Exodo 7–13: Leksiyon 42

Exodo 12–13, Bahin 1

Ang Pagsaylo sa Ginoo

Aron buhian ang mga Israelinhon, si Jehova (Jesukristo) nagpadala og kataposang katalagman—ang kamatayon sa tanang panganay nga mga bata sa Ehipto. Dayon mihatag siya og mga instruksiyon aron “sayloan” sa katalagman kadtong matinud-anong mosalig Kaniya (tan-awa sa Exodo 12:13). Gipasiugda ni Jesukristo ang pagpangaon sa Pagsaylo isip usa ka simbolo sa paghinumdom sa makaluwas nga gahom sa Iyang Pag-ula. Kini nga leksiyon makatabang sa mga estudyante nga mabati ang kaimportante sa Manluluwas ug sa Iyang Pag-ula diha sa ilang kinabuhi.

Pagpangandam sa estudyante: Dapita ang mga estudyante sa pagpamalandong sa mga simbolo ni Jesukristo nga ilang natun-an sa miagi. Hangyoa sila nga ikonsiderar ang maong mga simbolo nga nagtudlo bahin Niya. Dayon dapita sila sa pagpili og usa ka simbolo ug ipasabot ngadto sa usa ka tawo kon unsay gitudlo niini bahin kang Jesukristo.

Posibleng mga Kalihokan sa Pagkat-on

Ang panginahanglan sa pagluwas

Ikonsiderar ang pagsugod sa klase pinaagi sa pagbasa o pag-summarize sa usa ka asoy bahin sa usa ka tawo nga natanggong ug dili makabuhi. Ang mosunod nga asoy maoy usa ka paagi sa pagbuhat niini. (Alang sa dugang nga mga detalye, tan-awa sa “Timeline: Thai cave rescue that transfixed the world for 17 days,” Hunyo 24, 2019, reuters.com.)

Niadtong Hunyo 23, 2018, 12 ka sakop sa soccer team sa mga batan-on, nga nag-edad og 11 hangtod 16, ug ang ilang 25 anyos nga assistant coach ang midesisyon nga suhiron ang dakong sistema sa langob sa amihanang Thailand human sa ilang praktis. Wala madugay human sila makasulod, nabahaan ang mga langob tungod sa kusog nga ulan, maong natanggong sila upat ka kilometro (2.5 ka milya) gikan sa baba sa langob ug wala silay kontak sa gawas sulod sa kapin sa usa ka semana.

• Unsa kahay imong bation kon ikaw ang naa sa ilang sitwasyon?

Pagka-Hulyo 2, ang eksperyensiyadong mga diver sa kataposan nakaplagan ang grupo sa mga batan-on. Pero tungod sa baha ug padayong pag-ulan nakahimo sa dinaliang pagluwas nga halos imposible. Samtang ang mga batang lalaki ug ilang coach nakadawat og tabang aron mabuhi, ang mga eksperto naglalis sa mga opsiyon. Pwede nilang sulayan nga igawas ang mga batan-on gamit ang ekipo sa pag-dive, pero lisod kaayo ang agianan ug nagkinahanglan og talagsaon nga kahanas. Pwede usab nilang sulayan nga bangagan ang bato, mangita og laing ruta nga kagawsan, o maghulat og pipila ka bulan aron mohubas ang tubig. Kay nagsingabot na ang ting-ulan, ang pagluwas sa soccer team gikan sa langob nagpabiling dili segurado.

• Sa espirituhanon nga diwa, sa unsang paagi kita mobati nga natanggong, dili matarog, o walay paglaom?

Pwedeng ipasabot sa mga estudyante nga kitang tanan nagkinahanglan sa tabang sa Manluluwas aron maluwas kita gikan sa sala, kamatayon, ug uban pang kalisdanan sa atong kinabuhi.

Aron tabangan ang mga estudyante sa pagsusi sa ilang pagsalig sa Manluluwas ug sa Iyang Pag-ula, pwede nimo silang dapiton nga tubagon ang mosunod nga mga pangutana diha sa ilang mga journal sa pagtuon.

Paggahin og panahon sa pagpamalandong sa bisan unsang sala o mga kalisdanan nga imong gisagubang karon. Ikonsiderar kon unsay imong gibati bahin niini nga mga sala o mga kalisdanan. Dayon tubaga ang mosunod nga mga pangutana:

• Unsay akong gituohan mahitungod sa abilidad sa Ginoo nga moluwas kanako gikan sa akong mga sala ug uban pang kalisdanan nga akong maatubang?

• Unsay akong gibati bahin sa Iyang nahimo o andam nga buhaton para nako?

