Zanafilla 1–2; Moisiu 2–3; Abraham 4–5: Mësimi 9

Zanafilla 1:28–31; 2:1–25

“Familja Është Thelbësore në Planin e Krijuesit”

Pas krijimit të Adamit dhe Evës, Ati Qiellor i bashkoi ata në martesë. Ai i urdhëroi të shumoheshin dhe të mbushnin tokën dhe të bashkoheshin me njëri‑tjetrin. Ky mësim mund t’i ndihmojë nxënësit të kuptojnë rolin thelbësor të martesës dhe familjes në planin e Atit Qiellor për shpëtimin.

Përgatitja e nxënësve: Ftojini nxënësit të studiojnë dokumentin “Familja: Një Proklamatë drejtuar Botës”, duke kërkuar mësime që përshkruajnë arsyen pse familja është qendrore në planin e Atit Qiellor për shpëtimin.

Veprimtari të Mundshme të të Mësuarit

Kur të diskutoni rëndësinë e martesës dhe familjes në planin e Atit Qiellor për shpëtimin, kuptojeni se shumë nxënës aktualisht nuk përjetojnë situata ideale familjare. Jini të ndjeshëm ndaj nevojave dhe pyetjeve të nxënësve.

Gjërat që janë thelbësore

Merreni parasysh të shkruani në tabelë një ose më shumë fjali të paplota që ilustrojnë se si një send, veprimtari, person e kështu me radhë mund të jetë thelbësor për arritjen e diçkaje. Shembujt vijues mund të jenë të dobishëm. Ftojini nxënësit të mendojnë rreth mënyrës se si do t’i plotësonin vendet bosh, më pas kërkojuni nxënësve të ndryshëm t’ia japin përgjigjet e tyre klasës. Mund të jetë e dobishme të shpjegoni se fjala thelbësore mund të ketë edhe kuptimin qendrore ose më e rëndësishmja.

është thelbësore për suksesin në shkollë sepse .

është një pjesë thelbësore e një jete të lumtur sepse .

luan një rol thelbësor në jetën time sepse .

Pasi nxënësit të kenë dhënë përgjigjet e tyre, paraqiteni thënien vijuese nga dokumenti “Familja: Një Proklamatë drejtuar Botës” dhe ftojeni një nxënës ta lexojë atë me zë të lartë. Kërkojini klasës të kërkojë një aspekt thelbësor të planit të Atit tonë Qiellor për shpëtimin.

“Familja: Një Proklamatë drejtuar Botës” shpall:

“Ne, Presidenca e Parë dhe Këshilli i Dymbëdhjetë Apostujve të Kishës së Jezu Krishtit të Shenjtorëve të Ditëve të Mëvonshme, solemnisht shpallim se martesa midis një burri dhe një gruaje shugurohet nga Perëndia dhe se familja është thelbësore në planin e Krijuesit për destinacionin e përjetshëm të fëmijëve të Tij”. (“Familja: Një Proklamatë drejtuar Botës”, Gospel Library [Biblioteka e Ungjillit])

• Si mendon, pse martesa dhe familja luajnë role kaq të rëndësishme në planin e Atit Qiellor për shpëtimin?

• Në çfarë mënyrash mund ta shohësh Satanin të veprojë për t’i sulmuar martesat dhe familjet në kohën tonë?

Ftojini nxënësit të mendojnë për disa nga pyetjet që ata ose të tjerët mund të kenë rreth martesës dhe familjes. Ata mund t’i shkruajnë pyetjet e tyre në ditarët e tyre të studimit. Inkurajojini ata ndërsa studiojnë sot që të kërkojnë të vërteta dhe t’u kushtojnë vëmendje mbresave shpirtërore që mund të ndihmojnë për t’i udhërrëfyer ata në gjetjen e përgjigjeve për këto pyetje.

Mësime nga shkrimet e shenjta

Shpjegoni se ajo që bëri Ati Qiellor pas Krijimit të tokës, mund të na ndihmojë ta kuptojmë rolin thelbësor të martesës dhe familjes në planin e Tij. Paraqitini udhëzimet dhe burimet vijuese dhe jepuni nxënësve kohë për t’i studiuar ato. Mund t’i studioni këto së bashku si klasë, ose mund t’i organizoni nxënësit në grupe për t’i studiuar dhe diskutuar këto burime së bashku.

