Lesona 12
O le Aoaoina o Fanau e Ala i Faataitaiga ma Faatonuga
Auala mo le Faatinoga
Mulimuli i se mea e tasi po o mea uma o fautuaga nei e tusa ai ma ou lava tulaga manaomia ma tulaga e i ai.
-
Mafaufau loloto i tulaga manaomia o lau fanau po o tulaga manaomia o fanau a lau fanau, o fanau a ou uso ma tuafafine, po o isi e te iloa. Ia fuafua mo avanoa e aoao ai nei fanau e ala i au mea e fai ma upu.
-
Suesue i faamatalaga tusia e faatatau i le aoao atu i totonu o le aiga e pei ona maua i le O le Aoao Atu, e Leai se Isi Valaauga e Sili Ai (36123), itulau 145–49, ma le Tusi Taiala mo le Aiga (31180), itulau 3–8. Afai ua e faaipoipo, faitau ma talanoaina le faamatalaga tusia faatasi ma lou toalua.
Faamatalaga Faatonuina e Faitauina
Suesue i faamatalaga tusia o loo i lalo. Afai ua e faaipoipo, faitau ma talanoaina faamatalaga tusia faatasi ma lou toalua.
O le Lu’I Maoa’e i le Lalolagi—o le Avea ma Matua Lelei
Elder James E. Faust
O le Korama a Aposetolo e Toasefululua
O le Avea ma Matua o se Valaauga Paia
Ua uunaia a’u e talanoaina lenei mataupu ua ou filifilia e ta’ua o le lu’i maoa’e i le lalolagi. E faatatau lea i le avanoa ma le tiute o le avea ma ni matua lelei. O lenei mataupu e tele manatu eseese e pei foi o le toatele o matua, a e toaitiiti lava nisi ua faapea mai ua latou maua tali o mea uma. Ou te mautinoa e le o a’u o se tasi o latou ia.
Ou te manatu ua sili atu alii ma tamaitai maoa’e i le Ekalesia i le taimi nei i lo se isi lava taimi i lo’u olaga. Ua faailoa mai i lenei mea o le toatele o nei tagata talavou lelei e o mai i ni aiga lelei ma matua lelei. E ui lava i lea, o loo i ai foi le tele o matua lelei e manatu o loo i ai pea foi ni o latou sese. O le tasi taimi na ou faia ai se mea sese, ou te manatua ai lo- ’u lava tina na faapea mai, “O fea ea le itu ua ou sese ai?”
Na poloai mai le Alii, “Ia taitaiina a outou fanau i le malamalama ma le upu moni.” (MFF 93:40.) Ia te a’u lava ia, e leai se isi taumafaiga faaletagata e sili atu i lo lena.
O le avea ma tama po o le tina, e le gata o se lu’i maoa’e, a o se valaauga paia foi. O se taumafaiga e manaomia ai le faapaiaga. Na faapea mai Peresitene Makei, o le avea ma matua o se “tiute sili lea ua tuuina mai i tagata.” (The Responsibility of Parents to Their Children, [tamai tusi, leai se aso], 1).
O Le Faatupuina o Ni Aiga Manuia
E ui ina e itiiti lava ni lu’itau faaletagata e sili atu i le avea ma ni matua lelei, ae e itiiti foi ni avanoa e maua ai le olioli e sili atu. E moni lava e leai se isi galuega e sili atu i lenei lalolagi na i lo le aoaoina o a tatou fanau ia matatau i le Atua, ia fiafia, ava, ma fai mea lelei. O le a iloa e matua e leai se fiafia e sili atu pe a ava fanau ia te i latou ma a latou aoaoga. O le faaeaeaina lena i le tulaga faamatua. Na molimau mai Ioane, “E leai so’u fiafia e sili i lenei, pe a ou faalogo ua savavali la’u fanau i le upumoni.” (3 Ioane 1:4.) I lo’u manatu, o le aoaoina, ma le tausi lelei o le fanau, e matua manaomia ai le faautauta, atamai, malamalama, lotomaualalo, malosi, poto, faaleagaga, faapalepale, ma le galue malosi na i lo se isi lava lu’itau e mafai ona tatou maua i le olaga. Ua matua tatau lava lenei tulaga, aua ua solia i lalo tulaga faavae o le ola mama ma le amio lelei i o tatou alalafaga. Ina ia maua ni aiga lelei ma le malolosi, e tatau ona aoao le amio mama, ma faia ni tulafono, ma tulaga faatonuina, ma ia tausisi i ai. E tele alalafaga e le lagolagoina matua i le aoaoina ma le faamamaluina o tulaga taua o le ola mama. E tele ni aganuu ua le faatauaina ai le ola mama, e to’atele foi le autalavou i na alalafaga ua le iloa ni tulafono o le ola mama.