Niini nga leksyon, imong makat-onan kon giunsa pagluwas sa Manluluwas ang mga Israelinhon gikan sa pagkaulipon sa Ehipto. Samtang magtuon ka, dapita ang Espiritu Santo nga tabangan kang masabtan nga ang Manluluwas mao usab ang imong Tigluwas.

Ang simbolo sa Pagsaylo

Pwede nimong hangyoon ang mga estudyante nga hinumdoman kon giunsa paggamit sa Ginoo ang siyam ka katalagman aron kombinsihon ang mga Israelinhon ug mga Ehiptohanon nga Siya mao ang Dios.

Basaha ang Exodo 11:4–6, nga pangitaon ang ikanapulo ug kataposang katalagman.

• Unsay imong nadiskobrehan?

Gisaaran sa Ginoo ang mga Israelinhon nga kon matinud-anon nilang sundon ang Iyang mga instruksiyon, Iyang ipahinabo nga “sayloan” sila sa katalagman, ug dili mamatay ang ilang panganay nga mga anak (tan-awa sa Exodo 12:13, 23). Tungod niini, kini nga hitabo gitawag sa Ginoo og Pagsaylo (tan-awa sa Exodo 12:43). Ang mga instruksiyon sa Ginoo naglangkob sa usa ka pagkaon, apil ang kon unsay andamon ug kon unsaon kini pagkaon. Migamit ang Manluluwas og mga simbolo diha sa pagpangaon sa Pagsaylo aron tudloan ang mga Israelinhon bahin sa Iyang kaugalingon.

Paghatag og kalihokan aron tabangan ang mga estudyante nga ilhon ang mga instruksiyon nga gihatag sa Ginoo sa mga Israelinhon para sa pagpangaon sa Pagsaylo. Tabangi usab ang mga estudyante nga madiskobrehan kon unsay gitudlo niini nga mga instruksiyon bahin sa Ginoo ug ang kaluwasan nga Iyang gitanyag. Pwede kang maghimo og tsart diha sa pisara nga dunay mosunod nga mga ulohan. Pwedeng kopyahon sa mga estudyante ang tsart diha sa ilang mga journal sa pagtuon ug kompletohon kini diha sa gagmayng mga grupo. Ang posible nga mga tubag gilakip dinhi nga maoy imong basehan. Kompletoha ang usa ka aytem isip usa ka klase aron makita sa mga estudyante kon unsaon pagkompleto ang tsart diha sa ilang mga grupo.

Tun-i ang Exodo 12:3–8, 15, 21–23 ug kompletoha ang mosunod nga chart diha sa imong journal sa pagtuon.

Unsang mga instruksiyon ang gihatag sa Ginoo sa mga Israelinhon?	Unsa kaha ang gisimbolohan niini nga instruksiyon?
Unsang mga instruksiyon ang gihatag sa Ginoo sa mga Israelinhon? Pag-ihaw og himsog nga laki nga nating karnero aron kan-on (3–6, 21).	Unsa kaha ang gisimbolohan niini nga instruksiyon? Si Jesukristo, “ang Kordero sa Dios” (Juan 1:36), hingpit ug mihatag sa Iyang kinabuhi alang kanato.
Unsang mga instruksiyon ang gihatag sa Ginoo sa mga Israelinhon? Ibutang ang dugo sa nating karnero diha sa mga haligi sa ganghaan sa pultahan sa balay (7, 22).	Unsa kaha ang gisimbolohan niini nga instruksiyon? Ang Pag-ula ni Jesukristo makapanalipod nato samtang atong gamiton ang mga kondisyon sa paghinulsol diha sa atong kinabuhi.
Unsang mga instruksiyon ang gihatag sa Ginoo sa mga Israelinhon? Kaona ang nating karnero uban sa pait nga mga utanon ug pan nga walay patubo, kuhaa ang patubo (levadura) gikan sa balay (8, 15).	Unsa kaha ang gisimbolohan niini nga instruksiyon? Ang pait nga mga utanon maoy pahinumdom sa pait nga pagkaulipon sa mga Israelinhon sa Ehipto ug maoy sama sa kapait sa sala. Ang patubo, o levadura, makaagup-op sa pan. Isip kabahin sa atong paghinulsol, kaya natong tangtangon ang bisan unsa sa atong kinabuhi nga makadaot sa atong espiritu.

Kon mahuman na ang mga estudyante, hatagi sila og kahigayonan nga ipakigbahin ang ilang nakat-onan. Pwede nimong ipakita ang litrato sa sinugdanan sa leksiyon. Pwedeng ipasabot sa mga estudyante ang lainlaing aytem sa Pagsaylo nga gipakita sa litrato ug hisgoti kon unsay gisimbolohan niini.

