Leksyon 27 Materyal sa Pagpangandam sa Klase: Ang Pagpadayag bahin sa Pagkapari
“Leksyon 27 Materyal sa Pagpangandam sa Klase: Ang Pagpadayag bahin sa Pagkapari,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 27 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Imahe
pamilya atubangan sa templo
Leksyon 27 Materyal sa Pagpangandam sa Klase
Ang Pagpadayag bahin sa Pagkapari
Nahibulong ka ba sukad o gihangyo sa pagpasabut ngano nga ang Mga Santos sa Ulahing mga Adlaw nga kaliwat sa itum nga Afrikano gidid-an sulod sa pipila ka panahon nga ma-orden ngadto sa pagkapari ug sa pagdawat og mga ordinansa sa templo? Samtang ikaw magtuon, ilha unsay atong nahibaloan ug wala mahibaloi mahitungod sa pagkapari ug templo nga mga pagdili. Pangita og mga kamatuoran nga makatabang kanimo nga mas makasabut og maayo niini nga hilisgutan ug ipasabut ngadto sa uban sa tukma ug matinud-anong paagi.
Seksyon 1
Unsa ang atong nahibaloan mahitungod sa gigikanan sa pagkapari ug templo nga mga pagdili?
“Ang Basahon ni Mormon nagtudlo nga ‘ang tanan managsama ngadto sa Dios,’ lakip ang ‘itum ug puti, ulipon ug gawasnon, lalaki ug babaye’ (2 Nephi 26:33). Sa tibuok kasaysayan sa Simbahan, ang mga tawo sa tanang kaliwatan o kultura diha sa daghang mga nasud nabunyagan ug nagpuyo isip matinud-anong mga miyembro sa Simbahan. Sa panahon sa kinabuhi ni Joseph Smith, ang pipila ka itum nga mga lalaki nga miyembro sa Simbahan gi-orden ngadto sa pagkapari. Sa sayong bahin sa kasaysayan niini, ang mga lider sa Simbahan mihunong sa pagtugyan sa pagkapari ngadto sa itum nga mga lalaki nga kaliwat sa Afrikano. Ang mga rekord sa Simbahan wala maghatag og klarong mga panabut ngadto sa mga gigikanan niini nga buhat” (pasiuna sa Opisyal nga Pahayag 2).
Si Elijah Able usa sa pipila ka itum nga mga lalaki nga gi-orden ngadto sa pagkapari sayo sa kasaysayan sa Simbahan.
Atol niini nga panahon, ang itum nga mga lalaki ug mga babaye gidid-an usab sa pagdawat sa mga ordinansa sa templo, apan sila gitugutan pa nga mabunyagan ug modawat sa gasa sa Espiritu Santo. Bisan og daghan ang wala mailhi mahitungod sa gigikanan sa pagkapari ug templo nga mga pagdili, ang mga propeta sa Ulahing mga adlaw, lakip ni Brigham Young, David O. McKay, ug Harold B. Lee, mitudlo nga ang panahon moabut nga ang tanang takus nga mga miyembro sa Simbahan, walay pagsapayan sa kaliwat, mahimong makadawat sa tanang mga panalangin sa ebanghelyo (tan-awa sa “The Long-Promised Day,” Ensign, Hunyo 2018, 34).
Sa nanglabay nga mga katuigan, pipila sa mga lider ug mga miyembro sa Simbahan misugyot og mga rason kon ngano nga ang pagkapari ug templo nga mga pagdili gipaila. Bisan pa niana, kini nga mga pamahayag gihatag isip mga opinyon ug wala magrepresentar sa doktrina sa Simbahan.
Si Presidente Dallin H. Oaks sa Unang Kapangulohan, dili pa Apostol niana nga panahon nga ang pagkapari ug templo nga mga pagdili gihunong, namulong kabahin sa iyang mga pagbati sa wala pa ang pagpadayag nga mipahunong niadtong mga pagdili:
Imahe
Presidente Dallin H. Oaks
Akong naobserbahan ang kasakit ug ang kasagmuyo nga nasinati niadtong kinsa nag-antus niini nga mga pagdili ug niadtong kinsa … nangita og mga rason [alang niini]. Akong gitun-an ang gihatag nga mga rason ug wala mobati og panghimatuod sa kamatuoran bisan hain niini. Isip kabahin sa akong mainampuon nga pagtuon, akong nakat-unan nga, sa kinatibuk-an, panagsa ra nga mohatag ang Ginoo og mga rason alang sa mga sugo ug mga direksyon nga Iyang gihatag ngadto sa Iyang mga sulugoon. Determindo ako nga magmatinuoron ngadto sa atong propetikanhong mga lider ug mag-ampo—ingon nga gisaad gikan sa sinugdanan niini nga mga pagdili—nga ang adlaw moabut diin ang tanan makatagamtam sa mga panalangin sa pagkapari ug sa templo. (“President Oaks Remarks at Worldwide Priesthood Celebration,” Be One—A Celebration of the Revelation on the Priesthood, Hunyo 1, 2018, newsroom.ChurchofJesusChrist.org)
Seksyon 2
Unsa nga mga sitwasyon ang migiya ngadto sa pagpadayag gikan sa Ginoo nga itugyan ang pagkapari ngadto sa matag takus nga miyembro nga lalaki sa Simbahan ug ang mga panalangin sa templo ngadto sa tanang takus nga mga miyembro?
