Lesona 3

Faaolaolaina o le Alofa ma le Faauoga i le Faaipoipoga

Auala mo leFaatinoga

Ia mulimuli i se mea e tasi po o mea uma o nei fautuaga fuafua faatatau lava i o oe lava tulaga manaomia ma tulaga o loo i ai.

Suesue i le Mosaea 7:45–48. Ia faia se lisi o ituaiga o alofa o loo ta’ua i lenei mau. Ia faia se tautinoga ina ia faaleleia atili nei ituaiga o alofa i lou olaga. Ia mafaufau i auala e mafai ai ona fesoasoani nei ituaiga o alofa i tane ma ava i le fafagaina o lo latou alofa ma le faauoga.
Ia faia se fuafuaga faatasi ma lou toalua ina ia faaaluina sina taimi e faatasi ai na o oulua i vaiaso taitasi. Atonu o se mea tatau le fuafuaina o ia taimi e ala i le tusia o se faaupuga e manatua ai i se kalena po o se tamai api.

FaamatalagaFaatonuina eFaitauina

Suesue e uiga i le faamatalaga tusia o loo i lalo. Afai ua e faaipoipo, ia faitau ma talanoaina le faamatalaga tusia faatasi ma lou toalua.

Tasi i le Faaipoipoga

Peresitene Spencer W. Kimball
Peresitene Lona 12 o le Ekalesia

O se faaipoipoga aloaia, fiafia, ma le faamanuiaina, o le mea moni, o se sini autu lava lea a soo se tagata. O le faaipoipoga, atonu o se filifiliga po o se faaiuga aupito sili lea ona taua i lo faaiuga uma ma e i ai ona uiga taua e sili atu, aua e le gata ina maua ai le tele o le fiafia, ae faapea foi ona maua ai le olioliga e faavavau. E le gata ina aafia ai tagata e toalua o loo faatasi ai, ae faapea foi o la aiga aemaise lava a la fanau ma fanau a la fanau ma faasolo mai ai lava i le tele o augatupulaga.

I le filifilia la o se aumea mo le ola nei ma le faavavau, ua matua onomea ma tatau ai le faia o fuafuaga lelei, mafaufau, tatalo ma le anapogi ina ia mautinoa ai ma faaiuga uma lava, ina ia le sese le ua filifilia. E tatau ona i ai i le faaipoipoga le tasi i le mafaufau ma le loto. E le tatau ona avea lagona ma na o se mea e faia ai se tonu, ae o le mafaufau ma le loto, e faamalosia i le anapogi ma le tatalo ma le manatunatu loloto, o mea ia e maua ai se avanoa taua o le faaipoipoga fiafia. E aumaia faatasi ma lea tulaga le tu’u o mea ua loto i ai le tagata, ia fetufaai atu, ma e manaomia ai le le manatu faapito.

O le tele lava o tala fatu ma ata e faaali mai i le televise, e faaiuina lava i le faaipoipoga: “Ona nonofo fiafia lava lea o i laua mulimuli ane.” Ua tatou iloa, e le mafai ona maua le fiafiaga moni ma se faaipoipoga faamanuiaina i le na o le faataunuuina o le sauniga . E le mafai ona maua le fiafia i le na ona oomiina o se ki, e pei ona faia i le moli eletise; o le fiafiaga moni, o se vaega po o se tulaga lea o le mafaufau ma e faapea ona ala mai ai. E tatau ona galulue i ai. E le mafai ona faatauina mai i ni tupe; e le mafai foi ona ave fuaina.

Ua manatu nisi tagata, o le fiafia, o se olaga fifilemu lea ma le maua o mea matagofie tele o le olaga, ma le maua o le faaneeneega tumau; peitai, o le faaipoipoga moni, e faavae lea i luga o le fiafiaga moni lea e maua mai i le fetufaai atu, auauna atu, foai atu, lafoaia o mea e loto i ai mo le lelei o le isi, atoa ma le le manatu faapito.

