Genesis 5; Moises 6: Leksiyon 14

Moises 6:47–68

“Kini Mao ang Plano sa Kaluwasan”

Si Jesukristo mao ang sentro sa plano sa atong Langitnong Amahan sa kaluwasan . Gidapit niya ang tanan nga magkinabuhi subay sa Iyang doktrina. Kini nga leksiyon makatabang sa mga estudyante nga masabtan kon unsaon pagduol ngadto ni Jesukristo ug makadawat og mga panalangin nga Siya ug ang Langitnong Amahan lamang ang makatanyag.

Pagpangandam sa estudyante: Dapita ang mga estudyante sa pagpangutana sa usa ka sakop sa pamilya o higala kon nganong importante nila si Jesukristo ug kon unsay kahulogan para nila sa pagsunod Kaniya.

Mga Posibleng Kalihokan sa Pagkat-on

Duol ngadto kang Kristo

Ikonsiderar ang pagpakita og litrato ni Jesukristo, sama sa makita sa sinugdanan sa leksiyon. Dayon ipakigbahin ang mosunod nga senaryo.

Handurawa nga naa kay higala kinsa dili pamilyar ni Jesukristo. Ang imong higala nangutana nimo kon kinsa si Jesukristo ug kon nganong importante Siya nimo.

Hatagig panahon ang mga estudyante sa paghunahuna kon unsaon nila kini pagtubag. Dayon dapita silang ipakigbahin ang ilang mga hunahuna diha sa gagmayng mga grupo o uban sa klase.

• Kon limitado lang ang imong panahon sa pagtubag, unsay gusto nimong mahibaloan sa imong higala bahin ni Jesukristo? Ngano man?

Pahinumdomi ang mga estudyante sa tawag ni Enoch nga isangyaw ang paghinulsol ngadto sa grupo sa mga tawong daotan (tan-awa ang Moises 6:27–29). Ipasabot nga ang leksiyon karong adlawa nakatutok sa iyang mga pagtulun-an ngadto sa maong mga tawo. Ang mensahe ni Enoch nakasentro sa atong panginahanglan ni Jesukristo ug kon unsaon nato pagduol ngadto Kaniya.

Aron matabangan ang mga estudyante nga makapamalandong sa ilang panginahanglan para sa Manluluwas, ikonsiderar ang pagpakita sa mosunod nga mga instruksiyon ug paghatag og panahon sa mga estudyante sa hilom nga pagsukod sa ilang kaugalingon sa matag pamahayag.

Gamit ang sukdanan nga 1 (dili tinuod alang nako) ngadto sa 5 (tinuod alang nako), sukda ang imong kaugalingon gamit ang mosunod nga pamahayag:

1. Nahibalo ko kon nganong kinahanglan nako ang Manluluwas.

2. Nakasabot ko kon unsaon nako pagduol ngadto ni Jesukristo.

3. Sa karon gusto kong moduol ug mosunod ni Jesukristo.

Bisag giunsa pa nimog pagtimbang-timbang ang imong kaugalingon, gusto nga Manluluwas nga muduol ka ngadto Niya ug makadawat sa mga panalangin nga Siya lamang ang makatanyag. Samtang tun-an nimo karon ang mga pulong ni propeta Enoch, hatagi og pagtagad ang mga impresyon gikan sa Espiritu aron mas masabtan kon nganong kinahanglan nimo ang Manluluwas ug kon unsaon nimo pagduol Kaniya.

Gitudloan ni Enoch ang iyang katawhan

Aron matabangan ang mga estudyante nga makakat-on gikan sa mga pagtulun-an ni Enoch sa Moises 6, ikonsiderar ang pagkopya sa mosunod sa tsart diha sa pisara. Pwede usab kopyahon sa mga estudyante ang tsart diha sa ilang mga journal sa pagtuon. Hangyoa ang mga estudyante nga tun-an ang mga bersikulo. Tahasan ang katunga sa klase sa pagpangita sa rason kon nganong kinahanglan nato ang Manluluwas. Samtang pangitaon sa laing katunga kon sa unsang paagi kita makaduol ngadto kang Kristo. Samtang magtuon ang mga estudyante, pwede kang maglakaw-lakaw ug mangutana sa mga estudyante kon aduna bay mga pulong o hugpong sa mga pulong nga kinahanglan nila ang tabang aron masabtan. Makatabang tingali ang mosunod aron masabtan sa mga estudyante ang bersikulo 59:

