« អ័ប្រាហាំ ១ ៖ ‹ មានប្រាថ្នា…ធ្វើជា…អ្នកដើរតាមសេចក្ដីសុចរិត › » ព្រះគម្ពីរសញ្ញាចាស់ សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« អ័ប្រាហាំ ១ ៖ ‹ មានប្រាថ្នា…ធ្វើជា…អ្នកដើរតាមសេចក្ដីសុចរិត › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១២–១៧; អ័ប្រាហាំ ១–២ ៖ មេរៀនទី ២២
អ័ប្រាហាំ ១
« មានប្រាថ្នា…ធ្វើជា…អ្នកដើរតាមសេចក្ដីសុចរិត »
អ័ប្រាហាំបានធំដឹងក្ដីឡើងហ៊ុមព័ទ្ធដោយអំពើអាក្រក់ និងរូបព្រះ ។ ថ្វីបើមានកាលៈទេសៈទាំងនេះក៏ដោយក៏អ័ប្រាហាំមានបំណងប្រាថ្នាធ្វើតាមព្រះយេស៊ូវគ្រីស្ទ ដែលត្រូវបានគេស្គាល់នៅក្នុងជីវិតមុនផែនដី និងជាព្រះយេហូវ៉ាចំពោះអ័ប្រាហាំ ។ ពេលអ័ប្រាហាំចង់បានបំណងប្រាថ្នាដ៏សុចរិតរបស់លោក នោះព្រះអម្ចាស់បានប្រទានពរលោកឲ្យទទួលបានវា ។ មេរៀននេះអាចជួយសិស្សឲ្យមានសេចក្ដីសង្ឃឹមថា ព្រះវរបិតាសួគ៌អាចជួយពួកគេឲ្យទទួលបានពរជ័យដែលទ្រង់សព្វព្រះទ័យចង់ឲ្យពួកគេទទួលបាន ។
ការរៀបចំខ្លួនរបស់សិស្ស ៖ សូមអញ្ជើញសិស្សឲ្យធ្វើបញ្ជីពីអ្វីដែលពួកគេចង់បានបំផុតក្នុងជីវិត ហើយគិតអំពីថាតើព្រះវរបិតាសួគ៌មានព្រះទ័យយ៉ាងណាអំពីអ្វីដែលពួកគេចង់បានបំផុតនោះ ។
សកម្មភាពរៀនសូត្រដែលអាចមាន
តើអ្នកមានសេចក្តីប្រាថ្នាអ្វីខ្លះ ?
សូមចាប់ផ្ដើមមេរៀននេះដោយជួយសិស្សឲ្យគិតពីស្ថានភាពដែលពួកគេអាចមានបញ្ហាលើការជឿថា ព្រះអម្ចាស់អាចជួយពួកគេឲ្យទទួលបានពរជ័យដ៏សុចរិតមួយដែលពួកគេចង់បាន ។ ដើម្បីធ្វើបែបនេះ អ្នកអាចចែកចាយសាច់រឿងមិនពេញលេញដូចខាងក្រោមនេះ ហើយអញ្ជើញសិស្សឲ្យកំណត់ពីឧបសគ្គមួយដែលបុគ្គលម្នាក់ៗអាចប្រឈមមុខ ។
សាម៉ាន់ថាមានបំណងប្រាថ្នាចង់ធ្វើតាមព្រះយេស៊ូវគ្រីស្ទយ៉ាងខ្លាំង ដោយការផ្សព្វផ្សាយដំណឹងល្អរបស់ទ្រង់ទៅកាន់មនុស្សដទៃ ។ ទោះជាយ៉ាងណា ឥឡូវនេះរឿងនេះហាក់ដូចជាពិបាក ព្រោះ…
យូឆិនមានបំណងប្រាថ្នាចង់ធ្វើតាមព្រះយេស៊ូវគ្រីស្ទយ៉ាងខ្លាំង ដោយបង់ដង្វាយមួយភាគក្នុងដប់របស់គាត់ ។ ទោះជាយ៉ាងណា ឥឡូវនេះរឿងនេះហាក់ដូចជាពិបាក ព្រោះ…