Giluwas kita ni Jesukristo gikan sa espirituhanon ug pisikal nga kamatayon

Basaha ang Exodo 12:50–51; 13:3 aron mahibaloan kon unsay nahitabo samtang gituman sa mga anak sa Israel ang Pagsaylo.

Isulat ang mosunod nga kamatuoran diha sa pisara: Giluwas sa Manluluwas ang Iyang katawhan gikan sa espirituwal ug pisikal nga kamatayon.

Ipasabot nga ang Pagsaylo nagsimbolo niini nga kamatuoran. Isip kabahin sa plano sa Langitnong Amahan, ang tanang tawo kinahanglang maluwas gikan sa pisikal nga kamatayon (pagbulag sa lawas ug espiritu; tan-awa sa 2 Nephi 9:6, 11) ug espirituwal nga kamatayon (pagbulag gikan sa Dios tungod sa sala; tan-awa sa Helaman 14:16–19). Aron tabangan ang mga estudyante nga masabtan ang makaluwas nga gahom ni Jesukristo, pwede nimong ipabasa sa mga estudyante ang pipila niini nga mga bersikulo sa Basahon ni Mormon. Pwede usab nimong basahon o i-summarize ang nahibiling bahin sa asoy sa Thai soccer team.

Hisgoti pag-usab ang istorya sa natanggong nga mga soccer player ganina. Human sa pipila ka adlaw nga grabe nga panghitabo, ang mga eksperto gikan sa tibuok kalibotan determinado sa usa ka paagi aron luwason sila. Ang eksperyensiyadong mga diver misulod sa delikadong tubig sa dakong sistema sa langob ug, giusa-usa og paggawas ang mga batan-on ug ang ilang coach gikan sa gibaha nga langob.

• Sa unsang paagi kaha ang gihimo sa eksperyensiyadong mga diver nagsimbolo kon unsay mahimo sa Manluluwas para nato?

Ang Pag-ula ni Jesukristo importante kanako

Ang mosunod nga kalihokan makatabang sa mga estudyante nga masabtan ug mabati ang kaimportante sa gahom sa Manluluwas sa pagluwas kanato. Bahina ang klase ngadto sa mga pares. Dapita ang kada pares nga idrama-drama ang mosunod nga senaryo. Kon imong gibati nga maglisod ang imong mga estudyante sa paghunahuna nga sila karaang mga Israelinhon, laktawi kana nga bahin sa kalihokan, ug sultihi ang managpares nga hisgotan ang mga pangutana para sa usa ka tin-edyer sa modernong panahon.

Isip magkapares, hunahunaa nga ang usa ninyo usa ka Israelinhon nga tin-edyer nga bag-o lang mipakigbahin sa unang Pagsaylo didto sa Ehipto ug ang lain maoy usa ka tin-edyer sa modernong panahon. Gamita ang mosunod nga mga pangutana sa pag-interbiyo sa matag usa:

Mga pangutana alang sa Israelinhong tin-edyer

• Unsaon nimo sa paghulagway ang imong kasinatian sa pagkaulipon sa wala pa ang Pagsaylo?

• Unsay imong nakat-onan gikan sa imong kasinatian sa gabii sa Pagsaylo? Giunsa pag-usab ni Jehova ang imong kinabuhi?

• Unsay imong ipakigbahin kabahin kang Jehova ngadto sa mga tawo nga nagduhaduha sa pagsunod Niya?

Mga pangutana alang sa tin-edyer sa modernong panahon

• Sa unsang paagi ang sala sama sa pagkaulipon? Sa unsang paagi ang mga pagsulay sama sa pagkaulipon?

• Giunsa pag-usab ni Jesukristo ang imong kinabuhi?

• Unsay gusto nimo nga mahibaloan sa uban bahin sa makaluwas nga gahom ni Jesukristo?

Dapita ang mga estudyante sa pagrebyo sa ilang mga tubag sa mga pangutana sa pagsukod sa kaugalingon gikan sa sinugdanan sa leksiyon. Pangutan-a sila sa pagkonsiderar kon unsang mga impresyon ang ilang gibati gikan sa Espiritu bahin sa Manluluwas ug sa Iyang gahom sa pagluwas nila. Pwedeng idugang sa mga estudyante ang ilang mga panglantaw sa ilang gisulat ganina. Pwede nimong dapiton ang pipila ka estudyante sa pagpakigbahin sa ilang mga hunahuna bahin kang Jesukristo ug sa Iyang maulaong gahom sa pagluwas.

