Ko e tangata ko ia naʻe fakamoʻui ʻi he ʻaho Sāpaté ʻoku fāʻofua ki ai ʻene ongomātuʻá, ʻoku ʻasi ʻa Sīsū ʻi mui. Naʻe fāʻeleʻi mai naʻe kui. ʻOku kau ʻi he meʻa naʻe hokó hono maʻu ʻo e paʻangá ʻa e fāʻofua ʻa e tangata naʻe fakamoʻuí ʻi he vaʻe ʻo Sīsuú, mo ʻene ongomātuʻá. fakamoʻui-e-tangatá-fiefia-e-mātuʻá
Kuó ke ongoʻi mamaʻo nai ha taimi mei he ʻOtuá? Kuo ongoʻi pehē nai mo ha niʻihi kehe ʻokú ke ʻilo? Naʻe fakamanatu ʻe Paula ki he Kāingalotu ʻi Kolinitoó ʻa e ʻaloʻofa naʻe fakahā ʻe Sīsū Kalaisi kiate kinautolú. Naʻe akoʻi ʻe Paula ki he kakaí naʻe fakamavaheʻi kinautolu mei he ʻOtuá ʻo fakafou ʻi he angahalá. Meʻamālié, ʻe lava ke fakafoki mai kinautolu ʻo fakafou ʻi he Fakalelei ʻa Kalaisí ki ha vā fetuʻutaki lelei mo e ʻOtuá pea maʻu ʻa e anga māʻoniʻoni ʻa Kalaisí (vakai, 2 Kolinitō 5:16–21). ʻE lava ke tokoniʻi koe ʻe he lēsoni ko ʻení ke ke ofi ange ki he ʻOtuá mo aʻusia ʻa e tuʻunga ʻokú Ne finangalo ke ke aʻusiá.
Ko ho vā fetuʻutaki mo e ʻOtuá
To e vakaiʻi e ngaahi tūkunga ko ʻení. Fakakaukau ki he founga ʻoku faitatau pe kehe ai ho tūkunga fakatāutahá mei he ngaahi tūkunga ko ʻení.
Ko Semilá ko ha ākonga tui faivelenga ia ʻa Sīsū Kalaisi. ʻOku lau ia ʻe ha ngaahi kaungāmeʻa tokolahi ko ha faʻifaʻitakiʻanga. Ka neongo ia, ʻi he taimi ʻokú ne fai ai ha ngaahi fehalaaki, ʻokú ne ongoʻi lotomamahi ʻiate ia pē mo hohaʻa pe ʻe lava nai ʻo foki ki he Tamai Hēvaní ʻi ha ʻaho.
ʻOku ʻi ai ha ngaahi tōʻonga moʻui ʻa ʻOnitulei ʻokú ne ʻiloʻi ʻoku ʻikai lelei, pea ʻoku faingataʻa ke ne ʻilo ha founga ʻe lava ke fakamolemoleʻi ai ia mo liliu aí. ʻOkú ne fifili pe ʻe lava nai ke ne ongoʻi ofi ki he ʻOtuá, pea ʻoku ʻikai ke ne fakapapauʻi pe ʻoku taau ia mo ʻene feingá. ʻOku ʻikai ke ne fie talanoa mo ʻene mātuʻá pe pīsopé fekauʻaki mo ʻene ngaahi palopalemá.
Fakakaukau ki ho vā fetuʻutaki mo e Tamai Hēvaní. Fakamatalaʻi ʻi hoʻo tohinoa akó ʻa e tūkunga hoʻo moʻuí pea mo ho vā fetuʻutaki mo Iá. Te ke lava ʻo fakakau ai ʻa e taimi ʻokú ke ongoʻi ofi ai kiate Iá pea mo e taimi ʻokú ke ongoʻi mamaʻo aí pea pehē ki hoʻo ngaahi fiemaʻu ki ho vā fetuʻutaki mo Ia ʻi he kahaʻú.
ʻI hoʻo akó, fekumi ki he ngaahi moʻoni ʻe lava ʻo tokoni ke mahino kiate koe e ngaahi tāpuaki ʻo e ʻunuʻunu ofi ki he ʻOtuá mo e founga te ke lava ai ʻo ʻunuʻunu ofi kiate Iá.
Fefakaleleiʻakí
Naʻe tohi ʻe Paula ʻi he 2 Kolinitō 5 lolotonga ʻetau moʻui ʻi he māmaní, ʻoku tau “māpuhoi” mo ongoʻi “mafasia,” mo fakaʻamu ke foki ki heʻetau Tamai ʻi Hēvaní (vakai, 2 Kolinitō 5:1–5). Fakakaukau ki ha ngaahi taimi ʻi hoʻo moʻuí naʻá ke ongoʻi ai ha meʻa hangē ko e meʻa naʻe fakamatalaʻi ʻe Paulá.
