“Leksyon 5 Materyal sa Pagpangandam sa Klase: Ang Pagtungha sa Basahon ni Mormon,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 5 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 5 Materyal sa Pagpangandam sa Klase
Ang Pagtungha sa Basahon ni Mormon
Sa wala pa tagoi ni Moroni ang rekord sa Nephite, gitagna niya ang pagtungha niini sa ulahing mga adlaw: “Walay usa nga makaangkon og gahum sa pagdala niini ngadto sa kahayag gawas nga ihatag kaniya sa Dios” (Mormon 8:15). Ikonsiderar ngano nga ang Langitnong Amahan mipili sa usa ka batan-on, dili edukado nga batang lalaki nga mag-uuma sa paghubad ug pagmantala sa usa sa labing gamhanan nga mga basahon sa atong panahon.
Seksyon 1
Giunsa ni Joseph Smith pagpagawas ang Basahon ni Mormon pinaagi sa gahum sa Dios?
Daghang milagroso nga mga panghitabo nahitabo isip kabahin sa pagtungha sa Basahon ni Mormon nga naghatag og ebidensya nga kini gihubad pinaagi sa gahum sa Dios (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 23–33, 43–71).
Usa ka anghel nangalagad ni Joseph Smith ug nagsulti kaniya sa karaang rekord.
Sa gabii sa Septyembre 21, 1823, si anghel Moroni mipakita ngadto ni Joseph Smith ug misulti kaniya nga ang Dios adunay buhat alang kaniya (tan-awa sa Joseph Smith—Kasaysayan 1:33).
Pagtuon agi og Pagpangandam alang sa Klase
Basaha ang Joseph Smith—Kasaysayan 1:34–35.
Si Joseph Smith mihubad sa basahon bisan og batan-on pa ug gamay ra og edukasyon.
Si Joseph Smith nag-edad og 17 anyos sa dihang si anghel Moroni unang mibisita kaniya ug sa dihang una niyang nakita ang bulawan nga mga palid. Tali sa mga edad nga 18 ug 21, si Moroni mibisita kaniya kausa matag tuig ug mihatag kaniya og “pahimangno ug kaalam” (Joseph Smith—Kasaysayan 1:54). Sa edad nga 21 gitugutan si Joseph nga dad-on ang mga palid aron kini mahubad. Sa edad nga 22 gihubad niya ang porsyon sa mga palid, uban ni Martin Harris nga maoy tigsulat. (Kini nga manuskrito naglangkob sa 116 ka pahina nga nawala ug wala na usba og hubad.) Sa edad nga 23 nakompleto ni Joseph ang tanan nga paghubad, uban ni Oliver Cowdery ug sa uban nga maoy mga tigsulat.
Si Emma Smith, asawa ni Propeta Joseph Smith, mipasabut: “[Nianang higayuna] si Joseph Smith … dili makasulat ni makadiktar og tarung ug hinan-ay nga maayong sulat; labaw na nga magdiktar og usa ka basahon sama sa Basahon ni Mormon. Ug, bisan ako aktibo nga partisipante sa mga talan-awon nga nahitabo, ug anaa didto atol sa paghubad sa mga palid … talagsaon kini kanako, ‘kahibulongan ug katingalahan,’ kaayo kini alang kanako ingon man ni bisan kinsa usab. … Ang Basahon ni Mormon balaan ang pagkatinuod—wala gayud ako magduda bisan gamay sa katinuod niini. (“Last Testimony of Sister Emma,” The Saints’ Herald, Okt. 1, 1879, 290).
Nakompleto ni Joseph Smith ang hubad sa mubo kaayo nga panahon.
Giba-bana nga nakompleto ni Joseph Smith ang hubad sulod sa “saysentay singko o mas ubos pa ka mga adlaw nga tingtrabaho,” naghubad sa usa ka basahon “nga naglakip og 531 ka pahina sa karon nga edisyon. Makalkulo kana nga mo-average og walo ka pahina kada adlaw. Ikonsiderar kini kon mohubad kamo og libro, o samtang moiskedyul kamo sa inyong kaugalingong pagbasa sa Basahon ni Mormon” (Russell M. Nelson, “A Treasured Testament,” Ensign, Hulyo 1993, 61–62).
Si Joseph Smith mihubad nga walay mga mugbong sulat pahinumdom ug sa walay pagribyu sa manuskrito.
