Lesona 8

Pulea o Tupe a le Aiga

Auala mo le Faatinoga

Mulimuli i se tasi o mea po o mea uma o nei fautuaga e tusa ai ma ou lava tulaga manaomia ma tulaga e i ai.

• Ia faia se lisi o mea na e faatauina talu ai nei. Ia tusia le mataitusi o le M i tafatafa o le mea na e manaomia. Tusi le mataitusi o le L i tafatafa o le mea na e manaomia ae sa e le manaomia. Ia faaaoga le lisi e iloilo ai au amioga o le faiga o faatau. Afai ua tele na’ua tupe ua e faaaluina i mea e le manaomia, ia mafaufau i ni auala e faaaoga ai ma le poto au tupe.

• Faatasi ma lou toalua, ia oulua fuafuaina faatasi se vaega tupe mo se taimi o le leai o se totogi o le a oo mai—atonu mo le tasi i le lua vaiaso. Ia mafaufau i le faaaogaina o le faataitaiga o loo i le itulau 35 e avea ma taiala. Ia galulue faatasi ina ia ola faatatau i le fuafuaga ua oulua faatuina.

Faamatalaga Faatonuina e Faitauina

Suesue i le faamatalaga tusia o loo i lalo. Afai ua e faaipoipo, ia faitau ma talanoaina le faamatalaga tusia faatasi ma lou toalua.

Tumau i le Faatuatua e Ui Lava i Suiga

Peresitene N. Eldon Tanner
Fesoasoani Muamua i le Au Peresitene Sili

O le mea ou te fia ta’u atu ia te outou i le aso nei o a’u faamatalaga ia e uiga i le faatuatua ma mataupu faavae ia, afai e mulimuli i ai, o le a maua ai le tulaga saogalemu i mea tau tupe ma le filemu o le mafaufau pe a feagai ma soo se tulaga o le tamaoaiga.

“Ia Outou Muai Saili le Malo o le Atua”

Muamua, ou te fia faia se faamatalaga ma faamautuina se sini e mafai ai ona faatinoina nei mataupu faavae o le tamaoaiga.

Sa faapea mai se tasi o atalii o o’u atalii i se tasi o aso ia te a’u: “Ua ou maitauina o oe ma isi tagata faamanuiaina, faapea foi ma a’u ua faia se tonu i le mafaufau ou te mana’o ia faamanuiaina a’u taumafaiga i lo’u olaga. Ou te manao e faatalanoaina le toatele o tagata ua faamanuiaina a latou taumafaiga e mafai ona ou faatalanoaina ma iloa ai po o le a le mea ua faamanuiaina ai o latou olaga. A o e tilotilo agai i tua i mea na e faia, Tama Matua, o le a se mea ua e talitonu ua sili ona taua ua mafua ai ona faamanuiaina au taumafaiga?”

Sa ou ta’u atu ia te ia ua uma ona tuuina mai e le Alii se ala e faamanuiaina ai taumafaiga e pei ona ou iloa: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou” (Mataio 6:33).

O loo finau mai nisi e faapea o loo tamaoaiga i mea tau tupe nisi tagata o e e le o muai saili le malo o le Atua. Ua sa’o lea tulaga. Peitai e le o folafola mai e le Alii ia i tatou na o oa o le lalolagi pe afai tatou te muai saili le malo. E le o le tulaga lea mai mea na ou oo i ai. I upu a Henrik Ibsen: “Atonu e avea le tupe ma faapogai o le tele o mea, ae peitai e le o le mea autu lea. Na te aumaia ia te oe le meaai, ae le o le mana’o e ai; o vailaau, ae le o le soifua maloloina; o tagata e masani ai, ae le o ni uo; o auauna, ae le o le faamaoni; aso o le olioli, ae le o le filemu po o le fiafia” (i le The Forbes Scrapbook of Thoughts on the Business of Life [1968], 88).

O faamanuiaga faaletino o se vaega lea o le talalelei pe afai e maua i le ala e tatau ai ma le faamoemoega sa’o. Ua faamanatu mai ia te a’u se mea na oo ia Peresitene Hugh B. Brown. A o avea o ia ma se fitafita talavou o le Taua Muamua o le Lalolagi, sa asiasi atu o ia i sana uo matua i le falemai. O lenei uo sa avea ma milionea i taimi e tele ma sa taoto o ia ua lata ina maliu ina ua valusefulu ona tausaga. Sa leai se popolega tele i lona to’alua ua la tete’a po o se tasi o lana fanau e to’alima e o atu e asi o ia i le falemai. A o mafaufau Peresitene Brown e uiga i mea “na le maua e lana uo e le mafai e tupe ona faatau ma maitauina le tulaga pagatia ma le faanoanoa loloto na i ai o ia,” sa fesili o ia i lana uo pe faapefea ona ia suia le ala o loo ola ai pe ana fai e toe amata lona olaga.