Ona o le tele o alalafaga ua faaleagaina ma aveesea lo latou ola mama ma le tele foi o aiga ua malepelepe, e tasi lava lo tatou faamoemoega sili, o le uai atu o a tatou taumafaiga i le aoaoina o le isi tupulaga—o a tatou fanau ia. O le faia o lenei mea, e tatau ona tatou faamalosia faiaoga muamua o le fanau. O faiaoga sili i ia faiaoga uma, o matua ia ma isi tagata o le aiga, o le siosiomaga pito sili ona lelei e tatau ona i ai i le aiga. E tatau ona tatou taumafai malosi i ala uma e faamalosia ai o tatou aiga ina ia tutu atu o ni olo malolosi e tete’e atu i uiga leaga uma ua siomia ai i tatou. O le loto gatasi, fiafia, filemu, ma le alofa i le aiga, e mafai ona fesoasoani i fanau e maua ai le malosi e manaomia e feagai ai ma lu’itau o le olaga. Na saunoa Barbara Bush, le faletua o Peresitene George Bush, i nai masina ua mavae, i le au faau’u i le Kolisi o Ueselele e faapea:
“Po o le a lava le vaitaimi, po o le a foi le tausaga, e tasi lava le mea e le mafai ona suia: O tama ma tina, afai o i ai se lua fanau, o le mea lena e tuu i ai le faamuamua i mea uma. E tatau ona e faitau atu i lau fanau, e tatau ona e fusi mai i lau fanau, ma e tatau ona e alofa i lau fanau. O le manuia o lou aiga, le manuia o se atunuu, e le faalagolago i mea e faia i le Fale Pa’epa’e, a o mea e faia i lou lava fale” (Washington Post, 2 Iuni 1990, 2).
O le avea ma tama ma tina lelei, e manaomia ai le tu’ua e matua o le tele o mea la te mananao ai ina ia tali atu i manaoga o le fanau. O le taunuuga o lenei tautiga, o le a faatupuina ai e matua se uiga lelei ma iloa ai ona faatinoina upu moni sa aoao mai e le Faaola lava Ia.
Ou te faaaloalo tele mo matua nofofua o e o feagai ma avega mamafa, i le taumafai e tete’e atu i tulaga faigata i le faamaopoopoina o le aiga. E tatau ona faamamaluina ma fesoasoani atu ia te i latou ia latou taumafaiga fita. Peitai, o le a sili ona faigofie soo se galuega a se tina po o se tama i le aiga pe afai e i ai faatasi le tama ma le tina i le aiga. E masani lava ona tofotofoina ma manaomia e fanau le malosi ma le atamai o matua.
O Le a Le Tele o Taimi e Fai Ai a Outou Tatalo Faaleaiga?
I na i tausaga ua mavae, sa faatalanoaina ai Epikopo Simuti e Peresitene Kimball. Sa fesili atu Peresitene Kimball, “pe faafia ona faia tatalo a lou aiga?”
Sa tali atu Epikopo Simuti, “matou te taumafai e faia tatalo faaleaiga e faalua i le aso, a o le averesi e tasi i le aso.”
Sa tali atu Peresitene Kimball, “I aso ua mavae, o le faia o tatalo faaleaiga e tasi i le aso atonu sa lelei lena tulaga. A o le lumanai o le a le lava lena, pe afai tatou te fia faasaoina o tatou aiga.”
