29.

Сүмийн хурал цуглаан

29.0

Оршил

Хожмын үеийн гэгээнтнүүд хамтдаа шүтэн биширч, нэг нэгнээ сэнхрүүлэхээр мөн сайн мэдээг зааж, суралцахаар цуглардаг (Алма 6:6; Моронай 6:5–6-г үзнэ үү). Аврагч “Хоёр буюу гурвуулаа Миний нэрээр хаана цуглана, тэнд Би тэдний дунд байна” (Матай 18:20) хэмээн амласан. Хамтдаа цугларах нь бидний зүрх сэтгэл “эв нэгдэл хийгээд нэг нэгнийхээ зүг хандсан хайранд” (Мозая 18:21) нэгдэх нэг арга зам юм.

Гэхдээ хуралдах нь Есүс Христийн адил үйлчилж, тохинуулах ажлыг хэзээ ч орлох ёсгүй.

29.1

Хурал цуглааныг төлөвлөж, хөтлөн явуулах

Удирдагчид “Бурханы зарлигууд хийгээд илчлэлтүүдийн дагуу тэд Ариун Сүнсээр удирдагдан” (Сургаал ба Гэрээ 20:45, Mоронай 6:9-ийг мөн Сургаал ба Гэрээ 46:2-ыг үзнэ үү) хурал, цуглааныг төлөвлөж, хөтлөн явуулдаг. Тэд хурал цуглаанд Сүнсний нөлөөг урих арга замуудыг эрэлхийлнэ.

Хурал, цуглааны тоо, үргэлжлэх хугацаа гишүүдэд эсвэл гэр бүлд нь ачаалал өгөхгүй байхад удирдагчид анхаарна.

29.2

Тойргийн хурал цуглаан

29.2.1

Ариун ёслолын цуглаан

Зорилго

Ариун ёслолоос хүртсэнээр Есүс Христийг дурсан санах. Бусад зорилгод шүтэн бишрэх, итгэл гэрчлэлээ бэхжүүлэх, тойргийн ажил хэргийг хөтлөн явуулах гэх зэрэг багтдаг.

Оролцогчид

Бүх хүнийг оролцоход урьдаг.

Давтамж

Ням гараг бүр

29.2.1.1

Ариун ёслолын цуглааныг төлөвлөх

Ариун ёслолын цуглааныг бишопын зөвлөл төлөвлөж, хөтлөн явуулна. Цуглаан нь ариун ёслолд мөн Есүс Христэд итгэх итгэлийг бэхжүүлэхэд төвлөрсөн байхад тэд анхаарна.

Ариун ёслолын цуглаан нэг цаг үргэлжилнэ. Үүнд дараах зүйлc орсон байна.

1. Оршил хөгжим (удирдамжийг 19.3.2-оос үзнэ үү).

2. Мэндчилэн, найрсгаар угтана.

3. Тэргүүлэх эрх мэдэлтнийг эсвэл зочилж ирсэн бусад удирдагчийг танилцуулна.

4. Зарлал. Зарлалыг аль болох товчхон байлгах хэрэгтэй.

5. Нээлтийн дуулал ба залбирал. 19.3.2 болон 29.6-г үзнэ үү.

6. Тойргийн болон гадасны ажил хэрэг. Үүнд:

   • Албан тушаалтан, багш нарыг дэмжүүлэн баталж, чөлөөлнө (30.3 ба 30.6-аас үзнэ үү).

   • Аароны санваарын албанд томилох ах нарын нэрсийг танилцуулна (18.10.3-ыг үзнэ үү).

   • Тойргийн шинэ гишүүд, үүний дотор сүүлд хөрвөгдсөн хүмүүсийг танилцуулна.

7. Хүүхдэд нэр өгч, адислах (18.6-г үзнэ үү). Үүнийг ихэвчлэн мацгийн болон гэрчлэлийн цуглаанаар хийнэ (29.2.2-ыг үзнэ үү).

8. Шинэ хөрвөгчдийг гишүүнээр батлах (18.8-ыг үзнэ үү).

