Genesis 1–2; Moises 2–3; Abraham 4–5: Leksiyon 9

Genesis 1:28–31; 2:1–25

“Ang Pamilya Mahinungdanon Ngadto sa Plano sa Tiglalang”

Human sa paglalang ni Adan ug Eva, gihiusa sila sa Langitnong Amahan diha sa kaminyoon. Gisugo Niya sila nga magpadaghan ug pun-on ang yuta ug mounong sa usag usa. Kini nga leksiyon makatabang sa mga estudyante nga masabtan ang mahinungdanong papel sa kaminyoon ug pamilya diha sa plano sa Langitnong Amahan sa kaluwasan.

Pagpangandam sa estudyante: Dapita ang mga estudyante sa pagtuon sa “Ang Pamilya: Usa ka Pamahayag ngadto sa Kalibotan,” nga mangita sa mga pagtulun-an nga naghulagway kon nganong importante ang pamilya sa plano sa Langitnong Amahan sa kaluwasan.

Mga Posibleng Kalihokan sa Pagkat-on

Dihang hisgotan ang kaimportante sa kaminyoon ug pamilya sa plano sa Langitnong Amahan sa kaluwasan, hibaloi nga daghang estudyante karon ang wala makasinati sa sulondong mga kahimtang sa pamilya. Mahimong sensitibo sa mga panginahanglan ug pangutana sa mga estudyante.

Importanteng mga butang

Ikonsiderar ang pagsulat sa pisara og usa o kapin pang dili kompletong mga kapahayag nga naghulagway sa usa ka butang, kalihokan, tawo, ug uban pa nga importante unta aron makab-ot ang usa ka butang. Makatabang tingali ang mosunod nga mga pangutana. Dapita ang mga estudyante nga hunahunaon kon unsaon nila kini pagsumpay, dayon hangyoa ang lainlaing estudyante nga ipakigbahin sa klase ang ilang tubag. Mahimong makatabang ang pagpasabot nga ang pulong nga mahinungdanon mahimo usab nga magpasabot nga importante o labing importante.

mahinungdanon aron molampos sa pag-eskwela kay .

mahinungdanon nga bahin sa malipayong kinabuhi kay .

nagdala sa mahinungdanong tahas sa akong kinabuhi kay .

Human ipakigbahin sa mga estudyante ang ilang mga tubag, ipakita ang mosunod nga pamahayag gikan sa “Ang Pamilya Usa ka Pamahayag Ngadto sa Kalibotan,” ug dapita ang usa ka estudyante sa pagbasa og kusog. Hangyoa ang klase nga mangita sa usa ka importanteng aspeto sa plano sa kaluwasan sa atong Langitnong Amahan.

“Ang Pamilya Usa ka Pamahayag Ngadto sa Kalibotan” nag-ingon:

Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay kataposan nga destinasyon sa Iyang mga anak. (“Ang Pamilya: Usa ka Pamahayag ngadto sa Kalibotan,” Librarya sa Ebanghelyo)

• Sa imong hunahuna nganong importante ang gidala nga papel sa kaminyoon ug pamilya sa plano sa kaluwasan sa Langitnong Amahan?

• Sa imong nakita sa unsang paagi naningkamot si Satanas sa pag-atake sa mga kaminyoon ug pamilya sa atong panahon?

Dapita ang mga estudyante nga hunahunaon ang pipila sa mga pangutana nga anaa tingali sila o ang uban bahin sa kaminyoon ug pamilya. Pwede nilang isulat ang ilang mga pangutana diha sa ilang mga journal sa pagtuon. Dasiga silang pangitaon ang mga kamatuoran samtang nagtuon karon ug bantayan ang espirituwal nga mga impresyon nga mogiya nila sa pagpangita sa mga tubag niining mga pangutanaha.

Pagtudlo gikan sa mga kasulatan

Ipasabot nga ang gihimo sa Langitnong Amahan human sa Paglalang makatabang nato nga masabtan ang mahinungdanong papel sa kaminyoon ug pamilya diha sa Iyang plano. Ipakita ang mosunod nga mga instruksiyon ug kapanguhaan, ug hatagig panahon ang mga estudyante nga tun-an kini. Pwede ninyo kining tun-an uban sa klase, o pwede nimong grupo-grupohon ang mga estudyante aron tun-an ug dungang hisgotan kini nga mga kapanguhaan.

