Moisiu 7: Mësimi 18

Moisiu 7:53–69

Mbreti i Sionit do ta Ruajë Popullin e Tij

Një nga titujt e Shpëtimtarit është “Mbreti i Sionit” (Moisiu 7:53). Ai kujdeset për popullin e Tij dhe, në ditët e fundit, Ai do t’i ruajë ata nga mundimet e mëdha që do të ndodhin. Ky mësim mund t’i ndihmojë nxënësit ta dallojnë dhe vlerësojnë atë që Zoti ka bërë për t’i ndihmuar ata t’i kapërcejnë sprovat e kohës sonë.

Përgatitja e nxënësve: Ftojini nxënësit të vijnë të përgatitur për të treguar një fragment nga Libri i Mormonit që i ka ndihmuar ata kur janë përballur me sprova.

Veprimtari të Mundshme të të Mësuarit

Mundime të mëdha në ditët e fundit

Ftojini nxënësit të përfytyrojnë sikur po afrohet një stuhi e madhe në qytetin tuaj. Nëse është e dobishme, mund të paraqitni figurën e një stuhie të madhe.

• Cilat janë disa nga sprovat ose vështirësitë e mëdha të ditëve të fundit? Si mund të krahasohen këto sprova dhe vështirësi me një stuhi?

• Cilat janë disa mënyra për të kërkuar siguri nga këto stuhi?

Ftojini nxënësit të përsiatin ndjenjat e tyre rreth këtyre stuhive dhe përpjekjet e tyre për të gjetur siguri. Vlerësimi vijues i vetes është një mënyrë se si mund ta bëni këtë:

Përsiat se sa të vërteta janë për ty pohimet vijuese:

• E di çfarë ka bërë Zoti për të më ndihmuar gjatë stuhive (sprovave dhe vështirësive) me të cilat përballem.

• E vlerësoj atë që ka bërë Zoti dhe e dëshiroj sinqerisht ndihmën e Tij.

Ftojini nxënësit të kërkojnë frymëzim nga Fryma e Shenjtë teksa studiojnë. Fryma e Shenjtë mund të na mësojë rreth mënyrave se si Zoti mund t’i ndihmojë nxënësit gjatë stuhive me të cilat përballen.

Mbreti i Sionit

Enoku dhe populli i tij ndërtuan atë që u quajt “Qyteti i Shenjtërisë, madje Sion” (Moisiu 7:19). Zoti premtoi se ata do të “bano[nin] në siguri përgjithmonë” (Moisiu 7:20). Enoku më pas e pa dhe vajtoi për shkatërrimin që do të vinte gjatë përmbytjes. Duke kërkuar ngushëllim, Enoku pyeti a do të kishte Zoti mëshirë për njerëzit që erdhën pas përmbytjes. Si përgjigje, Zoti dha mësim dhe i tregoi Enokut Shpëtimtarin dhe Shlyerjen e Tij (shih te Moisiu 7:42–57).

Lexo te Moisiu 7:53, duke kërkuar mënyrën se si Shpëtimtari e përshkroi Veten.

• Si mund ta ngushëllonin Enokun gjërat që tregoi Zoti në këtë varg?

Ftojini nxënësit t’i shenjojnë dhe diskutojnë titujt dhe rolet e ndryshme të Jezu Krishtit te vargu 53. Ky mësim do të përqendrohet tek titulli i Tij “Mbreti i Sionit”. Ju mund të bëni pyetje për ndjekjen e ecurisë rreth këtij titulli si:

• Në ç’mënyrë është Jezu Krishti si një mbret i fuqishëm dhe i dashur për ne?

• Cilat fraza të tjera nga ky varg përshkruajnë bekimet që do të donit nga ndjekja e Mbretit të Sionit?

Merreni parasysh t’u kujtoni nxënësve që Sioni përbëhet nga kushdo që, njësoj si populli i Enokut është “[i] kulluar në zemër” (Doktrina e Besëlidhje 97:21) – njerëz që janë si Zoti.

Zoti do ta ruajë popullin e Tij

Enoku e pyeti Zotin a do të vinte Ai përsëri në tokë. Zoti i tregoi Enokut ditët e fundit dhe gjërat që Ai do të bënte për njerëzit që përpiqen fort ta ndjekin Atë.

Lexo te Moisiu 7:60–61, duke kërkuar atë që Zoti premtoi të bënte.