• Matawo kita diha sa Espiritu pinaagi sa pagdawat sa gasa sa Espiritu Santo (tan-awa ang Mga Hilisgotan ug mga Pangutana, “Giya sa Pagtuon sa Ebanghelyo: “Gasa sa Espiritu Santo,” Librarya sa Ebanghelyo).

• Ang pagkabalaan nagpasabot nga mahimong “walay sala, putli, hinlo, ug balaan tungod sa Pag-ula ni Jesukristo” (Giya ngadto sa mga Kasulatan, “Pagbalaan,” Librarya sa Ebanghelyo).

Pagtulun-an ni Enoch bahin sa pagduol ngadto kang Kristo: Moises 6:48–52, 57–59

Kinahanglan nako ang Manluluwas kay …	Makaduol ako kang Kristo pinaagi sa …

Human makompleto sa mga estudyante ang katunga sa tsart, hatagi silag higayon nga hisgotan ang ilang mga nadiskobrehan. Mahimo nila kini pinaagi sa pagpuno sa tsart diha sa pisara uban sa klase o pinaagi sa pagpakigbahin sa ilang nakat-onan uban sa ilang pares.

• Unsay imong nakat-onan gikan niini nga mga bersikulo bahin sa kon nganong kinahanglan nato ang Manluluwas?

  Ang mga estudyante nga nakatutok sa kon nganong nagkinahanglan kita og Manluluwas pwedeng mopakigbahin sa mga kamatuoran nga sama sa makadawat lamang kita sa mga panalangin sa kaluwasan pinaagi ni Jesukristo (bersikulo 52); kinahanglang maghinulsol ang tanang tawo sa tibuok kalibotan (mga bersikulo 49–50, 57); walay hugaw nga butang ang pwedeng mopuyo sa gingharian sa Dios (bersikulo 57). Pwede nimong dapiton ang mga estudyante nga isulat ang mga kamatuoran nga ilang nakaplagan diha sa tsart sa pisara.

• Unsa ang gitudlo niini nga mga bersikulo kanimo bahin sa piho nga mga aksiyon nga pwede nimong himoon nga makatabang nimo sa pagduol ngadto kang Jesukristo?

  Pwedeng isulat sa mga estudyante nga nagpunting sa kon unsaon nato pagduol ngadto kang Kristo ang ilang nakaplagan diha sa pisara. Pwedeng i-summarize ang ilang mga tubag ngadto sa usa ka kamatuoran nga sama sa makaduol kita ngadto kang Kristo samtang maminaw kita sa tingog sa Manluluwas, motuo kita Kaniya, maghinulsol sa atong mga sala, mabunyagan, ug madawat ang gasa sa Espiritu Santo.

  Makatabang tingali ang pagpasabot nga usahay kini nga proseso hisgotan sa mga kasulatan isip “doktrina ni Kristo” (2 Nephi 31:2–21), doktrina sa Manluluwas (tan-awa sa 3 Nephi 11:31–40), o ang ebanghelyo sa Manluluwas (tan-awa sa 3 Nephi 27:13–22). Ikonsiderar ang pagdapit sa mga estudyante sa pagbasa sa Moises 6:62 aron makita ang laing termino nga gigamit sa Langitnong Amahan aron ihulagway kini nga proseso. Pwede nimong dapiton ang mga estudyante nga ipakigbahin ang ilang namatikdan bahin sa papel ni Jesukristo sa plano sa Langitnong Amahan sa kaluwasan.

• Unsay imong isulti sa usa ka tawo nga nagduhaduha kon angay bang maningkamot aron sundon si Kristo?