Gihulagway ni Emma ang proseso sa paghubad ngadto sa iyang anak nga lalaki, nga si Joseph Smith III, sa hapit na si Emma mamatay niadtong 1879:
Mituo [ako] nga ang Simbahan giestablisar pinaagi sa balaang giya. Hingpit ang akong pagtuo niini. …
Si [Joseph] walay manuskrito ni basahon nga gibasa [samtang siya naghubad]. …
Kon aduna man siyay bisan unsa niana nga matang dili niya kini matago gikan kanako. …
Ang mga palid kanunayng nahimutang diha sa lamesa nga walay bisan unsa nga salipud nga makatago niini, giputos sa gamayng hapin sa lamesa, nga akong gihatag aron iyang kalukutan niini. Kausa akong nahikap ang mga palid, samtang anaa kini sa lamesa, nga gisubay ang kilid ug porma niini. Morag mabawog kini sama sa baga nga papel, ug dunay tingog nga sama sa metal kon ang mga tumoy paklion gamit ang kumagko, sama sa buhaton usahay sa usa ka tawo nga mopakli sa mga palid sa libro gamit ang kumagko. …
Nahatagan ko sa katagbawan nga walay tawo nga makadiktar sa mga sinulat diha sa manuskrito gawas kon siya dinasig; tungod kay, sa dihang gitahasan ko isip iyang tigsulat, ang imong amahan modiktar ngari kanako matag karon ug unya; ug inigbalik human og kaon, o human sa mga paghunong, modiretso ra siya og sugod kon diin siya mihunong, nga dili magtan-aw sa manuskrito o pagpabasa sa bisan asa nga porsyon niini ngadto kaniya. Usa kini ka naandang butang nga iyang himoon. Dili imposible nga ang usa ka makinaadmanon nga tawo makahimo niini; ug, alang sa usa ka tawo nga walay alamag ug dili makinaadmanon sama niya, imposible ra kaayo. (Emma Smith, sa “Last Testimony of Sister Emma,” The Saints’ Herald, Okt. 1, 1879, 289–90)
Si Joseph Smith gihatagan og mga instrumento nga tabang sa iyang paghubad.
Si Joseph wala mihubad sa Basahon ni Mormon sa naandan nga paagi. Wala siya nasayud sa orihinal nga lingwahe sa mga palid ug dayon ihubad ang lingwahe ngadto sa Iningles. Kondili, iyang gihubad ang pinulongan gikan sa usa ka lingwahe ngadto sa lain pinaagi sa pagpadayag—pinaagi “sa gasa ug gahum sa Dios” (Doktrina ug mga Pakigsaad 135:3).
Si Joseph ug ang iyang mga escriba misulat bahin sa duha ka instrumento nga gigamit sa paghubad sa Basahon ni Mormon. Usa ka instrumento, nga gitawag diha sa Basahon ni Mormon nga “maghuhubad,” (Mosiah 8:13), nga mas naila sa mga Santos sa Ulahing mga Adlaw karon isip ang “Urim ug Thummim” (Joseph Smith—Kasaysayan 1:35). Miluwat si Oliver Cowdery og pahayag nga sa “pagtan-aw pinaagi” sa Urim ug Thummim, si Joseph “nakahimo sa pagbasa sa Iningles, sa gireporma nga Ehiptohanong pinulungan, nga gikulit diha sa mga palid” (“Book of Mormon TranslationGospel Topics, topics.ChurchofJesusChrist.org).
Ang nagsunod nga mga pagsaysay nag-ingon nga usahay mogamit si Joseph og laing instrumento sa paghubad sa Basahon ni Mormon. Kini nga instrumento mao ang usa ka gamay nga bato nga porma og oblong, usahay gitawag nga bato sa manalagna, nga nadiskubrihan ni Joseph pipila ka tuig sa wala pa niya makuha ang bulawang mga palid. Kini nga mga pagsaysay nagpakita nga si Joseph mobutang sa mga tighubad o sa bato nga manalagna ngadto sa kalo aron mababagan ang kahayag, nga nakapahimo niya nga mas makakita sa mga pulong nga makita diha sa instrumento. (Tan-awa sa “Book of Mormon Translation,” topics.ChurchofJesusChrist.org; tan-awa usab sa Richard E. Turley Jr., Robin S. Jensen, ug Mark Ashurst-McGee, “Si Joseph ang Manalagna,” Liahona, Okt. 2015, 10.)
Kapin sa usa ka tuig human ang Basahon ni Mormon namantala, si Joseph gihangyo atol sa usa ka miting sa paghulagway og pipila ka mga detalye bahin sa pagtungha sa Basahon ni Mormon. Ang mga rekord [minutes] sa miting namahayag nga siya “miingon nga dili tuyo nga isulti diha sa kalibutan ang tanang mga detalye sa pagtungha sa Basahon ni Mormon” ug nga “dili angay nga iyang ipakigbahin kini nga mga butang” (sa “Minutes, 25–26 Oktubre 1831,” Minute Book 2, 13, josephsmithpapers.org).
