Leksyon 11 Materyal sa Magtutudlo

Ang Pagpundok sa Israel

Si Jesukristo misaad nga pundukon ang Iyang katawhan sa ulahing mga adlaw (tan-awa sa 3 Nephi 21:22–29). Gidesinyo kini nga leksyon aron matabangan ang mga estudyante nga mas makasabut sa ilang tahas sa pagtabang sa Ginoo sa pagpundok sa Israel. Makatabang usab kini sa mga estudyante sa pagplano unsaon nila nga mas hingpit nga makaapil niini nga pagpundok.

Mga Sugyot alang sa Pagtudlo

Ang Ginoo misugo sa Iyang mga Santos sa pagpundok.

Ipakita ang mosunod nga litrato, ug dapita ang usa ka estudyante sa pagbasa og kusog sa Doktrina ug mga Pakigsaad 29:1–2.

Pila ka Higayon, ni Liz Lemon

• Unsa ang gitudlo kanato sa gilarawan niini nga mga bersikulo mahitungod sa Manluluwas? Unsa ang gusto ni Jesukristo nga buhaton alang sa Iyang katawhan?

Ipasabut og maayo ang pulong nga “pag-ula” nga anaa sa bersikulo 1. Ipasabut nga si Presidente Russell M. Nelson mitudlo nga “sa Hebreohanon, ang sukaranang pulong alang sa pag-ula mao ang kaphar, usa ka berbo nga nagpasabut ‘sa pagtabon’” (“The Atonement,” Ensign, Nob. 1996, 34).

• Sumala sa bersikulo 2, kinsa ang katawhan sa Ginoo nga gusto Niya nga pundukon ug tabunan sa Iyang mga bukton sa kalooy?

Ipasabut nga ang Biblia, ang Basahon ni Mormon, ug pipila sa mga pagpadayag nga gihatag ngadto ni Joseph Smith ang tanan nagtudlo nga ang Ginoo mopundok sa Iyang katawhan, sa nagkatibulaag nga Israel, sa ulahing mga adlaw (tan-awa sa Ezequiel 28:25; 2 Nephi 10:8; Doktrina ug mga Pakigsaad 33:6).

Dapita ang mga estudyante sa pagpasabut unsay ilang nasabtan mahitungod sa pagpundok sa Israel. (Awhaga sila sa paggamit sa seksyon 1 sa materyal sa pagpangandam.) Mahimo usab ikaw nga mangutana sama sa mosunod aron matabangan nga mapalawman pa ang panaghisgot:

• Ngano kaha nga si Presidente Nelson motawag sa panagpundok nga “ang labing dako nga hagit, ang labing dako nga kawsa, ug ang labing dako nga buhat dinhi sa yuta karon”? (“Paglaum sa Israel” [tibuok kalibutan nga debosyonal sa kabatan-onan, Hunyo 3, 2018], ChurchofJesusChrist.org).

• Unsay atong makat-unan mahitungod sa Ginoo ug sa Iyang kinaiya pinaagi sa pagkatibulaag ug pagpundok sa Iyang sinaaran nga katawhan?

• Unsa ang ubang rason nga gusto sa Ginoo nga magpundok ang Iyang mga Santos?

Ipasabut nga niadtong Disyembre 1830 si Joseph Smith nakadawat og pagpadayag nga nagsugo sa mga Santos nga mobalhin ngadto sa Ohio (tan-awa sa Doktrina ug mga Pakigsaad 37:1–3). Sa usa ka komperensya sa Simbahan niadtong Enero 1831, si Joseph nakadawat og dugang nga pagpadayag nga naghatag sa mga rason nganong ang Ginoo misugo sa mga Santos sa pagpundok ug mipasabut sa gisaad nga mga panalangin sa pagbuhat sa ingon.

Dapita ang klase sa pagbasa sa Doktrina ug mga Pakigsaad 38:28, 31–33, nga mangita sa mga paagi nga ang mga Santos mapanalanginan kon sila mosunod sa sugo nga magpundok ngadto sa Ohio. Dapita ang mga estudyante sa pagpakigbahin unsay ilang nadiskubrihan.

Mahimo nimong hatagan og gibug-aton ang mosunod nga kamatuoran: Ang Ginoo mopundok sa Iyang katawhan aron sa pagpanalipod ug molig-on kanila sa espirituhanong paagi.

• Sa unsa nga paagi nga ang pagpundok karon sa atong mga ward, mga stake, ug mga templo makapahimong posible alang kanato nga makadawat og panalipod ug espirituhanong kalig-on gikan sa Ginoo?

• Unsang mga matang sa panalipod ang inyong nasinati samtang kamo nagpundok uban sa mga Santos?

Ang Ginoo nagtawag ug nagtabang sa Iyang mga sulugoon sa pagpundok sa Israel.

Gamita pag-usab ang litrato sa himongaan nga nagpundok sa iyang mga piso ilawom sa iyang mga pako. Ipakita ang mosunod nga kamatuoran: Ang Ginoo mitawag kanato ug motabang kanato sa pagpundok sa Israel.