Sa faapea mai lea tagata matua, o le na maliu i nai aso mulimuli ane: “‘A o ou mafaufau i tua i lo’u olaga o le mea sili ona taua ma le aoga atonu na ou maua ae sa le iloa i le tau faaputuputuina o a’u miliona, o le faatuatua faatauvaa lea na i ai i lo’u tina i le Atua faapea ma le tino ola pea o le tagata.

“‘…Ua e fesili mai ia te a’u po o le a le mea sili ona taua i le olaga. E le mafai ona ou tali atu ia te oe i ni upu sili atu ona lelei na i lo upu na faaaoga e le tagata tusitala.’” Sa talosaga o ia ia Peresitene Brown e ava’e se tamai api mai lana ato ma faitau mai ai e ia se solo ua ta’ua “O a’u o se Tagata ese.”

E ese le tulaga ua ou i ai nai lo le faatuatua na aoao mai e lo’u tina,

E ese le tulaga ua ou i ai nai lo le Atua o le na faafofoga mai i lo’u tina a’o alaga atu,

E ese le tulaga ua ou i ai i lo le faamafanafanaga na tausia a’u,

I lima e faavavau na siiina ai lo’u tama ina ua maliu.

Ina ua sau le lalolagi tele ma valaau mai ia te a’u, sa ou tu’ua mea uma ae mulimuli atu,

Sa ou le iloa, ona o lo’u tauaso, ua se’i ese lo’u lima mai Lona aao,

E aunoa ma lo’u iloa ona o lo’u faateia e le aoga ia mea uma,

O le oa o le auro e iila, e pei ona sa ou iloa muamua. Sa ou faaaluina le olaga e saili ai mea na ou manatu faatauvaa i ai ina ua ou maua,

Sa ou tau ma tauia i le tele o mea na pogai ona ia malo,

Peitai ou te foai atu ia mea uma, o le ta’uta’ua ma le mauoa ma fiafiaga na maua ai,

Pe ana ou maua le faatuatua na avea ai lo’u tina ma tagata e pei ona sa i ai.

“O le molimau taupulapula lena a se tagata na fanau mai i le Ekalesia ae na se mamao ese mai ai. O le tagi lena ma le lotomomomo a se alii ua tu’ua na o ia o le semanu na te maua soo se mea e mafai ona faatauina i tupe, ae ua ia le maua mea sili ona taua o le olaga ona o le faaputuina o oa o lenei lalolagi” (Continuing the Quest [1961],32–35 faaopoopo le faatusilima).

O loo tuuina mai ai e le Perofeta o Iakopo i le tusi a Mamona se fautuaga taua e uiga i lenei mea:

“A o le i sailiili e outou le oloa, ia outou saili le malo o le Atua.

“Pe a uma foi ona outou maua le faamoemoe ia Keriso ona maua lea e outou le oloa, pe afai tou te saili i ai; tou te saili ai foi i le fia fai mea lelei, e faaofu ai e le lavalava, ma fafaga i e fia aai, ma tu’usaolotoina ai e ua fusifusia, ma auauna atu i e mamai ma e tigaina” (Iakopo 2:18–19; faaopoopo le faatusilima).

O le faavae la ma le faamoemoega o mea nei: E tatau ona tatou muai saili le malo, galue ma fuafua ma faaalu ma le poto tupe, ia fuafua mo le lumanai, ma ia faaaoga se tamaoaiga ua faamanuiaina ai i tatou e fesoasoani ai i le atiinae o lena malo. Afai e taitaiina i tatou i lea faamoemoega e faavavau ma atiinae i lenei faavae mautu, o lona uiga e mafai ona tatou faaauauina le olaga ma le to’afilemu ia tatou feau e fai i aso taitasi faapea foi ma a tatou galuega o le olaga, ia e tatau ona fuafua ma le faaeteete ma mulimuli ai ma le agaga naunautai.

O lenei le tulaga ou te mana’o ina ia faamatala atu ai mataupu faavae e lima o le tamaoiga maumaututu.

