya ang gugma sa Dios ug mobati nga mas magtinguha sa Iyang tabang?” ug “Sa unsang paagi makatabang ang laing baroganan sa pag-angkon og espirituhanong kahibalo?”

Sa imong journal sa pagtuon, isulat ang imong nakat-onan gikan niini nga kasinatian nga gusto nimong mahinumdoman. Mahimong maglakip kini kon sa unsang paagi makatabang nimo ang proseso sa paggamit sa mga baroganan sa pag-angkon og espirituhanong kahibalo kon duna kay bisan unsang mga pangutana o mga kabalaka.

Dugang nga mga Kalihokan sa Pagkat-on

Alternatibong kalihokan sa pagsag-ulo

Hatagi ang estudyante og bug-at nga pang-ehersisyo o usa ka butang nga igo ra ang gibug-aton ug dapita sila nga alsahon kini. Pangutana kon nganong pugson nato ang atong kaugalingon nga mahimong kusgan.

Sa unsang paagi ang pagsag-ulo sa mahinungdanong hugpong sa mga pulong sa kasulatan o mga tudling sa kasulatan makapahimo natong mas lig-on sa espirituhanong paagi?

Dapita ang mga estudyante sa pagsag-ulo og mahinungdanong hugpong sa mga pulong o mga tudling. Hangyoa sila nga ipakigbahin kon sa unsang paagi ang nasag-ulo nga mga tudling sa kasulatan makapalig-on nila sa espirituhanong paagi.

Alternatibong senaryo

Paghunahuna og usa ka batan-ong lalaki ug batan-ong babaye nga nagkahigugmaay. Ang usa nila naghunahuna nga ang labing maayo nga paagi aron mas molig-on ang ilang relasyon mao ang pagpakighilawas. Ang usa dili ingon niana ka segurado pero mibati nga napugos sa pagbuhat sa ingon.

• Unsa ang pipila ka rason nga ang mga tawo mahimong maghunahuna nga ang pakighilawas makapalig-on sa ilang relasyon?

• Unsa ang pipila ka rason nga ang usa ka tawo mahimong mobati nga napugos nga mahimong aktibo sa sekswal nga paagi?

Dapita ang mga estudyante nga mopili og usa sa duha ka batan-on. Hangyoa ang mga estudyante nga gamiton ang mga baroganan sa pag-angkon og espirituhanong kahibalo sa pagtabang niini nga tawo.