O tagata e to’alua e eseese tulaga o olaga ma malamalamaaga e omai ai i la’ua, ua la iloa mulimuli ane ina ua ma’ea ona faataunuu le sauniga, e tatau ona la faafeagai ma tulimatai faatasi atu i le mea moni. E le toe i ai se olaola fifilemu ma se olaga faafoliga o le fiafia; e tatau ona tatou o ese mai ao o le lagi, ae ia tutu mamau o tatou vae i le fogaeleele. E tatau ona la tauaveina faatasi le tiutetauave ma talia tiute fou. E tatau ona lafoaia nisi o sa’olotoga faaletagata, ma e tele na’ua foi fetu’utu’unaiga o le le manatu faapito e tatau ona fai.

E oo ina vave iloa e se tagata ina ua mavae le faaipoipoga e i ai i lana tane po o le ava nisi o vaivaiga sa le i faaalia pe na iloa muamua. O uiga lelei ma le tausaafia sa tumau ona faaalia i le taimi a’o faia le faauoga, ua faasolosolo nei ina mou malie atu, a’o vaivaiga ma tulaga le tonu sa foliga mai ua na o sina mea itiiti ma le faatauvaa i le taimi o le faauoga, ua oo nei ina tupu tele ma avea ma to’atuga. Ua oo i le taimi e tatau loa ona i ai le loto malamalama, iloiloga o le tagata, atoa ma le mafaufau lelei, manatunatuga loloto, atoa ma le faia o fuafuaga. O amioga masani i le tuputupu ae o le a alia’i mai; atonu e aiu pe ola faamaumau, pe paie pe toaga foi lau soa, pe lotu pe leai foi; atonu e agalelei ma lagolagosua o ia, pe le loto onosai ma maitaita foi, e pule malosi pe lima foai, e manatu faapito pe matamuli foi. O le a faatupulaia le faafitauli o matua ma le aiga o le toalua , ma o le a faalauteleina foi sootaga a le toalua ia i latou.

E masani lava ona le fiafia e faaleleia mea uma ma faataunuuina tiutetauave mamafa e tatau ona faia. Ua faigata ona suitulaga atu i ai le ola fuafua lelei i le olaga o le tele o mea sa i ai , ma e foliga mai e masani lava ona mafuli atu tagata talavou i le soona mananao “ina ia maua mea ia tutusa ma mea o loo maua e o la tuaoi.” E masani lava ona le fiafia e faia suiga e tatau ai o mea tau tupe. E masani lava ona mananao ava talavou ina ia faaauauina i o latou lava aiga le maua o mea taugata e pei ona sa i ai i aiga tamaoaiga o o latou tama o e na faamanuiaina. O nisi o i latou ua naunau e fesoasoani ia maua le olaga lena o le tele o mea e ala i le faigaluega pea pe a ma’ea ona faaipoipo. O le mea lea e oo ina tu’ua ai e i latou le fale ma le aiga lea e i ai o latou tiute, ae o atu e saili galuega ina ia maua mai ai tupe e tele. Afai e galulue uma le tane ma le ava o le a faapea loa ona i ai i le aiga le tulaga o le faatauva, ae le o le felagolagomai. O ia tagata faigaluega e to’alua ua foi mai i le fale ua vaivai, loto fefete ma le mitamita o le tagata lava ia, faateleina o le tulaga tuto’atasi, ona faapea loa lea ona tutupu mai ai o tulaga o le feeseeseai ma le le femalamalamaai. O le a tutupu a’e nai eseesega laiti ma avea ma ni eseesega tetele.

E ui lava ina faigata le faaipoipoga, ma e ta’atele faaipoipoga le lelei ma le malepelepe, ae peitai e mafai ona i ai le fiafia moni ma tumau, ma e mafai ona avea le faaipoipoga o se mea sili atu ona maua ai le olioli na i lo le mea e mafai e le mafaufau o le tagata ona malamalama i ai. E mafai ona maua e ulugalii uma, ma tagata uma lea mea. E le moni ma o se tulaga faanenefu le manatu faapea e tutusa mea uma e fiafia ma le fiafia i ai ni tagata se toalua; ma a’o sailia e alii ma tamaitai talavou uma i le filifiliga ma le agaga tatalo se tasi e mafai ona la femaliliea’i faatasi ma avea ai le olaga ma se tulaga matagofie, peitai e i ai lava le tulaga moni, e mafai lava e soo se alii lelei ma soo se tamaitai lelei ona maua le fiafia moni ma se faaipoipoga faamanuiaina, pe afai e i ai ia i la’ua uma le faanaunauga ina ia matua galulue agai i ai.

