Genesis 1–2; Moises 2–3; Abraham 4–5: Leksiyon 8

Genesis 1:26–27

“Gibuhat sa Dios ang Tawo Sama sa Iyang Kaugalingong Dagway”

Sa ikaunom nga yugto sa paglalang, gihimo sa Dios ang lalaki ug babaye. Ang kada tawo sa yuta maoy hinigugmang anak nga lalaki ug anak nga babaye sa langitnong mga ginikanan ug adunay balaang kinaiyahan ug kapalaran. Kini nga leksiyon makatabang sa mga estudyante nga mobati sa kaimportante sa ilang pagkatawo ug potensyal isip anak nga mga lalaki ug anak nga mga babaye sa langitnong mga ginikanan.

Pagpangandam sa estudyante: Dapita ang mga estudyante sa pagsag-ulo o pagrebyo sa pangbukas nga mga linya sa mga tema sa Young Women ug Aaronic nga Pagkapari ug sa pagpamalandong sa kaimportante sa matag pamahayag:

Mga Posibleng Kalihokan sa Pagkat-on

Pagkatawo ug mga lTimaan

Ikonsiderar ang pagdrowing og han-ay sa panghitabo diha sa pisara ug dapita ang mga estudyante nga magbuhat og ilang kaugalingon nga personal nga han-ay sa panghitabo diha sa ilang mga journal sa pagtuon. Naa sa ubos ang sampol nga timeline.

Pagdrowing og pinahigda nga linya nga nagrepresentar sa imong kinabuhi ug butangi kini og timaan sa lain-laing pagkatawo o titulo nga aduna ka sa nangagi, sa kasamtangan, o gipaabot sa umaabot. Pwedeng apil ani ang “higala,” “estudyante,” o titulo sa trabaho o calling nga anaa ka. Ang mosunod maoy usa ka ehemplo:

• Unsa ang pipila ka pagkatawo o mga titulo ang gipili nga imong gibutang sa imong han-ay sa panghitabo? Ngano man?

• Sa unsang paagi kini nga mga ilhanan o mga titulo nakaimpluwensiya sa mga pagpili nga imong himoon?

Gipasabot ni Presidente Russell M. Nelson kon sa unsang paagi nga ang atong paghingalan sa atong kaugalingon makaapekto kanato.

Ang mga timaan mahimong makalingaw ug magpakita sa inyong suporta alang sa bisan unsang gidaghanon nga positibo nga mga butang. Daghang timaan ang mausab alang kaninyo sa paglabay sa panahon. Ug dili tanang timaan ang managsama og bili. Apan kon ang bisan unsang timaan ang mohulip sa inyong labing importante nga mga timailhan, ang mga resulta mahimong espirituhanon nga makapeligro. (“Mga Pagpili alang sa Kahangtoran” [tibuok kalibotang debosyonal alang sa mga young adult, Mayo 15, 2022], broadcasts.ChurchofJesusChrist.org)

• Sa imong hunahuna nganong makapeligro sa espirituwal nga paagi ang ubang mga timaan?

Mga anak sa langitnong mga ginikanan

Basaha ang Genesis 1:26–27 ug ang mosunod nga pamahayag gikan sa “Ang Pamilya: Usa ka Pamahayag ngadto sa Kalibotan,” nga mangita sa mga panglantaw bahin sa imong mahangtoron nga pagkatawo.

Ang Genesis 1:26–27 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios. Ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay kataposan nga pag-ila ug katuyoan. (“Ang Pamilya: Usa ka Pamahayag ngadto sa Kalibotan,” ChurchofJesusChrist.org)

• Unsang mga panabot ang imong nakuha bahin sa imong mahangtoron nga pagkatawo?

  Ang usa ka kamatuoran nga pwedeng mailhan sa mga estduyante mao nga kita anak nga mga lalaki ug anak nga mga babaye sa langitnong mga ginikanan, nga gihimo sama sa ilang dagway. Kon wala pa nila kini mahimo, dapita ang mga estudyante nga isulat ang “Anak sa Dios” diha sa ilang timeline.

• Sa imong hunahuna unsa kahay ipasabot sa gilalang sama sa dagway sa Dios?