Si Elder Neal A. Maxwell sa Korum sa Napulog Duha ka mga Apostoles miingon:
Daghan kinsa nagbasa sa Basahon ni Mormon masabtan nga nagtinguha nga mahibalo pa mahitungod sa pagtungha niini, lakip ang aktwal nga proseso sa paghubad. … Ang atong nahibaloan mahitungod sa aktwal nga pagtungha sa Basahon ni Mormon igo na, apan dili kini malukpanon. …
… Tingali ang mga detalye giunsa sa paghubad gipugngan … tungod kay kita kinahanglan nga mogahin sa atong kaugalingon kon unsay sulod sa basahon kay sa manubra ang atong pagpakabana mahitungod sa proseso sa atong pagdawat niini. (Neal A. Maxwell, “By the Gift and Power of God,” Ensign, Ene. 1997, 39, 41)
Pamalandong agi og Pagpangandam alang sa Klase
Ngano kaha nga kita kinahanglan nga mas magpakabana sa “sulod sa basahon” kay sa “proseso sa atong pagkadawat niini”?
Seksyon 2
Sa unsa nga paagi nga ang mga pagpamatuod sa mga saksi sa Basahon ni Mormon naghatag og dugang nga ebidensya sa katinuod niini?
Atol sa paghubad sa Basahon ni Mormon, si Joseph Smith ug Oliver Cowdery nakahibalo nga ang Ginoo mopakita sa mga palid ngadto sa tulo ka espesyal nga mga saksi (tan-awa sa Ether 5:2–4). Si Oliver, David Whitmer, ug Martin Harris “nadani pinaagi sa usa ka dinasig nga tinguha nga mamahimong tulo ka talagsaon nga mga saksi” (Doktrina ug mga Pakigsaad 17, ulohan sa seksyon).
Niadtong Hunyo 1829 gipakita ngadto kang Oliver, David, ug Martin ang mga palid sa milagroso nga paagi. Sila mipamatuod nga “usa ka anghel sa Dios mikunsad gikan sa langit, ug siya midala ug mipahiluna sa atubangan sa among mga mata, nga kami nakasud-ong ug nakakita sa mga palid, ug sa mga kinulit diha niini” (“Ang Pagpamatuod sa Tulo ka mga Saksi,” Basahon ni Mormon).
Diha-diha human ang Tulo ka mga Saksi nakasinati uban sa anghel, mipauli si Joseph Smith ngadto sa panimalay sa Whitmer ug mituaw ngadto sa iyang mga ginikanan: “Papa, mama; kahibalo ba mo kon [unsa] ako ka malipayon; ang Ginoo mipakita karon sa mga palid ngadto sa tulo pa gawas sa akong kaugalingon—sila nakakita og usa ka anghel, kinsa mipamatuod ngadto kanila; ug sila mohatag og pagsaksi sa kamatuoran sa unsay akong gisulti; kay karon sa ilang kaugalingon sila nasayud na, nga ako walay gibuhat nga pag-ilad sa mga tawo. Ug akong gibati nga ingon og migaan ang akong salagubangon, nga bug-at na [kaayo] alang nako; ug kini nakapalipay nako, nga wala na gayud ako mag-inusara sa kalibutan.” (“Lucy Mack Smith, History, 1845,” 153–54, josephsmithpapers.org)
Dayon, gipakita ni Joseph ang mga palid ngadto sa dugang nga walo ka mga saksi. Sila mipahayag nga “kami nakakupot [sa mga palid] uban sa among mga kamot; ug kami usab nakakita sa mga kinulit diha niini, … ug nasayud sa kasiguroan nga [si Joseph Smith] nakabaton sa mga palid nga among gipamulong” (“Ang Pagpamatuod sa Walo ka mga Saksi,” Basahon ni Mormon).
Bisan pa sa mga kasungian uban ni Joseph Smith nga misangpot nga ang matag usa sa Tulo ka mga Saksi sa tagsa-tagsa nagkabulagay sa Simbahan (sila si [Oliver] Cowdery ug [Martin] Harris mibalik ra), sila nagpadayon sa paghatag sa ilang pagpamatuod isip mga saksi sa ilang tibuok kinabuhi. Ang matag usa sa Walo ka mga Saksi mihatag na usab sa iyang pagpamatuod mahitungod sa pagtino sa mga palid, bisan og ang pipila sa katapusan mipalayo sa Simbahan. Ang hiniusa nga bili sa ilang daghang mga pamahayag, nga gihatag sulod sa daghang katuigan ug bisan pa sa ilang nausab nga mga kinaiya ngadto ni Joseph Smith ug sa Simbahan, usa ka gamhanan nga saksi sa kasaligan sa mga pamahayag nga ilang gimantala diha sa Basahon ni Mormon. (“Mga Saksi sa Basahon ni Mormon,” Mga Hisgutanan sa Kasaysayan sa Simbahan, ChurchofJesusChrist.org)
Irekord ang Inyong mga Hunahuna
Irekord ang inyong mga kasinatian nga nakatabang ninyo nga makahibalo sa katinuod sa Basahon ni Mormon. Kamo hatagan og oportunidad, kon kamo mopili, sa pagpakigbahin sa inyong saksi panahon sa klase.