ចំណេះចំណានខាងគោលលទ្ធិ ៖ កូរិនថូស ទី១ ១៥:៤០–៤២
មានកម្រិតនៃសិរីល្អចំនួនបីក្នុងដំណើររស់ឡើងវិញ
នៅក្នុងមេរៀនមុន « កូរិនថូស ទី១ ១៥:៣២–៥៤ » អ្នកបានរៀនអំពីកម្រិតនៃសិរីល្អចំនួនបីក្នុងដំណើររស់ឡើងវិញ ។ អ្នកក៏បានរៀនផងដែរថា ព្រះវរបិតាសួគ៌របស់យើងនឹងប្រទានសិរីល្អសេឡេស្ទាលដល់មនុស្សស្មោះត្រង់ តាមរយៈព្រះយេស៊ូវគ្រីស្ទ ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ កូរិនថូស ទី១ ១៥:៤០–៤២ ពន្យល់ពីគោលលទ្ធិ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតពិត ។
ទន្ទេញ និងពន្យល់
សូមបំពេញជំហានខាងក្រោមដើម្បីជួយអ្នកឲ្យទន្ទេញ និងពន្យល់ពីគោលលទ្ធិដែលបានបង្រៀននៅក្នុង កូរិនថូស ទី១ ១៥:៤០–៤២ ៖
-
សូមសរសេរ « កូរិនថូស ទី១ ១៥:៤០–៤២ ៖ នៅក្នុងដំណើររស់ឡើងវិញ មានកម្រិតសិរីល្អចំនួនបី » កាត់ក្បាលទំព័រនៅលើក្រដាសមួយសន្លឹក ។
-
សូមគូររូបព្រះអាទិត្យនៅក្រោមឃ្លា ព្រះចន្ទនៅក្រោមព្រះអាទិត្យ និងផ្កាយមួយនៅក្រោមព្រះចន្ទ ។
-
សូមអាន កូរិនថូស ទី១ ១៥:៤០–៤២ ហើយដាក់ស្លាកឈ្មោះគំនូរនីមួយៗរបស់អ្នកជាមួយនឹងសិរីល្អដែលវាតំណាងឲ្យ ។ ( សូមកំណត់ចំណាំថា ការបកប្រែដោយយ៉ូសែប ស្ម៊ីធ អំពី កូរិនថូស ទី១ ១៥:៤០ បន្ថែមសេចក្ដីយោងទៅនឹងសិរីល្អទេឡេស្ទាល [ នៅក្នុង កូរិនថូស ទី១ ១៥:៤០លេខយោងក ] ) ។
-
សូមក្រឡេកមើលគំនូររបស់អ្នក ខណៈពេលកំពុងនិយាយឡើងវិញ នូវសេចក្តីយោងបទគម្ពីរ និងឃ្លាបទគម្ពីរគន្លឹះនៅក្នុងចិត្តរបស់អ្នក រហូតដល់អ្នកមានអារម្មណ៍ថា មានទំនុកចិត្តថាអ្នកចេះសេចក្ដីយោងបទគម្ពីរទាំងនោះច្បាស់ ។
-
តើអ្នកនឹងពន្យល់ពីសេចក្ដីពិតដែលបានបង្រៀននៅក្នុងវគ្គបទគម្ពីរនេះដល់នរណាម្នាក់ ដែលមិនយល់ពីអ្វីដែលកើតឡើងក្រោយពីសេចក្ដីស្លាប់នៅក្នុងផែនការរបស់ព្រះវរបិតាសួគ៌ដោយរបៀបណា ? សូមសរសេរការពន្យល់តាមគំនិតរបស់អ្នកផ្ទាល់ ។
រៀនអនុវត្ត
ការអនុវត្តតាមគោលការណ៍នៃការទទួលបានចំណេះដឹងខាងវិញ្ញាណអាចជួយយើងជាមួយនឹងស្ថានភាពជីវិតពិត និងសំណួរសំខាន់ៗដែលយើងមានបាន ។
សូមអានសាច់រឿងខាងក្រោមនេះ ហើយសូមជ្រើសរើសយកសាច់រឿងមួយណា ដែលអ្នកចង់ផ្តោតទៅលើសកម្មភាពបន្ទាប់ ។
-
ជូលា ព្យាយាមធ្វើអ្វីដែលត្រឹមត្រូវ ប៉ុន្តែនាងតែងមានអារម្មណ៍ថាត្រូវបានគេថ្កោលទោសដោយសារតែភាពទន់ខ្សោយរបស់នាង ។ នាងជឿថាមនុស្សផ្សេងទៀតនឹងបានទៅនគរសេឡេស្ទាល ប៉ុន្តែនាងសង្ស័យថានាងប្រហែលជាមិនអាចធ្វើបានទេ ។
-
ម៉ារីយ៉ា ទើបតែបានស្តាប់សុន្ទរកថាដ៏អស្ចារ្យមួយអំពីអំណោយទាននៃដំណើររស់ឡើងវិញដែលព្រះវរបិតាសួគ៌ និងព្រះយេស៊ូវគ្រីស្ទនឹងប្រទានដល់មនុស្សគ្រប់គ្នា ។ នាងឆ្ងល់ថា « ហេតុអ្វីបានជាខ្ញុំគួរប្រែចិត្ត ឬរក្សាបទបញ្ញត្តិទាំងឡាយ ប្រសិនបើមនុស្សគ្រប់គ្នានឹងត្រូវបានរស់ឡើងវិញក្នុងរូបកាយអមតៈដ៏ឥតខ្ចោះនោះ ? »
