“Ang inyong lawas sagrado,” Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022)
“Ang inyong lawas sagrado,” Alang sa Kalig-on sa mga Kabatan-onan
Ang inyong lawas sagrado
1 Mga Taga-Corinto 6:18–20
Ang inyong lawas usa ka talagsaon nga gasa gikan sa inyong Langitnong Amahan. Siya mihatag niini kaninyo aron sa pagtabang ninyo nga mahimong mas sama Kaniya. Ang pagbaton og usa ka lawas naghatag kaninyo og dugang nga gahom sa paggamit sa inyong kagawasan sa pagpili. Ang gipahiuli nga ebanghelyo ni Jesukristo makatabang kaninyo nga makakita sa inyong lawas gikan sa panglantaw sa Dios. Ug kana naghimo og dakong kalainan sa inyong mga pagpili mahitungod kon unsa ang buhaton sa inyong lawas ug unsaon sa pag-atiman niini.
Mahangtoron nga mga kamatuoran
Ang inyong lawas sama sa panagway sa Dios—ang labing mahimayaon, halangdon nga Binuhat sa uniberso. Ang mga kasulatan nagtandi sa atong mga lawas ngadto sa usa ka templo, usa ka dapit diin makapuyo ang Espiritu. Siyempre, ang inyong lawas dili pa hingpit karon. Apan ang mga kasinatian nga aduna kamo sa inyong lawas makatabang kaninyo nga maandam sa pagdawat ugma damlag og usa ka hingpit, nabanhaw, mahimayaon nga lawas.
Ang inyong kalag gilangkoban sa inyong lawas ug sa inyong espiritu. Alang niini nga rason, konektado kaayo ang pisikal nga kahimsog ug ang espirituwal nga kahimsog. Ang Manluluwas mipadayag sa Pulong sa Kaalam aron sa pagtudlo sa mga baroganan sa pag-atiman sa inyong lawas—ug sa pagsaad og pisikal ug espirituwal nga mga panalangin.
Ang sekswal nga mga pagbati importante nga bahin sa plano sa Dios aron sa pagmugna og malipayon nga mga kaminyoon ug mahangtoron nga mga pamilya. Kini nga mga pagbati dili pagpakasasala—kini sagrado. Tungod kay ang sekswal nga mga pagbati sagrado kaayo ug gamhanan kaayo, ang Dios mihatag kaninyo sa Iyang balaod sa kaputli aron sa pag-andam kaninyo sa paggamit niini nga mga pagbati sa Iyang katuyoan. Ang balaod sa kaputli nagpahayag nga ang Dios nagtugot sa sekswal nga kalihokan tali lamang sa usa ka lalaki ug usa ka babaye kinsa minyo. Daghan sa kalibotan ang nagbaliwala o gani nagbugalbugal sa balaod sa Dios, apan ang Ginoo nagdapit kanato nga mahimo nga Iyang mga disipulo ug mosunod sa usa ka mas taas nga sumbanan kay sa kalibotan.
Mga pagdapit
Itratar ang inyong lawas—ug ang mga lawas sa ubang tawo—uban sa pagrespeto. Samtang mohimo kamo og mga desisyon mahitungod sa inyong panamit, estilo sa buhok, ug panagway, pangutan-a ang inyong kaugalingon, “Gitahod ba nako ang akong lawas isip usa ka sagrado nga gasa gikan sa Dios?” Gusto sa Langitnong Amahan nga makita nato ang usag usa kon kinsa gayod kita: dili lang pisikal nga mga lawas apan Iyang hinigugmang mga anak nga adunay balaanon nga padulngan. Likayi ang mga estilo nga mopakita o modani og dili tukma nga atensiyon ngadto sa inyong pisikal nga lawas kay sa kon kinsa kamo isip usa ka anak sa Dios nga adunay mahangtoron nga kaugmaon. Himoa ang moral nga kalimpyo ug ang gugma alang sa Dios nga mogiya sa inyong mga pagpili. Pagtinguha og tambag gikan sa inyong mga ginikanan.
Buhata ang mga butang nga mopalig-on sa inyong lawas—dili ang mga butang nga makapasakit o makadaot niini. Tagamtama uban sa pagpasalamat ang daghang maayo nga mga butang nga gihatag sa Dios. Apan hinumdomi nga ang ilimnon nga makahubog, tabako, kape, tsa, ug ubang makadaot nga mga droga ug mga sangkap dili alang sa inyong lawas o sa inyong espiritu. Bisan ang makatabang nga mga sangkap, sama sa gireseta nga mga droga, mahimong makadaot kon dili gamiton sa hustong paagi.
Ipabiling sagrado ang pakighilawas ug ang sekswal nga mga pagbati. Kinahanglan nga dili kini mao ang hilisgotan sa mga pakatawa o lingaw-lingaw. Gawas sa kaminyoon tali sa usa ka lalaki ug usa ka babaye, sayop ang paghikap sa pribado, sagrado nga mga bahin sa lawas sa lain nga tawo bisan kon nagsinina. Sa inyong mga pagpili mahitungod kon unsa ang inyong buhaton, tan-awon, basahon, paminawon, hunahunaon, i-post, o i-text, likayi ang bisan unsa nga tuyo nga makapaaghat og mahigalon nga mga emosyon diha sa uban o sa inyong kaugalingon. Kini naglakip sa pornograpiya sa bisan unsang matang. Kon makakaplag kamo og mga sitwasyon o mga kalihokan nga makapakusog sa mga tintasyon, likayi kini. Nahibalo kamo kon unsa kadto nga mga sitwasyon ug mga kalihokan. Ug kon dili kamo segurado, ang Espiritu, ang inyong mga ginikanan, ug ang inyong mga lider makatabang kaninyo nga mahibalo. Ipakita sa inyong Amahan sa Langit nga kamo mopasidungog ug motahod sa sagrado nga gahom sa pagmugna og kinabuhi.