Gipakigbahin ni Presidente Thomas S. Monson (1927–2018) ang mosunod nga panabot bahin sa paglalang sama sa dagway sa Dios.

Ang Dios nga atong Amahan adunay mga dunggan nga makadungog sa atong mga pag-ampo. Siya adunay mga mata nga makakita sa atong mga lihok. Siya adunay ba-ba nga makasulti kanato. Siya adunay kasingkasing nga mobati og kalooy ug gugma. Siya tinuod. Siya buhi. Kita iyang mga anak, nga gihimo sama sa iyang panagway. Ang atong hitsura sama kaniya ug ang iyang hitsura sama kanato. (“Buhi ang Manunubos Ko, Niini Nasayod Ako,” Ensign, Abr. 1990, 6)

• Sa imong hunahuna nganong importante nga mas nahibalo ka sa imong pagkatawo isip usa ka anak sa Dios labaw sa bisan unsang pagkatawo nga anaa ka?

  Hatagi og panahon ang mga estudyante nga pamalandongan unsa kaimportante ang ilang pagkatawo isip anak sa Dios. Ang paghimo sa ingon makadapit sa Espiritu Santo sa pagpamatuod sa kamatuoran o pagtabang aron maandam ang mga hunahuna ug mga kasingkasing sa mga estudyante nga matudloan.

• Unsa nga mga babag ang makapalisod sa pagtuo o paghinumdom sa imong pagkatawo isip anak sa Dios, nga gibuhat sama sa Iyang dagway?

Ikonsiderar ang pagsulat sa mga tubag sa estudyante sa nag-unang pangutana diha sa pisara. Ang posibleng mga tubag mahimong ang pipila ka tawo wala tingali makasabot kon nganong importante ang pagkahimong anak sa Dios, nakigbisog sila sa pagbati sa gugma sa Dios, o nalinga sila sa dili kaayo importanteng mga timailhan. Kon adunay pangutana ang mga estudyante bahin sa gender, sunda ang ehemplo sa Manluluwas samtang tudloan nimo sila bahin sa Iyang doktrina sa paagi nga makahatag og pagsabot, paglaom, ug kaayohan. Pagpamatuod nga gimahal sa Dios ang tanan Niyang mga anak ug motabang sa mga estudyante nga atubangon ang ilang mga pangutana samtang ilang gamiton ang mga baroganan sa pag-angkon og espirituwal nga kahibalo.

Alang sa mga ideya kon unsaon pagtubag ang mga pangutana sa mga estudyante bahin sa gender, tan-awa ang Dugang nga mga Kalihokan sa Pagkat-on.

Mga pulong sa mga kasulatan ug propeta

Hatagi ang mga estudyante sa handout nga nag-ulohan og “Ako Anak sa Dios.” Dapita ang mga estudyante nga tinguhaon ang inspirasyon gikan sa Dios samtang magtuon sila aron mailhan nila ang kaimportante sa ilang balaang pagkatawo. Isip dugang sa handout, pwede nimong dapiton ang mga estudyante nga rebyohon ang mga pagtulun-an nga makita sa mga tema sa Young Women ug Aaronic nga Pagkapari. Pwede kining indibidwal nga himoon sa mga estudyante o uban ang sa gagmay nga mga grupo.

Kon mahuman na pagtuon ang mga estudyante, pwede nimo silang dapiton nga ipakigbahin ang ilang nakat-onan diha sa klase o sa gagmay nga mga grupo. Pwede usab nimong ipangutana ang mosunod:

• Unsay imong nakaplagan gikan sa mga kapanguhaan nga imong gitun-an nga makahuloganon para nimo?

• Sa unsang paagi nga ang pagkahibalo sa imong pagkatawo isip anak sa Dios makaapektar sa imong panglantaw sa imong kaugalingon ug sa uban?

• Sa unsang paagi naapektohan ang imong kinabuhi sa pagkahibalo sa imong balaang pagkatawo ug potensyal?