Ou te le iloa pe mata o le faia faasamasamanoa o afiafi faaleaiga i lea taimi ma lea taimi o le a lava lea i le lumanai e puipuia ai a tatou fanau i le malosi tau le amiolelei. O le seasea ona suesue faatasi le aiga i tusitusiga paia, atonu o le a le lava lea e faamalosia ai i le lumanai a tatou fanau i uiga lelei e tete’e atu ai i uiga leaga uma i mea o le a siomia ai i latou i le olaga. O fea se mea o le lalolagi e mafai ona aoaoina ai e fanau le legavia, amiotonu, faamaoni, ma uiga lelei uma pe afai e le aoaoina i le aiga? O nei uiga lelei uma, e moni, e aoaoina i le Ekalesia, a o aoaoga lava a matua e sili atu ona tumau i aoaoga uma.
E Tatau i Matua Ona Faia le Faataitaiga
Pe a aoaoina e matua fanau e aloese mai mea mata’utia, e le tatau i matua ona faapea atu i fanau, “ua ma malamalama ma ua ma iloa lelei ala o le lalolagi, ma e sili atu ona le afaina ai i ma’ua nai lo outou.” O le pepelo o matua o le a le talitonu ai fanau i mea ua la aoaoina ai i latou i le aiga. Mo se faataitaiga, pe a matamata matua i se tifaga e faasaina le fanau e matamata ai, o le a fesiligia e fanau le faamaoni o matua. Afai e faamoemoeina fanau ia faamaoni, e tatau ona faamaoni matua. Afai e tatau ona faamaoni fanau, e tatau foi ona faamaoni matua. Afai e te lua mananao ia ava la oulua fanau, e tatau foi ona oulua ava.
E tatau ona aoaoina lelei le fanau i isi uiga lelei, o le faaaloalo lea mo isi, e amata mai lava i matua o le tamaitiiti ma le aiga; o le faaaloalo i faatusa o le faatuatuaga ma talitonuga lotonuu o isi; o le faaaloalo i tulafono a le malo ma tulaga tatau; o le faaaloalo i mea totino a isi; ma le faaaloalo i taitai. Sa faamanatu mai e Paulo e tatau i le fanau ona “aoaoina i latou ia muamua ona agalelei i lo latou lava aiga.” (1 Timoteo 5:4).
Aoaiina Tatau o le Fanau
O se tasi o lu’itau sili ona fita i matua o le aoaiina tatau o le fanau. O le aoaoina o le tamaitiiti, e faalagolago lava i ona uiga. Aua e tofu lava le tamaitiiti ma ona uiga faapitoa. O le aoaoga e aoga i le isi e le aoga i le isi. Ou te le iloa po o ai e lava lona poto e faapea mai ai ua mamafa le aoaiga pe ua mama foi, sei vagana ai lava matua o le fanau lava ia, o e sili ona alolofa ia te i latou. O lena mea e manaomia ai le taitaiga ma le agaga tatalo o matua. O le aoaoga faavae lava o le aoaia o fanau, e tatau ona faia i le alofa na i lo le faasalaga. Na fautua mai Polika Iaga, “afai e valaauina oe e aoai se tasi, aua ne i e aoaia se tasi e aunoa ma le toe faaali atu i ai o lou alofa.” (In Journal of Discourses,9:124.) O le faatonu ma le aoaiina o ni vaega ia e le mafai ona tu’uesea i le aoaoina o le fanau. Afai e le aoaiina e matua fanau, ona aoaiinaa lea e tagata lautele o fanau i le ala e le fiafia ai matua. A leai se aoaiga, o le a le faaaloalo fanau i tulafono a le aiga po o le atunuu.
O le faamoemoega moni o le aoaiga, o le aoaoina o le usiusitai. Na faapea mai Peresitene Tavita O Makei, “o matua e le aoaoina le usiusitai i fanau, afai e le aoaoina i o latou aiga le usiusitai, o le a faamalosia e alalafaga, ma faia lea aoaiga. O le mea lea, e sili atu i se aiga, i lona agalelei, alofa, ma le loto malamalama, ona aoaoina se tamaitiiti i le usiusitai, na i lo le tu’u atu o ia i aoaiga saua ma le le alofa o le a tuuina atu e alalafaga, pe afai e le i faia e le aiga lona tiute” (The Responsibility of Parents to Their Children, 3).
