« ម៉ូសេ ៧:១–២១ ៖ ‹ ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ម៉ូសេ ៧:១–២១ ៖ « ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ម៉ូសេ ៧ ៖ មេរៀនទី ១៦
ម៉ូសេ ៧:១–២១
« ព្រះអម្ចាស់ទ្រង់បានហៅរាស្ត្រទ្រង់ថាស៊ីយ៉ូន »
ព្រះបានហៅហេណុកឲ្យធ្វើជាព្យាការី ដើម្បីផ្សព្វផ្សាយសារលិខិតនៃដំណឹងល្អ ។ ប្រជារាស្ត្រដែលជ្រើសរើសដើរតាមហេណុកបានប្រមូលផ្តុំគ្នា ហើយព្រះអម្ចាស់បានការពារពួកគេពីអំពើទុច្ចរិតនៅជុំវិញពួកគេ ។ នៅទីបំផុត ពួកគេបានបង្កើតជាទីក្រុងដ៏ពោរពេញដោយអំណរ និងបរិសុទ្ធមួយ ដែលព្រះអម្ចាស់ហៅថា « ស៊ីយ៉ូន » ( ម៉ូសេ ៧:១៨ ) ។ មេរៀននេះអាចជួយសិស្សអភិវឌ្ឍលក្ខណៈដូចជាព្រះគ្រីស្ទ ដែលហេណុក និងរាស្ត្ររបស់ទ្រង់មាន ។
ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីអតីតកាលរបស់ពួកគេ និងឥទ្ធិពលដែលសកម្មភាពរបស់ពួកគេអាចមានលើមនុស្សផ្សេងទៀត ។
សកម្មភាពរៀនសូត្រដែលអាចមាន
កម្លាំងតាមរយៈឫសដែលទាក់ទងគ្នាទៅវិញទៅមក
សូមគិតអំពីវិធីមួយដើម្បីចាប់ផ្តើមមេរៀន ដោយជួយសិស្សឲ្យស្គាល់ពីកម្លាំងដែលអាចបានមកពីការរួមសាមគ្គីជាមួយនឹងអ្នកដទៃ ។ ខាងក្រោមនេះគឺជារបៀបមួយដែលអ្នកអាចធ្វើការណ៍នេះបាន ។
-
តើអ្នកគិតថា ប្រភេទដើមឈើដែលខ្ពស់ជាងគេបំផុតអាចលូតលាស់បានកម្ពស់ប៉ុន្មាន ?
ដើមឈើខ្ពស់ជាងគេបំផុតនៅលើពិភពលោក គឺដើមរេដវូដ ។ វាអាចលូតបានដល់កម្ពស់ជាង ៣០០ ហ្វីត ( ៩២ ម៉ែត្រ ) ។
-
ដើម្បីទ្រទ្រង់ដើមដ៏ខ្ពស់បែបនេះ តើអ្នកគិតថាឫសដើមរេដវូដមួយដើមមានលក្ខណៈដូចម្ដេច ?
គួរឲ្យភ្ញាក់ផ្អើល ឫសដើមរេដវូដមានជម្រៅត្រឹមតែ ៣–៦ ហ្វីត ( ១–២ ម ) ប៉ុណ្ណោះ ។ ទោះជាយ៉ាងណាក៏ដោយ ឫសទាំងនេះបានលាតសន្ធឹងជាច្រើនរយហ្វីត ( ជាង ១០០ ម ) ហើយបានប្រទាក់ជាប់នឹងឫសនៃដើមឈើផ្សេងៗទៀត ។ ការចាក់ឬសភ្ជាប់គ្នានេះហើយធ្វើឲ្យដើមរេដវូដ ឈរយ៉ាងរឹងមាំរយៈពេលរាប់រយឆ្នាំតទល់នឹងខ្យល់ និងទឹកជំនន់ ( សូមមើល រីឆាត អេក វីងគ្លីល « Web of Friendship » New Era ខែ សីហា ឆ្នាំ ២០០៣ ទំព័រ ១០–១១ ) ។
-
តើអ្នកគិតថា យើងអាចរៀនសូត្រអ្វីខ្លះពីដើមរេដវូដ ដែលអាចជះឥទ្ធិពលដល់គ្រួសារ សាលារៀន និងវួដ ឬសាខាទាំងឡាយរបស់យើង ?
-
តើអ្នកគិតថា ហេតុអ្វីបានជាព្រះអម្ចាស់ចង់ឲ្យយើងស្វែងរកកម្លាំងនៅក្នុងអ្នកដទៃជុំវិញយើង ក៏ដូចជានៅក្នុងទ្រង់ផងដែរនោះ ?