Kon makabenepisyo ang mga estudyante sa pagkakitag ehemplo kon sa unsang paagi makaapektar nila ang ilang pagkahibalo sa ilang mahangturon nga pagkatawo, ikonsiderar ang pagtan-aw sa “Running Toward the Light” (17:34), nga anaa sa ChurchofJesusChrist.org, gikan sa time code 11:00 hangtod 15:19. Niini nga bidyo, ipakigbahin ni Elder Peter M. Johnson sa Seventy ang iyang kasinatian sa pagkahibalo nga anak siya sa Dios ug ang anaa nga impluwensiya sa maong kahibalo sa iyang kinabuhi. Human sa bidyo, pwede nimong dapiton ang pipila ka estudyante nga ipakigbahin ang kon unsay dili nila malimtan sa mensahe ni Elder Johnson.

Pamalandongi ang imong pagkatawo

Hatagi og panahon ang mga estudyante sa pagpamalandong sa ilang nakat-onan bahin sa ilang pagkatawo ug potensyal isip anak nga mga lalaki ug anak nga mga babaye sa langitnong mga ginikanan. Dapita silang irekord diha sa ilang mga journal sa pagtuon ang bisan unsang mga impresyon o panabot nga gusto nilang hinumdoman. Ikonsiderar ang pagtapos pinaagi sa pagkanta sa “Ako Anak sa Dios” isip usa ka klase, dayon ipakigbahin ang imong pagpamatuod bahin sa pagkahimong anak sa Dios.

Sag-uloha

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang importante nga hugpong sa mga pulong sa kasulatan para sa Genesis 1:26–27 mao ang “gibuhat sa Dios ang tawo sama sa iyang kaugalingong dagway.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa ang atong balaang potensiyal isip mga anak sa Dios?

Tungod kay kita espiritu nga mga anak sa Dios, atong napanunod ang potensyal aron mapalambo ang Iyang balaan nga mga kinaiya. Pinaagi sa Pag-ula ni Jesukristo, kita mamahimong sama sa atong Langitnong Amahan ug makadawat sa kahingpitan sa hingpit nga kalipay. (Mga Hilisgotan ug mga Pangutana, “Espiritung mga Anak sa Langitnong mga Ginikanan,” topics.ChurchofJesusChrist.org)

Alang sa dugang nga impormasyon, tan-awa sa “Pagkahimong Sama sa Dios” diha sa Mga Essay sa Mga Hilisgotan sa Ebanghelyo.

Tan-awa usab ang “Ang Sinugdanan sa Tawo,” Ensign, Peb. 2002, 26–30.

Unsay atong nahibaloan bahin sa atong Inahan sa Langit?

Si Elder Dale G. Renlund sa Korum sa Napulog Duha ka Apostoles mitudlo:

Gamay lang kaayo ang gipadayag kabahin sa Inahan sa Langit, apan ang unsay atong nasayran giminubo diha sa usa ka hilisgotan sa ebanghelyo diha sa atong aplikasyon sa Librarya sa Ebanghelyo. Sa higayon nga inyong mabasa unsay anaa diha, masayran ninyo ang tanang butang nga akong nahibaloan mahitungod sa hilisgotan. Nanghinaot ko nga masayod pa og dugang. Kamo usab mahimong aduna pay mga pangutana ug gustong makakita og dugang pa nga mga tubag. Ang pagpangita og mas dako nga pagsabot mao ang usa ka importante nga bahin sa atong espiritwal nga paglambo, apan palihog pagmatngon. Ang pangatarongan dili ikapuli sa pagpadayag.

Ang pagpangagpas dili mosangpot ngadto sa mas dakong espiritwal nga kahibalo, apan kini makadala ngadto sa pagkalingla o makatipas sa atong pag-focus gikan sa unsay gipadayag. (“Ang Inyong Diosnong Kinaiya ug Mahangtorong Padulngan,” Liahona, Mayo 2022, 70)

Para sa dugang impormasyon, tan-awa ang “Langitnong mga Ginikanan” diha sa Mga Hilisgotan ug mga Pangutana sa Librarya sa Ebanghelyo.