Teksa nxënësit i lexojnë vargjet nga Zanafilla 2, nëse dëshironi, mund të shpjegoni se fjalët ndihmë që i leverdis te vargu 18 i referohet “një ndihmëse të përshtatshme, të denjë ose që i përket” Adamit. Mund edhe të shpjegoni se rrëfimi për Evën që krijohet nga brinja e Adamit është simbolik dhe mund të përfaqësojë partneritetin e barabartë mes bashkëshortit dhe bashkëshortes (shihni te Russell M. Nelson, “Lessons from Eve”, Ensign, nëntor 1987, f. 87).

Studio thënien dhe shkrimet e shenjta vijuese, duke kërkuar fakte mbi rëndësinë e martesës dhe familjes për Perëndinë.

Presidenti Spenser W. Kimball (1895–1985) dha mësim:

“Zoti … [i solli] së bashku Adamin dhe Evën, mashkulli i Tij i parë dhe femra e Tij e parë në këtë tokë, dhe kr[eu] një ceremoni të shenjtë martesore për t’i bërë ata burrë e grua”. (Teachings of Presidents of the Church: Spencer W. Kimball [2006], f. 192)

Shkrimet e shenjta për t’i studiuar:

Zanafilla 1:27–28 (Urdhërimi i Perëndisë drejtuar Adamit dhe Evës)

Zanafilla 2:18, 21–24 (Krijimi i Evës)

Zanafilla 2:24 është një fragment i zotërimit doktrinor. Merreni parasysh t’i ftoni nxënësit t’i shenjojnë fragmentet e zotërimit doktrinor në një mënyrë të dallueshme, që të mund t’i gjejnë me lehtësi.

Doktrina e Besëlidhje 49:15–17 (Mësimet e Zotit nëpërmjet Profetit Jozef Smith)

• Çfarë të vërtetash gjete që demonstrojnë rëndësinë e martesës dhe familjes për Perëndinë?

Nxënësit mund të përcaktojnë të vërteta të ngjashme me ato që vijojnë:

Perëndia i ka urdhëruar bashkëshortët dhe bashkëshortet që të kenë fëmijë (Zanafilla 1:28).

Bashkëshorti dhe bashkëshortja duhet të jenë një dhe të veprojnë si partnerë të barabartë (Zanafilla 2:18, 24).

Martesa midis një burri dhe një gruaje shugurohet nga Perëndia (Doktrina e Besëlidhje 49:15).

Toka u krijua që të sigurohej një vend ku fëmijët e Perëndisë mund të lindeshin në familje dhe të përparonin së bashku (Doktrina e Besëlidhje 49:16–17).

Si pjesë e diskutimit tuaj për këto të vërteta, mund të jetë e dobishme të diskutoni thënien vijuese nga Presidenti Rasëll M. Nelson.

Presidenti Rasëll M. Nelson e theksoi rolin e rëndësishëm që do të luanin familjet pasi toka të ishte krijuar nga Perëndia:

“Madhështor siç është, planeti Tokë është pjesë e diçkaje edhe më madhështore – atij plani të madhërishëm të Perëndisë. E përmbledhur thjesht, toka u krijua që familjet të mund të jenë. Shkrimi i shenjtë shpjegon se një bashkëshort dhe një bashkëshorte ‘duhet të jenë një mish, dhe kjo e gjitha, që toka të mund të përmbushë qëllimin e krijimit të saj’ [Doktrina e Besëlidhje 49:16].” (“The Creation”, Ensign, maj 2000, f. 85)

• Si mund të ndikojë të kujtuarit e rolit thelbësor të martesës dhe familjes në planin e Perëndisë në zgjedhjet që bën në jetën tënde?

• Si mund të na ndihmojnë këto të vërteta dhe mësime që të përgjigjemi kur shohim se doktrina e martesës ose e familjes po kritikohet ose i ulet vlera?

• Si mendon se mund të të ndihmojë ndjekja e standardeve të Atit Qiellor për martesën dhe familjen që të bëhesh më shumë si Ai?

Krijo një përgjigje

Për t’i ndihmuar nxënësit ta shpjegojnë atë që kanë mësuar rreth rëndësisë së martesës dhe familjes në planin e Perëndisë, merreni parasysh të tregoni një skenar si ai në vijim. Mund ta përshtatni këtë skenar që të jetë më i lidhur me kulturën tuaj dhe jetën e nxënësve tuaj. Pasi ta tregoni skenarin, paraqitini udhëzimet që nxënësit të krijojnë një përgjigje.