9. Ариун ёслолын дуулал ба ариун ёслолыг түгээх. Ариун ёслол бол цуглааны гол анхаарах хэсэг юм. Энэ ёслол нь Аврагчийн тухай болон өөрсдийнх нь төлөө гаргасан Түүний золиосны талаар бодох боломжийг гишүүдэд олгодог.

   Ариун ёслолыг бэлтгэх, адислах, түгээх тухай дэлгэрэнгүй мэдээллийг 18.9-өөс үзнэ үү.

10. Сайн мэдээний захиас, цугларагчдын дуулал эсвэл өөр бусад дуу хөгжим.

11. Хаалтын дуулал ба залбирал.

12. Цуглааны дараах хөгжим.

29.2.1.4

Үг хэлэх хүмүүсийг сонгох

Бишопын зөвлөл ариун ёслолын цуглаан дээр үг хэлэх гишүүдийг сонгодог. Тэд ихэнхдээ тойргийн гишүүдийг, үүний дотор өсвөр үеийнхнийг урьдаг.

Үг хэлж буй хүмүүс Есүс Христийн тухай гэрчилж мөн судруудыг ашиглан Түүний сайн мэдээг заадаг (Сургаал ба Гэрээ 42:12; 52:9-ийг үзнэ үү).

29.2.2

Мацгийн болон гэрчлэлийн цуглаан

Зорилго

Ариун ёслолоос хүртэж, Есүс Христийн тухай, Түүний сайн мэдээний талаар гэрчилснээр нэг нэгнээ хүчирхэгжүүлэх. Гишүүдийг мацаг барих боломжтой бол цуглаанд ирэхдээ мацаг барьсан байхад урамшуулдаг.

Оролцогчид

Бүх хүнийг оролцоход урьдаг.

Давтамж

Сард нэг удаа, ариун ёслолын цуглаан нь мацгийн болон гэрчлэлийн цуглаан болдог. Ихэвчлэн энэ нь сарын эхний ням гарагт болдог.

Мацгийн болон гэрчлэлийн цуглаанд үг хэлэх хүнийг томилдоггүй бөгөөд дуу хөгжмийн тусгай дугаар байдаггүй. Харин хөтлөн явуулж буй хүн гэрчлэлээ товчхон хуваалцдаг. Тэр дараа нь цугларагчдыг гэрчлэлээ хуваалцахад урьдаг. Гэрчлэлээ хуваалцах гэдэг нь Ариун Сүнсний өдөөлтийн дагуу сайн мэдээний үнэнийг тунхаглах гэсэн үг юм.

29.2.3

Тойргийн чуулган

Зорилго

Гадасны удирдагчид тойргийн чуулганаар тойргийн удирдагч, гишүүдэд зааварлаж, дэмжлэг үзүүлж, тохинуулна. Тойргийн гишүүд ерөнхий болон орон нутгийн удирдагчдыг дэмжин баталдаг.

Оролцогчид

Бүх хүнийг оролцоход урьдаг.

Давтамж

Мацгийн ням гаргаас өөр ням гарагт, жилд нэг удаа.

29.2.4

Бишопын зөвлөлийн хурал

Зорилго

Хамтдаа зөвлөлдөж, тойрогтой холбоотой асуудлуудын талаар шийдвэр гаргах.

Оролцогчид

Бишопын зөвлөл, бичиг хэргийн ажилтан болон гүйцэтгэх нарийн бичиг.

Давтамж

Ерөнхийдөө долоо хоногт нэг удаа болно.

Авч хэлэлцэх зүйлсэд дараах зүйл орж болно.