Aoaoina o Fanau Ia Galulue
O le vaega taua o le aoaoina o le fanau ia loto pulea ma faia mea tatau, o le aoaoina lea o i latou ia galulue. A o tuputupua’e i tatou, o le to’atele o i tatou e faapei o le tagata na faapea mai, “ou te fiafia i galuega, ou te maua ai le fiafia. E mafai ona ou nofo ma toe vaavaai atu i ai i taimi e tele” (Jerome Klapka Jerome, i le The International Dictionary of Thoughts, na tuufaatasia e John P. Bradley, Leo F. Daniels, ma Thomas C. Jones [1969], 782). Ioe, o faiaoga sili o le matupu o le galue o matua lava. Ia te a’u lava ia, sa avea le galue o se fiafiaga ia te a’u ina ua ou uluai galue faatasi ma lo’u tama ma lona tama, ma tausoga ma uso. Ou te iloa sa sili atu ona avea a’u ma se tagata faalavelave na i lo le avea ma fesoasoani i na galuega, ae matagofie lava na taimi ma lesona sili taua sa aoaoina ai. Poo tuuina atu ea e matua taimi e faasino ma faataitai ma faamatala atu ina ia mafai e le fanau, e pei ona aoao mai Liae, “e filifili mo i latou lava, ae le galueaiina”? (2 Nifae 2:26.)
Na faapea mai Luteru Pepani (Luther Purbank), o se tasi alii faitogalaau maoa’e o le lalolagi, “afai tatou te le tausia a tatou laau toto e pei ona faia ia tatou fanau, o le a le pine ae avea ma se togavao matua” (i le Elbert Hubbard’s Scrap Book [1923], 227).
Lu’i Faapitoa Mo Matua
O le a faamanuiaina foi fanau i le filifiliga sa’oloto lea ua maua ai e i tatou uma le avanoa e alualu ai i luma, tuputupua’e ma atiae. O lena saolotoga e mafai ai foi e fanau ona sailia e faia filifiliga tuufaafeagai o le manatu faapito, o le ola faamaimau, o le ola soona fai, ma le faaleagaina o le tagata lava ia. E masani ona faaalia e fanau lea filifiliga saoloto a o iti lava i latou.
O matua uma lava o e loto malamalama, alolofa, ma popole, ma latou uma o lo o taumafai e ola i mataupu faavae o le amiotonu i le mea sili latou te mafaia, e tatau ona faamafanafanaina i le iloa lea o i latou o ni matua lelei, e tusa lava po o a ni uiga o faaali mai e a latou fanau. Ua i ai i fanau le tiute e faalogo, usiusitai, ma ua uma ona aoaoina ia taumafai e aoao. O le a le tu’uaia i matua amioga le tatau uma a le fanau, aua e le mafai e matua ona mautinoa o le a amio lelei le fanau. O nisi o fanau o le a latou tofotofoina lava le poto o Solomona ma le onosai o Iopu.
O lo o i ai foi se lu’itau faapitoa lava mo nisi o matua o e mauoloa po o e o loo faia mea uma e mananao ai le fanau. O nisi fanau i aiga faapena e faatiga i o latou matua i le le usiusitai i tulafono a matua vagana ua faia muamua e matua mea latou te mananao ai. Na faapea mai Elder Neal A. Maxwell, “o matua o e ua tele naua mea ua latou faia mo a latou fanau e le pine ae latou iloa ua leai se isi mea latou te mafaia ia latou fanau. E tele naua fanau ua tu’u atu i ai mea e tele, ma ua leaga ai.” (i le Conference Report, Aperila 1975, 150; poo le Ensign, Me 1975, 101). Ua avea o se natura faaletagata, le le talisapaia atoatoa o mea ua tatou maua e le i alu ai so tatou malosi.
O lo o i ai se talitonuga e faapea, o nisi matua e naunau lava mo a latou fanau ia talia ma ia lauiloa ia latou tupulaga; ae i ai foi le popole i nei lava matua ina ne’i faia e a latou fanau mea o loo faia e a latou tupulaga.