Në një nga orët mësimore të shkollës së Elsës, ndodhi një diskutim rreth martesës dhe familjes. Elsa tregoi disa nga pikëpamjet e saj rreth martesës që bëhet mes një burri dhe një gruaje dhe rëndësisë së të pasurit të fëmijëve nga çiftet e martuara. Shumë nga shokët e klasës të Elsës dhanë mendime që qenë shumë të ndryshme nga të sajat. Pas orës mësimore, një i ri që quhej Isli, i cili gjithashtu ishte në orën mësimore të seminarit me Elsën, e pyeti atë pse kishte kaq mendime të prapambetura rreth martesës dhe familjes.

Duke përdorur atë që mësove sot, krijo një përgjigje që Elsa mund t’ia japë Islit. Përfshi sa vijon në përgjigjen tënde:

1. Një shpjegim rreth arsyes pse martesa dhe familja janë të rëndësishme për Atin Qiellor dhe planin e Tij për shpëtimin

2. Një ose më shumë mësime nga shkrimet e shenjta ose udhëheqësit e Kishës

3. Një ftesë që Elsa mund t’ia bëjë Islit që mund ta ndihmojë atë

Pasi nxënësit të kenë pasur kohë për t’u përgatitur, jepuni atyre një mundësi për t’i dhënë përgjigjet e tyre. Ata mund t’ia tregojnë ato një partneri ose një grupi të vogël. Disa nxënës të gatshëm mund të ftohen gjithashtu që t’ia tregojnë përgjigjet e tyre klasës ose që ta interpretojnë me role skenarin.

Jepuni nxënësve kohë për të reflektuar për atë që mësuan dhe ndien sot. Ata mund të mendojnë për të vërtetat që mësuan, të cilat u dhanë përgjigje disave prej pyetjeve të tyre. Ftojini ata ta mbajnë shënim në ditarët e tyre të studimit çdo mbresë shpirtërore që kanë pasur. Dëshmoni për të vërtetat që keni diskutuar sot.

Mësoni Përmendsh

Nëse dëshironi, mund t’i ndihmoni nxënësit t’i mësojnë përmendsh gjatë këtij mësimi referencën e zotërimit doktrinor dhe frazën kyç të shkrimit të shenjtë dhe t’i përsëritin ato në mësimet e ardhshme. Fraza kyç e shkrimit të shenjtë për vargun te Zanafilla 2:24 është: “Njeriu … do të bashkohet me gruan e tij, dhe do të jenë një mish i vetëm”. Idetë për veprimtaritë e mësimit përmendsh janë në materialet e shtojcës nën titullin “Veprimtari për Përsëritjen e Zotërimit Doktrinor”.

Burime Shtesë

Zanafilla 2:21–22. A u krijua vërtet Eva nga brinja e Adamit?

Presidenti Spenser W. Kimball (1895–1985) dha mësim se “historia e brinjës, natyrisht, është figurative” (“The Blessings and Responsibilities of Womanhood”, Ensign, mars 1976, f. 71).

Presidenti Rasëll M. Nelson shpjegoi se si brinja në rrëfimin e krijimit të Evës është figurative ose simbolike:

“Brinja, duke dalë pikërisht nga pjesa anësore, duket se tregon bashkëpjesëmarrje. Brinja nuk nënkupton as mbizotërim, as nënshtrim, por një marrëdhënie të dyanshme si bashkëpjesëmarrës, për të punuar e për të jetuar, krah për krah.” (“Lessons from Eve”, Ensign, nëntor 1987, f. 87)

Çfarë ndodh me njerëzit që nuk kanë një martesë të përjetshme ose familje ideale në këtë jetë?

Plaku Nil L. Andersen, i Kuorumit të Dymbëdhjetë Apostujve, dha mësim:

“Unë shpreh dashurinë e dhembshurinë time për çiftet e virtytshme, të cilët martohen dhe nuk janë në gjendje të lindin fëmijët që i presin me kaq dëshirë, dhe për ato gra e burra që nuk kanë pasur mundësinë të martohen sipas ligjit të Perëndisë. Ëndrrat e parealizuara të jetës janë të vështira për t’u kuptuar nëse shihen vetëm nga këndvështrimi i vdekshmërisë. Si shërbëtor i Zotit, unë ju premtoj se, në qoftë se jeni besnikë ndaj Jezu Krishtit dhe besëlidhjeve tuaja, ju do të merrni bekimet shpërblyese në këtë jetë dhe dëshirat tuaja të drejta në kohën e përjetshme, të caktuar nga Zoti.” (“Udhëtimi Vetjak i një Fëmije të Perëndisë”, Liahona, maj 2021, f. 47)