• Тойргийн аврал, өргөмжлөлийн ажлыг зохицуулах

• Тойргийн хувь хүн, гэр бүлүүдийг, ялангуяа өсвөр үеийнхэн, хүүхдүүдийг хүчирхэгжүүлэх

• Ёслолуудыг, үүнд санваарын томилгоог хүлээн авахад бэлтгэх гишүүдийг тодорхойлох

• Тойргийн дуудлага өгөх гишүүдийг тодорхойлох

29.2.5

Тойргийн зөвлөлийн хурал

Зорилго

Тойрог дахь Бурханы аврал, өргөмжлөлийн ажлыг гүйцэлдүүлэхэд туслах (1.2-ыг үзнэ үү).

Оролцогчид

• Бишопын зөвлөл, тойргийн бичиг хэргийн ажилтан болон тойргийн гүйцэтгэх нарийн бичиг.

• Ахлагчийн чуулга, Халамжийн нийгэмлэг, Залуу эмэгтэйчүүд, Хүүхдийн хэсэг, Ням гаргийн ангийн ерөнхийлөгчид.

Давтамж

Ерөнхийдөө долоо хоног тутам (гэхдээ үүнээс цөөн хуралдаж болно).

Бишоп тойргийн зөвлөлийн хурлыг төлөвлөж, удирдан, хөтлөн явуулна. Бишопыг байхгүй үед зөвлөл нь томоохон шийдвэрүүдийг гаргадаггүй.

Тойргийн байгууллагуудын удирдагчид тойргийн зөвлөлийн хуралд 2 үүрэгтэй оролцоно. Үүнд:

1. Тойргийн бүх гишүүнийг адислахад тусалдаг тойргийн зөвлөлийн гишүүдийн хувьд.

2. Өөрсдийн байгууллагын төлөөлөгчдийн хувьд.

Тойргийн зөвлөлийн гишүүд хамтдаа уулзахдаа бүхэл бүтэн зөвлөлийн нэгдсэн хүчин чармайлтаас ашиг тус авах асуудлуудын талаар ярилцана. Зөвлөлийн гишүүн бүрийг эдгээр асуудлын талаар бодол санаа, сүнслэг өдөөлтөө хуваалцахыг урамшуулдаг.

Ихэнхдээ тойргийн зөвлөлийн хурал нэг цагаас хэтэрдэггүй. Тэд залбирлаар мөн өмнөх хурлын даалгаврын талаар тайлагнаснаар эхэлнэ. Бишоп нь хувь хүн, гэр бүлүүдийг адислахад хамгийн шаардлагатай асуудлуудыг чухалчилна.

• Есүс Христийн сайн мэдээний дагуу амьдрах. Бүх гишүүнд итгэлээ бэхжүүлэн, авралын ёслолуудыг хүлээн авч, гэрээнүүдийг сахихад нь тусална.

• Тусламж хэрэгтэй хүмүүсийг харж халамжлах. Хувь хүн, гэр бүл, олон нийтийг адислахын тулд нөөц бололцоо, ур чадвараа хуваалцана. Тойргийн гишүүдэд бие даахад нь тусална. (22-р бүлгийг үзнэ үү.)

• Бүх хүнийг сайн мэдээг хүлээн авахыг урих. Сайн мэдээг суралцаж байгаа тэдний, мөн шинэ ба эргэн ирж буй гишүүдийн өсөлт хөгжилтийг дүгнэн ярилцана. Гишүүд сайн мэдээг бусад хүнтэй хуваалцаж болох арга замуудын талаар ярилцана. (23-р бүлгийг үзнэ үү.)

• Гэр бүлүүдийг мөнхөд нэгтгэх. Ариун сүмийн ёслолууд хүлээн авахаар бэлтгэж байгаа гишүүдийн өсөлтийг дүгнэн ярилцана. Ариун сүмийн зөвшөөрлийн бичиг авахуйц зохистой болоход нь илүү олон гишүүнд туслах арга замуудыг төлөвлөнө. Гишүүд ариун сүм, гэр бүлийн түүхийн ажилд оролцож болох арга замуудыг ярилцана. (25-р бүлгийг үзнэ үү.)

Зөвлөлийн гишүүд нь хувийн чанартай юм уу эмзэг аливаа мэдээллийг нууцлах ёстой (4.4.6-г үзнэ үү).