Kaniadtong 1964, si Joseph William Billy Johnson sa Cape Coast, Ghana, nakabaton og usa ka pagpamatuod sa gipahiuli nga ebanghelyo human mabasa ang Basahon ni Mormon ug ubang mga basahon sa Simbahan nga gihatag ngadto kaniya. Si Brother Johnson ug ang uban kinsa mipasakop sa Simbahan mipadala og mga sulat ngadto ni Presidente David O. McKay naghangyo nga ang mga misyonaryo ipadala ngadto sa Africa aron sa pagbunyag kaniya ug sa uban ngadto kang kinsa siya mipakigbahin sa ebanghelyo. Mitubag si Presidente McKay nga ang mga misyonaryo ipadala “sa tukma nga panahon sa Ginoo,” apan hangtud niana si Brother Johnson kinahanglan nga magpadayon sa pagtuon sa ebanghelyo ug sa pagtabang sa iyang kauban nga mga tumutuo (sa E. Dale LeBaron, “Steadfast African Pioneer,” Ensign, Dis. 1999, 45–49).
Bisan tuod og walay oportunidad alang ni Brother Johnson nga mabunyagan niana nga panahon, siya ug pipila sa ubang tawo makugihong mipakanap sa mensahe sa ebanghelyo didto sa Ghana sulod sa daghang mga katuigan. Mitukod si Brother Johnson og daghang mga kongregasyon sa mga tumutuo ug migiya kanila og makanunayong mga puasa diin sila nangamuyo alang sa mga misyonaryo nga moanha sa ilang yuta ug itukod ang Simbahan taliwala kanila (tan-awa sa Elizabeth Maki, “‘A People Prepared’: West African Pioneer Preached the Gospel before Missionaries,” history.ChurchofJesusChrist.org).
Sama sa mga tumutuo sa Ghana, mga kaliboan sa ubang mga tawo nga kaliwat sa itum nga Afrikano nakabaton og mga pagpamatuod sa gipahiuli nga ebenghelyo samtang ang misyonaryong buhat mikanap sa tibuok yuta atol sa ika-20 nga siglo. Ang mga lider sa Simbahan gidasig pinaagi sa hugot nga pagtuo niini nga mga indibidwal ug gitinguha ang pagtugyan sa mga panalangin sa pagkapari ug sa templo ngadto kanila (tan-awa sa Opisyal nga Deklarasyon 2).
Gibati ni Presidente Spencer W. Kimball ang usa ka linaing kusog nga pagbati sa pagtubag sa pagkapari ug templo nga gidili atol sa iyang panahon isip Presidente sa Simbahan. Nahinumdom siya:
Imahe
Presidente Spencer W. Kimball
Nasayud ako nga adunay usa ka butang sa among atubangan nga importante kaayo sa kadaghanan sa mga anak sa Dios. … Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo, ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang iyang buot ipabuhat. Nakigsulti ako kaniya kalabut niini ug miingon, “Ginoo, buot lamang ako nga mobuhat unsa ang husto. … Buot lamang kami sa mga butang nga pagbuot nimo, ug buot kami niini kon imong pagbuot kini ug dili hangtud.” … Giklaro kaayo sa Ginoo ngari kanako unsa ang angay nga buhaton. (Mga Pagtulun-an sa mga Presidente sa Simbahan: Spencer W. Kimball [2006], 297)
Ingon nga narekord diha sa Doktrina ug mga Pakigsaad, “Ang pagpadayag miabut ngadto sa Presidente sa Simbahan nga si Spencer W. Kimball ug gipanghimatuod sa ubang mga lider sa Simbahan didto sa Templo sa Salt Lake sa Hunyo 1, 1978” (pasiuna sa Opisyal nga Deklarasyon 2).
Diha sa ilang pahibalo sa publiko kabahin sa pagpadayag, ang Unang kapangulohan mipahayag:
Kami naghangyo sa dugay ug dako nga tinguha alang niini nga, atong matinud-anon nga mga kaigsoonan, naggahin og daghan nga mga takna sa Ibabaw nga Lawak sa Templo nangamuyo sa Ginoo alang sa langitnong paggiya.