Si e plotësojnë burrat dhe gratë njëri‑tjetrin si partnerë të barabartë?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Arsyeja 1: Natyrat e shpirtit të mashkullit dhe femrës e plotësojnë dhe përsosin njëri‑tjetrin, prandaj burrat dhe gratë paracaktohet të përparojnë së bashku drejt ekzaltimit. …

… Ndërthurja e pashoqe e aftësive shpirtërore, fizike, mendore dhe emocionale si të meshkujve edhe të femrave, nevojitej për ta vënë në jetë planin e lumturisë. Të vetëm, as burri as gruaja nuk mund t’i përmbushin qëllimet e krijimit të tij apo të saj. …

Arsyeja 2: Sipas planit hyjnor, duhen që të dy, një burrë e një grua, për të sjellë fëmijë në vdekshmëri dhe për të siguruar kushtet më të mira për rritjen dhe edukimin e fëmijëve.

…[M]artesa midis një burri e një gruaje është mënyra e autorizuar përmes së cilës shpirtrat para lindjes hyjnë në vdekshmëri.” (“Marriage Is Essential to His Eternal Plan”, Ensign, qershor 2006, f. 83, 84.)

Veprimtari Plotësuese të të Mësuarit

Zanafilla 2:1–3. Perëndia u çlodh në Shabat

Nëse nxënësit tuaj do të kishin dobi nga bërja e një plani të kujdesshëm për ta mbajtur ditën e Shabatit të shenjtë, mund të shpenzoni kohë duke studiuar vargjet te Zanafilla 2:1–3. Shpjegoni se Zanafilla 2 është një vazhdim i rrëfimit të Krijimit. Ftojeni një nxënës të lexojë me zë të lartë te Zanafilla 2:1–3. Vëreni klasën ta ndjekë dhe të kërkojë atë që Zoti bëri ndryshe ditën e shtatë.

Pastaj bëni pyetjen e mëposhtme:

• Cila është një e vërtetë që mësojmë rreth ditës së Shabatit nga shembulli i Zotit në këto vargje?

Nxënësit mund të përcaktojnë një të vërtetë të ngjashme me atë në vijim: Ne mund ta mbajmë të shenjtë ditën e Shabatit kur çlodhemi nga punët tona dhe përqendrohemi te gjërat e shenjta.

Merreni parasysh të diskutoni pyetje si vijueset:

• Cilat janë disa nga mënyrat se si mund të përqendrohemi te gjërat e shenjta në Shabat?

• Si mendoni se jeni bekuar duke u çlodhur nga punët tuaja në ditën e Shabatit dhe duke u përqendruar te gjërat e shenjta?

Mund t’i ftoni nxënësit të përsiatin mënyra se si mund ta shenjtërojnë më plotësisht ditën e Shabatit. Më pas inkurajojini ata të veprojnë sipas të paktën njërës prej këtyre ideve.

Zanafilla 2:18, 24. Partnerë të barabartë

Nxënësit mund të kenë dobi nga diskutimi i mëtejshëm rreth së vërtetës që bashkëshorti dhe bashkëshortja duhet të jenë partnerë të barabartë. Pasi ta përcaktoni këtë të vërtetë, mund të jepni thënien nga Plaku Dejvid A. Bednar në pjesën “Burime Shtesë”. Ju mund të diskutoni edhe pyetje si vijueset:

• Çfarë mendoni se do të thotë që një bashkëshort dhe një bashkëshorte janë partnerë të barabartë në martesë?

• Pse është thelbësore që bashkëshorti dhe bashkëshortja ta trajtojnë njëri‑tjetrin si partnerë të barabartë?

Materiale filmike rreth rëndësisë së martesës dhe familjes

Merreni parasysh të përdorni një ose më shumë nga materialet filmike vijuese për t’i ndihmuar nxënësit ta kuptojnë më mirë rëndësinë e martesës dhe familjes:

• “Renaissance of Marriage” [“Rilindja e Martesës”] (2:36). Presidenti Henri B. Ajring, i Presidencës së Parë, shpjegoi se si të qenit i martuar me Motrën Ajring e ka ndihmuar të “bë[hej] gjithçka e mirë që ai dëshironte të bëhej”.

• “Cili Është Qëllimi i Familjes?” (1:17). Ky material filmik e përshkruan familjen si njësinë bazë hyjnore të shoqërisë.

• “Having Children in Faith” [“Të Pasurit e Fëmijëve në Besim”] (2:25). Plaku Nil L. Andersen, i Kuorumit të Dymbëdhjetë Apostujve, diskuton mësimet që lidhen me urdhërimin e Zotit për t’u shumuar e mbushur tokën.