Lau ʻa e 2 Kolinitō 5:17–20, ʻo kumi ʻa e ngaahi moʻoni te ke lava ʻo fakaʻaongaʻi ʻi hoʻo moʻuí ʻi he taimi ʻokú ke ongoʻi mamaʻo ai mei he ʻOtuá. Fakatokangaʻi ange ʻoku ʻuhinga ʻa e fakaleleí mo e fakahoko ‘o e fakaleleí ʻi he ngaahi veesi ko ʻení ki hono toe fakafoki mai ki he uouangatahá mo e ʻofeina ʻe he ʻOtuá hili ha mavahe meiate Ia.
1. Tali e ngaahi fehuʻi ko ʻení ʻi hoʻo tohinoa akó:
Ko e hā ha ngaahi foʻi lea mo ha ngaahi kupuʻi lea ʻi he ngaahi veesi ko ʻení (2 Kolinitō 5:17–20) ʻoku nau fakamatalaʻi lelei taha ʻa e meʻa naʻe fai ʻe he Fakamoʻuí maʻaú?
Ko e hā ʻa e fatongia ʻo e Tamai Hēvaní ʻi hono tokoniʻi koe ke ke foki hake kiate Iá? (Vakai, 2 Kolinitō 5:18–19.)
Ko e hā ha ngaahi tāpuaki ʻoku tau maʻu ʻi heʻetau feinga ke moʻui “ʻia Kalaisí”? (2 Kolinitō 5:17.)
Ko e moʻoni ʻe taha ʻoku akoʻi ʻi he 2 Kolinitō 5:17–20 ko e lava ke tau fakalelei ki he ʻOtuá pea hoko ko ha kakai foʻou ʻo fakafou ʻi he Fakalelei ʻa Sīsū Kalaisí.
Naʻe akoʻi foki ʻe Paula fekauʻaki mo e ʻuhinga ʻoku tau lava ai ʻo hoko ko ha kakai foʻoú pea mo hono ʻuhinga ʻo e meʻá ni.
Lau ʻa e 2 Kolinitō 5:21, ʻo kumi ki he ngaahi fakamatala ki he Tamai Hēvaní, Sīsū Kalaisi, pea mo koé.
Ko e hā naʻá ke ako mei he aʻusia ko ʻení?
Lau ʻa e palakalafi ko ʻení, pea kumi ki ha toe ngaahi fakakaukau ʻoku ʻuhingamālie kiate koé.
ʻOku akoʻi ʻe Paula ʻi he 2 Kolinitō 5:21 neongo naʻe ʻikai teitei halaia ʻa Sīsū ʻi ha angahala, ka naʻá Ne toʻo kiate Ia ʻi he Ngoue ko Ketisemaní pea ʻi he kolosi ʻi Kalevalé, ʻa e kavenga, mafasia, mo e ngaahi nunuʻa ʻo ʻetau ngaahi angahalá. ʻI he taimi ʻoku tau fekumi fakamātoato ai ke fakamolemoleʻi mo ngaohi kitautolu ko ha “fakatupu foʻoú,” ʻoku tau tali ʻa e kole ʻa Sīsū Kalaisi kapau te tau tui kiate Ia mo fakatomala mei heʻetau ngaahi angahalá, te Ne toʻo ʻetau ngaahi angahalá pea lava ke tau maʻu Hono anga māʻoniʻoní. ʻI he foungá ni, ʻe ngaohi ai kitautolu ke tau maʻa, ʻo hangē pē ko ʻEne maʻá (vakai foki, Kolose 2:13–14; 1 Pita 2:24).
ʻOku tokoni fēfē nai ʻa e ngaahi akonaki ʻi he 2 Kolinitō 5:21 ke mahino lelei ange kiate koe ʻa e ʻuhinga ʻoku tau lava ai ʻo hoko ko ha fakatupu foʻou ʻia Kalaisí pea mo hono ʻuhingá?
Ko e hā ha ngaahi fakakaukau mo ha ngaahi ongo naʻe mei aʻusia ʻe he ʻAlo haohaoa ʻo e ʻOtuá ʻi Heʻene toʻo loto- fiemālie hoʻo ngaahi angahalá kiate Ia kae lava ke ke fakalelei ki he ʻOtuá pea liliú? (Fakakaukau ke lau ʻa e ʻĪsaia 49:16 mo e Tokāteline mo e Ngaahi Fuakava 19:18 kimuʻa pea tali ʻa e fehuʻi ko ʻení.)
ChurchofJesusChrist.org
Fakalaulauloto ki he founga kuó ke aʻusia ai, pe ko ha taha ʻokú ke ʻilo, ʻa e fakamoʻui mo e fakalelei ʻoku fai ʻe he Fakamoʻuí ʻo fakafou ʻi Heʻene Fakaleleí.