29.2.6

Тойргийн өсвөр үеийнхний зөвлөлийн хурал

Зорилго

Тойрог дахь өсвөр үеийнхнийг хүчирхэгжүүлэх. Тэдэнд Бурханы аврал, өргөмжлөлийн ажилд оролцоход нь туслах (1.2-ыг үзнэ үү).

Оролцогчид

• Бишопын зөвлөл

• Пристийн чуулга дахь бишопын нэг туслах, багш нар, диконы чуулгын ерөнхийлөгчид

• Залуу эмэгтэйчүүдийн ангийн ерөнхийлөгчид (хэрэв тойрогт Залуу эмэгтэйчүүдийн ганцхан анги байдаг бол ерөнхийлөгчийн зөвлөлийнхөн бүгд)

• Залуу эмэгтэйчүүдийн ерөнхийлөгч

Давтамж

Ихэвчлэн сард нэг удаа

Хурал бүрийн өмнө бишоп, хурлыг хөтлөн явуулах хүн хоёр ярилцах зүйлсийг авч хэлэлцэнэ.

• Аврал, өргөмжлөлийн ажил

• Тойргийн өсвөр үеийнхний хэрэгцээ ба тэдгээрийг шийдвэрлэх арга зам

• Идэвх султай эсвэл шинэ гишүүн болох өсвөр үеийнхэнд хүрч ажиллахын тулд гаргаж буй хүчин чармайлт

• Үйл ажиллагаанууд, тухайлбал тусламж хэрэгтэй хүмүүст үйлчлэх боломж Ихэнх төлөвлөгөөг чуулгын эсвэл ангийн ерөнхийлөгчийн зөвлөлийн хурлаар гаргадаг (20-р бүлгийг үзнэ үү).

• Тохинуулах (21-р бүлгийг үзнэ үү).

• Шинээр дуудагдсан чуулга, ангийн ерөнхийлөгчийн зөвлөлд чиг баримжаа өгөх

29.2.8

Ням гаргийн цуглааны хуваарь

Тойргууд ням гаргийн цуглаандаа дараах хоёр цагийн хуваарийн аль нэгийг ашигладаг.

1-р хөтөлбөр

60 минут	Ариун ёслолын цуглаан
10 минут	Анги, цуглаанууддаа орох
50 минут	Бүх ням гарагт: Хүүхдийн хэсэг, үүнд балчир хүүхдийн анги орно Сарын нэг ба гурав дахь ням гарагт: Ням гаргийн анги Хоёр дахь ба дөрөв дэх ням гарагт: санваарын чуулгын цуглаан, Халамжийн нийгэмлэгийн цуглаан, Залуу эмэгтэйчүүдийн цуглаан Тав дахь ням гарагт: Өсвөр үеийнхэн болон насанд хүрэгчдэд зориулсан цуглаан Бишопын зөвлөл сэдвийг тодорхойлж, багш нарыг хуваарилна.

2-р хөтөлбөр

50 минут	Бүх ням гарагт: Хүүхдийн хэсэг, үүнд балчир хүүхдийн анги орно Сарын нэг ба гурав дахь ням гарагт: Ням гаргийн анги Хоёр дахь ба дөрөв дэх ням гарагт: санваарын чуулгын цуглаан, Халамжийн нийгэмлэгийн цуглаан, Залуу эмэгтэйчүүдийн цуглаан Тав дахь ням гарагт: Өсвөр үеийнхэн болон насанд хүрэгчдэд зориулсан цуглаан Бишопын зөвлөл сэдвийг тодорхойлж, багш нарыг хуваарилна.
10 минут	Ариун ёслолын цуглаан руу орох
60 минут	Ариун ёслолын цуглаан

29.3

Гадасны хурал цуглаан

29.3.1

Гадасны чуулган

Зорилго

Гадасны чуулганы үндсэн зорилго бол гишүүдийн Есүс Христэд итгэх итгэлийг бэхжүүлэх явдал юм.