Samtang basahon sa mga estudyante ang mga bersikulo gikan sa Genesis 2, pwede nimong ipasabot nga ang mga pulong katabang sa bersikulo 18 nagtumong sa “usa ka katabang nga angay ni, takos sa o katimbang ni” Adan (tan-awa ang footnote 18b). Pwede usab nimong ipasabot nga ang asoy nga si Eva gilalang gikan sa gusok ni Adan simbolikanhon ug pwedeng magpasabot sa patas nga pagkauban tali sa bana ug asawa (tan-awa ang Russell M. Nelson, “Lessons from Eve,” Ensign, Nov. 1987, 87).

Tun-i ang mosunod nga pamahayag ug mga kasulatan, nga mangitag mga ebidensya sa kaimportante sa kaminyoon ug sa pamilya alang sa Dios.

Si Presidente Spencer W. Kimball (1895–1985) mitudlo:

Ang Ginoo … [midala] ni Adan ug ni Eva, nga iyang unang lalaki ug unang babaye dinhi sa yuta, ug [mi]pahigayon sa balaan nga seremonya sa kaminyoon aron sa paghimo kanila nga bana ug asawa. (Mga Pagtulun-an sa mga Presidente sa Simbahan: Spencer W. Kimball [2006], 192)

Mga kasulatan nga tun-an:

Genesis 1:27–28 (Sugo sa Dios kang Adan ug Eva)

Genesis 2:18, 21–24 (Paglalang kang Eva)

Ang Genesis 2:24 mao ang usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Doktrina ug mga Pakigsaad 49:15–17 (Ang mga pagtulun-an sa Ginoo pinaagi ni Propeta Joseph Smith)

• Unsang mga kamatuoran ang imong nakita nga nagpakita sa kaimportante sa kaminyoon ug sa pamilya para sa Dios?

Mailhan tingali sa mga estudyante ang mga kamatuoran nga sama sa mosunod:

Gisugo sa Dios ang mga bana ug mga asawa nga manganak (Genesis 1:28).

Mahimong usa ang bana ug asawa ug molihok isip patas nga magkauban (Genesis 2:18, 24).

Giorden sa Dios ang kaminyoon tali sa lalaki ug babaye (Doktrina ug mga Pakigsaad 49:15).

Gihimo ang yuta aron kapuy-an sa mga anak sa Dios nga matawo gikan sa mga pamilya ug dungan nga mag-uswag (Doktrina ug mga Pakigsaad 49:16–17).

Isip bahin sa panaghisgot niini nga mga kamatuoran, makatabang tingali ang paghisgot sa mosunod nga pamahayag ni Presidente Russell M. Nelson.

Gihatagan og gibug-aton ni Presidente Russell M. Nelson ang importanteng papel sa mga pamilya human sa paglalang sa Dios sa yuta:

Ingon sa ka bililhon niini, ang planetang Yuta usa ka bahin sa butang nga mas bililhon pa—kanang mahinungdanong plano sa Dios. Sa mubo nga pagkasulti, gilalang ang yuta nga aron ang mga pamilya mahimo. Gipasabot sa kasulatan nga ang bana ug asawa “mahimo nga magkahiusa, ug tanan niini aron nga ang yuta makatuman sa katuyoan sa iyang pagkalalang” [Doktrina ug mga Pakigsaad 49:16]. (“The Creation,” Ensign, Mayo 2000, 85)

• Sa unsang paagi ang paghinumdom sa mahinungdanong papel sa kaminyoon ug pamilya diha sa plano sa Dios makaapektar sa imong mga pagpili sa kinabuhi?

• Sa unsang paagi kini nga mga kamatuoran ug pagtulun-an makatabang nato sa pagtubag dihang gisaway o gipakaubos ang doktrina sa kaminyoon o pamilya?

• Sa imong hunahuna sa unsang paagi ang pagsunod sa mga sumbanan sa Langitnong Amahan kalabot sa kaminyoon ug pamilya makatabang nimo nga mas mahisama Kaniya?

Paghimog tubag

Aron tabangan ang mga estudyante nga ipasabot ang ilang nakat-onan bahin sa kaimportante sa kaminyoon ug sa pamilya diha sa plano sa Dios, ikonsiderar ang pagpakigbahin og senaryo nga parehas sa mosunod. Pwede nimong ipahiuyon kini nga senaryo nga mas may kalabotan sa inyong kultura ug sa kinabuhi sa mga estudyante. Human mapakigbahin ang mga senaryo, ipakita ang mga instruksiyon aron makahimog tubag ang mga estudyante.