Siya nakadungog sa atong mga pag-ampo, ug pinaagi sa pagpadayag nagmatuod nga ang dugay na nga gisaad nga adlaw miabut na kanus-a ang matag matinud-anon, takus nga tawo sa Simbahan mahimo nga modawat sa balaan nga pagkapari, uban sa gahum sa paggamit niini nga langitnong pagtugot, ug maglipay uban sa iyang mga hinigugma sa matag panalangin nga nagagikan niini, lakip ang mga panalangin sa templo. (Opisyal nga Pahayag 2)
Si Presidente Gordon B. Hinckley, kinsa usa ka miyembro sa Korum sa Napulog Duha ka mga Apostoles sa panahon ang pagpadayag nadawat, mipamatuod kabahin sa unsa kini sama nga maanaa sa templo nianang adlawa:
Imahe
Presidente Gordon B. Hinckley
Miduyog kami sa pag-ampo diha sa labing sagrado nga sitwasyon. Si Presidente Kimball mismo mao ang namulong niana nga pag-ampo. … Adunay balaanon nga pagbati diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga kasigurohan nga ang butang diin iyang giampo matarung. …
Kaming tanan nasayud nga ang panahon miabut na alang sa kausaban ug nga ang desisyon miabut gikan sa kalangitan. Ang tubag klaro. Adunay hingpit nga panaghiusa diha kanamo sa among kasinatian ug sa among pagsabut. (Priesthood Restoration,” Ensign, Okt. 1988, 69–70)
Imahe
icon, rekord
Irekord ang Inyong mga Hunahuna
Kanus-a ka nakasaksi nga ang Ginoo naggiya sa Iyang Simbahan pinaagi sa pagpadayag ngadto sa Iyang mga propeta? Sa imong tibuok kinabuhi, unsa nga mga kausaban ang imong nakita nga ang Ginoo naghimo og paagi nga ang Iyang Simbahan nagtuman sa misyon niini? Kon mahimo, tan-awa ang tanan o bahin sa pahibalo sa 1978 nga pagpadayag bahin sa pagkapari diha sa kinatibuk-ang komperensya ug i-rekord ang imong mga pagbati.
Seksyon 3
Unsa ang epekto sa pagpadayag diha sa Simbahan ug sa mga katawhan sa tibuok kalibutan?
Sa katapusan sa usa ka malisud nga adlaw, gibati ni Brother Billy Johnson nga napugos sa pagpatingog sa iyang radyo sa mga tungang gabii sa wala pa matulog. Samtang naminaw, nabatian niya ang balita nga ang gidid-an sa pagkapari gihunong. Iyang nahinumduman, “Ako nakalukso ug nagsugod sa paghilak ug nagmaya sa Ginoo uban sa mga luha nga karon mao na ang panahon nga ang Ginoo mopadala og mga misyonaryo ngadto sa Ghana ug sa ubang bahin sa Africa aron modawat sa pagkapari. … Malipayon kaayo ko.” Sa dihang miabut ang mga misyonaryo sa Ghana, nakakaplag sila og grupo sa mga tawo kinsa misagop na sa gipahiuli nga ebanghelyo. Si Brother Johnson uban sa mga 600 ka mga miyembro sa kongregasyon gibunyagan. “Human makaserbisyo isip unang presidente sa Cape Coast branch, si [Brother] Johnson mipadayon sa pag-alagad isip presidente sa district, usa ka full-time nga misyonaryo, ug isip patriyarka sa Cape Coast Ghana Stake” (tan-awa sa Elizabeth Maki, “‘A People Prepared”: West African Pioneer Preached the Gospel before Missionaries,” history.ChurchofJesusChrist.org).
Si Elder Edwin Q. “Ted” Cannon Jr. nagbunyag og usa ka grupo sa mga kinabig nga taga-Nigeria.
Isip resulta sa pagpadayag nga nagtapos sa pagkapari ug templo nga mga pagdili, ang mga misyonaryo karon nagsangyaw sa ebanghelyo sa daghang mga nasud sa Africa, mga templo natukod niana nga kontinente, ug gatusan ka liboan ka mga tawo nga kaliwat sa itum nga Afrikano midawat sa mga ordinansa sa ebanghelyo alang sa ilang mga kaugalingon ug alang sa ilang patay nga mga katigulangan. Karon, ang mga miyembro sa Simbahan nga kaliwat sa itum nga Afrikano naghimo og bililhon nga mga kontribusyon ngadto sa Simbahan sa tibuok kalibutan samtang sila nakighiusa sa ilang isig ka mga Santos ug naninguha nga mahimong “usa diha ni Kristo Jesus” (Mga Taga-Galacia 3:28).
Imahe
icon, pamalandong
Pamalandong agi og Pagpangandam alang sa Klase
Unsa ang imong makat-unan gikan sa pagkaandam ni Brother Johnson sa pagsagop ug pagpuyo sa gipahiuli nga ebanghelyo bisan pa og gidid-an siya sa pagkapari ug templo nga mga panalangin sulod sa pila ka panahon?