ដើម្បីជួយសិស្សវាយតម្លៃថាតើពួកគេមានទំនាក់ទំនងល្អយ៉ាងណាទៅនឹងមនុស្សជុំវិញខ្លួន សូមអញ្ជើញសិស្សឲ្យឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សារបស់ពួកគេ ៖
-
តើអ្នកដទៃជួយ និងគាំទ្រអ្នកយ៉ាងដូចម្ដេច ជាពិសេសនៅក្នុងការខិតខំរបស់អ្នកដើម្បីចូលមកជិតព្រះអង្គសង្គ្រោះ ? ( ការណ៍នេះអាចនឹងមាននៅក្នុងគ្រួសារ វួដ ឬសាខារបស់អ្នក ក្រុមមិត្តភក្តិ សហគមន៍ ជាដើម ) ។
-
តើអ្នកព្យាយាមគាំទ្រអ្នកដទៃ និងជួយពួកគេឲ្យមានអារម្មណ៍កាន់តែជិតស្និទ្ធជាមួយព្រះអង្គសង្គ្រោះយ៉ាងដូចម្ដេច ?
នៅពេលសិស្សសិក្សាមេរៀននេះ សូមអញ្ជើញពួកគេឲ្យឆាប់ដឹងអំពីចំណាប់អារម្មណ៍នៃព្រះវិញ្ញាណបរិសុទ្ធ ។ ព្រះវិញ្ញាណបរិសុទ្ធអាចបង្រៀនពួកគេពីរបៀបដែលពួកគេអាចបង្កើនកម្លាំងដែលពួកគេទទួលអារម្មណ៍ពីព្រះ និងពីមនុស្សជុំវិញពួកគេ ។
កម្លាំងនៅស៊ីយ៉ូន
នៅក្នុងការនិមិត្តមួយ ព្រះអម្ចាស់បានហៅព្យាការីហេណុក ដើម្បីផ្សាយអំពីការប្រែចិត្ត និងពិធីបុណ្យជ្រមុជទឹកទៅកាន់ទីក្រុងមួយចំនួន ។ ប្រជារាស្រ្តដែលដើរតាមហេណុកបានមកជួបជុំគ្នា ។
សូមអាន ម៉ូសេ ៧:១៣, ១៦–១៧ ដោយស្វែងរកភាពផ្ទុយគ្នារវាងរាស្ត្រដែលកំពុងព្យាយាមធ្វើតាមព្រះអម្ចាស់ និងរាស្ត្រដែលបានប្រឆាំងនឹងពួកគេ ។
-
តើអ្នកស្ងើចសរសើរអ្វីខ្លះអំពីពរជ័យដែលព្រះអម្ចាស់បានប្រទានដល់ប្រជារាស្ត្រដែលព្យាយាមដើរតាមទ្រង់ ?
ដើម្បីយល់កាន់តែច្បាស់អំពីអ្វីដែលធ្វើឲ្យប្រជារាស្ដ្ររបស់ព្រះអម្ចាស់ខុសប្លែកពីគេនោះ សូមអាន ម៉ូសេ ៧:១៨–២១ ។ ( វាអាចមានប្រយោជន៍ក្នុងការចង្អុលបង្ហាញថា ការ ត្រូវបណ្តាសា សំដៅដល់ការត្រូវបានបង្ខាំងនូវពរជ័យដោយសារតែភាពទុច្ចរិត ។ ដូចគ្នានេះផងដែរ សូមមើល « បណ្តាសា បណ្តាសាទាំងឡាយ » នៅក្នុងសេចក្ដីណែនាំដល់បទគម្ពីរទាំងឡាយ ) ។
ម៉ូសេ ៧:១៨ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
សូមជួយសិស្សឲ្យយល់ពីអ្វីដែលពួកគេបានសិក្សា ។ ដើម្បីធ្វើដូច្នេះបាន អ្នកអាចអញ្ជើញពួកគេឲ្យគូរក្នុងសៀវភៅកំណត់ហេតុរបស់ពួកគេនូវតំណាងដ៏សាមញ្ញនៃអ្វីដែលពួកគេបានរៀនពី ខទី ១៨ ។ បន្ទាប់មក សិស្សអាចចែកចាយអ្វីដែលពួកគេបានគូរ និងមូលហេតុដែលពួកគេគូរវាជាមួយដៃគូ ក្រុមតូចៗ ឬថ្នាក់រៀនទាំងមូល ។
-
តើអ្នករៀនសូត្របានអ្វីខ្លះអំពីរាស្ដ្ររបស់ព្រះអម្ចាស់ពី ខទី ១៨ ?
-
តើអ្នកគិតថា វាមានន័យយ៉ាងណាដើម្បី « មានចិត្តតែមួយ និងគំនិតតែមួយ » ?