កាឡូសមានបំណងប្រាថ្នាចង់ធ្វើតាមព្រះយេស៊ូវគ្រីស្ទយ៉ាងខ្លាំង ដោយការទទួលពិធីបុណ្យជ្រមុជទឹក ។ ទោះជាយ៉ាងណា ឥឡូវនេះរឿងនេះហាក់ដូចជាពិបាក ព្រោះ…
សូមអញ្ជើញសិស្សឲ្យគិតអំពីកាលៈទេសៈរបស់ខ្លួន និងឧបសគ្គនានាដែលពួកគេអាចប្រឈមមុខក្នុងការធ្វើតាមព្រះយេស៊ូវគ្រីស្ទ ។ សុំឲ្យពួកគេបំពេញជំហានខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
នៅក្នុងសៀវភៅកំណត់ហេតុការសិក្សារបស់អ្នក ៖
-
កត់ត្រាពរជ័យមួយចំនួនដែលអ្នកចង់បានបំផុតនៅក្នុងជីវិត ។
-
សរសេរឧបសគ្គណាមួយដែលអ្នកជួប ដែលនាំទៅរកពរជ័យទាំងនេះ ។
នៅពេលសិស្សសិក្សា អ័ប្រាហាំ ១ សូមអញ្ជើញពួកគេឲ្យស្វែងរកជំនួយពីព្រះវរបិតាសួគ៌តាមរយៈព្រះវិញ្ញាណបរិសុទ្ធ ។ ព្រះវិញ្ញាណបរិសុទ្ធអាចជួយពួកគេឲ្យមានសេចក្ដីសង្ឃឹមថា ពួកគេអាចដើរតាមព្រះយេស៊ូវគ្រីស្ទ ហើយទទួលបានពរជ័យរបស់ទ្រង់ មិនថាពួកគេអាចជួបនឹងឧបសគ្គអ្វីនោះទេ ។
កាលៈទេសៈរបស់អ័ប្រាហាំ
ក្នុងមេរៀនទី ៣ ៖ អ័ប្រាហាំ ៣ សិស្សបានរៀនអំពីដើមកំណើតនៃគម្ពីរអ័ប្រាហាំ ។ ប្រសិនបើអ្នកមិនបានពន្យល់រឿងនេះនៅក្នុងមេរៀនទី ៣ ទេអ្នកអាចធ្វើវាឥឡូវនេះបាន ។ ប្រសិនបើសិស្សមានសំណួរអំពីដើមកំណើតនៃគម្ពីររបស់អ័ប្រាហាំ អ្នកអាចបង្ហាញវីដេអូនេះ « The Book of Abraham | Now You Know »ចាប់ពីនាទីទី ០:០០ ដល់ ២:៤៣ ។ វីដេអូនេះមាននៅគេហទំព័រ ChurchofJesusChrist.org ។
វាអាចមានប្រយោជន៍ក្នុងការឲ្យសិស្សបង្កើតតារាងជួរឈរពីរ ។ ពួកគេអាចដាក់ចំណងជើងជួរឈរទីមួយថា « ពរជ័យដែលអ័ប្រាហាំប្រាថ្នាចង់បាន » និងជួរឈរទីពីរ « ឧបសគ្គដែលអ័ប្រាហាំបានជួប » ។ ការណ៍នេះអាចជួយរៀបចំអ្វីដែលសិស្សរៀននៅក្នុង អ័ប្រាហាំ ១:១–៧ ។
|
ពរជ័យដែលអ័ប្រាហាំប្រាថ្នាចង់បាន |
ឧបសគ្គដែលអ័ប្រាហាំបានជួប |
|---|---|
ពរជ័យដែលអ័ប្រាហាំប្រាថ្នាចង់បាន | ឧបសគ្គដែលអ័ប្រាហាំបានជួប |
សូមអាន អ័ប្រាហាំ ១:១–៧ ដោយរកមើលពរជ័យដែលអ័ប្រាហាំប្រាថ្នាចង់បាន និងឧបសគ្គដែលអ័ប្រាហាំបានជួបដើម្បីទទួលបានពរជ័យទាំងនោះ ។
-
តើអ្វីដែលលេចធ្លោចំពោះអ្នកអំពីពរជ័យដែលអ័ប្រាហាំប្រាថ្នាចងបាន ?
-
ហេតុអ្វីពរជ័យទាំងនេះអាចជាអ្វីដែលអ្នកចង់បានដែរ ?