Isip bahin sa panaghisgot sa naunang pangutana, makatabang tingali sa mga estudyante nga tun-an ang pipila o tanan sa mosunod nga mga bersikulo, nga mangita sa mga panalangin nga atong madawat dihang moduol kita ni Jesukristo: Mateo 11:28–30; 2 Nephi 31:21; 3 Nephi 19:13–14; Ether 12:27; Moroni 10:32–33. Pwede usab nimong ikonsiderar ang pagdapit sa mga estudyante nga ipakigbahin ang mga panalangin nga ilang nasinati dihang naningkamot silang moduol ni Jesukristo.

Ipakita ang pagsabot

Dapita ang mga estudyante nga tan-awon ang senaryo sa sinugdanan sa leksiyon uban sa ilang higala. Aron makapraktis sa pagpasabot sa ilang nakat-onan, pwedeng ipakigbahin sa mga estudyante diha sa ginagmayng grupo ang ilang mga tubag sa mosunod nga mga pangutana.

Base sa imong nakat-onan ug gibati karon, ipasabot ang mosunod ngadto sa imong higala sa paagi nga dali nila kining masabtan:

• Nganong kinahanglan nato si Jesukristo?

• Unsay atong buhaton aron maduol ngadto Kaniya?

Ikonsiderar ang pagtapos sa leksiyon pinaagi sa pagdapit sa mga estudyante sa pagrekord sa ilang mga hunahuna o espirituwal nga impresyon diha sa ilang mga journal sa pagtuon. Pwede nimong ipakigbahin unsa ang imong nakat-onan bahin sa atong panginahanglan ni Jesukristo ug sa pagpamatuod kon sa unsang paagi napanalanginan ang imong kinabuhi tungod sa pagduol ngadto kang Jesukristo.

Dugang nga mga Kapanguhaan

Unsa ka importante ang imbitasyon sa Manluluwas nga maduol ngadto Kaniya?

Si Presidente Henry B. Eyring sa Unang Kapangulohan mitudlo:

Ang mga pulong nga “duol ngadto ni Kristo” usa ka pagdapit. Mao kini ang pinaka importante nga pagdapit nga inyo gayong matanyag sa laing tawo. Mao kini ang pinaka importante nga pagdapit nga mahimong dawaton ni bisan kinsa. (“Duol ngadto ni Kristo,” Liahona, Mar. 2008, 49)

Sa unsang paagi makatabang nato ang doktrina ni Jesukristo sa pagduol ngadto Kaniya?

Si Elder Dale G. Renlund sa Korum sa Napulog Duha ka Apostoles mipasabot:

“Kami nagatuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3). Ang matag tawo makaduol ngadto ni Jesukristo sa hingpit pinaagi sa pagdawat sa gipahiuli nga ebanghelyo. Kita “makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.”[Isangyaw ang Akong Ebanghelyo: Giya sa Misyonaryo nga Pagserbisyo (2004), 1].

Mao kini ang hiniusa nga mensahe sa Amahan ug sa Anak. Gusto Nila nga ang tanang mga anak sa Langitnong Amahan mosunod sa doktrina ni Kristo. (“Ang Matahum nga Gasa sa Sakramento,” Liahona, Ago. 2018, 20)

Sa unsang paagi makatabang nako ang doktrina ni Kristo?

Si Presidente Russell M. Nelson mipakigbahin:

Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi. Ang doktrina ni Kristo makatabang kanato sa pagkaplag ug pagpabilin sa dalan sa pakigsaad. Ang pagpabilin nianang higpit apan maayong pagkahan-ay nga dalan sa kaulahian mopasarang kanato nga makadawat sa tanan nga ang Dios aduna. Walay butang nga mas dako pa og bili kay sa tanan nga anaa sa atong Amahan! (“Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6)

Dugang nga mga Kalihokan sa Pagkat-on

Mas lawom nga pagsabot sa doktrina sa Manluluwas

Pwedeng palawomon sa mga estudyante ang ilang pagsabot sa doktrina ni Kirsto pinaagi sa pagpili og usa ka aspeto sa doktrina nga ilang mas tun-an pa. Pwede nilang tun-an ang tukma nga seksiyon sa mga pahina 6–9 sa Isangyaw ang Akong Ebanghelyo: Giya sa Pagpaambit sa Ebanghelo ni Jesukristo (2023). Samtang nagtuon, pwede nilang tubagon ang mosunod nga mga pangutana:

• Unsay kahulogan niini nga aspeto sa doktrina ni Kristo para nimo?