Totogi se Sefuluai Faamaoni

Tulaga Mautu #1: Totogi se sefuluai faamaoni. E masani lava ona ou manatunatu pe o tatou iloa o le totogi o la tatou sefuluai e le o le tuuina atu lea o ni meaalofa i le Alii ma lana Ekalesia. O le totogi o le sefuluai o le totogiina lea o se aitalafu i le Alii. O le Alii o le faapogai lea o faamanuiaga uma tatou te maua, e aofia ai ma le ola lava ia.

O le totogiina o le sefuluai o se poloaiga, o se poloaiga faatasi ma se folafolaga. Afai tatou te usiusitai i lenei poloaiga, ua folafola mai ia i tatou o le a tatou “manuia i le nuu.” E aofia ai i lenei manuia se tulaga e sili atu na i lo oa faalelalolagi—atonu e aofia ai le maua o le soifua maloloina ma le matala o le mafaufau. E aofia ai le mautu o le aiga ma le faatuputupulaia i mea faaleagaga. Ou te faamoemoe o outou o e e le o totogiina nei a outou sefuluai atoatoa o le a outou sailia le faatuatua ma le malosi e fai ai lea mea. A o outou faataunuuina lenei tiutetauave i Le na faia outou, o le a outou maua le fiafia tele na’ua, ma e na o i latou o e faatuatua i lenei poloaiga ua latou iloa.

Ola Fuafua Lelei

Tulaga Mautu #2: Ia ola e tusa ma mea ua e maua. Ua ou iloa e leai se auala e mafai ai ona e maua ni tupe e sili atu na i lo le mea e mafai ona e faaaluina. Ua ou talitonu e le o le aofai o tupe e mafai ona maua e se tagata e aumaia ai le filemu o le mafaufau a o le pulea lelei o ana tupe. E mafai ona avea le tupe ma se auauna usiusitai ae peitai o se pule saua. O i latou o e e fuafuaina lo latou olaga autu ina ia faaavanoa sina faasiliga, o i latou ia e pulea tulaga e oo i ai. O i latou o e faaaluina e sili atu na i lo mea latou te maua ua pulea e i latou le tulaga e oo i ai. E nofo pologa i latou. Sa faapea mai Peresitene Heber J. Grant: “Afai e i ai se mea e tasi e aumaia ai le filemu ma le lotomalie i le loto o le tagata, faapea ma le aiga, o lea mea o le ola lea e tusa ma mea ua tatou maua. Peitai afai e i ai se mea e tasi e le lelei, o lea mea o le faia lea o ni aitalafu e le mafai e se tasi ona totogi” (Gospels Standards, tuufaatasia e G. Homer Durham [1941], 111).

O le mea autu i le faaaluina o tupe e itiiti ifo na i lo mea tatou te maua e faigofie lava—ua ta’ua lea mea o le loto pulea. E tusa lava po o le amataga o le olaga po o se taimi mulimuli ane, e tatau ona aoaoina e i tatou taitoatasi le pulea o i tatou lava, o tatou manaoga, atoa ma tatou tuinanau i mea tau tupe. Faauta i le faamanuiaina o le e iloa ona faaaluina e itiiti ifo na i lo mea na te maua ma faasaoina sina mea mo aso leaga.

Ia Iloa Le Eseesega o Mea e Manaomia Moni ma Mea e le Manaomia

Tulaga Mautu #3: Ia iloa le eseesega o mea e manaomia moni ma mea e le manaomia. O manaoga o le tagata o se mea lea ua faia e le tagata lava ia. Ua gaosia e a tatou pisinisi faatauva le anoano o oloa ma auaunaga ina ia faatosina ai lo tatou mana’o i mea e sili atu ona faigofie ona faaaoga faapea ma oa e le manaomia. Ou te le faitioina pisinisi po o le maua o nei oloa po o auaunaga. Ua na ona ou popole e uiga i o tatou tagata ina ia faaaogaina le faautauta lelei ia latou faatauga. E tatau ona tatou aoao o le tu’u o mea ua tatou loto i ai o se vaega taua lea o le pulea o i tatou e faavavau.

E to’atele matua ma fanau sa fananau mai talu le Taua Lona Lua o le Lalolagi i lenei atunuu faapea ma le tele o isi atunuu, ua na o tulaga tamaoaiga ua latou iloa. E to’atele ua i ai i tulaga o le faamalieina vave o le manao. Ua anoanoai avanoa o galuega mo i latou uma o e o loo mafai ona galulue. O mea sa le i manaomia i na ona po mo le toatele ua ta’ua o mea e tatau mo aso nei.