Sa usa sa mga klase sa eskwelahan ni Elizabeth, usa ka panaghisgot ang nahitabo bahin sa kaminyoon ug sa pamilya. Gipakigbahin ni Elizabeth ang pipila sa iyang panglantaw kabahin sa kaminyoon nga tali sa lalaki ug babaye lamang ug ang kaimportantesa magtiayon nga minyo nga manganak. Daghan sa mga klasmeyt ni Elizabeth ang mipakigbahin sa ilang mga opinyon nga lahi kaayo ni sa iyaha. Human sa klase, usa ka batan-ong lalaki nga ginganlag Isaac, nga anaa usab sa klase sa seminary ni Elizabeth, ang nangutana kang Elizabeth kon nganong kinaraan kaayo ang iyang mga opinyon bahin sa kaminyoon ug sa pamilya.

Gamit sa unsay imong nakat-onan karon, paghimog tubag nga pwedeng ipakigbahin ni Elizabeth kang Isaac. Iapil ang mosunod diha sa imong tubag:

1. Usa ka pagpasabot nganong importante ang kaminyoon ug pamilya para sa Langitnong Amahan ug sa Iyang plano sa kaluwasan

2. Usa o kapin pang pagtulun-an gikan sa mga kasulatan o mga lider sa Simbahan

3. Usa ka pagdapit nga pwedeng ipakigbahin ni Elizabeth kang Isaac nga makatabang niya

Human mahatagi og panahon ang mga estudyante sa pagpangandam, hatagi silag higayon nga ipakigbahin ang ilang mga tubag. Ppwede nila kining ipakigbahin sa usa ka pares o sa gamayng grupo. Pwede usab dapiton ang pipila ka estudyante nga andam mopakigbahin sa ilang mga tubag diha sa klase o idrama-drama ang senaryo.

Hatagig panahon ang mga estudyante sa pagpamalandong sa ilang nakat-onan ug gibati karon. Pwede nilang hunahunaon ang bahin sa mga kamatuoran nga ilang nakat-onan nga nakatubag sa pipila nila ka pangutana. Dapita sila nga irekord ang bisan unsang espirituwal nga impresyon nga naa sila diha sa ilang mga journal sa pagtuon. Pagpamatuod sa mga kamatuoran nga imong nahisgotan karon.

Sag-uloha

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang importante nga hugpong sa mga pulong sa kasulatan para sa Genesis 2:24 mao ang “Ang lalaki … moipon siya sa iyang asawa: ug sila mahimong usa ka unod.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Genesis 2:21–22. Gilalang ba gayod si Eva gikan sa gusok ni Adan?

Si Presidente Spencer W. Kimball (1895–1985) mitudlo nga “ang istorya bahin sa gusok, dayag lang, nga usa ka pasumbingay” (“Ang mga Panalangin ug mga Responsibilidad sa Pagkababaye,” Ensign, Mar. 1976, 71).

Gipasabot ni Presidente Russell M. Nelson kon sa unsang paagi ang gusok diha sa asoy sa paglalang ni Eva usa ka sambingay o simbolikanhon:

Ang gusok, nga gikan sa kilid, daw masabot og panag-uban. Ang gusok wala magpasabot nga dominyon ni ulipon, apan pareha nga relasyon isip managkauban, sa pagtrabaho ug sa pagpakabuhi, nga magtambayayong. (“Lessons from Eve,” Ensign, Nov. 1987, 87)

Unsa na man ang mga tawong walay mahangturon nga kaminyoon o nahiangayng pamilya niining kinabuhia?

Si Elder Neil L. Andersen sa Korum sa Napulog Duha ka Apostoles mitudlo:

Akong ipadayag ang akong gugma ug kalooy sa matarong nga managtiayon kinsa nagminyo ug wala makabaton og anak nga mahinamon nilang gipaabot ug niadtong kababayen-an ug kalalakin-an kinsa walay kahigayonan nga maminyo sumala sa balaod sa Dios. Ang wala matuman nga mga damgo sa kinabuhi lisod sabton kon lantawon lamang gikan sa panglantaw sa mortalidad. Isip sulugoon sa Ginoo, ako mosaad kaninyo nga samtang kamo magmatinud-anon ngadto ni Jesukristo ug sa inyong mga pakigsaad, kamo makadawat sa bayad nga mga panalangin niini nga kinabuhi ug sa inyong matarong nga mga tinguha niining mahangtoron nga latid sa panahon sa Ginoo. (“Ang Personal nga Panaw sa usa ka Anak sa Dios,” Liahona, Mayo 2021, 47)

Sa unsang paagi magkatimbang ang mga lalaki ug mga babaye isip mga mag-partner?