Gisaad nga mga panalangin
Ang inyong pagtahod sa inyong kaugalingon ug sa uban molambo samtang kamo mopasidungog sa inyong lawas pinaagi sa inyong kinaiya, dagway, ug sinina.
Ang Ginoo misaad og dakong mga bahandi sa kahibalo ngadto niadtong kinsa motuman sa Pulong sa Kaalam. Ang usa ka himsog nga lawas, nga gawasnon gikan sa pagkaadik, mopalambo usab sa inyong abilidad sa pagdawat og personal nga pagpadayag, klaro nga paghunahuna, ug pagserbisyo sa Ginoo.
Ang pagsunod sa balaod sa kaputli magdala sa pag-uyon sa Dios ug personal nga espirituwal nga gahom. Kon kamo maminyo, kini nga balaod magdala og mas dako nga gugma, pagsalig, ug paghiusa sa inyong kaminyoon. Ang pagsunod niini nga balaod mohimong posible nga kamo mouswag sa kahangtoran ug mahimong mas sama sa inyong Langitnong Amahan. Ang inyong pagsalig molambo samtang kamo magpuyo isip usa ka disipulo ni Jesukristo.
Mga pangutana ug mga tubag
Unsa ang sumbanan sa Ginoo bahin sa sinina, pamostura, mga patik, ug mga pagpatusok? Ang sumbanan sa Ginoo mao ang inyong pagtahod sa kasagrado sa inyong lawas, bisan kon kana nagpasabot nga mahimong lahi gikan sa kalibotan. Himoa kini nga kamatuoran ug ang Espiritu nga maoy inyong giya samtang mohimo kamo og mga desisyon—ilabi na sa mga desisyon nga adunay malungtaron nga mga epekto sa inyong lawas. Mahimong maalamon ug matinud-anon, ug pagtinguha og tambag gikan sa inyong mga ginikanan ug mga lider.
Unsaon nako sa pagbuntog ang mga tintasyon ug ang ngil-ad nga mga naandan? Ang Langitnong Amahan ug si Jesukristo adunay gahom sa pagtabang kaninyo. Pun-a ang inyong kinabuhi sa mga butang nga modapit niana nga gahom ngadto sa inyong kinabuhi, sama sa pag-ampo, pagtuon sa kasulatan, ug pagserbisyo sa uban. Dangop ngadto kang Jesukristo ug sa Iyang ebanghelyo ug inyong makaplagan nga ang mga kahuyang mamahimo nga mga kalig-on. Pangayo og tabang gikan sa mga ginikanan, mga lider, ug propesyonal nga mga tigtambag kon gikinahanglan. Alang niadtong nag-antos sa pagkaadik, ang Simbahan nagtanyag og programa aron maulian gikan sa pagkaadik. Kini mao ang mga panalangin nga gihatag sa Simbahan sa Manluluwas aron sa pagtabang kaninyo sa pagkontrolar og usab sa inyong kinabuhi. Magkinahanglan kini og panahon, mao nga pagmapailobon, ug ayaw gayod og undang.
Maibog ko sa mga tawo nga sama nako og sekso. Sa unsang paagi kini nga mga sumbanan magamit ngari kanako? Ang pagbati og pagkaibog sa sama og sekso dili sala. Kon kamo aduna niini nga mga pagbati ug dili kini ipadayon o lihokon, kamo nagsunod sa sagrado nga balaod sa kaputli sa Langitnong Amahan. Kamo usa ka minahal nga anak sa Dios ug usa ka disipulo ni Jesukristo. Hinumdomi nga ang Manluluwas nakasabot sa tanan ninyong masinati. Pinaagi sa inyong pakigsaad nga koneksiyon ngadto Kaniya, makakaplag kamo og kalig-on sa pagtuman sa mga sugo sa Dios ug makadawat sa mga panalangin nga Iyang gisaad. Salig Kaniya ug sa Iyang ebanghelyo.
Naabuso ko, ug mibati ko og kaulaw. Nakasala ba ko? Ang pagkahimong usa ka biktima sa bisan unsang pag-abuso o pagdagmal wala naghimo kaninyo nga adunay sala. Palihog ayaw batia ang kahasol sa tanlag o kaulaw. Ang Manluluwas nahigugma kaninyo. Siya gustong motabang kaninyo, moayo kaninyo, ug mohatag kaninyo og kalinaw. Ang propesyonal nga mga tigtambag, inyong mga sakop sa pamilya, ug inyong mga lider makatabang usab.
Tan-awa sa Genesis 1:27 (gilalang kita sa hitsura sa Dios); Juan 14:18 (ang Manluluwas nagsaad og kahupayan); Mga Taga-Filipos 4:7 (ang kalinaw sa Dios milapaw sa tanang pagpanabot); Doktrina ug mga Pakigsaad 88:15 (ang espiritu ug ang lawas mao ang kalag); 89 (ang Pulong sa Kaalam); 121:45 (ang mahiyason nga mga hunahuna mosangpot sa dugang nga pagsalig).
Mga pangutana sa rekomend sa templo
Ang Ginoo miingon nga ang tanang butang kinahanglang “himo[on] nga limpyo” sa Iyang atubangan (Doktrina ug mga Pakigsaad 42:41). Ikaw ba naningkamot alang sa moral nga kalimpyo sa imong mga hunahuna ug kinaiya? Ikaw ba nagsunod sa balaod sa kaputli?
Ikaw ba nakasabot ug nagsunod sa Pulong sa Kaalam?