Ua faaalia lea mea i ulugalii talavou o e ua faamoemoe e tuu i o latou fale ni meafale ma saunia mo i latou lava ni mea e le manaomia ao tau amatamata o latou aiga, o ni mea ia sa faato’a mafai ona maua e o latou matua ina ua mavae le tele o tausaga o tauivi ma le olaga. O le mananao i mea e tele mo se taimi vave, atonu e gauai atu ai ulugalii talavou i nonoga tupe e faigofie ona maua, ma faapea ona tuuina ai i latou lava i le nofo aitalafu. O lenei faiga o le a le mafai ai e i latou ona maua alagatupe e manaomia e fai ai mea o loo fautuaina e le Ekalesia e pei o le teuina o meaai ma isi polokalama mo le saogalemu.

O le soona manao ma le le lelei o le pulea o tupe e faatietieina ai i luga o ulugalii avega mamafa. O le tele o faafitauli o faaipoipoga, e pei ona foliga mai, e mafua mai i itu tau le tamaoaiga—a le o le le lava o tupe maua e tausi ai le aiga o le le pulea o tupe maua e maua mai.

Sa sau se tasi tama talavou i lona epikopo mo le fautuaina i mea tau tupe ma sa ia faamatalaina se tala e masani ona tatou faalogo soo i ai: “Epikopo, ua aoaoina lelei a’u ina ia avea ma se enisinia, ma o loo ia te a’u se totogi lelei. E foliga mai i le taimi atoa na ou aoga ai sa aoaoina a’u i le ala e maua ai tupe, ae leai se tasi na aoaoina a’u i le ala e pulea ai tupe.”

E ui lava ina tatou talitonu e manaomia i tagata aoga uma le ave o ni vasega e aoaoina ai i le faaaogaina o tupe, ae peitai o le aoaoga autu e i ai lava lea i matua. E le mafai ona tu’ua e matua lenei aoaoga taua i se tulaga pagatia pe tuuina atu foi le tiutetauave atoa lava ia tatou aoga ma iunivesite a le Malo.

O se vaega taua o lenei aoaoga o le faamatalaina lea o le nofo aitalafu. Mo le to’atele o i tatou, o loo i ai ituaiga e lua o le nofo aitalafu i mea tautupe—o le nofo aitalafu lea i mea e faatau mai ma le nofo aitalafu i le faafaigaluegaina o tupe poo mea tau pisinisi. O le nofo aitalafu i mea e faatau mai e faatatau lea i le faaaitalafu mai o mea tatou te faaaogaina i aso taitasi. Mo se faataitaiga, e aofia ai le totogi auauai o lavalava, ogaumu, meafale, ma isi. O le nofo aitalafu i mea e mananao ai e maua lea i le faamokesi o mea tatou te maua po o le maua lea i le faaaitalafu o mea tatou te maua i le lumanai. E matua matautia lava lenei tulaga . Afai e vaea i tatou, le mafai ona gaoioi, poo le feagai ma faalavelave tuga tutupu faafuasei, o le a faigata ia i tatou ona totogi a tatou aitalafu. O le togitogi o mea e faatau o le ala sili lea ona taugata e faatau ai mea. E tatau ona faaopoopoina i le tau o oloa ni tupe tului ma le totogi o le taulimaina o ia mea.

Ua ou iloa e i ai taimi e talafeagai ai i aiga talavou le faatau o mea faaaitalafu. Peitai matou te lapatai atu ia te outou ia aua ne’i faatauina se mea e sili atu na i lo le mea ua manaomia moni ma ia totogi au aitalafu i se vave e mafai ai. Afai ua tele mea e faaalu i ai le tupe, ia aloese mai le avega faaopoopo o tupe faasili mo mea faaaitalafu.

O le nofo aitalafu i le faafaigaluegaina o tupe e tatau ona matua puipuia lelei ina ia le faaletonu le tulaga mautu o le aiga. Aua le faafaigaluegaina tupe i se tulaga le mautinoa. E mafai ona oo i se tulaga pagatia se laasaga le mautinoa. E tele faamanuiaga ua soloiesea ona o le le pulea lelei o le mana’o ina ia saga maua ma saga maua atili. Ia tatou aoao mai faanoanoaga o aso ua mavae ma ia aloese mai le faapologaina o lo tatou taimi, malosi, ma le ola maloloina ona o le mana’o tele ina ia maua oa e faaopoopoina mai.