ʻE lava ke tokoni ʻa e fakalaulauloto ki he ngaahi tefitoʻi moʻoni ʻo e ongoongoleleí ke mahino lelei ange kiate kitautolu mo tau ongoʻi honau mahuʻingá. Toe lau ʻa e fakamatala ki he tūkunga lolotonga hoʻo moʻuí mo e vā fetuʻutaki mo e ʻOtuá ʻa ia naʻá ke hiki ʻi he kamataʻanga ʻo e lēsoní. Toʻo ha kiʻi taimi ke ke fakalaulauloto ai ki he ngaahi fehuʻi ko ʻení:
ʻE ʻasi mo ongo fēfē nai haʻate fakalelei ki he ʻOtuá ʻo taʻengata?
Ko e hā ha ngaahi founga te ke fie hoko ai ʻo foʻou ʻo fakafou ʻi he Fakalelei ʻa Sīsū Kalaisí?
Ko e hā ha ngaahi meʻa kuó ke aʻusia ʻi hoʻo moʻuí ʻoku fakahaaʻi ai ʻa e loto-fiemālie ʻa Sīsū Kalaisi ke tokoniʻi koe ke ke liliú?
2. Tali e ngaahi fehuʻi ko ʻení ʻi hoʻo tohinoa akó:
Naʻe tokoni fēfē nai ʻa e fakalaulaulotó?
Ko e hā kuó ke ako ʻi he lēsoni ko ʻení fekauʻaki mo e ngaahi ongo mo e fakaʻamu ʻa e Tamai Hēvaní mo Sīsū Kalaisi maʻaú?
Ako, ongoʻi, pea fakahoko
Hiki ʻi hoʻo tohinoa akó ʻa e meʻa naʻá ke ako mo ongoʻi he ʻahó ni ʻa ia naʻe mahuʻingamālie taha kiate koé pea mo hono ʻuhingá. Hiki ʻa e meʻa ʻokú ke ongoʻi ʻoku ueʻi koe ke ke fakahoko ʻa ia ʻe lava ʻo tokoni atu ke ke fakalelei ai ki he ʻOtuá pea hoko “ko ha fakatupu foʻou” ʻia Kalaisi. Ko e hā ha ngaahi liliu ʻokú ke ʻamanaki te ke sio ki ai ʻiate koe (ʻi ha taʻu ʻe taha, taʻu ʻe ua, pe taʻu ʻe nima) ko ha taha kuo liliu moʻoni ʻia Kalaisi?
Fili Pē: Fie Ako Lahi Ange?
Te ne tokoniʻi fēfē nai au ke u moʻui ʻaki ʻa e ongoongolelei ʻo Kalaisí mo hoko “ko ha fakatupu foʻou” ʻiate Ia?
Naʻe pehē ʻe ʻEletā ʻUlisesi Soalesi ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Laʻitā fakaʻofisiale ʻo ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá.
ʻE tokoniʻi kitautolu ʻe he tupulaki ʻo e tuí mo e uluí pea mo hono tauhi e ngaahi fekau ʻa e ʻOtuá, ke fakamālohia ʻetau holi ke muimui ʻia Sīsuú pea fakatupu ha liliu fakalaumālie moʻoni ʻiate kitautolu—ko hono toe fakalea ʻe tahá, ko hono liliu kitautolu ki ha tangata foʻou, hangē ko hono akoʻi ʻe he ʻAposetolo ko Paulá ʻi heʻene tohi ki he kakai Kolinitoó (2 Kolinitō 5:17). ʻOku ʻomai ʻe he liliu ko ʻení ha fiefia, lavameʻa lahi ange mo e moʻui lelei pea tokoniʻi kitautolu ke pukepuke ha taumuʻa ʻoku taʻengatá.
2 Kolinitō 5:17–21. ʻE lava fēfē nai ke mahino lelei ange kiate au ʻa e meʻa naʻe akoʻi ʻe Paula ʻi he ngaahi veesi ko ʻení?
ʻE ala tokoni atu ʻa e fakamatala ko ʻení ke mahino kiate koe ha niʻihi ʻo e ngaahi foʻi lea mo e ngaahi kupuʻi lea ʻi he ngaahi veesi ko ʻení:
ʻOku ʻuhinga ʻa e hoko ko ha “fakatupu foʻoú” ko e “liliu hotau lotó, fofongá, mo hotau natulá ke hoko ʻo hangē ange ko e Fakamoʻuí” (Benjamin M. Z. Tai, “Ko e Mālohi ʻo e Tohi ʻa Molomoná ʻi he Fakauluí,” Liahona, Mē 2020, 47).
ʻOku ʻuhinga ʻa e “ʻikai lau kiate kinautolu ʻenau ngaahi faiangahalá” koeʻuhí ko e meʻa naʻe fai ʻe Kalaisi maʻatautolú, ʻi he taimi ʻoku tau fakalelei ai ki he ʻOtuá ʻoku ʻikai lau ʻetau ngaahi angahalá kiate kitautolu.