Оролцогчид

Бүх хүнийг ерөнхий хуралдаанд оролцоход урьдаг. Бусад хуралдааныг доор дурдсанчлан тодорхой оролцогчдод зориулан явуулна.

Давтамж

Жилд хоёр удаа

29.3.2

Гадасны санваарын ерөнхий цуглаан

Зорилго

Санваартнуудад үүрэг хариуцлагынх нь талаар зааж сурган, урам зориг өгөх.

Оролцогчид

Гадасны бүх санваартан

Давтамж

Жилд нэг удаа.

29.3.3

Гадасны санваарын удирдлагын хурал

Зорилго

Санваарын удирдагчдад үүрэг хариуцлагынх нь талаар заах, ур чадварыг нь сайжруулж, итгэлийг нь хөгжүүлэх

Оролцогчид

• Гадасны ерөнхийлөгчийн зөвлөл

• Дээд зөвлөл

• Гадас, тойргийн бичиг хэргийн ажилтнууд (мөн шаардлагатай бол туслах бичиг хэргийн ажилтнууд)

• Гадас, тойргийн гүйцэтгэх нарийн бичиг

• Гадасны Залуу эрэгтэйчүүдийн ерөнхийлөгчийн зөвлөл (мөн дуудагдсан бол нарийн бичиг)

• Бишопын зөвлөл

• Ахлагчийн чуулгын ерөнхийлөгчийн зөвлөл, нарийн бичгүүд

• Аароны санваарын чуулгын зөвлөхүүд.

Давтамж

Санваарын удирдлагын хурлыг гадасны чуулган бүрийн нэгэн хэсэг болгон явуулна.

29.3.4

Гадасны удирдлагын хурал

Зорилго

Тойргийн байгууллагуудын удирдагчдад үүрэг хариуцлагыг нь заах, удирдагч, багшийнхаа хувьд сайжрахад нь туслах мөн Есүс Христэд итгэх итгэлээ хүчирхэгжүүлэхэд нь туслах Эдгээр хурлаар удирдагчид хамтдаа зөвлөлдөж, санаа бодлоо хуваалцдаг.

Оролцогчид

Гадас, тойргийн Халамжийн нийгэмлэг, Залуу эмэгтэйчүүд, Хүүхдийн хэсэг, Ням гаргийн ангийн бүх ерөнхийлөгчийн зөвлөл, нарийн бичиг. Гадасны ерөнхийлөгчийн зөвлөлийн гишүүн эсвэл томилогдсон дээд зөвлөлийн гишүүн оролцож, тэргүүлнэ. Эдгээр байгууллагад томилогдсон багш, зөвлөх, дээд зөвлөлийн гишүүн, бишопын зөвлөлийн гишүүд бас оролцож болно.

Давтамж

Жилд нэг удаа.

29.3.5

Гадасны дээд пристийн чуулгын хурал

Зорилго

Чуулгын гишүүдэд үүрэг хариуцлагыг нь мөн санваартай холбоотой сургаалыг заах.

Оролцогчид

Гадасны дээд пристийн чуулгын бүх гишүүн.

Давтамж

Доод тал нь жилд нэг удаа

29.3.6

Гадасны ерөнхийлөгчийн зөвлөлийн хурал

Зорилго

Хамтдаа зөвлөлдөж, гадастай холбоотой асуудлуудын талаар шийдвэр гаргана.

Оролцогчид

Гадасны ерөнхийлөгчийн зөвлөл, гадасны бичиг хэргийн ажилтан болон гүйцэтгэх нарийн бичиг.

Давтамж

Тогтмол (ихэвчлэн долоо хоног тутам)

29.3.7

Дээд зөвлөлийн хурал

Зорилго

Гадсан дахь Бурханы аврал, өргөмжлөлийн ажлын талаар хамтдаа зөвлөлдөнө (1.2-ыг үзнэ үү).

Оролцогчид

• Гадасны ерөнхийлөгчийн зөвлөл

• Дээд зөвлөл

• Гадасны бичиг хэргийн ажилтан ба гүйцэтгэх нарийн бичиг

Давтамж

Боломжтой бол сард хоёр удаа хуралдана.