O loo i ai se fua tumau e faavavau e mafai ona maua ai e ulugalii uma se faaipoipoga fiafia ma le faavavau; peitai e pei lava o fua uma, o mea autu lava e faaaogaina e tatau ona i ai, e le tatau ona lafoaia pe faaitiitia pe faagataina foi. O le faia o le filifiliga a’o le i faia le faauoga atoa ma le faauoga faaauauina pe a mae’a le faaipoipoga e tutusa lava le taua o ia mea e lua, peitai e le sili atu ona taua na i lo le faaipoipoga lava ia, ma o le faamanuiaina o lea faaipoipoga e faalagolago lava lea i tagata e toalua— e le faalagolago i le toatasi, ae faalagolago i tagata e toalua.

I se faaipoipoga e amataina ma faavae i tulaga e tatau ai e pei ona sa ta’ua muamua, e le o i ai se tu’u faatasiga o mana e mafai ona faaumatia ai lea faaipoipoga se’i vagana le mana o loo i totonu o le tane ma le ava po o i la’ua uma foi; ma e tatau ona la tauaveina le tiutetauave. Atonu e i ai se faatosinaga a tagata ma faalapotopotoga e faia mo le lelei po o le leaga o lena faaipoipoga. O le tulaga o mea tau tupe, va fealoai ma isi tagata, tulaga tau upufai o malo, atoa foi ma isi tulaga atonu e foliga mai o mea ia e leaga ai se faaipoipoga; peitai o le faaipoipoga e faalagolago lava lea i le tane ma le ava o e e mafai ona la avea lena faaipoipoga ma se mea faamanuiaina ma le fiafia pe afai ua tonu o la loto, le manatu faapito, ma amiotonu.

E faigofie le fua e manuia ai; e itiiti mea e faaaogaina e manuia ai lea faaipoipoga, e ui lava ina o loo i ai i mea taitasi le tele o mea e faaleleia ai.

Muamua, e tatau lava ona i ai le ala sa’o ma le tonu agai i le faaipoipoga lea e tatau ai i le tagata ona filifilia se la te faatasi o le e toetoe lava atoatoa ma i ai tulaga uma ia e faatauaina e i laua. Ona tatau ai lea i ia tagata e to’alua ona o mai i le fatafaitaulaga i le malumalu ma lo la iloa e tatau ona la galulue malosi agai atu i lenei tulaga o le nonofo faatasi ma le fiafia.

Lua, e tatau ona i ai le le manatu faapito, ia faagalo e le tagata lava ia lava ma ia faatatau le olaga atoa o le aiga ma isi mea uma e tatau ai mo le lelei o le aiga, ma ia aveesea le manatu faapito.

Tolu, e tatau lava ona faaauauina e le aunoa le tulaga o le faauoga atoa ma le faaalia o le alofa faamaoni, agalelei, atoa ma le manatunatuga loloto ina ia faaolaolaina pea le alofa.

Fa, e tatau ona matua tausia ma ola atoatoa i poloaiga uma a le Alii e pei ona faamatalaina mai e le talalelei a Iesu Keriso.

O le faatauaina la ma le faagaoioia e le aunoa o ia uiga lelei ma le tausaafia, o le a le mafai ona oo mai ai le faanoanoa, faamutaina o le tulaga o le le malamalama, atoa ma le aloese mai ai i le tulaga o le ono tatalaina o le faaipoipoga. O le a tatau i loia e tatalaina faaipoipoga ona suia i nisi galuega ma o le a tapunia faamasinoga e tatalaina ai faaipoipoga.