Sa tuuina mai e Peresitene Spencer W. Kimball lenei fautuaga faatupu manatu:

“Ua faamanuiaina i tatou e le Alii i le tamaoaiga e sili atu i lo se isi lava taimi muamua. E lelei tele mea ua tuuina mai ia i tatou ma e tatau mo le faia o la tatou galuega i le lalolagi nei ae peitai e ia te a’u lava le faanoanoa ona o le to’atele o i tatou ua amata ona fai le tamaoaiga ma atua sese ua tatou ifo i ai, ona o le tele o le faatosinaga a ia mea i o tatou olaga. Po ua sili atu ea ia mea ia i tatou na i lo le malosi o lo tatou faatuatua? E to’atele tagata ua latou galulue i le tele o taimi o lo latou olaga i le galuega o le fia lauiloa e aofia ai le tele o tupe, oloa, pisinisi, teugatupe, fanua, meafale, taavale ma le mana’o e faamaonia ai le tamaoaiga ua latou faamoemoe mo se olaga umi ma le fiafia. O le mea moni lava ua tatou faagaloina le tofiga na tuuina mai ia i tatou o le faaaoga lea o ia mea e tele mo tatou aiga ma korama e fausia ai le malo o le Atua” (Liahona, Aukuso 1977, 2–4).

Ou te fia faaopoopoina ai lenei mea i le faamatalaga a Peresitene Kimball ina ia avea o se molimau. E leai lava se isi tulaga ou te iloa ua faateleina ai le fiafia ma le filemu o le mafaufau e pei o le faateleina o meatotino e sili atu na i lo manaoga tatau o le aiga.

Fuafua ma le Poto ia Tupe

Tulaga Mautu #4: Ia fuafua ma ola e tusa ai ma se fuafuaga o mea tautupe. O lo o i ai se tasi o a’u uo e i ai sona afafine na alu atu i aoga i nuu mamao e aoga ai i le BYU mo se vaitu’uaga. Sa tusi mai lea tamaitai i lea taimi ma lea taimi i lona aiga ina ia lafo atu ni tupe. O le mea na popole ai lenei alii o lona telefoni atu lea i lona afafine i atunuu mamao ma fesili atu ia te ia e uiga i lona manaomia o nisi tupe. I se tasi taimi i le la talanoaga sa faamatala mai e le afafine, “Peitai Tama, e mafai ona ou faamatala atu ia te oe le mea na alu i ai tupe uma na e auina mai ia te a’u”

Sa tali lenei alii, “e foliga mai e te le o malamalama i la’u tala. O loo alu lo’u mafaufau i se fuafuaga—o se fuafuaga lea mo le faaalu’ina o tupe—ae le o se tala faamaumau o le mea na alu i ai lea tupe ma lea tupe.”

Atonu e tatau ona pei matua o le tama o le tama i le kolisi o le na auina atu se feau faauaealesi i lona aiga, “A leai se tupe, leai se fiafia, o lou atalii.” Sa toe uaealesi atu i ai le tama, “Matua faanoanoa tele, leaga tele, o lou tama.”

Ua ou maitauina i le faatalanoaina o le tele o tagata i le tele o tausaga e to’atele na’ua tagata e le faia se fuafuaga lelei o tupe ma ua le pulea lelei i latou lava ina ia tausisi i lea fuafuaga. E to’atele tagata ua manatu o le i ai o se fuafuaga o mea tautupe e aveesea ai mai ia i latou le saolotoga. I se tasi itu, ua aoaoina e le tele o tagata faamanuiaina o se fuafuaga o mea tau tupe e maua ai le saolotoga tau le tamaoaiga.

O le fuafuaina o tupe ma le puleaina o tupe e le o se faiga lavelave tele po o le alu ai o le taimi. O loo faamatalaina se tala e uiga i se tama na sau mai se isi atunuu o le na ia teuina i totonu o se pusa seevae lana tala tusia o tupe e totogi, ma lana tala tusia o tupe maua sa tautau i se fao, a’o ana tinoitupe sa teu i totonu o se masini teutupe.

“Ua ou le iloa pe mafai faapefea ona e faagaoioia lau pisinisi i lenei auala,” o le tala lea a lona atalii. “Pe faapefea ona e iloa po o le a lau tupe faasili?