Dugang nga mga Kalihokan sa Pagkat-on

Mga asoy sa paglalang

Ang mga kasulatan naglangkob sa lainlaing asoy sa Paglalang. Ang kada asoy makadugang sa atong pagsabot. Dapita ang mga estudyante nga tun-an ang mosunod nga mga tudling sa kasulatan bahin sa paglalang sa lalaki ug babaye, nga mangita sa mga detalye sa kada asoy nga modugang sa atong pagsabot.

1. Genesis 1:26–27

2. Moises 2:26–27

3. Abraham 4:26–27

Gipakatawo aron mahimong hari

Si Sister Elaine S. Dalton, kanhi Kinatibuk-ang Presidente sa Young Women, mipakigbahin og usa ka istorya bahin ni Hari Louis XVI aron itudlo kon sa unsang paagi ang pagkabihalo sa atong potensyal makaapektar sa atong mga pagpili. Ikonsiderar ang pagtan-aw sa “Hinumdomi Kon Kinsa Kamo!” gikan sa time code 6:03 hangtod 6:50.

• Sa unsang paagi kini nga istorya maggamit sa atong pagkatawo ug potensyal isip mga anak sa Dios?

Mga pangutana bahin sa gender

Kon adunay pangutana ang mga estudyante bahin sa gender, makatabang tingali ang paggahin og panahon sa klase aron tubagon ang pipila nila ka kabalaka. Tinguhaa ang giya gikan sa Espiritu Santo aron tabangan ka nga tin-aw nimong matudlo ang kamatuoran uban sa gugma ug pagsabot.

Pwedeng ipakigbahin ang mosunod nga pamahayag gikan ni Elder Ronald A. Rasband sa Korum sa Napulog Duha ka Apostoles aron maandam ang mga estudyante sa paghisgot niining sensitibong hilisgotan.

Ang labing talandogon … mao kadtong kabatan-onan ug mga young single adult kinsa nakigbisog sa mga isyu sa gender. Kinahanglan silang magakos sa mga bukton sa ilang Manluluwas ug masayod nga gipangga sila. Kanunay nga ang Ginoo nagtawag kanato; nagla[o]m Siya nga mahimo kita nga Iyang mahinangpon, mahigugmaong mga bukton. Kinahanglang awhagon nato ang ilang mga higala sa pagbuhat sa ingon. (“Si Jesukristo Mao ang Tubag” [usa ka gabii uban ang Katibuk-ang Awtoridad, Peb. 8, 2019])

Itudlo ang mga estudyante sa pamahayag gikan sa “Ang Pamilya: Usa ka Pamahayag ngadto sa Kalibotan” nga gihimong pakisayran sa leksiyon.

• Unsay imong nahibaloan bahin sa plano sa Langitnong Amahan para sa Iyang mga anak nga makatabang nimong masabtan kon nganong importante nga karakter ang gender?

Hatagi ang mga estudyante sa mosunod nga kapanguhaan. Dapita silang pangitaon ang usa o kapin pa aron mas masabtan ang papel sa gender diha sa plano sa Langitnong Amahan o uban pang panabot bahin sa hilisgotan.

• Gihatagan og kahulogan sa Simbahan ang gender isip ang sekso sa pagkatawo (Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw [2023], 38.6.23).

• “Leksyon 7 Materyal sa Pagpangandam sa Klase: Ang Mahangtoron nga Kinaiya ug Katuyoan sa Gender,” Ang Materyal sa Pagpangandam sa Klase sa Mahangtorong Pamilya, institute.ChurchofJesusChrist.org.

• Presidente Dallin H. Oaks sa “General Conference Leadership Meetings Begin,” Newsroom.ChurchofJesusChrist.org.

• “Transgender” sa seksiyong Tabang sa Kinabuhi sa Librarya sa Ebanghelyo.

Mga kapilian nga bidyo

Ikonsidear ang pagpasalida sa usa sa mosunod nga mga bidyo, nga anaa sa ChurchofJesusChrist.org, aron tabangan ang mga estudyante nga masabtan ang ilang balaang potensyal ug ang gugma sa Langitnong Amahan kanila isip Iyang mga anak.

Learn about God’s Plan for You (0:56)

Earthly Father, Heavenly Father (3:59)

God’s Greatest Creation (2:51)