Si Elder David A. Bednar sa Korum sa Napulog Duha ka Apostoles mipasabot:

Rason 1: Ang mga kinaiya sa mga espiritu sa lalaki ug babaye nag-kompleto ug naghingpit sa usag-usa ug, busa ang mga lalaki ug babaye gituyo nga mouswag og dungan ngadto sa kahimayaan. …

… Ang talagsaong kombinasyon sa espirituhanon, pisikal, mental, ug emosyonal nga mga kapasidad sa mga lalaki ug mga babaye gikinahanglan alang sa pagpatuman sa plano sa kalipay. Kon mag-inusara, ang babaye o lalaki dili makatuman sa mga katuyoan sa iyang pagkalalang. …

Rason 2: Sa balaang plano, ang lalaki ug ang babaye gikinahanglan sa pagdala sa mga bata nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga bata.

… [A]ng kaminyoon tali sa lalaki ug babaye mao ang agianan nga gihatagan og gahom diin ang mga espiritu sa kalib[o]tan nga wala dinhi sa yuta mosulod sa pagka-mortal. (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51, 52)

Dugang nga mga Kalihokan sa Pagkat-on

Genesis 2:1–3. Ang Dios mipahulay sa Igpapahulay

Kon makabenepisyo ang imong mga estudyante sa pagplano pag-ayo aron sa paghupot sa adlawang Igpapahulay nga balaan, pwede kang maggahin og panahon sa pagtuon sa Genesis 2:1–3. Ipasabot nga ang Genesis 2 maoy sumpay sa asoy sa Paglalang. Dapita ang usa ka estudyante sa pagbasa og kusog sa Genesis 2:1–3. Hangyoa ang klase nga sundan kini ug mangita kon unsay gibuhat sa Ginoo sa ikapitong adlaw nga lahi kay sa nag-unang mga adlaw.

Dayon ipangutana ang mosunod:

• Unsa ang kamatuoran nga atong makat-onan bahin sa adlawng Igpapahulay gikan sa ehemplo sa Ginoo niini nga mga bersikulo?

Posibleng mailhan sa mga estudyante ang kamatuoran nga sama sa mosunod: Atong mabalaan ang adlawng Igpapahulay dihang mopahulay kita sa atong mga trabaho ug tutokan ang sagradong mga butang.

Ikonsiderar ang paghisgot sa mga pangutana sama sa mosunod:

• Unsa ang pipila ka paagi nga makatutok kita sa sagradong mga butang sa Igpapahulay?

• Sa unsang paagi mibati kang gipanalanginan pinaagi sa pagpahulay gikan sa inyong mga paghago sa adlawng Igpapahulay ug nagtutok sa sagradong mga butang?

Pwede nimong dapiton ang mga estudyante nga pamalandongan ang mga paagi nga mas mabaalan nila ang adlawng Igpapahulay. Dayon dasiga silang buhaton ang bisag usa niini nga mga ideya.

Genesis 2:18, 24. Patas nga magkauban

Makabenepisyo tingali ang mga estudyante sa dugang paghisgot bahin sa kamatuoran nga ang bana ug asawa kinahanglang mahimong patas nga magkauban. Human maila kini nga kamatuoran, pwede nimong ipakigbahin ang pamahayag ni Elder David A. Bednar sa “Dugang nga mga Kapanguhaan.” Pwede pod nimong hisgotan ang mga pangutana sama sa mosunod:

• Para nimo unsay ipasabot sa giingon nga patas nga magkauban ang asawa ug ang bana diha sa kaminyoon?

• Nganong importanteng trataron sa bana ug asawa ang usag usa ingong patas nga magkauban?

Mga bidyo bahin sa kaimportante sa kaminyoon ug pamilya

Ikonsiderar ang paggamit sa usa o kapin pa sa mosunod nga mga bidyo aron tabangan ang mga estudyante nga mas masabtan ang kaimportante sa kaminyoon ug pamilya:

• “Renaissance of Marriage” (2:36). Gipasabot ni Presidente Henry B. Eyring sa Unang Kapangulohan kon sa unsang paagi nakatabang niya ang pagminyo kang Sister Eyring nga “mahimong kinamaayohan sa tibuok [niyang] pagkatawo.”

• “What Is the Purpose of Family?” (1:17). Gihulagway niini nga bidyo ang pamilya isip balaang patukoranan sa katilingban.

• “Having Children in Faith” (2:25). Gihisgotan ni Elder Neil L. Andersen sa Korum sa Napulog Duha ka Apostoles ang mga pagtulun-an nga may kalabotan sa sugo sa Ginoo nga magpadaghan ug pun-on ang yuta.