Leksyon 20 Materyal sa Magtutudlo

Mga Ordinansa ug Pagsimba sa Templo

Sa dihang ang Templo sa Nauvoo gitukod pa, si Propeta Joseph Smith mitudlo, “Ang Simbahan wala pa hingpit ma-organisar … hangtud nga ang Templo makompleto” (Mga Pagtulun-an sa mga Presidente sa Simbahan: Joseph Smith [2007], 503). Ang katuyoan niini nga leksyon mao ang pagdugang sa pagsabut sa mga estudyante sa importansya sa mga ordinansa sa templo ug sa pagdapit kanila sa pagpalambo sa pagkasagunson (ingon sa pagtugot sa panahon) ug sa kalidad sa ilang pagsimba sa templo.

Mga Sugyot alang sa Pagtudlo

Gipahiuli sa Ginoo ang makaluwas nga mga ordinansa sa templo pinaagi ni Joseph Smith.

Ipakita ang hulagway sa usa ka templo nga mailhan sa mga estudyante. Dapita ang pipila ka mga estudyante kinsa nakapahimulos sa pagsimba diha sa templo aron ipakigbahin kon unsa ang ilang gibati sa ilang pagsulod sa balay sa Ginoo. Mahimo usab ikaw mangutana kon unsa ang ilang gibati sa dihang sila mibiya sa templo.

PAGPALAMBO SA ATONG PAGTUDLO UG PAGKAT-ON

Pangutana og makaawhag nga paggamit. Dapita ang mga estudyante sa pagtubag sa mga pangutana nga makaawhag sa paggamit sa nakat-unan. Kini nga mga matang sa pangutana makahimo og importanting tahas sa pagtabang sa mga estudyante sa pagtan-aw kon giunsa sa mga kamatuoran nga gihisgutan magamit sa ilang mga sitwasyon karon ug usab sa paghunahuna kon unsaon nga kini mahimong magamit sa umaabut (tan-awa sa Gospel Teaching and Learning [2012], 5.1.4).

Ipasabut nga human ang mga Santos naka-establisar sa ilang mga kaugalingon didto sa Nauvoo, Illinois, nadawat ni Propeta Joseph Smith ang sugo sa pagtukod og templo. Sama sa Templo nga gitukod didto sa Kirtland, kini nga buluhaton nagkinahanglan og dakong mga sakripisyo gikan sa mga Santos. Sa dihang ang Templo sa Nauvoo gitukod pa mitudlo si Propeta Joseph Smith, “Ang Simbahan wala pa hingpit nga ma-organisar … hangtud nga ang Templo makompleto” (Mga Pagtulun-an: Joseph Smith, 503).

• Ngano kaha ang Pagpahiuli sa Simbahan sa Manluluwas dili makompleto kon walay templo? (Mahimo nimong awhagon ang mga estudyante sa pagpakigbahin og pipila sa unsay ilang nakat-unan gikan sa pagtuon sa materyal sa pagpangandam.)

Ipasabut nga diha sa usa ka pagpadayag nga nagmando sa mga Santos sa pagtukod sa Templo sa Nauvoo, gipadayag sa Ginoo nganong ang templo mahimong importante kaayo ngadto sa mga Santos. Gipasabut Niya nga ang mga paghugas, mga pagdihog, ug mga bunyag alang sa patay, ug ubang mga ordinansa nahisakop lakip diha sa Iyang balaang balay. Dapita ang mga estudyante sa paggahin og pipila ka minuto sa pagtuon sa Doktrina ug mga Pakigsaad 124:31, 34, 40–41, 55, mangita kon giunsa sa Ginoo pagsaad ang Iyang mga katawhan diha sa mga templo.

Ipa-report sa mga estudyante kon unsay ilang nakit-an. Gamit ang mga pulong sa estudyante, ipakita o isulat ang usa ka kamatuoran diha sa pisara nga susama niining mosunod: Diha sa templo, nagpanalangin ang Ginoo kanato og importanting mga ordinansa aron kita mapurongpurongan og pasidungog, imortalidad, ug kinabuhing dayon.

• Sa unsa nga mga paagi kaha ang mga ordinansa sa templo nag-andam kanato alang sa pasidungog, imortalidad, ug kinabuhing dayon?

Red Brick Store

Ipakita ang usa ka hulagway sa Red Brick Store ni Joseph sa Nauvoo, ug hangyoa ang mga estudyante sa pagpasabut kon unsa ang ilang nahibaloan mahitungod sa pagpahiuli sa tulumanon sa pagtuga sa templo. Dapita sila sa pagribyu sa seksyon 2 sa materyal sa pagpangandam ingon nga gikinahanglan.

• Unsa ang imong nakat-unan mahitungod sa mga panalangin sa pagtuga gikan sa seksyon 3 sa materyal sa pagpangandam?