• Sa unsang paagi kini makatabang nimo sa pagduol ngadto kang Kristo?

• Sa unsang paagi kini makatabang nimo nga mahisama sa Langitnong Amahan?

Dayon pwede nimong ipasalida ang usa o duha sa mosunod nga mga bidyo klip gikan sa “Trusting the Doctrine of Christ,” nga anaa sa ChurchofJesusChrist.org. Gipakigbahin ni Elder Evan A. Schmutz sa Seventy kon sa unsang paagi ang pagsalig sa doktrina ni Kristo makapausab sa atong pamaagi sa pagkinabuhi (time code 3:41 hangtod 5:33). Dayon iyang gipasabot kon sa unsang paagi ang magtiayon nga si Travis ug Kacie misalig kang Jesukristo luyo sa mga pagsulay nga ilang giatubang (time code 6:02 hangtod 8:26).

Moises 6:59. Pisikal nga pagkatawo ug espirituwal nga pagkatawo pag-usab

Pwedeng tun-an sa mga estudyante ang proseso sa espirituwal nga pagkatawo pag-usab pinaagi sa pagtandi niini ngadto sa pisikal nga pagkatawo.

Dapita ang mga estudyante sa pagbasa sa Moises 6:59 ug sa pag-ila sa tulo ka elemento (tubig, Espiritu, dugo) nga gikinahanglan sa pisikal ug espirituwal nga pagkatawo.

Dapita ang usa ka estudyante sa pagbasa sa Moises 6:60, ug pangutan-a:

• Unsay papel sa matag usa niini nga mga elemento sa proseso sa pagkatawo pag-usab?

Aron matabangan ang mga estudyante sa pagtubag niini nga pangutana, pwede nimong basahon ang mosunod nga pamahayag ni Elder Bruce R. McConkie (1915–85) sa Kurom sa Napulog Duha ka Apostoles:

Sa matag mortal nga pagkatawo ang bata gitunlod sa tubig sa sabakan sa inahan. Sa pinili nga panahon ang espiritu mosulod sa lawas, ug ang dugo kanunay nga magdagayday sa mga kaugatan sa bag-ong tawo. Kay kon dili, kon wala ang matag usa niini, wala ang kinabuhi, wala ang pagkatawo, wala ang mortalidad.

Sa matag pagkatawo ngadto sa gingharian sa langit, ang bag-ong natawo nga bata diha kang Kristo giunlod sa tubig, nakadawat siya sa Espiritu Santo pinaagi sa pagpandong sa mga kamot, ug ang dugo ni Kristo milimpyo kaniya gikan sa tanang sala. Kay kon dili, kon wala ang matag usa niini, walay Espirituwal nga pagkatawo, walay kabag-ohan sa kinabuhi, walay paglaom sa kinabuhing dayon. (A New Witness for the Articles of Faith [1985], 288)

Moises 6:63. “Ang tanan nga mga butang nagpamatuod kanako”

Aron tabangan ang mga estudyante nga makita kon sa unsang paagi ang tanang butang nagpamatuod ni Jesukristo, pwede nimong ipabasa nila ang Moises 6:63. Dayon pwede nimong hangyoon ang mga estudyante sa pagpakigbahin unsay nagpamatuod ni Jesukristo sa ilang kinabuhi.

Timan-i: Kon gigamit nimo pag-ayo ang Moises 6:63 sa Leksiyon 7: “Genesis 1:1–25” aron makakat-on og dugang bahin kang Jesus isip ang Tiglalang, pwede nimo kining dili gamiton dinhi.

Bidyo

Samtang nangandam ang mga estudyante sa panaghisgot kon nganong angayng moduol ngadto ni Jesukristo, pwede nimo silang dapiton sa pagtan-aw sa “Come unto Christ: 2014 Theme Song” (4:48).