O tagata e to’alua e o atu i le fatafaitaulaga o le faaipoipoga e tatau ona la iloa, o le maua o le faaipoipoga fiafia e pei ona la faamoemoe atu i ai, e tatau ona la iloa o le faaipoipoga ua le na o se tuufaatasiga faaletulafono, ae o lona uiga, o le lafoai lea o mea e fiafia i ai mo le lelei o le isi, fetufaai, atoa foi ma le faamutaina o nisi o saolotoga faaletagata lava ia. O lona uiga, o le matua ola fuafua tatau. O lona uiga, o fanau o le a faaopoopoina ai le i ai o tulaga o mea tau tupe, auauna atu, tausiga po o le popole foi. Peitai, o lona uiga foi o uiga ma lagona loloto ma le tausaafia o tagata uma.

A’o le i oo ina faataunuuina le faaipoipoga, e i ai i tagata taito’atasi le saolotoga e alu ai ma foi mai i le taimi e loto i ai o ia, faatulaga ma fuafuaina lona olaga i le tulaga e iloa ia lelei ai, atoa foi ma le faia to’atasi e ia o faaiuga uma lava. O soa faapelepele, e tatau ona latou iloa a’o le i oo ina faia tautoga ma osia feagaiga, e tatau i tagata taito’atasi ona taliaina ma le atoatoa, e tatau lava ona faasilisilia le tulaga lelei o le aiga fou mo le lelei o le tane ma le ava. E tatau ona aveese le faaaogaina e tagata taitasi o le “O a’u” ma le “lo’u po o le la’u” ae ia suitulaga i ai le “ma’ua” ma le “matou”. E tatau lava ona matua iloiloina maeaea faaiuga uma e tatau ona aafia ai tagata e to’alua po o le sili atu foi o e o loo aafia ai. A’o agai atu nei o ia i le faia o faaiuga taua, o le a i ai i le ava le atugaluga tele e uiga i le aoga o ia faaiuga i matua, le fanau, le aiga, atoa ma o latou olaga faaleagaga. O le filifiliga a le tane o se galuega, lona olaga i mea tau faafiafiaga, ana uo, ma mea uma e fiafia i ai, e tatau nei ona iloiloina ma le malamalamaaga o ia ua na o se vaega o le aiga, ma e tatau ona manatuaina le vaega atoa o le aiga.

Atonu o le a le aunoa le faaipoipoga ma ni tulaga le tonu e ono tutupu mai ai, peitai e mafai ona avea ma faaipoipoga e maua ai le filemu sili. Atonu e mafai ona oo i se ulugalii le tulaga o le mativa, mai, mea e le fiafia i ai, mea e to’ilalo ai, ma e oo lava i le maliu ma le oti i le aiga, peitai e ui lava ina o le a i ai nei mea uma, ae o le a le aveesea mai ai lava lo la tulaga o le filemu. O le a tumau lava ona avea le faaipoipoga ma se faaipoipoga faamanuiaina pe afai o le a le ulufale lava i ai le manatu faapito. O faafitauli ma mea le tonu e ono tutupu mai o le a mafai ona tu’u faatasi ai matua i se faatasiga e le motusia, pe afai e i ai le tulaga atoatoa o le le manatu faapito. I le tulaga pagatia o le soifuaga na i ai le vaitaimi o le 1930 ma ona tupu, sa matua faaitiitia ai lava le tulaga o le tatalaina o faaipoipoga. O le mativa, to’ilalo, ma mea na faanoanoa ai—sa avea ia mea ma mea na fusia faatasi ai matua. E mafai e tulaga faigata ona faamautuina sootaga ma fegalegaleaiga, lea e mafai ona faaumatia e le tamaoaiga ma le tele o mea.

O le faaipoipoga e faavae i le manatu faapito e toetoe lava ina mautinoa e oo ina malepe. O le tagata e faaipoipo ona o tupe po o se foi e faaipoipo ona o le ta’uta’ua po o se tulaga faaletagata e mautinoa lava o le a le maua le fiafia. O le tagata e faaipoipo ona o le faamalieina o le mitamita ma le faamaualuga pe faaipoipo foi ona o le faaitaina pe ina ia tiga ai le isi tagata o loo ia taufaavalea ia te lava. Peitai o le e faaipoipo mo le tuuina atu ma le mauaina o le fiafia, mo le tuuina atu ma le mauaina o le auaunaga, ma o le e vaai atu i le manuia o i la’- ua uma e to’alua atoa ma le aiga o le a oo mai o le a maua le avanoa e avea ai le la faaipoipoga ma se faaipoipoga fiafia.