“Atalii e,” o le tali lea a le tamaloa faipisinisi, “I le taimi na ou oso ifo ai mai le vaa, sa na o le ofuvae sa ou ofuina. O aso nei ua avea lou tuafafine ma se faiaoga tusiata, ua avea lou uso ma fomai, ma ua avea oe ma se tagata tausitusi. Ua i ai sa’u taavale, se fale, ma se pisinisi lelei. Ua uma ona totogi mea uma. Ia e faaopoopo na mea uma, toese le ofuvae, ona e iloa lea o la’u tupe faasili.”

Ua aoao mai ni tagata popoto i mea tau tupe e faapea o loo i ai vaega eseese e fa i soo se fuafuaga lelei o mea tautupe. E tatau ona fai muamua se fuafuaga i mea autu e manaomia e pei o meaai, lavalava, ma isi; lua, fuafuaga mo le tutusa lelei o tagata uma i le aiga; tolu, mea e manaomia faafuasei e pei o tupe teu, inisiua o le ola maloloina, ma le inisiua o le ola; ma lona fa, ia faia se fuafuaga lelei o le teuina o mea mo le lumanai.

Ou te fia faia se faamatalaga e uiga i mea e lua o nei mea taua. E leai se mea e sili atu ona foliga mai ua mautinoa e pei o le tutupu faafuasei mai o mea i lo tatou olaga. Ona o le faaopoopoina atili o tupe alu i vailaau, o le inisiua o le soifua maloloina o le auala lea e tasi e mafai ona totogi ai e aiga tupe mo faalavelave tutupu faafuasei, mai, po o tupe e alu i maitaga o tina, aemaise lava o pepe e fananau mai e le i oo i le taimi e tatau ai. O le inisiua o le ola e maua mai ai se tupe e le aunoa pe afai e oti le na faia le inisiua ao le i matua o ia. E tatau i aiga uma ona faia se fuafuaga mo le inisiua e tatau ai o le soifua maloloina ma le ola.

A uma ona faia nei mea autu, e tatau ona tatou teuina se tupe i taimi uma e ala i le pulea lelei o mea tau tupe mo tupe e faafaigaluegaina. Ua ou iloa e to- ’aitiiti tagata ua faamanuiaina i le totogiina o tupe faafaigaluega ma o i latou ia sa leai se amio masani muamua o le faasaoina o tupe e le aunoa. O lenei mea e manaomia ai le pulea o le loto ma le faamasino poto. E tele auala e teu faafaigaluega ai tupe. Na pau lava la’u fautuaga o le filifili lea ma le poto tagata e fautuaina oe i tupe e teu faafaigaluega. Ia mautinoa ua fetaui la latou fautuaga ma lou to’afilemu e ala i le tausia o se tala faamaumau faamanuiaina o tupe faafaigaluega.

Ia Faamaoni

Tulaga Mautu #5: Ia faamaoni ia outou feutagaiga uma o mea tautupe. O le uiga lelei o le amio sa’o e le mafai lava ona uma. E faatatau lea i mea uma tatou te faia. E tatau ona taulamua i tatou ona amio sa’o i le avea ai ma taitai ma tagata o le Ekalesia.

Uso e ma tuafafine, i nei mataupu faavae e lima, ua ou taumafai ai e otooto atu se tulaga ua ou ta’ua o le faiga moni o mea tautupe ma le pulea o mea e maua.

Ou te faamoemoe o i tatou taitoatasi e aoga i ai le faatinoina o nei mea. Ou te tuuina atu la’u molimau o ia mea e moni ma o lenei Ekalesia faapea ma le galuega ua tatou faia ua moni ma faamaoni.

Mai se lauga a Peresitene Tanner i le sauniga aoao o le uelefea i le konafesi aoao a le Ekalesia ia Oketopa 1979 (tagai Conference Report, Oketopa 1979,117–21; poo le Ensign, Novema 1979, 80–82).

budget

Fuafuaga o Mea Tautupe Mai aso ia aso

Tupe Maua	Fuafuaina	Tulaga Moni
Totogi pe a uma ona toese lafoga
Isi tupe maua
Aofai o Tupe Maua
Tupe Fa’aalu	Fuafuaina	Tulaga Moni
Sefuluai
Isi tupe totogi i le Ekalesia
Tupe teu mo se vaitaimi umi
Tupe teu mo faalavelave faafuasei
Meaai
Mokesi po o le Lisi
Meafale
Fela’uaiga
Totogi o Aitalafu
Inisiua
Totogi o vailaau
Lavalava
Isi
Isi
Isi
Aofai o tupe fa’aalu