Leksyon 12 Materyal sa Magtutudlo

Ang Pag-establisar sa Kawsa sa Zion

Human sugoa sa Ginoo sa pag-establisar sa kawsa sa Zion, ang unang mga Santos nagsugod sa pagtukod og pundukanan nga dapit didto sa Lalawigan sa Jackson, Missouri. Gidesinyo kini nga leksyon aron matabangan ang mga estudyante sa pag-ila og mga paagi nga sila makatabang sa pagtukod sa Zion sa atong panahon.

Mga Sugyot alang sa Pagtudlo

Ang Ginoo misugo sa Iyang katawhan sa pag-establisar sa kawsa sa Zion.

Hangyoa ang mga estudyante sa paghunahuna kon pila ka higayon sila nag-ampo ngadto sa Langitnong Amahan sa pagpangayo og panabang nga makahibalo kon unsay Iyang gusto nga ilang buhaton sa ilang kinabuhi.

Ipasabut nga sa tingpamulak niadtong 1829, bisan sa wala pa maorganisar ang Simbahan, si Joseph Smith nakadawat og mga pagpadayag alang nila ni Oliver Cowdery, Hyrum Smith, ug Joseph Knight. Matag usa niini nga mga lalaki nagtinguha nga makahibalo unsa ang ipabuhat sa Ginoo kanila. Isulat ang mosunod nga mga pakisayran sa kasulatan diha sa pisara: Doktrina ug mga Pakigsaad 6:6; 11:6; 12:6.

Dapita ang mga estudyante sa pagbasa sa hilom sa mga bersikulo, nga mangita unsay gisulti sa Ginoo sa matag usa niini nga mga lalaki.

• Unsa kaha ang gipasabut sa “pagdala ug pagtukod sa kahimoan sa Zion”? (Doktrina ug mga Pakigsaad 6:6).

Dapita ang mga estudyante sa pagbasa og kusog sa pamahayag ni Joseph Smith sa seksyon 1 sa materyal sa pagpangandam. O mahimo nimong ipakita ang video nga “Teachings of Joseph Smith: Preparing for Zion” (1:42). Hangyoa ang klase sa pagpangita kon unsay gitudlo ni Joseph Smith mahitungod sa Zion.

• Ngano kaha ang Zion usa ka kawsa nga nakapainteres sa katawhan sa Dios sa matag panahon? (Dapita ang mga estudyante sa paghinumdom unsay ilang nakat-unan sa materyal sa pagpangandam.)

Isulat ang mosunod nga dili kompleto nga mga pulong diha sa pisara: Kita makatukod sa Zion pinaagi sa …

Ipasabut nga niadtong Nobyembre ug Disyembre sa 1830, samtang nagtrabaho si Joseph Smith sa iyang dinasig nga hubad sa Biblia, siya nakadawat og mga pagpadayag mahitungod sa karaang propeta nga si Enoch ug sa iyang katawhan. Dapita ang usa ka estudyante sa pagbasa sa Moises 7:18–19, 21 ug laing estudyante nga mobasa sa Doktrina ug mga Pakigsaad 97:21. Hangyoa ang klase sa pagpaminaw sa deskripsyon sa Ginoo sa Zion.

• Unsay atong makat-unan gikan sa deskripsyon sa Ginoo sa Zion nga makatabang nato nga makahibalo unsaon sa pagtukod sa Zion sa atong panahon? (Ilista ang mga tubag sa mga estudyante ubos sa dili kompleto nga mga pulong. Ang mga tubag sa estudyante magkalahi apan mahimong maglakip sa mga ehemplo sama sa mosunod: Kita makatukod sa Zion pinaagi sa pagkahimong usa sa kasingkasing ug hunahuna, pinaagi sa pagpuyo nga matarung, pinaagi sa pag-atiman sa kabus ug timawa, ug pinaagi sa pagpaningkamot nga mahimong putli sa kasingkasing.)

• Unsa ang mahimo nga kalainan niini sa usa ka pamilya, ward, o branch diin ang tanan “usa sa kasingkasing ug usa sa hunahuna”?

Dapita ang usa ka estudyante sa pagribyu sa pamahayag ni Elder D. Todd Christofferson sa Korum sa Napulog Duha ka mga Apostoles sa seksyon 1 sa materyal sa pagpangandam. Hangyoa ang mga estudyante sa pagpangita kon unsaon nato nga mahimong usa sa kasingkasing ug usa sa hunahuna. Human sila makareport, mahimo kang modugang magbutang sa Manluluwas sa sentro sa atong kinabuhi ug sa pagsunod sa mga lider sa Simbahan nganha sa lista sa pisara.

• Sa unsa nga paagi nga ang pagbutang sa Manluluwas sa sentro sa atong kinabuhi ug sa pagsunod sa mga lider sa Simbahan makatabang kanato nga mahimong katawhan nga sama sa Zion?

Ang mga Santos misulay sa pagtukod sa siyudad sa Zion didto sa Lalawigan sa Jackson, Missouri.

Ipasabut nga ang mga Santos nakakat-on gikan sa Moises 7 nga sa dili pa ang Ikaduhang Pag-anhi sa Manluluwas, ang katawhan sa Ginoo pagapundukon og usab ug motukod og laing dakbayan sa Zion (tan-awa sa Moises 7:62). Pipila ka bulan human makadawat sa pagpadayag nga narekord sa Moises 7, si Propeta Joseph Smith nakadawat og laing pagpadayag atol sa usa ka komperensya sa Simbahan nga nagpadayag og dugang pa kabahin niining umaabut nga siyudad sa Zion (tan-awa sa Doktrina ug mga Pakigsaad 45).

