Parau ’ōmuara’a a te Peresidenira’a Mātāmua
E toru ava’e i muri mai i te faati’araahia o te Ekalesia, ua faaue mai te Fatu, na roto i te peropheta Iosepha Semita, ia Ema, oia ho’i i te vahine a Iosepha, ia haaputuputu mai i te tahi mau himene mo’a na te Ekalesia: « No te mea e oaoa to to’u nei varua i te himene o te aau; oia ïa, ua riro te himene a te feia parau ti’a ei pure ia’u nei, e e pahonohia te reira na roto i te haamaitairaa i ni’a iho i to ratou ra mau upoo » (PH&PF 25:12).
I teie nei, 150 matahiti i muri mai i te nene’iraahia te buka himene matamua a te Ekalesia, ua oaoa roa matou ia faaite atu e, o teie te hoê buka himene i faaapîhia. Te vai nei i roto i teie buka himene apî te tahi mau himene no roto mai i te buka himene matamua e te tahi atu mau buka himene i muri mai, e te tahi atoa ho’i mau himene apî. Ua ma’itihia teie mau himene no te tauturu i te mau melo o te Ekalesia na roto i te ao atoa nei.
Te pehe i roto i ta tatou mau pureraa a te Ekalesia
Ua riro te pehe faauruhia ei tuhaa faufaa rahi roa i roto i ta tatou mau pureraa a te Ekalesia. Na teie mau himene e faatae mai i te Varua o te Fatu, e faatupu i te faatura, e faatahoê i te mau melo, e e horo’a mai i te rave’a ia tatou no te arue atu i te Fatu.
Te vai nei te tahi mau haapiiraa faahiahia roa i roto i teie mau himene ta tatou e himene nei. E tauturu teie mau himene ia tatou ia tatarahapa e ia rave i te mau ohipa maitai, ia faarahi i te iteraa papû e te faaroo, ia faaitoito i te feia paruparu, ia tamahanahana i tei oto, e ia faauru ia tatou ia faaitoito noa e tae noa’tu i te hopea.
Te ti’aturi nei matou e himene rahi tatou i roto i ta tatou mau haaputuputuraa. Te faaitoito nei matou i te mau melo atoa, i te feia aravihi e te aravihi ore i te ohipa himene, ia amui tahoê mai ia tatou i te himeneraa i te mau himene. Te ti’aturi nei matou e faaohipa pinepine outou e te mau feia faatere, te mau orometua, e te mau melo, i te mau haapiiraa maitai roa e te nehenehe i roto i te buka himene.
Ua faatere te mau melo no te Ekalesia i te mau pupu himene mai te matamua roa mai. E mea tano roa i te mau paroisa e te mau amaa i roto i te Ekalesia ia faaohipa pinepine i te pupu himene. Te faaitoito atu nei matou i te mau pupu himene ia faaohipa i teie mau himene i roto i te buka himene.
Te pehe i roto i to tatou mau utuafare
Te vai nei te mana rahi i roto i teie mau himene no te faahaere rahi i te huru pae varua o te mau utuafare i mua e no te tauturu ia ratou ia haapa’o i te evanelia. E mea maitai roa i te mau melo no te Ekalesia ia faaroo, ia ha’uti e ia himene i te mau pehe maitai roa i roto i to ratou mau utuafare.
Ua faaineinehia ta tatou buka himene ia tano no te utuafare e no te fare pureraa. Te ti’aturi nei matou e riro teie buka himene mai te mau papa’iraa mo’a e te tahi atu mau buka pae faaroo i roto i to tatou mau utuafare. E nehenehe i teie mau himene ia faatae mai i te varua nehenehe e te hau i roto i te utuafare, e ia faatupu i te here e te tahoêraa i rotopu i te mau melo no te utuafare.
A haapii i ta outou mau tamarii ia au i teie mau himene. A himene i teie mau himene i te Sabati, i roto i te mau pureraa pô utuafare, i te taime haapiiraa evanelia, e i te taime pure. A himene i teie mau himene a rave ai outou i te ohipa, a ha’uti ai outou, e a ratere amui ai outou. A himene i teie mau himene no te faatupu rahi i te faaroo e te iteraa papû i roto i ta outou mau tamarii rii a faata’oto ai outou ia ratou.
Te pehe i roto i to tatou oraraa tata’itahi
Taa ê atu i te haamaitairaa ta tatou i farii no roto mai i teie mau himene i roto i te Ekalesia e te utuafare, e haamaitai rahi atoa te reira i to tatou iho oraraa tata’itahi. E nehenehe i teie mau himene ia faaitoito ia tatou e ia faatupu i te hinaaro i roto ia tatou ia rave i te ohipa parau ti’a. E nehenehe atoa i te reira ia faaî i to tatou mau varua i te mau mana’o faahiahia e ia faatae mai i te varua no te hau i roto ia tatou.
E nehenehe atoa i teie mau himene ia tauturu ia tatou ia pato’i atu i te mau faahemaraa a te enemi. Te faaitoito atu nei matou ia outou ia tamau aau i teie mau himene auhia e outou e ia haapii i te mau papa’iraa mo’a no ni’a i teie mau himene. E, ia ô mai te tahi mau mana’o tano ore i roto i to outou feruriraa, a himene i te hoê o teie mau himene ia outou iho, no te faahaere atu i te mana’o ino i rapae e no te mono i te reira i te mana’o maitai.
E te mau taea’e e te mau tuahine, a himene tatou i teie mau himene no te ani i te Varua o te Fatu ia tae mai i roto i ta tatou mau haaputuputuraa, i roto i to tatou mau utuafare, e i roto i to tatou oraraa tata’itahi. A tamau aau e a feruri maitai i teie mau himene, a faahiti e a himene i te reira, e rave mai i te maa pae varua i roto i te reira. E mea ti’a ia tatou ia ite e, ua riro te himene a te feia parau ti’a ei pure i mua i to tatou Metua i te Ao ra, « e e pahonohia te reira na roto i te haamaitairaa i ni’a iho i to [outou] ra mau upoo ».
Te Peresidenira’a Mātāmua