O Le Fesoasoani Atu i Fanau Ia Ola e Tusa Ai Ma Aoaoga i le Aiga
E masani lava, o fanau e faia le filifiliga ma i ai le talitonuga maumaututu e aloese mai fualaau oona, alakaholo, ma le legavia, o latou ia ua talia ma faaaoga aoaoga lelei mai o latou aiga e pei ona ola ai o latou matua. I taimi o filifiliga faigata, o le a latou mulimuli lava i aoaoga a o latou matua na i lo le gauai atu i faataitaiga leaga a tupulaga po o faasalalauga taufaasese a ala faasalalau e faatosina ai i ava malolosi, uiga faitaaga, mulilua, le faamaoni, ma isi uiga leaga uma faapena. O le a pei i latou o le autau talavou e lua afe a Helamana o e na “aoaoina e o latou tina, pe afai latou te le masalosalo, e laveaiina i latou e le Atua,” mai le oti “Ma ua latou tala mai upu a o latou tina, ua faapea mai: Matou te le masalosalo lava, na iloa e o matou tina” (Alema 56:47–48).
O le mea e foliga mai ua fesoasoani e faamautuina ai aoaoga a matua i olaga o le fanau, o le talitonu moni i le Atua. A avea lenei talitonuga ma vaega o o latou olaga, ona maua lea o le malosi i o latou agaga. Mai nei mea uma e tatau ona aoao atu, o le a le mea sili e tatau ona aoao atu e matua? Ua faailoa mai e tusitusiga paia, e tatau ona aoao e matua a latou fanau i le “faatuatua i le Alo o le Atua soifua, ma le papatisoga, ma le meaalofa o le Agaga Paia” ma le “mataupu o le salamo” (MFF 68:25). O nei upu moni uma e tatau ona aoaoina i le aiga. E le mafai ona aoaoina ia mataupu i le aoga, e le aoaoina foi e le malo po o alalafaga. E moni, e mafai ona fesoasoani polokalama a le Ekalesia, a o le aoaoga sili lava ona taua e faia lea i le aiga.
O Vaega e Afe o le Alofa
O taimi o aoaoga a matua e le manaomia ni mea tetele, ofoofogia ma mamana. Ua tatou aoaoina lea tulaga mai le Faiaoga Sili. Na faapea mai Sale Enele Pakihesa (Charles Henry Parkhurst):
“O le matagofie atoatoa o le soifuaga o Keriso o le tuufaatasia lea o gaoioiga laiti o le matagofie- –e pei o le talanoa ma le fafine i le vaieli; o le faailoa atu i le faipule talavou manaoga lilo o lona loto ua le maua ai e ia le malo o le Lagi;… . o le aoaoina o se vaega toaitiiti o ona soo i le ala e tatalo ai; o le saunia o le afi mo le tunuina o ia e taumamafa ai ona soo a o faatali atu ia te i latou ina ua a’e mai lo latou faiva i le po ua maalilili, vaivai, ma loto vaivai. Ua e iloa nei, o nei mea, ua faigofie ai ona tatou malamalama i tulaga taua moni ma mea e naunau faapitoa i ai [Keriso], o ni mea laiti lava.” (“Kindness and Love,” i le Leaves of Gold [1938],177).
E faapena foi i le tulaga o le avea ma matua. O mea laiti o mea tetele ia o loo tuuina atu i le aiga e ala i vaega e afe o le alofa, faatuatua, aoaiga, taulaga, onosai, ma galuega.
Fanau o le Feagaiga
O lo o i ai folafolaga sili faaleagaga e mafai ona fesoasoani i matua faatuatua o lenei Ekalesia. O fanau a matua ua faamauina e faavavau e mafai ona latou maua faamanuiaga faalelagi na folafola mai i o latou matua faamaoni o e na tausia a latou feagaiga. Afai e manatua e matua a latou feagaiga, o le a manatua foi i latou e le Atua. Ona maua ai lea e fanau faamanuiaga o nei feagaiga ma folafolaga silisili. Aua o i latou o fanau o le feagaiga (tagai Orson F. Whitney, i le Conference Report, Aperila 1929, 110–11).
Ia faamanuia atu le Atua i matua o lenei lalolagi o loo tauivi ma faamaoni. Ia faapitoa ona Ia faamamaluina feagaiga ua tausia e matua faamaoni i le Ekalesia, ma ia leoleoina nei fanau o le feagaiga.
Mai se lauga a Elder Faust i le konafesi aoao a le Ekalesia ia Oketopa 1990 (Liahona, Ianuari 1991,34–37).