Dapita ang klase sa pagbasa pagdungan sa Doktrina ug mga Pakgisaad 45:66–71, nga mangita sa mga deskripsyon sa siyudad sa Zion.

• Unsa nga epekto ang inyong mahunahuna niini nga pagpadayag diha sa unang mga Santos?

Pahinumdumi ang mga estudyante nga si Joseph Smith nakahibalo sa wala madugay pinaagi sa pagpadayag nga “ang tunga-tunga nga dapit” alang sa siyudad sa Zion adto sa Independence, Lalawigan sa Jackson, Missouri (Doktrina ug mga Pakigsaad 57:3).

• Unsa nga mga hagit ang nakapugong sa mga Santos sa pagtukod sa siyudad sa Zion sa Lalawigan sa Jackson? (Awhaga ang mga estudyante sa paghinumdom unsay ilang nakat-unan gikan sa seksyon 2 sa materyal sa pagpangandam.)

• Unsa kaha nga mga pangutana ang gipangutana sa mga Santos human sila gipalayas gikan sa Lalawigan sa Jackson?

Ang Zion matukod lamang sa mga baruganan sa pagkamatarung.

Ipasabut nga sa mga bulan human sa mapintas nga pagpapahawa sa mga Santos gikan sa Lalawigan sa Jackson sa mga manggugubot nga panon, si Joseph Smith nakigbisog sa mga pangutana kon “ngano nga ang Dios mitugot sa tumang kalisud nga moabut sa Zion” ug “pinaagi sa unsa nga iyang ibalik ang [Zion] pag-usab ang [iyang] kabilin” (“Sulat ngadto nila ni Edward Partridge ug sa Uban, 10 Disyembre 1833,” josephsmithpapers.org). Ang Ginoo sa katapusan mihatag ni Joseph og panabut ngano nga ang mga Santos gigukod ug gipapahawa.

Dapita ang katunga sa klase sa pagribyu sa Doktrina ug mga Pakigsaad 101:2–3, 6–8 ug ang laing katunga sa pagribyu sa Doktrina ug mga Pakigsaad 105:3–6, nga mao ang mga tudling nga ilang gitun-an sa seksyon 3 sa materyal sa pagpangandam. Hangyoa ang mga estudyante sa pagpakigbahin sa ilang mga hunahuna mahitungod sa mosunod nga mga pangutana nga gihangyo nga ilang pamalandungan:

• Unsa ang nakapugong sa mga Santos sa pag-establisar sa kawsa sa Zion sa Lalawigan sa Jackson, Missouri?

• Unsa nga mga aksyon ug kinaiya ang gikinahanglan sa Ginoo niadtong anaa sa ulahing mga adlaw kinsa nagtinguha sa pagtukod sa Zion? (Idugang ang mga tubag sa mga estudyante ngadto sa lista diha sa pisara ubos sa mga pulong Kita makatukod sa Zion pinaagi sa …)

Ipasabut nga samtang ang Independence, Missouri, mao “ang tunga-tunga nga dapit” sa Zion (Doktrina ug mga Pakigsaad 57:3), si Propeta Joseph Smith mitudlo nga “bisan asa nga dapit diin ang mga Santos nagpundok mao ang Zion” (Mga Pagtulun-an sa mga Presidente sa Simbahan: Joseph Smith [2007], 221). Karon, kini naglakip sa tanang mga stake sa Simbahan sa tibuok kalibutan.

Ipakita ang mosunod nga kinutlo ni Joseph Smith:

ang Propeta nga si Joseph Smith

. …“Maoy atong tinguha nga matukod ang Zion isip atong pinakamahinungdanon nga katuyoan.” (Mga Pagtulun-an: Joseph Smith, 221).

• Base sa unsay inyong nakat-unan mahitungod sa Zion, ngano kaha nga ang pagtukod sa Zion kinahanglan man nga maoy usa sa atong labing dako nga mga tumong?

Hatagi ang mga estudyante og panahon sa pagribyu unsay ilang nakat-unan gikan sa mga kasinatian sa unang mga Santos ug sa mga pagpadayag mahitungod sa pagtukod sa Zion. Dapita sila sa pagpamalandong unsay ilang mabuhat karon sa pagtabang sa pag-establisar sa Zion sa ilang mga panimalay, mga ward, ug mga branch. Mahimo nimong awhagon sila sa pagrekord sa ilang mga hunahuna ug mga impresyon nga ilang nadawat. Mahimo usab nimong hangyoon ang pipila ka estudyante sa pagpakigbahin unsay ilang buhaton. Pahinumdumi sila sa dili pagpakigbahin sa bisan unsa nga personal ra kaayo.

Alang sa Sunod nga Higayon

Ipasabut nga aron matabangan ang Iyang mga Santos sa pag-establisar og Zion, ang Ginoo mipadayag sa mga balaod sa pagpahinungod, moralidad, panglawas, ug sa Igpapahulay, uban pa. Hatagi og gibug-aton nga ang mga estudyante nga adunay oportunidad sa pagtuon sa usa o daghan pa niini nga mga hilisgutan samtang sila mag-andam alang sa sunod nga klase. Awhaga sila nga moanha sa klase sa sunod nga higayon nga andam nga mopakigbahin og butang nga talagsaon nga ilang nadiskobrehan mahitungod sa usa o daghan niini nga mga balaod.