E pei o se fugalaau le alofa, ma e pei foi o le tino, e manaomia le fafagaina pea lava pea. O le a le pine ona pae’e ma oti le tino faaletino pe afai e le fafagaina e le aunoa. O le a mamae ma pe se fugalaau matala pe a aunoa ma se meaai ma se vai. Ua faapea foi le alofa, e le mafai ona faamoemoe e tumau e faavavau se’i vagana ua fafagaina e le aunoa i vaega o le alofa, o le faaalia o le faatauaina e le tagata o ia lava, o le faaalia lea o le agaga faafetai, ma le faatauaina o le le manatu faapito.

O le i ai o le tulaga atoatoa o le le manatu faapito ua mautinoa ai le maua o se isi mea taua i le faaipoipoga faamanuiaina. Afai e saili se tasi i mea e fiafia i ai, mea e to’afilemu ai, ma le fiafia o le isi, o le a tuputupu ae le alofa faateleina e pei ona sa i ai i le taimi o le faauoga ma faamautuina atili i le faaipoipoga. E to’atele ulugalii ua latou faatuutuu ia latou faaipoipoga ma ua maalili ai le alofa e pei o se falaoa ua leva ona tuu pe pei foi o ni tala malie ua pasia i le faalogo. E moni lava o mea pito sili ona taua e fafagaina ai le alofa o le faataua e le tasi o le isi, agalelei, manatu alofa, manatu mamafa, faaalia o le alofa, uiga o le loto faafetai, moomia, mitamita, faaaumea, lagona mautinoa, faatuatua, faifai mea faatasi, tutusa o le tasi ma le tasi, ma le faalagolago o le tasi i le tasi.

E tatau i se tasi ona matua tausia ma le faamaoni poloaiga a le Alii ina ia maua le fiafiaga moni i le faaipoipoga. E matua leai lava se tasi, e nofo fua pe ua faaipoipo foi, na maua atoatoa e ia le fiafia, vagana na amiotonu o ia. O loo i ai tulaga faamalie loto e le tumau ma tulaga taufaasese mo na o sina taimi, ae o se tulaga mautu o le fiafia e maua lea i le na o le ola mama ma le ta’uaogaina. O se tasi o le ua i ai se olaga amiotonu faapea ma le i ai o ni talitonuga loloto faalelotu e le mafai ona maua e ia le fiafia i se olaga le to’aga. O le a tumau pea ona oo mai le lagona nofosala, se’i vagana ua na le amanaia lena tulaga, ma o le i ai i lea tulaga ua tulaga pagatia ai le faaipoipoga. O le i ai o se lagona nofosala matuitui e mafai ona avea ai le olaga ma mea sili ona le moomia. O le le toaaga o se mea e faaleagaina ai le faaipoipoga, aemaise lava pe a eseese mea e le to’aaga i ai i la’ua.

O le feeseeseai i mea tau lotu o ni tulaga sili ia ona tofotofoina ai ma o ni tulaga ia e pito sili ona le mafai ona foia o eseesega uma.

Ua faauuina e le Atua le faaipoipoga. Ua le na o se tu faale va fealoai. O le a le mafai ona faaeaina le tagata pe a aunoa ma le faaipoipoga tatau ma le faamanuiaina. Faitau i afioga a lo outou Alii o se mea ua tatau ma tonu le faaipoipoina.