នៅក្នុងមេរៀនមុន អ្នកបានសិក្សាអំពីសេចក្ដីពិតខាងក្រោមដែលបានបង្រៀននៅក្នុង កូរិនថូស ទី១ ១៥:៤០–៤២ ៖ នៅក្នុងផែនការរបស់ព្រះវរបិតាសួគ៌ មាននគរនៃសិរីល្អខុសៗគ្នាសម្រាប់រូបកាយដែលបានរស់ឡើងវិញ ។ សូមប្រើគោលការណ៍នៃការទទួលបានចំណេះដឹងខាងវិញ្ញាណ និងសេចក្តីពិតដែលបានបង្រៀននៅក្នុង កូរិនថូស ទី១ ១៥:៤០–៤២ ដើម្បីជួយទាំង ជូលា ឬ ម៉ារីយ៉ា អំពីកង្វល់ ឬសំណួររបស់នាង ។
១. ឆ្លើយសំណួរនៅក្រោមគោលការណ៍នីមួយៗនៃការទទួលបានចំណេះដឹងខាងវិញ្ញាណដូចខាងក្រោមទៅក្នុងសៀវភៅកំណត់ហេតុការសិក្សារបស់អ្នក ។
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
សូមអាន កថាខណ្ឌទី ៨ នៅក្នុងផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលចំណេះចំណានខាងគោលលទ្ធិ ( ឆ្នាំ ២០២២ ) ។ សូមពិចារណាគូសសម្គាល់លើសំណួរទាំងពីរនៅចុងបញ្ចប់នៃកថាខណ្ឌនោះ ។
-
តើចម្លើយចំពោះសំណួរទាំងពីរនេះអនុវត្តចំពោះស្ថានភាពរបស់ ជូលា ឬ ម៉ារីយា បានយ៉ាងដូចម្តេច ។
កថាខណ្ឌទី ៨ ថ្លែងផងដែរថា « យើងស្វែងរកជំនួយមកពីព្រះវិញ្ញាណបរិសុទ្ធ ដើម្បីមើលឃើញនូវរឿងទាំងឡាយដូចជាព្រះអម្ចាស់ទតឃើញ » ។
-
តើព្រះអម្ចាស់អាចទតឃើញអ្វីខ្លះនៅក្នុងស្ថានភាពនេះ ដែលនឹងមានប្រយោជន៍ដល់ ជូលា ឬ ម៉ារីយ៉ា ? ហេតុអ្វី ?
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
អាន កថាខណ្ឌទី ១១–១២ នៅក្នុងផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ។
-
តើអ្នកនឹងណែនាំ ជូលា ឬ ម៉ារីយា ឲ្យស្វែងរកសេចក្ដីពិតនានាដែលពួកគេត្រូវការនៅក្នុងជីវិតរបស់ពួកគេនៅឯណា ?
-
តើអ្នកធ្លាប់មានបទពិសោធន៍អ្វីខ្លះ ដែលបង្ហាញពីសារៈសំខាន់នៃការជ្រើសរើសដោយប្រុងប្រយ័ត្ននូវកន្លែងដែលអ្នកស្វែងរកសេចក្តីពិតខាងវិញ្ញាណ ?
សូមចំណាយពេលពីរបីនាទី ដើម្បីស្វែងរកបទគម្ពីរជាក់លាក់ ឬសេចក្តីថ្លែងការណ៍របស់ព្យាការីដែលអ្នកមានអារម្មណ៍ថាត្រូវចំពោះស្ថានភាពរបស់ ជូលា ឬ ម៉ារីយា ។ ( វគ្គបទគម្ពីរមួយចំនួនពីមេរៀនថ្មីៗដែលអាចមានប្រយោជន៍រួមមាន កូរិនថូស ទី១ ១៥:៤០–៤២; គោលលទ្ធិ និង សេចក្តីសញ្ញា ៧៦:៥០–៥២, ៦២–៦៤, ៦៩–៧០, ៧១–៧៦, ៨១–៨៥; ៨៨:២១–២៤ ) ។
-
តើអ្នកបានរកឃើញអ្វីដែលអ្នកអាចចែកចាយបាន ? តើសេចក្ដីពិតទាំងឡាយដែលអ្នករកឃើញបានធ្វើឲ្យមានការខុសប្លែកក្នុងជីវិតរបស់អ្នកយ៉ាងដូចម្ដេច ?
ធ្វើសកម្មភាពដោយសេចក្ដីជំនឿ
សូមរំឭក កថាខណ្ឌទី ៥–៦ នៅក្នុងផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ។ សូមពិចារណាគូសសម្គាល់យ៉ាងហោចណាស់ឃ្លា ឬគំនិតបីផ្សេងគ្នា ដែលអ្នកគិតថាអាចជួយដល់ ជូលា ឬ ម៉ារីយា បាន ។
-
តើអ្នកបានជ្រើសរើសឃ្លាអ្វីខ្លះ ? តើឃ្លានីមួយៗទាំងនេះអាចជួយ ជូលា ឬ ម៉ារីយា បានយ៉ាងដូចម្តេច ?
-
ប្រសិនបើអ្នកមានគំនិតស្រដៀងនឹងគំនិតរបស់ជូលា ឬ ម៉ារីយា តើអ្នកបានធ្វើអ្វីខ្លះដើម្បីឆ្លើយតបដោយស្មោះត្រង់ចំពោះគំនិតទាំងនោះ ?
-
ហេតុអ្វីបានជាយុវនារីម្នាក់ៗត្រូវផ្តោតលើសេចក្តីជំនឿរបស់ពួកគេទៅលើព្រះយេស៊ូវគ្រីស្ទ នៅពេលពួកគេធ្វើការតាមស្ថានភាពរបស់ពួកគេ ? ហេតុអ្វីបានជាមិនធ្វើឲ្យអស់ពីសមត្ថភាពដោយមិនផ្តោតលើទ្រង់ ?