• Çfarë mendon se do të thotë që Zoti t’i “ruaj[ë]” njerëzit që përpiqen fort ta ndjekin Atë?

Teksa nxënësit lexojnë te Moisiu 7:62 sikurse udhëzohet më poshtë, nëse doni, mund t’i ndihmoni ata të kuptojnë se sa aktiv është Perëndia për ruajtjen e popullit të Tij. Një mënyrë për ta bërë këtë është t’i ftoni nxënësit t’i kushtojnë vëmendje përdorimit të fjalës unë dhe çdo foljeje në vetën e parë numri njëjës. Mund edhe t’i ftoni ata të vënë re se kur Zoti përdor fjalët im, e mi ose tim, sim dhe fjalët me të cilat janë të lidhura këto.

Megjithëse Enoku kishte parë në vegim përmbytjen shkatërruese në kohën e Noeut, Zoti më pas i tregoi Enokut mënyrat se si Ai do ta mblidhte popullin te Vetja dhe do ta ruante atë.

Lexo te Moisiu 7:62, duke kërkuar atë që Zoti do të bëjë për ta ruajtur popullin e Tij.

• Cilat janë disa nga gjërat që Zoti do t’i bëjë për ta ruajtur popullin e Tij?

  Shkruajeni frazën vijuese në tabelë: Për ta ruajtur popullin e Tij në ditët e fundit, Zoti do të …

  Ndërsa nxënësit përgjigjen, shkruajini frazat vijuese në tabelë:

  dërgojë drejtësi nga qiejt.

  dërgojë të vërtetën nga toka.

  mbledhë popullin e Tij në Sion (shihni edhe te Doktrina e Besëlidhje 115:6).

• Cilat janë disa mënyra se si Zoti po e përmbush këtë profeci në kohën tonë?

Drejtësi nga qiejt dhe të vërtetën nga toka për të na mbledhur në Sion

Për t’i ndihmuar nxënësit t’i kuptojnë tre aspektet e ndryshme të kësaj të vërtete, mund të shkruani: “Drejtësi nga qiejt”, “Të vërtetën nga toka” dhe “Sion”, secilën në tabelë në kolona të ndara. Në vijim janë fjali dhe figura të lidhura me secilin aspekt. Shkruajeni çdo fjali në një copë të veçantë letre ose paraqitni figurat. Nxënësit më pas mund ta përkojnë fjalinë ose figurën me një nga krerët në tabelë.

Drejtësi nga qiejt

• Jozef Smithi mori Vegimin e Parë.

• Gjon Pagëzori i dha Jozef Smithit Priftërinë Aarone.

• Pjetri, Jakobi dhe Gjoni i dhanë Jozef Smithit Priftërinë Melkizedeke.

• Zoti zbuloi librin Doktrina e Besëlidhje.

• Zoti e zbulon fjalën e Tij nëpërmjet profetëve bashkëkohorë.

Të vërtetën nga toka

• Jozef Smithi i mori dhe i përktheu fletët e arta.

Sioni

• Ne të gjithë jemi pjesë e një lagjeje ose dege.

Ndihmojini nxënësit të përsiatin rëndësinë e asaj që ka bërë Zoti. Një mënyrë se si mund ta bëni këtë, është t’i ftoni nxënësit ta plotësojnë atë sa vijon në ditarët e tyre të studimit. Nëse përdorët veprimtarinë e mëparshme, nxënësit mund të përzgjedhin diçka nga lista në tabelë.

Përcakto dy mënyra se si Zoti po e ruan popullin e Tij nga mundimet e kohës sonë dhe përgjigju për pyetjet vijuese. Nëse është e mundur, mendo për një shembull konkret. Mund të përmendësh një përvojë me priftërinë, një fragment nga Libri i Mormonit, një përvojë në lagjen ose degën tënde dhe kështu me radhë.

• Si të ka ndihmuar ky shembull të arrish ta njohësh më mirë Shpëtimtarin?

• Si të ka ndihmuar ose mund të të ndihmojë kjo për vështirësitë e ditëve të fundit?

Ftojini disa nxënës të japin përgjigjet e tyre.