O Se Laulau Ua Siomia i le Alofa
Elder LeGrand R. Curtis
O le Fitugafulu
E tele mea ua tusia e uiga i le taua o le aiga. Na saunoa mai Peresitene Marion G. Romney ia i tatou e faapea “Ua i ai i le lotolotoi o le lepetia o alalafaga ia le le mautu o le aiga.”1 Ua tatou iloa o nisi aiga e tetele fale, matagofie meafale ma taugata foi. O nisi fale e laiti ma faatauvaa, ma nai meafale faalelava. E ui i lea, e mafai ona avea fale ma aiga taitasi “ma lagi i le lalolagi, pe a faatumulia i le alofa—o se vaega o le lagi lena tatou te mananao tatou te i ai,” e pei ona faamanatu mai e se tasi o a tatou viiga matagofie.2
O se tasi o meafale e sili ona taua ua maua i le tele o fale o aiga, o le laulau ai lea i le umukuka. Atonu e laitiiti pe tele foi, pe o se fata foi e laitiiti se avanoa e tu’u ai meaai ma tui ma sipuni. O lona aoga faapitoa e foliga mai o se mea lena e maua ai e tagata eseese o le aiga le tausiga.
I lenei sauniga faapitoa, o lo’u faanaunauga o le aumaia lea ia te outou o se aoga e sili ona loloto ma taua o le laulau i le umukuka, lea e mafai ona tatou maua ai mea e sili i lo na o le tausiga mo le manuia o o tatou tino faaletino.
Talanoaga e Uiga i Le Talalelei a o Siomia le Laulau
O se aiga e masani ona toalua pe toatolu foi ni tagata e i ai e eseese le matutua, ae e tatau i le aiga ona feiloai—ia le gata ina feiloai e aai, ae ia tatalo, talatalanoa, faalogo, faamatala, aoao, ma tuputupu a’e faatasi. Na saunoa mai Peresitene Gordon B. Hinckley:
“O la’u aioi atu—ma ou te moomoo maimau pe ana ou lelei i le tauina atu o lenei mea—o se aioiga ia laveai le fanau. Ua toatele na’ua i latou o savavali ma le tiga ma le fefe, i le faaesea ma le atuatuvale. E manaomia e fanau le susulu o le la. Latou te manaomia le fiafia. Latou te manaomia le alofa ma le tausiga. Latou te manaomia le agalelei ma le faafouina ma le alofa. O fale o aiga uma lava, e tusa pe o le a le tau, e mafai ona maua ai se siosiomaga o le alofa lea e avea ma siosiomaga o le faaolataga.”3
O le toatele o tagata o aiga ua gauai atu i faatosinaga e tele a le lalolagi i fafo atu o le aiga, ma faatosinaga malosi a leitio, televise, vitio, ma isi mea e tele ia tatou te aumaia i o tatou aiga.
Se’i manatu faalemafaufau lava i se aiga, e potopoto i se laulau, atonu o se laulau ai i le umukuka ma talatalanoa e uiga i le talalelei, e uiga i le sauniga faamanatuga, e uiga i savali, talatalanoa e uiga i le mekasini o le Liahona, talatalanoa e uiga i le aoga ma ona suiga uma, talanoa e uiga i le konafesi aoao, talatalanoa e uiga i lesona o le Aoga Sa, faalogologo i musika lelei, talatalanoa e uiga ia Iesu Keriso ma Ana aoaoga. E mafai ona faalautele lenei lisi. E le na o matua, ae o se mea tatau i tagata uma o le aiga ia mautinoa ia maua e tagata uma taitoatasi o i ai se avanoa lelei e auai i le talatalanoaga.
Tatalo Faaleaiga Faataamilo i le Laulau
Manatu i le malosi o se aiga, e to’otutuli faatamilo i se laulau (e aunoa ma se televise), e tatalo, aioi atu mo se fesoasoani, faafetai atu i lo tatou Tama mo faamanuiaga—ma aoao atu i tupulaga uma le taua o se Tama Faalelagi alofa. O tatalo faaleaiga faatasi ma fanau laiti e mafai ona atina’e ai ni tagata matutua lelei, o e o le a i ai se aso o le a tatalo faatasi ai ma o latou aiga.