-
តើបំណងប្រាថ្នារបស់អ័ប្រាហាំ ដើម្បីធ្វើតាមព្រះយេស៊ូវគ្រីស្ទបានជួយលោកនៅកាលៈទេសៈលំបាកដែលលោកបានឆ្លងកាត់យ៉ាងដូចម្ដេច ?
ព្រះយេហូវ៉ាបានជួយអ័ប្រាហាំឲ្យយកឈ្នះឧបសគ្គរបស់លោក
សូមអាន អ័ប្រាហាំ ១:១៥–២០ ដោយរកមើលរបៀបដែលព្រះយេហូវ៉ាបានជួយអ័ប្រាហាំ ឲ្យយកឈ្នះឧបសគ្គដែលលោកបានឆ្លងកាត់ ។
ជាជម្រើស អ្នកអាចជ្រើសរើសបង្ហាញវីដេអូ « Deliverance of Abraham » ( ១:៣៨ ) ដែលមាននៅលើគេហទំព័រ ChurchofJesusChrist.org ។
បើមានពេល អ្នកគួរចំណាយពេលខ្លះពិភាក្សាអំពីរបៀបដ៏អស្ចារ្យដែលព្រះយេហូវ៉ាបានជួយសង្គ្រោះអ័ប្រាហាំ ។ អ្នកអាចប្រៀបធៀបការរំដោះនេះទៅនឹងរបៀបដែលព្រះអម្ចាស់នាំយើងចេញពីឧបសគ្គរបស់យើងឆ្ពោះទៅកាន់ការរស់នៅដ៏សុចរិត ។ ព្រះអម្ចាស់អាចរំដោះយើងពីទម្លាប់មិនល្អដូចជាប្រព័ន្ធផ្សព្វផ្សាយសង្គម ឬការប្រើប្រាស់បច្ចេកវិទ្យាហួសប្រមាណ ឬការប្រើប្រាស់រូបអាសគ្រាមជាដើម ។ អ្នកអាចថ្លែងទីបន្ទាល់ថា ព្រះយេហូវ៉ា អាចរំដោះយើងពីឧបសគ្គនានា ដែលអាចធ្វើឲ្យមានការលំបាកក្នុងការធ្វើតាមទ្រង់ ។
-
តើអ្នកគិតថា អ័ប្រាហាំបានរៀនអ្វីខ្លះអំពីព្រះយេហូវ៉ា នៅក្នុងបទពិសោធន៍នេះ ?
-
តើព្រះវរបិតាសួគ៌អាចជួយយើងយកឈ្នះឧបសគ្គនានា ដើម្បីទទួលបានពរជ័យដ៏សុចរិតដែលយើងចង់បានដោយរបៀបណា ?
សូមពន្យល់ដល់សិស្សថា ក្រោយពីអ័ប្រាហាំត្រូវបានជួយសង្គ្រោះ នៅទីបំផុតលោកបានទៅកាន់ស្រុកកាណាន ។ ព្រះអម្ចាស់ទ្រង់បានប្រទានកិត្តិយសដល់អ័ប្រាហាំ ចំពោះការប្រព្រឹត្តតាមបំណងប្រាថ្នារបស់លោក ដោយប្រទានពរដល់លោកនូវបព្វជិតភាព និងពរជ័យដ៏សំខាន់ផ្សេងទៀត ។ ព្រះបានសន្យានឹងអ័ប្រាហាំនូវពរជ័យទាំងនេះដែលជាផ្នែកមួយនៃអ្វីដែលយើងហៅថាសេចក្ដីសញ្ញាអ័ប្រាហាំ ។ សិស្សនឹងរៀនបន្ថែមទៀតអំពីសេចក្ដីសញ្ញានេះនៅមេរៀនក្រោយៗទៀត ។
ក្រោយមកទៀតនៅក្នុងជីវិតរបស់អ័ប្រាហាំ ព្រះអម្ចាស់បានមកជួបនឹងលោក ហើយបានសន្យាថា ទ្រង់នឹងបំពេញសេចក្ដីប្រាថ្នាដ៏សុចរិតទាំងអស់របស់អ័ប្រាហាំ ( សូមមើល អ័ប្រាហាំ ២:៩–១១ ) ។ សូមអាន អ័ប្រាហាំ ២:១២–១៣ ដោយរកមើលអ្វីដែលអ័ប្រាហាំបាននិយាយបន្ទាប់ពីបទពិសោធន៍នេះ ។
-
តើយើងអាចរៀនគោលការណ៍អ្វីខ្លះចេញពីបទពិសោធន៍របស់អ័ប្រាហាំ ?