Kërkoni mënyra për t’i ndihmuar nxënësit të dallojnë dhe vlerësojnë gjithçka që ka bërë Zoti për t’i ndihmuar ata për sprovat dhe vështirësitë në ditët e fundit. Një mënyrë se si mund ta bëni këtë, është të dëgjoni me kujdes se çfarë thonë nxënësit dhe të thoni se çfarë mund të na mësojë ajo rreth karakterit dhe natyrës së Zotit. (Për trajnim shtesë mbi ndihmën ndaj nxënësve që ta njohin dhe ndiejnë dashurinë e Zotit, shihni pjesën “Help Learners Strengthen Their Relationship with Heavenly Father and Jesus Christ” [“Ndihmojini Nxënësit ta Forcojnë Marrëdhënien e Tyre me Atin Qiellor dhe Jezu Krishtin”] te Teacher Development Skills [Zotësitë për Përmirësimin e Mësuesve].)

Burime Shtesë

A do të ruhet çdo person i drejtë nga të gjitha mundimet në ditët e fundit?

Profeti Jozef Smith (1805–1844) dha mësim:

“[Unë] shpjegova në lidhje me ardhjen e Birit të Njeriut; gjithashtu që është ide e rreme që shenjtorët do t’i shpëtojnë gjithë gjykimeve ndërsa të ligjtë vuajnë; sepse gjithë mishi i nënshtrohet vuajtjes dhe ‘shenjtorët … mezi do të shpëtojnë’ [shih DeB 63:34]; përsëri shumë prej shenjtorëve do të shpëtojnë, sepse i drejti do të rrojë për shkak të besimit të tij [shih Habakuk 2:4]; përsëri shumë prej të drejtëve do të bien pre e sëmundjes, murtajës etj., për shkak të dobësisë së mishit, dhe përsëri do të shpëtohen në Mbretërinë e Perëndisë”. (Mësimet e Presidentëve të Kishës: Jozef Smith [2009], f. 268)

Si do të dërgojë Perëndia drejtësi nga qielli dhe të vërtetën nga toka?

Presidenti Ezra Taft Benson (1899–1994) dha mësim:

“Libri i Mormonit ka dalë në dritë nga toka, i mbushur me të vërtetën, duke shërbyer pikërisht si ‘gur[i kyç] i besimit tonë’ (shih te Parathënia e Librit të Mormonit). Perëndia ka dërguar gjithashtu drejtësi nga qielli. Vetë Ati iu shfaq me Birin e Tij Profetit Jozef Smith. Engjëlli Moroni, Gjon Pagëzori, Pjetri, Jakobi dhe shumë engjëj të tjerë u udhëzuan nga qielli për t’i rivendosur mbretërisë fuqitë e nevojshme. Më tej, Profeti Jozef Smith mori zbulesë pas zbulese nga qiejt gjatë atyre viteve të para kritike të rritjes së Kishës. Këto zbulesa janë ruajtur për ne te Doktrina e Besëlidhje.

Këto dy vepra të mëdha shkrimesh të shenjta, atëherë, bëhen një mjet madhor në duart e Zotit për ruajtjen e popullit të Tij në ditët e mëvonshme.” (“The Gift of Modern Revelation”, Ensign, tetor 1986, f. 79–80)

Si do të bekohem për mbledhjen në Sion dhe në kunjet e tij?

Presidenti Dallin H. Ouks, i Presidencës së Parë, dha mësim:

“Me krijimin e kunjeve dhe ndërtimin e tempujve në shumë kombe me popullsi të konsiderueshme të anëtarëve besnikë, urdhërimi i tanishëm është të mos mblidhen në një vend, por të mblidhen në kunjet në vendlindjet e tyre amtare. Atje anëtarët besnikë mund të gëzojnë bekimet e plota të përjetësisë në një shtëpi të Zotit. Atje, në vendlindjet e tyre amtare, ata mund t’i binden urdhrit të Zotit për t’i zgjeruar kufijtë e popullit të Tij dhe për t’i forcuar kunjet e tij (shih te Doktrina e Besëlidhje 101:21; 133:9, 14). Në këtë mënyrë, kunjet e Sionit janë “për mbrojtje e për strehim nga stuhia dhe nga zemërimi, kur të derdhen pa u zvogëluar mbi tërë dheun” (Doktrina e Besëlidhje 115:6). (“Preparation for the Second Coming”, Liahona, maj 2004, f. 8)

Plaku D. Tod Kristoferson, i Kuorumit të Dymbëdhjetë Apostujve, shpalli:

“Ne duhet ta pranojmë se ndërtimi i Sionit ndodh në kohë të trazuara – ‘një ditë zemërimi, një ditë djegie[je], një ditë shkatërrimi, kuje, vajtimi dhe ankimi; dhe si një vorbull do të vijë mbi gjithë faqen e tokës, thotë Zoti’ [Doktrina e Besëlidhje 112:24]. Pra, mbledhja në kunje bëhet ‘për mbrojtje e për strehim nga stuhia dhe nga zemërimi, kur të derdhen pa u zvogëluar mbi tërë dheun’ [Doktrina e Besëlidhje 115:6]. …

Kjo periudhë madhështore dhe e fundit ungjillore po shkon vazhdimisht drejt kulmit të saj – Sioni në tokë, që bashkohet me Sionin nga lart në kthimin e lavdishëm të Shpëtimtarit. Kisha e Jezu Krishtit është e autorizuar ta përgatitë – dhe po e përgatit – botën për atë ditë.” (“Duke u Përgatitur për Kthimin e Zotit”, Liahona, maj 2019, f. 82, 84)

Moisiu 7:62. Si mund ta ndihmojmë drejtësinë dhe të vërtetën “të derdhe[n] mbi tokë si në një përmbytje”?

Plaku Dejvid A. Bednar, i Kuorumit të Dymbëdhjetë Apostujve, na ftoi:

“Ajo që është përmbushur deri më tani në këtë periudhë ungjillore, duke kumtuar mesazhet e ungjillit nëpërmjet kanaleve të mediave shoqërore, është një fillim i mbarë – por veçse një rrëke e vogël. Tani ju shtroj ftesën për ta ndihmuar këtë rrëke të kthehet në një përmbytje. Duke filluar nga sot, unë ju këshilloj ta mbuloni tokën me mesazhe të mbushura me drejtësi dhe të vërtetë – mesazhe që janë të sakta, lartësuese dhe për t’u lavdëruar – dhe me plot kuptimin e fjalës ta mbuloni tokën sikurse një përmbytje (shih te Moisiu 7:59–62).” (“Flood the Earth through Social Media”, Liahona, gusht 2015, f. 53)

Veprimtari Plotësuese të të Mësuarit

Moisiu 7:53. “Shkëmbi i Qiellit”

Nëse ndieni se nxënësit do të kishin dobi nga studimi i titullit dhe rolit të Shpëtimtarit si Shkëmbi i Qiellit, merreni parasysh sa vijon. Mund të përdorni vargjet te 2 Nefi 31:17–20 për t’i ndihmuar nxënësit ta kuptojnë frazën “ai që hyn me anë të portës dhe ngjitet deri tek unë, nuk do të bjerë kurrë” (Moisiu 7:53). Nxënësit mund të zbulojnë se cila është porta, cili është shtegu dhe si të çon ai te Jezu Krishti. Mund edhe të përdorni vargun te Helamani 5:12 për të diskutuar se si nuk mund të biem kur e ndërtojmë themelin tonë mbi Jezu Krishtin.

Shpërndajeni ungjillin e Shpëtimtarit nëpërmjet mediave shoqërore

Mund të paraqitni thënien nga Plaku Dejvid A. Bednar te pjesa Burime Shtesë ose të shfaqni materialin filmik “To Sweep the Earth as with a Flood” [“Të Mbulojë Tokën si një Përmbytje”] (2:56). Pyetini nxënësit se çfarë prove shohin se mesazhet e ungjillit në mediat shoqërore po e mbulojnë tokën si një përmbytje. Jepuni kohë nxënësve në orën mësimore për të krijuar dhe shpërndarë një mesazh në mediat shoqërore rreth ungjillit të Jezu Krishtit. Ftojini disa nxënës t’ia tregojnë klasës mesazhin që krijuan. Mund edhe t’i ftoni nxënësit të ndjekin llogaritë e Presidencës së Parë, Kuorumit të Dymbëdhjetë Apostujve dhe udhëheqësve të tjerë të Kishës në mediat shoqërore. Nxënësit mund të shohin shembuj të mënyrave se si këta udhëheqës e shpërndajnë ungjillin e Shpëtimtarit duke përdorur mediat shoqërore.

Moisiu 7:62. “Sepse atje do të jetë tabernakulli im”

Nxënësit mund të kenë dobi nga të parit se si do ta themelojë Zoti tabernakullin e Tij në Jerusalemin e Ri. Diskutojeni rëndësinë e tempullit në Sion dhe sigurinë që mund të gjejmë në Shtëpinë e Zotit. Mund të përdorni thënien nga Presidenti Dallin H. Ouks te pjesa Burime Shtesë si pjesë të diskutimit.