Sa faamatalaina lelei e Elder Thomas S. Monson lenei tulaga:
“Na faatonu mai e le Alii ia faia a tatou tatalo faaleaiga ina ua Ia fetalai mai: “Ia tatalo i o outou aiga i le Tama i lo’u igoa, ina ia manuia a outou ava, ma a outou fanau. (3 Nifae 18:21).
Pe mafai ona tatou auai faatasi a o tatou tagai atu i se aiga masani o le Au Paia o Aso e Gata Ai o tatalo atu i le Alii? O le Tama, Tina ma le fanau taitasi o tootutuli, punonou o latou ulu, ma moeiini o latou mata. O se lagona matagofie o le alofa, lotogatasi, ma le filemu ua faatumulia ai le fale. A o faalogo atu le tama i lona atalii laitiiti o tatalo atu i le Atua ia faia e lona tama mea sa’o, ma usiusitai i faatonuga a le Alii, pe tou te manatu ea o le a faigata i se tama faapena ona faaaloalo i le tatalo a lona atalii pele? A o faalogo se teine talavou i lona tina alofa o aioi atu i le Alii, ia musuia lana tama teine i le filifiliga o ana soa, ia ona saunia o ia lava mo se faaipoipoga i le malumalu, tou te le talitonu ea o le a saili lena tamaitai e faamamaluina lenei aioiga lotomaualalo a lona tina, o le e alofa tele i ai? Pe a tatalo le tama, tina, ma fanau taitasi ma le faatauanau ia ola agavaa nei atalii lelei i le aiga ina ia latou maua i le taimi e tatau ai se valaauga e auauna atu e avea ma ave fea’u a le Alii i le misiona a le Ekalesia, pe tatou te le amata ea ona vaai i le tuputupu a’e o ia atalii ma avea ma ni taulele’a talavou ola amio lelei, faatasi ma se faanaunauga lofituina e auauna atu e avea ma faifeautalai?”4
E pei ona fai mai le toatele, “e mafai faapefea ona e auina atu lau fanau ma matua i fafo i le lalolagi i aso taitasi e aunoa ma le faapotopoto faatasi ma talanoa atu i le Alii?” O matua atamamai e iloilo le faasologa o mea e fai, ma fuafua se taimi i aso taitasi e sili atu ma le tasi e faapotopoto ai le aiga mo faamanuiaga o le tatalo. O le a le pine ae iloa e tagata talavou ona faia foi faapea ma iloa le taua o tatalo faaleaiga.
Ia Avea le Aiga Ma Se Nofoaga Fiafia
Sa ou ta’ua muamua e ao ona “avea le aiga ma nofoaga fiafia ona e galulue tagata uma ia faatumauina faapena. Ua ta’ua mai o le fiafia o se mea e gaosia mai le aiga, ma e tatau ona tatou taumafai e fai ni mea e fiafia ai o tatou aiga ma avea ma ni nofoaga lelei mo i tatou ma a tatou fanau. O se aiga fiafia o se aiga lea e faaautu i aoaoga o le talalelei. E manaomia ai le tumau ai i taumafaiga lelei e faia e i latou e mau ai.”5
Sa tomumu se talavou pisi i se aiga toatele, e uiga i le tele o le taimi e alu i tatalo faaleaiga. A o tatalo le tina faautauta, sa ia faia ma le loto i ai le le ta’ua o le igoa o lana tama tomumu. Ina ua faaiuina le tatalo, na faapea mai lana tama pisi, “Tina, e te le i ta’ua lo’u igoa i lau tatalo!” Sa faamalamalama atu e le tina alofa o lea sa tali atu o ia i lana tomumu sa fai mai. Sa faapea mai le tama pisi, ‘“Aua e te le toe ta’ua lo’u igoa.”
Suesuega i Tusitusiga Paia a o Faatamilo i le Laulau
Se’i tagai faalemafaufau i se aiga o siomia se laulau o loo i ai ni tusitusiga paia o susu’e, o loo talanoa upu moni e tele ma manatunatu i lesona! O se laulau moni lenei o loo siomia i le alofa!
E ioe tagata faiaoga e manaomia e tamaiti ona matua faitau tusi tele i fafo atu o le aoga. E mafai ona tatou faamanuiaina a tatou fanau e ala i le faitau o tusitusiga paia faatasi ma i latou i aso taitasi—i le laulau ai i le umukuka.