Dugang nga mga Kapanguhaan

Sa unsang paagi kita luwason ni Jesukristo gikan sa pisikal ug espirituwal nga kamatayon?

Si Elder D. Todd Christofferson sa Korum sa Napulog Duha ka Apostoles mipasabot:

Atong nakita ang tahas sa kamatayon diha sa plano sa atong Langitnong Amahan, apan kana nga plano mabaliwala kon walay paagi nga mabuntog ang kamatayon sa katapusan, sa pisikal ug sa espiritwal. Busa, usa ka Manunubos, ang Bugtong Anak sa Dios, si Jesukristo, nag-antus ug namatay sa pag-ula alang sa kalapasan nila ni Adan ug Eva, sa ingon naghatag og pagkabanhaw ug imortalidad alang sa tanan. Ug kay walay usa kanato ang hingpit ug makanunayong masulundon sa balaod sa ebanghelyo, ang Iyang Pag-ula nagtubos usab kanato gikan sa atong kaugalingong mga sala kon kita maghinulsol. Pinaagi sa maulaong grasya sa Manluluwas nga naghatag og kapasayloan sa mga sala ug pagbalaan sa kalag, mahimo kitang matawo pag-usab sa espirituhanong paagi ug mapahiuli ngadto sa Dios. Ang atong espirituhanong kamatayon—ang atong pagkabulag gikan sa Dios—matapos na. (“Nganong Kaminyoon, Nganong Pamilya,” Liahona, Mayo 2015, 51)

Sa unsang paagi kita luwason ni Jesukristo gikan sa kasakit sa sala?

Si Presidente Russell M. Nelson mitudlo:

Sa Tanaman sa Getsemani, ang atong Manluluwas midala sa Iyang Kaugalingon sa matag kasakit, matag sala, ug sa tanan nga hilabihan nga kagul-anan ug pag-antos nga sukad ninyo nasinati ug nako ug sa tanan nga sukad natawo o matawo pa. Ubos sa masakit kaayo nga alantoson, miagas ang Iyang dugo sa matag lungag sa panit. Kining tanang mga pag-antos migrabe pa sa dihang bangis Siya nga gilansang sa krus didto sa Kalbaryo.

Pinaagi niining masakit kaayo nga mga kasinatian ug sa Iyang misunod nga Pagkabanhaw—ang Iyang walay kinutoban nga Pag-ula—Iyang gihatag ang pagka-imortal ngadto sa tanan, ug mitubos sa matag usa kanato gikan sa mga epekto sa sala, sa kondisyon sa atong paghinulsol. (“Ang Sakto nga Ngalan sa Simbahan,” Liahona, Nob. 2018, 88)

Asa ko makakat-on og dugang bahin sa simbolismo sa Pagsaylo?

Para sa dugang nga impormasyon bahin simbolo sa Pagsaylo, tan-awa sa “The Passover Supper” (New Era, Apr. 2019, 8–9).

Dugang nga mga Kalihokan sa Pagkat-on

Pagsinati sa mga elemento sa Pagsaylo

Aron tabangan ang mga estudyante nga mapasalamaton sa pipila sa mga simbolo sa pagpangaon sa Pagsaylo, pwede kang maghatag og pipila ka pagkaon. Pwede nimong gamiton ang mga biskotso o tortillas alang sa pan nga walay patubo; parsley, kamunggay, o romaine nga letsugas alang sa pait nga mga utanon, ug karne sama sa baka o manok isip puli sa nating karnero.

Pwede nimong tugotan ang mga estudyante nga mokaon og mga parte sa pagpangaon sa Pagsaylo samtang hisgotan nimo ang mga kahulogan sa lainlaing mga aytem. Ang bisan unsang parte sa pagpangaon sa Pagsaylo kinahanglang ipresentar ug kaonon uban ang pagtahod ug dignidad.

Mga bidyo bahin sa Pagsaylo ug Pag-ula ni Kristo

Aron tabangan ang mga estudyante nga mahunahuna ang mga panghitabo sa Pagsaylo, pwede nimo silang dapiton nga sundan sa Exodo 12:3–13 samtang ilang tan-awon ang usa sa mosunod nga mga bidyo:

“Ang Pagsaylo” (3:07): live-action nga asoy

“Ang Pagsaylo” (2:55): animated nga asoy

Pwede usab nimong ikonsiderar ang pagpasalida sa bidyo nga “Pag-ula—Dili Usa ka Higayon nga Butang” (3:00). Kini nga bidyo makatabang sa mga estudyante nga masabtan ang kaimportante sa pagdangop kang Jesukristo aron makagamit sa Iyang makaluwas nga gahom sa tibuok nilang kinabuhi.