Dapita ang mga estudyante sa pagbasa sa Doktrina ug mga Pakigsaad 29:4–7 ug 84:86–88, nga mangita sa mga paagi sa Ginoo sa pagtabang kanato samtang kita motabang sa pagpundok sa Israel. Dapita ang mga estudyante sa pagpakigbahin unsay ilang nakit-an.

Alang sa ehemplo kon unsaon sa Ginoo pagtabang kanato sa pagpundok sa Israel, dapita ang mga estudyante sa pag-istorya pag-usab o pagbasa sa istorya sa misyon ni Heber C. Kimball ngadto sa England nga makita sa seksyon 2 sa materyal sa pagpangandam. Kini mahimong himoon sa ginagmay nga mga grupo. Dapita ang matag grupo (o ang klase) sa paghisgot sa mosunod nga mga pangutana human maribyu ang istorya ni Elder Kimball:

• Unsay akong makat-unan gikan sa kasinatian ni Heber C. Kimball nga tingali makahatag kanako og dugang pagsalig aron makatabang sa pagpundok sa Israel pinaagi sa pagpakigbahin sa ebanghelyo ngadto sa uban?

• Kanus-a ako mibati sa tabang sa Ginoo sa pagsangyaw sa ebanghelyo?

• Unsay akong mahimo nga dugang nakong mapakita ang akong hugot nga pagtuo ug pagpakigbahin sa ebanghelyo ngadto sa uban?

Ipakita ang mosunod nga pamahayag ni Elder Dieter F. Uchtdorf sa Korum sa Napulog Duha ka mga Apostoles. Dapita ang mga estudyante sa pagbasa sa pamahayag ug dayon mopakigbahin kon giunsa nila sa pagpakigbahin ang mensahe sa ebanghelyo ngadto sa uban sa epektibo apan sa natural nga mga paagi.

Elder Dieter F. Uchtdorf

Bisan asa ka sa kalibutan, adunay daghang kahigayunan sa pagpaambit sa maayong balita sa ebanghelyo ni Jesukristo ngadto sa mga tawo nga imong mahimamat, ikauban sa pag-eskwela, ikauban sa pagpuyo, o katrabaho, o ikauban sa paglingawlingaw. … Adunay daghang normal ug natural nga pamaagi sa pagbuhat niini. (Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15, 17)

Makaapil kita sa talagsaong buhat sa pagpundok sa Israel.

Ipakita ang mosunod nga pamahayag ni Presidente Nelson, ug hangyoa ang usa ka estudyante sa pagbasa niini og kusog:

Presidente Russell M. Nelson

Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel. (Russell M. Nelson, “Paglaum sa Israel,” 15)

• Base sa mga pagtulun-an ni Presidente Nelson unsa pa ang atong mabuhat sa pagtabang sa Ginoo sa pagpundok sa Israel? (Tabangi ang mga estudyante sa pag-ila sa kamatuoran susama sa mosunod: Nagpundok kita sa Israel kon kita motabang sa mga anak sa Dios nga mohimo ug motuman sa mga pakigsaad uban Kaniya.)

Pahinumdom: Ang mga estudyante makahimo sa paghisgot og dugang sa pagpundok sa Israel pinaagi sa family history ug pagserbisyo sa templo diha sa leksyon 19, “Katubsanan sa mga Patay.”

Dapita ang mga estudyante sa pagpangita og pipila ka piho nga mga paagi nga sila makatabang sa pagpundok sa Israel. Ilista sa pisara ang ilang mga tubag. Mahimo kang mohangyo sa mga estudyante sa pagpakigbahin sa ilang mga kasinatian nga ilang nasinati kalabut sa mga butang nga anaa sa lista.

Hatagi og panahon ang mga estudyante sa pagpamalandong sa mosunod nga pangutana nga makita sa seksyon 2 sa materyal sa pagpangandam ug sa pagsulat og tumong nga ilang gibati nga ilang mahimo. Mahimo silang mohimo og plano sa pagbuhat sa ilang mga tumong uban sa usa ka higala o grupo diha sa klase. Mahimo usab nga ikaw mangutana kon duna bay pipila ka mga estudyante ang andam nga moreport sa ilang kasinatian atol sa umaabut nga panaghisgot.

• Unsay inyong mahimo sa umaabut nga mga adlaw ug mga semana aron mohimo og mas aktibo nga bahin sa pagpundok sa Israel?

Tapusa pinaagi sa pagpakigbahin sa imong pagpamatuod nga ang Ginoo nagpundok sa Israel sa ulahing mga adlaw. Ipaniguro sa mga estudyante ang panalipod ug kalig-on sa Dios nga ihatag kanila samtang sila magpundok uban sa ubang mga Santos ug samtang sila motabang sa pagpundok sa Israel.

Alang sa Sunod nga Higayon

Ipasabut nga ang pagpundok sa Israel dunay duol nga kalabutan sa buhat sa Ginoo sa pag-establisar sa Zion dinhi sa yuta agi og pagpangandam alang sa Iyang Ikaduhang Pag-anhi. Dapita ang mga estudyante sa pagtuon sa materyal sa pagpangandam alang sa sunod nga klase ug moanha nga andam nga mohisgot unsa ang Zion ug ang mga panalangin nga moabut gikan sa pagtabang sa pag-establisar sa Zion sa ilang mga panimalay ug sa mga stake.