Moises 6: Leksiyon 15

Pagbansay 1 sa Doktrinal nga Kahanas

Pagsag-ulo ug Paggamit sa mga Baroganan sa Pag-angkon og Espirituwal nga Kahibalo

Ang doktrinal nga kahanas makatabang sa mga estudyante sa pagtukod sa ilang pundasyon diha ni Jesukristo ug sa Iyang ebanghelyo. Kini nga leksiyon makahatag sa mga estudyante og mga kahigayonan sa pagsag-ulo sa mga pakisayran sa doktrinal nga kahanas ug sa ilang importante nga hugpong sa mga pulong sa kasulatan ingon man sa pagkat-on ug paggamit sa balaang mga baroganan sa pag-angkon og espirituwal nga kahibalo.

Pagpangandam sa estudyante: Ikonsiderar ang pagdapit sa mga estudyante sa pagpili og usa ka pakisayran sa doktrinal nga kahanas ug sa pagpaningkamot sa pagsag-ulo sa pakisayran sa kasulatan ug sa importante nga hugpong sa mga pulong kasulatan. Pwede dayon nilang ikonsiderar ang bili sa pagsag-ulo niini.

Mga Posibleng Kalihokan sa Pagkat-on

Ang kaimportante sa pagsag-ulo

Aron tabangan ang mga estudyante nga mahunahunaan ang bili sa pagsag-ulo og mga kasulatan, ikonsiderar ang pagpakigbahin sa mosunod:

Handurawa nga human sa klase sa seminary, mikomento ang usa ka higala nga walay pulos ang pagsag-ulo og mga kasulatan kay pwede ra man nimo ning tan-awon diha sa app sa Librarya sa Ebanghelyo.

• Sa unsang paagi ang pagsag-ulo og mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan makahatag nimo og panalangin?

Hisgotan tingali sa mga estudyante ang pagbaton og dugang kahibalo sa kon unsay naa sa mga kasulatan, mangita og mga kasulatan bisan og walay magamit nga device, ug paghinumdom sa mga pulong ni Jesukristo sa mga panahon sa panginahanglan. Pwede kang mobase sa mga ehemplo diha sa mga kasulatan sa mga indibiduwal nga nakahinumdom sa mga pulong sa Ginoo sa mga panahon sa panginahanglan. Apil sa mga ehemplo ang Manluluwas (tan-awa sa Mateo 4:1–11), si Nephi (tan-awa sa 1 Nephi 4:1–6), ug si Abinadi (tan-awa sa Mosiah 12:27–37).

Pagrebyo sa doktrinal nga kahanas: Sag-uloha

Ang mosunod nga kalihokan makatabang sa mga estudyante nga marebyo ang ilang nasag-ulo nga mga pakisayran sa doktrinal nga kahanas ug mahinungdanong hugpong sa mga pulong sa kasulatan diha sa Daang Tugon nga ilang nakat-onan karong tuiga. Dugang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Ikonsiderar ang pag-organisa sa mga estudyante nga magpares-pares ug paghatag sa matag estudyante og mga piraso sa papel nga parehas ka daghan sa mga tudling sa doktrinal nga kahanas nga imong natun-an. Ipakita ang maong mga tudling sa doktrinal nga kahanas ug ang mahinungdanong hugpong sa mga pulong sa kasulatan niini. Makita ang listahan sa mga pakisayran sa doktrinal nga kahanas ug sa mahinungdanong hugpong sa mga pulong sa kasulatan sa Daang Tugon diha sa Mahinungdanon nga Dokumento sa Doktrinal nga Kahanas (2023).

Dapita ang usa ka pares nga ilista ang mga pakisayran sa doktrinal nga kahanas diha sa ilang mga piraso sa papel ug ang laing pares ang molista sa mahinungdanong hugpong sa mga pulong diha sa ilang mga piraso sa papel. Dihang mahuman na sila, ang usa ka pares kinahanglan nga naay mga piraso sa papel diin nasulat ang kada pakisayran sa kasulatan ug ang laing partner kinahanglan nga naay mga piraso sa papel diin nasulat ang katugbang nga mahinungdanong hugpong sa mga pulong sa kasulatan.

Human mahimo sa mga estudyante ang ilang mga papel, ihatag kanila ang mosunod nga mga instruksiyon:

1. Guniti ang imong mga piraso sa papel aron makita nimo, pero dili makita sa imong pares .

2. Ibutang sa unang pares diha sa lingkoranan ang papel nga adunay usa sa mga pakisayran sa kasulatan.

3. Ang ikaduhang pares mangita sa katukma nga mahinungdanong hugpong sa mga pulong sa kasulatan ug ibutang kini diha sa lingkoranan.

4. Ang ikaduhang pares mobutang dayon sa usa sa mga mahinungdanong hugpong sa mga pulong, ug ibutang sa unang pares ang katukma nga pakisayran sa kasulatan.