29.3.8

Гадасны зөвлөлийн хурал

Зорилго

Гадсан дахь Бурханы аврал, өргөмжлөлийн ажлын талаар хамтдаа зөвлөлдөнө (1.2-ыг үзнэ үү).

Оролцогчид

• Гадасны ерөнхийлөгчийн зөвлөл

• Дээд зөвлөл

• Гадасны бичиг хэргийн ажилтан ба гүйцэтгэх нарийн бичиг

• Гадасны Халамжийн нийгэмлэг, Залуу эмэгтэйчүүд, Хүүхдийн хэсгийн ерөнхийлөгчид

• Гадасны ганц бие залуучуудын болон ганц бие насанд хүрэгчдийн удирдагчид (дуудагдсан бол).

Давтамж

Бололцоотой бол сард нэг удаа

29.3.9

Гадасны насанд хүрэгчдийн удирдлагын хорооны хурал

Зорилго

Бурханы аврал, өргөмжлөлийн ажилд туслах явцад нь хэрхэн тойргийн удирдагчдад дэмжлэг үзүүлэх талаар хамтдаа зөвлөлдөнө. Гадсанд энэ ажлыг хийх гадасны удирдагчдын алсын харааг хэрэгжүүлэхэд туслах арга замуудыг төлөвлөнө.

Оролцогчид

• Гадасны ерөнхийлөгчийн зөвлөл

• Гадасны Халамжийн нийгэмлэгийн ерөнхийлөгчийн зөвлөл (мөн дуудагдсан бол нарийн бичиг)

• Ахлагчийн чуулгатай ажиллахаар томилогдсон дээд зөвлөлийн гишүүд

Давтамж

Шаардлага гарсны дагуу.

29.3.10

Гадасны өсвөр үеийнхний удирдлагын хорооны хурал

Зорилго

Гадасны удирдагчид болон өсвөр үеийнхэн хамтдаа (1) гадасны өсвөр үеийнхнийг хүчирхэгжүүлэх талаар зөвлөлдөж, (2) үйлчлэл, үйл ажиллагааг төлөвлөнө.

Үүнээс гадна гадасны удирдагчид Бурханы аврал, өргөмжлөлийн ажилд өсвөр үеийнхнийг татан оролцуулахад нь тойргийн удирдагчдад хэрхэн заавар өгч, дэмжих талаар хамтдаа зөвлөлдөнө. Тэд гадасны өсвөр үеийнхэнтэй холбоотой гадасны зөвлөлийн алсын харааг хэрэгжүүлэхэд туслах арга замуудыг төлөвлөнө.

Оролцогчид

• Гадасны ерөнхийлөгчийн зөвлөлийн гишүүн

• Гадасны Залуу эрэгтэйчүүдийн ерөнхийлөгчийн зөвлөл (мөн дуудагдсан бол нарийн бичиг)

• Гадасны Залуу эмэгтэйчүүдийн ерөнхийлөгчийн зөвлөл (мөн дуудагдсан бол нарийн бичиг)

• Гадасны тойрог бүрийн өсвөр үеийнхэн цуглаан эсвэл уулзалтын зарим хэсэгт тэднийг оролцуулах нь тустай байх асуудал орсон үед оролцоно.

Давтамж

Шаардлага гарсны дагуу.

29.3.11

Гадасны бишопуудын зөвлөлийн хурал

Зорилго

Туршлагаа хуваалцаж, асуултуудад хариулж, зөвхөн бишоптой холбоотой зааврыг өгнө.

Оролцогчид

Гадасны ерөнхийлөгч болон бүх бишоп, салбарын ерөнхийлөгч энэ зөвлөлийн гишүүн юм. Гадасны бичиг хэргийн ажилтан мөн оролцож, ажил үүрэг, гapгacaн шийдвэрүүдийн тэмдэглэлийг хөтөлнө.