សិស្សអាចកំណត់គោលការណ៍ខុសៗគ្នារួមមាន ៖ ប្រសិនបើយើងខិតខំធ្វើតាមព្រះយេស៊ូវគ្រីស្ទ ព្រះនឹងប្រទានដល់យើងនូវពរជ័យសុចរិតដែលយើងប្រាថ្នាចង់បាន ។
សូមអានសេចក្ដីថ្លែងការណ៍ខាងក្រោមមកពីប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ឬមើលវីដេអូ« A Perfect Brightness of Hope »ចាប់ពីនាទីទី ១១:០៩ ដល់ ១១:៣៨ ។ វីដេអូនេះមាននៅលើគេហទំព័រ ChurchofJesusChrist.org ។
ហេតុអ្វីបានជាយើងមិនគួរសង្ឃឹមថា សេចក្ដីប៉ងប្រាថ្នាដ៏សុចរិត និងការចង់បានដូចព្រះគ្រីស្ទនៅតែអាចឆ្លើយតបដោយអព្ភូតហេតុយ៉ាងអស្ចារ្យដោយព្រះនៃរាល់សេចក្ដីសង្ឃឹម ? យើងទាំងអស់គ្នាត្រូវជឿថា អ្វីដែលយើងប្រាថ្នាក្នុងសេចក្ដីសុចរិតអាចក្លាយជារបស់យើងនៅថ្ងៃណាមួយ តាមរបៀបមួយមិនខាន ។ ( « A Perfect Brightness of Hope » Liahona ខែ ឧសភា ឆ្នាំ២០២០ ទំព័រ ៨៣ )
សូមអញ្ជើញសិស្សឲ្យពិភាក្សាអំពីសំណួរខាងក្រោមនេះជាគូ ឬជាក្រុមតូចៗ ឬឲ្យសិស្សកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ បន្ទាប់ពីមានពេលគ្រប់គ្រាន់ហើយ សិស្សដែលស្ម័គ្រចិត្ដអាចចែកចាយចម្លើយមួយ ឬទាំងពីររបស់ពួកគេជាមួយនឹងសិស្សក្នុងថ្នាក់ ។
-
តើប្រសាសន៍របស់ប្រធាន ហូឡិន និងបទពិសោធន៍របស់អ័ប្រាហាំ ផ្ដល់សេចក្តីសង្ឃឹមដល់អ្នកយ៉ាងដូចម្ដេច ដែលព្រះអម្ចាស់អាចជួយអ្នកឲ្យយកឈ្នះឧបសគ្គនានាដើម្បីធ្វើតាមព្រះយេស៊ូវគ្រីស្ទ ?
-
តើព្រះវរបិតាសួគ៌បានជួយអ្នក ឬមនុស្សម្នាក់ដែលអ្នកស្គាល់ ឲ្យយកឈ្នះឧបសគ្គដើម្បីធ្វើតាមព្រះយេស៊ូវគ្រីស្ទនៅពេលណាដែរ ?
សូមពិចារណាចែកចាយបទពិសោធន៍របស់អ្នកអំពីពេលដែលព្រះវរបិតាសួគ៌បានជួយអ្នកឲ្យយកឈ្នះឧបសគ្គដើម្បីទទួលបានពរជ័យដ៏សុចរិតមួយ ។
សូមអញ្ជើញសិស្សឲ្យកត់ត្រាអ្វីដែលពួកគេបានរៀននៅថ្ងៃនេះនៅក្នុងសៀវភៅកំណត់ហេតុការសិក្សារបស់ពួកគេ ។
សូមពិចារណាអញ្ជើញសិស្សដែលស្ម័គ្រចិត្តឲ្យចែកចាយអ្វីដែលពួកគេបានសរសេរ ។ សូមបញ្ចប់ដោយចែកចាយទីបន្ទាល់របស់អ្នកអំពីសេចក្ដីពិតទាំងនេះ ។