5. Sublia ang proseso hangtod nga naa nay pares ang tanan ninyong papel.

Pwede nga magbaylo ang managpares kinsa naghupot sa mga pakisayran ug sa mahinungdanong hugpong sa mga pulong ug himoon pag-usab ang kalihokan. Pwedeng orasan sa mga estudyante ang ilang kaugalingon aron mahibaloan kon unsa ka paspas nilang matapos ang kalihokan.

Pwede nimong dasigon ang mga estudyante nga gamiton ang app sa doktrinal nga kahanas aron ipadayon ang pagsag-ulo og mga tudling sa doktrinal nga kahanas. Makatabang sa mga estudyante ang kadali nga pagrebyo sa mga pakisayran sa doktrinal nga kahanas ug sa mahinungdanong hugpong sa mga pulong sa kasulatan sa umaabot nga mga leksiyon nga makatabang usab sa mga estudyante nga masag-ulo nila kini.

Gamita ang mga baroganan sa pag-angkon og espirituwal nga kahibalo

Ang nahibiling bahin sa leksiyon nakatutok sa pagtabang sa mga estudyante sa paggamit sa mga tudling sa doktrinal nga kahanas ug sa mga baroganan sa pag-angkon og espirituwal nga kahibalo diha sa tinuod nga mga sitwasyon sa kinabuhi. Sa dili pa magpadayon, makatabang tingali sa mga estudyante ang pagrebyo niini nga mga baroganan sa mga parapo 5–12 sa seksiyong “Pag-angkon og Espirituwal nga Kahibalo” sa Mahinungdanon nga Dokumento sa Doktrinal nga Kahanas (2023). Ang gisugyot nga mga kalihokan sa pagrebyo gilakip diha sa apendiks ubos sa “Mga Kalihokan sa Pagrebyo sa Doktrinal nga Kahanas.”

Makatabang tingali ang mubong pagpasabot nga taliwala sa lainlaing impluwensiya nga atong giatubang ug sa ka-busy sa kada adlawng pagkinabuhi, mahimong lisod ang pagpabiling nakatutok sa Langitnong Amahan ug sa Iyang plano para nato. Aron ipakita kini nga problema, pwede nimong ipakigbahin ang usa o duha sa mosunod nga mga senaryo. Pwede nimong ipahiuyon ang mga detalye sa mga senaryo aron mas mohaom sa mga panginahanglan sa imong mga estudyante.

1. Si Leah kanunay nga daghan og mga higala sa ilang kasilinganan ug sa eskwelahan. Gitan-aw siya isip sikat sa iyang mga kaedad, ug ganahan siya nga ilhon nga sama niini. Sa miaging tuig, mibalhin ang pamilya ni Leah sa bag-ong siyudad. Siya adunay malisod nga panahon sa pagbati nga siya gidawat. Si Leah kulang sa suod nga mga higala sa iyang bag-ong dapit nga nakahimo niya sa paghunahuna kon naa ba siyay bili.

2. Si Collin usa ka hawod nga modula og soccer. Ang iyang mga ka-team, mga coach, ug mga kaedad kanunay nga modayeg kaniya tungod sa iyang mga abilidad sa pagdula ug sa mga kalamposan. Pero karong tuiga, nausab ang tanan dihang si Colin nahiagom sa seryoso nga pagkaangol sa tuhod sa wala pa magsugod ang season. Naguol siya pag-ayo dihang nahibaloan niya nga dili siya makadula sa kataposang season sa high school. Sa una, daghang tawo ang naluoy niya, ug naningkamot ang iyang mga ka-team nga iapil siya sa mga kalihokan sa team. Pero paglabay sa panahon, gibati ni Collin nga wala nay motagad niya. Siya nagsugod sa paghunahuna kon sa unsang paagi tingali mausab ang iyang kinabuhi karon nga tan-aw sa uban dili na siya hawod nga modula og soccer.

• Unsa ang pipila ka problema o mga hagit ang imong gibati nga kinahanglang sulbaron niini nga mga senaryo?

• Nganong ibase nato usahay ang atong bili sa kaugalingon sa ubang butang sama sa atong mga talento o sa panglantaw sa uban kanato?

Ipasabot nga makatabang ang doktrina sa Manluluwas ug ang mga baroganan sa pag-angkon og espirituwal nga kahibalo sa ingon niini nga mga sitwasyon.

Aron tabangan ang mga estudyante sa pagsugod sa paggamit niini nga mga baroganan, ikonsiderar ang pagbahin sa klase sa gagmayng mga grupo. Tahasi ang katunga sa mga grupo nga magtutok sa baroganan sa paglihok uban sa hugot nga pagtuo ug ang laing katunga magtutok sa baroganan sa pagsusi sa mga konsepto ug mga pangutana inubanan sa mahangtorong panglantaw. Dapita ang mga estudyante nga hisgotan ang daghang mga paagi sa baroganan nga naka-assign nila nga makatabang sa mga indibiduwal gikan sa mga senaryo.