សូមជួយសិស្សឲ្យស្វែងរកសេចក្ដីពិតមួយដែលស្រដៀងនឹងការណ៍ដែល រាស្ដ្ររបស់ព្រះអម្ចាស់ខិតខំដើម្បីរួបរួមសាមគ្គី រស់នៅដោយសុចរិត និងមើលថែជនក្រីក្រក្នុងចំណោមពួកគេ ។ អ្នកអាចចង្អុលបង្ហាញថា ទាំងនេះក៏ជាចរិកលក្ខណៈរបស់ព្រះអង្គសង្គ្រោះផងដែរ ។ ការក្លាយជារាស្ដ្ររបស់ព្រះអម្ចាស់ សំដៅដល់ការប្រែក្លាយកាន់តែដូចជាទ្រង់ ។
ការប្រែក្លាយជារាស្ដ្ររបស់ព្រះអម្ចាស់
ដើម្បីជួយសិស្សឲ្យយល់កាន់តែច្បាស់អំពីរបៀបរួបរួមសាមគ្គី រស់នៅដោយសុចរិត និងយកចិត្តទុកដាក់លើមនុស្សដែលត្រូវការជំនួយ សូមពិចារណាស្នើឲ្យសិស្សធ្វើការលើសំណៅមេរៀនខាងក្រោមជាក្រុមតូចៗ ។ ពួកគេអាចខិតខំជួយ និងគាំទ្រគ្នាទៅវិញទៅមកនៅក្នុងសកម្មភាពនេះទាំងមូល ។ អ្នកអាចប្រើសំណៅមេរៀននេះបានតាមវិធីពីរយ៉ាងដូចខាងក្រោម ៖
-
អញ្ជើញសិស្សឲ្យបែងចែកសំណៅមេរៀនជាផ្នែកៗក្នុងក្រុមរបស់ពួកគេ ហើយសិក្សាផ្នែករបស់ពួកគេដោយខ្លួនឯង ។ បន្ទាប់ពីបញ្ចប់ផ្នែករបស់ពួកគេរួចហើយ សិស្សអាចចែកចាយអ្វីដែលពួកគេបានរៀន ។
-
បិទសំណៅមេរៀនគ្រប់ផ្នែកទាំងអស់នៅលើជញ្ជាំង ហើយអញ្ជើញក្រុមតូចៗឲ្យដើរជុំវិញបន្ទប់ ហើយបំពេញផ្នែកនីមួយៗជាមួយគ្នា ។
អញ្ជើញសិស្សជាច្រើននាក់ឲ្យចែកចាយអ្វីដែលពួកគេបានរៀន ឬសិក្សាដែលមានអត្ថន័យសម្រាប់ពួកគេ ។ អ្នកក៏អាចសួរផងដែរថាតើការធ្វើការជាក្រុមបានបង្កើនការយល់ដឹងរបស់សិស្សយ៉ាងដូចម្ដេច ។
-
តើព្រះអង្គសង្គ្រោះបានធ្វើជាគំរូអំពីចរិកលក្ខណៈនៃស៊ីយ៉ូននៅក្នុងអំឡុងពេលព្រះជន្មរបស់ទ្រង់ដោយរបៀបណា ?
ដើម្បីបង្ហាញឧទាហរណ៍អំពីគុណលក្ខណៈដូចជាព្រះគ្រីស្ទនៃស៊ីយ៉ូន អ្នកអាចចែកចាយវីដេអូ « Charity: An Example of the Believers » ( ៤:៥០ ) ដែលមាននៅលើបណ្ណាល័យដំណឹងល្អ ។ សូមពិចារណាអញ្ជើញសិស្សឲ្យស្វែងរកពីរបៀបដែលយុវនារីទាំងនេះបានធ្វើជាគំរូពីស៊ីយ៉ូន ។
ដាក់ផែនការ
សូមអញ្ជើញសិស្សឲ្យគិតអំពីចំណាប់អារម្មណ៍ដែលពួកគេអាចមាន ក្នុងអំឡុងពេលសិក្សាមេរៀននេះ ហើយកត់ត្រាចម្លើយចំពោះសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ៖
-
តើគុណលក្ខណៈដូចជាព្រះគ្រីស្ទនៃស៊ីយ៉ូនមួយណាដែលអ្នកទទួលអារម្មណ៍ថាអ្នកអាចកែលម្អ ក្នុងជីវិតរបស់អ្នក ? ( ការណ៍នេះអាចនៅផ្ទះ នៅសាសនាចក្រ ឬជាមួយអ្នកដទៃ ) ។
-
តើមានអ្វីខ្លះដែលអ្នកនឹងចាប់ផ្តើមធ្វើក្នុងសប្តាហ៍នេះ ដើម្បីពង្រឹងគុណលក្ខណៈដូចជាព្រះគ្រីស្ទនោះ ? ( ការណ៍នេះអាចជាផ្នែកមួយនៃគោលដៅរបស់អ្នក សម្រាប់កម្មវិធីកុមារ និងយុវជន ) ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះ សម្រាប់ « ម៉ូសេ ៧:១៨ » គឺ « ព្រះអម្ចាស់បានហៅរាស្ត្រទ្រង់ថាស៊ីយ៉ូន ពីព្រោះពួកគេមានចិត្តតែមួយ និងគំនិតតែមួយ » ។ គំនិតសម្រាប់សកម្មភាពទន្ទេញ មាននៅក្នុងឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។