Давтамж

Доод тал нь улиралд нэг удаа.

29.5

Хүн нас барах үед хийх оршуулгын болон бусад үйлчлэл

29.5.1

Ерөнхий зарчим

Нас барсан хүнд зориулсан Сүмийн ёслолын гол зорилго бол авралын төлөвлөгөөний талаар, ялангуяа Аврагчийн Цагаатгал, Амилалтын талаар гэрчлэх явдал юм. Эдгээр ёслол нь хүндэтгэлтэй, сүнслэг үйл явдал байх ёстой.

Сүмийн удирдагчид бусад шашин, мөн бүлгийн зан үйл, ёслолуудыг нас барсан хүнд зориулсан Сүмийн ёслолд хамааруулахгүй.

29.5.2

Гэр бүлийнхэнд нь тусламж үзүүлэх

Есүс Христийн шавь нарын хувьд Сүмийн удирдагчид ба гишүүд “гашуудах тэдний хамт гашуудаж … мөн тайтгарал хэрэгтэй тэднийг тайтгаруулдаг” (Moзая 18:9) билээ. Гишүүнийг нас барахад бишоп гэрт нь очиж, тэднийг тайтгаруулдаг.

Бишоп нь тойргийн гишүүд, тухайлбал ахлагчийн чуулга, Халамжийн нийгэмлэгээс тусламж үзүүлж болохыг хэлнэ.

29.5.4

Оршуулгын ёслол (ийм ёс заншил байдаг бол)

Сүмийн байранд эсвэл өөр газарт байсан ч бишоп хөтлөн явуулж л байгаа бол Сүмийн цуглаан, шашны ёслол юм. Энэ бол сүнслэг үйл явдал байх ёстой.

Оршуулгын ёслол цагтаа эхлэх ёстой. Ерөнхийдөө оролцож байгаа хүмүүсийн цаг завыг хүндэтгэхийн тулд эдгээр нь 90 минутаас хэтрэхгүй байвал зохино.

Ерөнхийдөө оршуулгын ёслолыг ням гарагт явуулдаггүй.

29.6

Сүмийн цуглаан дээрх залбирал

Сүмийн цуглаан дээрх залбирлыг товч, энгийн, Сүнсний удирдамжийн дагуу хэлэх ёстой. Сүмийн баптисм хүртсэн гишүүн нээлт, хаалтын залбирлыг хэлж болно. Баптисм хүртээгүй хүүхдүүд Хүүхдийн хэсэгт залбирал хэлж болно.

29.7

Хурал цуглааныг шууд дамжуулах, онлайнаар хурал, цуглаан явуулах

Бишоп онцгой тохиолдолд цуглааны байранд болж буй ариун ёслолын цуглаан, оршуулга, хуримын ёслол зэргийг шууд дамжуулах зөвшөөрөл олгож болно.

Ариун ёслолын цуглааныг шууд дамжуулахдаа ариун ёслолыг гүйцэтгэх хэсгийг оруулдаггүй.

Зарим цуглаанд бишоп эсвэл гадасны ерөнхийлөгч нь биеэр оролцож чадахгүй гишүүдэд зайнаас оролцох зөвшөөрлийг олгож болно. Эдгээр хуралд:

• Ерөнхийлөгчийн зөвлөлийн эсвэл зөвлөлийн хурал гэх мэт удирдлагын хурал

• Чуулга, Халамжийн нийгэмлэг, Залуу эмэгтэйчүүдийн хурал цуглаан

• Ням гаргийн анги

• Хүүхдийн хэсгийн анги, дууны цаг зэрэг нь орно.

29.8

Хурал цуглааны үеэр гэрэл зураг авах, видео бичих

Сүмийн цуглааны ариун нандин байдлыг хадгалахын тулд хэн ч ариун ёслолын цуглааны болон гадасны чуулганы гэрэл зургийг авч эсвэл видео бичиж болохгүй.

Цуглааны бичлэгийн талаарх мэдээллийг 29.7-оос үзнэ үү.