Ang usa ka paagi nga mahimo nila kini mao ang pagsulat sa naka-assign nila nga baroganan sa tunga sa usa ka papel. Palibot sa baroganan, pwedeng isulat sa mga grupo ang piho nga mga paagi nga makalihok uban sa hugot nga pagtuo ang mga indibiduwal o ang mga ideya nga makatabang nila sa pagsusi sa ilang mga kabalaka uban ang mahangtorong panglantaw.

Pwede usab nimong ipakita ang mosunod nga mga pangutana aron hisgotan sa mga grupo.

Paglihok uban sa hugot nga pagtuo

• Unsa ang matinud-anon nga mga aksyon ang mahimo niining tawhana aron makatabang nila nga makita ang ilang kaugalingon sama sa panglantaw sa Dios?

• Unsang kausaban ang mahitabo sa kinabuhi niining tawhana kon himoon niyang prayoridad ang iyang pagkatawo isip anak sa Dios?

Pagsusi sa mga konsepto ug mga pangutana inubanan sa mahangtorong panglantaw

• Unsay makatabang niining tawhana aron makahinumdom bahin sa Dios ug ang Iyang plano? Sa unsang paagi kini makatabang sa ilang padayong pagkinabuhi sa kada adlaw?

• Unsay gusto nimong masabtan niining tawhana bahin sa iyang pagkatawo ug katuyoan?

Balaanong gitudlo nga mga tinubdan

Human maghisgot ang mga grupo, dapita silang ipakigbahin ang pipila sa ilang mga panabot diha sa klase. Dayon pahinumdomi ang mga estudyante sa ikatulong baroganan sa pag-angkon og espirituwal nga kahibalo: tinguhaa ang dugang nga panabot pinaagi sa balaanong gitudlo nga mga tinubdan. Hatagig panahon ang mga estudyante sa pagpangita sa balaanong gitudlo nga mga tinubdan nga makatabang sa mga indibidwal diha sa mga senaryo. Makatabang tingali niini ang mosunod nga mga pangutana.

• Sa unsang paagi makatabang ang mga pagtulun-an sa bisan unsang tudling sa doktrinal nga kahanas ngadto niining tawhana?

• Unsang uban pang kasulatan o pamahayag gikan sa mga lider sa Simbahan ang tingali makatabang?

Kon kinahanglan, pwede nimong pahinumdoman ang mga estudyante sa mga kasulatan o pamahayag sa mga lider sa Simbahan nga ilang natun-an niining tuiga nga konektado sa atong balaang pagkatawo ug katuyoan. Lakip sa mga ehemplo ang Mioses 1:2–6; Abraham 3:22–23; Genesis 1:26–27. Pwede usab nimong tultolan ang mga estudyante sa mga pamahayag gikan sa handout nga nag-ulohang “Ako Anak sa Dios,” nga naa sa Leksiyon 8: “Genesis 1:26–27.”

Samtang ipakigbahin sa mga estudyante ang balaanong gitudlo nga mga tinubdan, dapita silang hisgotan kon ngano o sa unsang paagi nila gibati nga makatabang kini nga mga tinubdan ngadto sa mga indibidwal nga gikan sa mga senaryo. Pwede usab nimong pangutan-on ang mga estudyante kon sa unsang paagi sila napanalanginan sa mga baroganan pinaagi sa pag-angkon og espirituwal nga kahibalo dihang mag-atubang sa mga hagit nga nalambigit sa ilang kaugalingong pagkatawo.

Dugang nga Kalihokan sa Pagkat-on

Alternatibong mga senaryo

Ang mosunod nga mga senaryo nakatutok sa lainlaing hilisgotan nga natubag niining tuiga. Pwede nimong ipakigbahin ang usa o duha niini nga mga senaryo ug dapita ang mga estudyante sa paggamit sa mga baroganan sa pag-angkon og espirituwal nga kahibalo aron tabangan ang mga indibidwal niini nga mga kahimtang.

• Usa ka adlaw atol sa paniudto, si Jasmine ug ang iyang higala nga si Reyna naghisgot sa ilang mga pagtuo mahitungod sa kaminyoon. Atol sa panag-istoryahanay, si Reyna natingala nga si Jasmine nagtuo nga ang kaminyoon tali lamang sa usa ka lalaki ug sa usa ka babaye. Nangutana si Reyna, “Nganong supak ang imong Simbahan sa sama og sekso nga kaminyoon? Di ba kinahanglan pwede nga magminyo ang mga tawo nga nagkahigugmaay?”

• Si Isaac nakamatikod sa usa sa iyang mga higala, si James, nga nagkaon og paniudto nga nag-inusara. Sa dihang milingkod siya aron ubanan niya, morag lawom ang gihunahuna ni James. Mitan-aw siya ni Isaac ug miingon, “Uy, sa simbahan niadtong Dominggo ang akong ministro miingon nga ang inyong simbahan nagtudlo nga kamo mahimong sama sa Dios. Morag arogante kanang paminawon alang nako. Nagtuo ba gayod kamo niana?”