Atonu e tele se fesuiaiga e faia ma le fuafua tatau ina ia maua ai se taimi e feiloai ai le aiga i le laulau i le umukuka, ae o le a ea se mea e sili ona taua na i lo le lotogatasi o le aiga, le tuputupu a’e faaleagaga o le aiga, o sootaga i le va o tagata o le aiga a o latou talanoa, faalogo, ma tali atu ma siomia uma i le alofa? O lo tatou manuia faapitoa o le taumafai lea ma toe taumafai pea.
Faamalosia o Sootaga o Aiga
E tele faatosinaga i le lalolagi o aso nei o saili e lepetia le fale ma le aiga. O matua faautauta e taumafai e faamalosia sootaga faaleaiga, faateleina le faaleagaga i le aiga, ma uai atu ia Iesu Keriso ma galuega faalemalumalu. Na saunoa mai Peresitene Howard W. Hunter ia i tatou:
“Ou te tatalo ina ia tatou agalelei atu o le tasi i le tasi ma le alofa tele, faaaloalo tele, agamalu tele ma le onosai ma le loto faamagalo….
“Lona lua, i lena lava agaga e tasi, ou te valaau atu ai foi i tagata o le Ekalesia ia faatuina le malumalu o le Alii e fai ma faailoga sili o lo latou auai i le Ekalesia, ma pito maualuga mo a latou feagaiga e sili ona paia. O se faanaunauga loloto lava o lo’u loto ia agavaa tagata uma o le Ekalesia mo le malumalu.”6
O le aoaoga sa tuuina mai e Peresitene Hunter e mafai ona matua faalauteleina i talanoaga e faia faataamilo i le laulau i le umukuka.
O o tatou aiga e tatau ona faataitai i ai le ala e fai lelei ai e le tasi le tasi e pei ona faapea mai o Goethe, “A e faia [se tagata e pei ona i ai], o le a tumau ai foi o ia e pei ona i ai, ae afai e te faia o ia ia avea ma se tasi e mafai [ma e ono mafai] ona avea ai, o le a avea o ia ma se tasi [e tatau ona avea ai].”7
Ia Avea Aiga O Ni Nofoaga o le Faamaoni
Na saunoa mai Peresitene Boyd K. Packer: “Ina ia aumaia ni mea o le lagi i totonu o le aiga, o le mautinoa lea ia faauuina tagata o le aiga i le auai i lotu. O afiafi faaleaiga, e moni, o se mea ua saunia mo lenei tupulaga—o se fonotaga faaleaiga lena e mafai ona faamaopopo ina ia talafeagai ma mea e manaomia; ma e mafai ona avea o se sauniga lotu pe pei foi o fonotaga na o loo faia i le falelotu.”8
O lea fautuaga ua ioe foi i le mea na ta’u mai e Elder Dean L. Larsen ia i tatou: “O o tatou falelotu e le na o le pau ia o ni nofoaga e mafai ona tatou tapuai ai. E tatau foi ona avea o tatou fale ma nofoaga o tapuaiga. O le a lelei pe afai o aso taitasi e mafai ai ona tatou ‘o atu i le lotu i o tatou fale’. E le tatau ona i ai se isi nofoaga e sili atu ona talia fiafia le Agaga o le Alii ma sili ona faigofie ona maua ai, na i lo totonu o o tatou lava aiga.”9
A o tatou galulue e faataunuu nei mea uma i o tatou aiga, o le a lelei ona tatou manatua le saunoaga taua a Peresitene Harold B. Lee: “Ia manatua e le aunoa o le galuega e sili ona taua a le Alii e faia e oe ma a’u, o se galuega lea e faia i totonu o puipui o o tatou lava fale.’10
O la’u aioiga i le aso, ia vaavaai faalelei ifo i tatou taitoatasi i totonu o o tatou fale ma le laulau i le umukuka, ma faaauau ona taumafai e aumaia le lagi i o tatou aiga ma ia o mai ia Iesu Keriso.
Mai se lauga a Elder Curtis i le konafesi aoao a le Ekalesia ia Aperila 1995 (Liahona, Iulai 1995, 91–92).