Ona o le moni o lena mea, o le mea lea e fuafua ai e le tagata poto ma le magafagafa o le Au Paia o Aso e Gata Ai lona olaga ma le faaeteete ina ia mautinoa o le a leai ni mea e fai ma pa pupuni e faalava mai i le ala. O le faia o se mea sese matuia e tasi, e mafai ai e le tagata ona tuuina i le ala ni mea e fai ma pa pupuni atonu e le mafai ona aveesea ma atonu e poloka ai le ala e tau atu i le ola e faavavau ma le avea ma Atua—o lo tatou taunuuga moni lea. Afai e alolofa tagata e to’alua i le Alii e sili atu i o la’ua lava ola ona alolofa ai lea o le tasi i le tasi e sili atu na i o la’ua lava ola, ma galulue faatasi e tusa ai ma le polokalama o le talalelei e avea ma o la faasinomaga autu, o le a mautinoa le maua e i la’ua o lenei fiafia tele. Afai e o atu se tane ma se ava i le malumalu paia, to’otutuli faatasi i le fale e tatalo ma lo la aiga, o atu faatasi ia latou sauniga lotu, tausia o latou olaga ia mama atoatoa—i le mafaufau ma le faaletino—ina ia tepa ma taulai atu o latou manatunatuga atoatoa ma manaoga ma le alofa i le tagata e to’atasi, o le ua avea ma ona to’alua, ma galulue faatasi i la’ua uma mo le atinae o le malo o le Atua, o lona uiga o le a faasilisilia lo la’ua fiafia.

O nisi taimi i le faaipoipoga e i ai isi tagata e pipii atu i ai o tatou loto, e ui lava ina sa fetalai mai le Alii i le mea moni: “Ia e alofa atu i lau ava ma lou loto atoa, ma pipii atu ia te ia a e le o se isi” (MFF 42:22).

O le uiga foi o lenei mea i lona tulaga atoatoa “ia e alofa atu i lau tane ma lou loto atoa, ma pipii atu ia te ia a e le o se isi.” E masani lava, e faaauau pea ona pipii atu tagata i o latou tina ma o latou tama ma a latou uo. O nisi taimi e le tu’ua atoatoa ai e tina le pipii atu ia latou fanau, ma o le mea lea e toe foi atu ai tane faapea foi ma ava i o latou tina ma tama e aumaia ai se fautuaga ma masua uma atu ia i latou, ae o le pipii atu e tatau ona faia lea i le ava i le tele o mea, ma o tulaga uma felatai o le tino e tatau ona tausia i se tulaga matua faalilolilo ma le le faalauaiteleina i isi.

E sili ona lelei i ulugalii le amata loa lava o lo la’- ua aiga, ia vavae ese ma ia tu’ueseeseina mai o la’ua matua. Atonu o se fale e sili ona faatauvaa ma faalelelei, ae peitai o se fale lava o i la’ua. E tatau ona avea lo oulua olaga faaipoipoina ma se tulaga tuto’- atasi mai i tagata o le aiga o le tamaitai faapea foi ma le alii. E faaauau pea ona e alofa atu ia te i latou; e te faatauaina la latou fautuaga; e ia te oe le agaga faafetai mo la latou mafutaga; ae peitai lua te ola i o oulua lava olaga, ma pulea a oulua lava faaiuga, o a oulua lava faaiuga e faia ina ua tatalo ma ua uma ona maua le fautuaga mai ia i latou e tatau ona tuuina mai. E le o le uiga o le pipii atu o le nonofo i le fale e tasi; o lona uiga ia nonofo faatasi i le fealofani:

“O lea, e tusa ai ma le tulafono…ia avea i la’ua ma tino e tasi, ina ia faataunuuina ai e le lalolagi i nei mea uma le iuga o lona foafoaga;

“Ina ia faatumuina ai foi le lalolagi i le fuataga atoatoa o le tagata, e tusa ma lona foafoaga a’o le i faia le lalolagi” (MFF 49:16–17).

Uso e ma tuafafine, ou te fia faapea atu o le afioga lenei a le Alii. E matua taua lava ma moni lenei fetalaiga, ma e leai se tasi e finau ma le Alii. Sa Ia foafoaina le lalolagi; sa Ia faia tagata. Ua silafia e Ia le tulaga e i ai mea uma. Sa Ia faavaeina le polokalama, ma ua le lava lo tatou atamai po o le poto e mafai ai ona finau atu ia te Ia e tusa ai ma nei mea taua. Ua silafia e Ia le mea e sa’o ma moni.

Matou te talosaga atu ia te outou ina ia mafaufau i nei mea. Ia mautinoa ua sa’o lau faaipoipoga. Ia mautinoa ua sa’o lou olaga. Ia mautinoa ua faataunuuina lelei lau vaega o le faaipoipoga.

Aumaia mai le Ensign, Mati 1977, 3–5.