Samtang ikaw naghisgot sa pagtuga hunahunaa ang pagpangutana sa pipila ka pagsunod nga mga pangutana nga gilista sa ubos. Ipasabut nga gitudlo ni Elder Bednar nga samtang kita nagsultihanay mahitungod sa templo kinahanglan dili nato “ipanabi o ihulagway ang talagsaon nga mga simbolo nga may kalabutan sa mga pakigsaad nga atong madawat atol sa sagradong mga seremonya sa templo,” apan “mahimo natong hisgutan ang mga nag-unang mga katuyoan niana ug ang doktrina nga may kalabutan sa mga ordinansa ug mga pakigsaad sa templo” (“Andam nga Makaangkon sa Matag Gikinahanglan nga Butang,” Liahona, Mayo 2019, 103).

• Unsa ang gilakip diha sa gasa sa pagtuga? (Tan-awa sa seksyon 3 sa materyal sa pagpangandam.)

• Unsa ang relasyon tali sa mga ordinansa ug mga pakigsaad?

• Samtang imong gitun-an ang materyal sa pagpangandam, unsay imong nakat-unan mahitungod sa mga pakigsaad nga atong gihimo atol sa tulumanon sa pagtuga?

• Ngano kaha ang Ginoo gusto sa Iyang mga katawhan nga pagatugahan diha sa templo?

Hunahunaa ang paghatag sa mga estudyante og usa ka minuto o duha sa pagpakigbahin sa ilang mga hunahuna ngadto sa laing estudyante nga naglingkod sa duol mahitungod sa mosunod nga mga pangutana nga makaplagan diha sa katapusan sa materyal sa pagpangandam:

• Unsa ang imong isugyot nga buhaton sa usa ka tawo sa pagpangandam sa pagdawat sa iyang pagtuga? Ngano nga ang templo ug ang mga ordinansa niini sa personal nga paagi importante nganha kanimo?

Ang pagsimba diha sa templo nagdapit sa gahum ug mga panalangin sa Ginoo nganhi sa atong mga kinabuhi.

Templo sa Kirtland

Pahinumdumi ang mga estudyante nga ang Templo sa Kirtland mao ang unang templo nga nahuman niini nga dispensasyon. Ang katuyoan niini lahi nianang mga templo nga nagsunod—kini naghatag og dapit alang sa Ginoo sa pagpahiuli sa kahibalo ug sa mga yawe sa pagkapari alang sa umaabut nga pagsimba diha sa templo. Atol sa pagpahinungod nga pag-ampo niana nga templo, gihangyo ni Joseph ang Ginoo sa paghatag og mga panalangin ngadto niadtong kinsa nagsimba diha sa templo. Dapita ang mga estudyante sa pagribyu sa Doktrina ug mga Pakigsaad 109:13, 22–26 ug sa pagpangita sa mga panalangin nga ilang madawat pinaagi sa pagsimba diha sa templo.

• Sumala niini nga mga bersikulo, unsa nga mga panalangin ang atong madawat samtang kita nagsimba diha sa templo? (Hunahunaa ang paglista sa mga tubag sa mga estudyante diha sa pisara ug sa pagpangutana kanila kon nganong kini nga mga panalangin importante ngadto kanila. Mahimo nimong tabangan ang mga estudyante sa pag-ila og baruganan sama sa mosunod: Samtang kita nagsimba diha sa templo sa Ginoo, Siya mosangkap kanato sa Iyang gahum ug panalipud.)

Paghisgot uban sa mga estudyante og mga katarungan nga kita nagkinahanglan sa gahum ug panalipud sa Ginoo sa atong panahon. Dapita ang mga estudyante kinsa nangutana og sakop sa pamilya o higala kon unsang piho nga mga panalangin nga gibati niya pinaagi sa mga ordinansa ug pagsimba sa templo nga ipakigbahin ang unsay ilang nakat-unan (tan-awa ang pagdapit diha sa katapusan sa seksyon 1 diha sa materyal sa pagpangandam). Mahimo usab ka nga modapit og mga estudyante sa pagpamatuod kabahin sa mga panalangin nga ilang gibati pinaagi sa ilang kaugalingong pagsimba sa templo.

Ipakita ug basaha uban sa mga estudyante ang mosunod nga pahamayag ni Presidente Russell M. Nelson:

Presidente Russell M. Nelson

Mohangyo ko kaninyo nga mainampuong motan-aw kon giunsa ninyo paggamit ang inyong oras. … Kon adunay templo nga dili kaayo layo kaninyo, giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon. Ako mosaad kaninyo nga ang Ginoo mohatag og mga milagro nga Siya nasayud nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo. (Russell M. Nelson, “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 114)

Aron sa pagtabang sa mga estudyante sa paghunahuna og maayo mahitungod sa ilang gisaad ngadto sa Ginoo ug sa ilang kaugalingong kasinatian sa templo, ipakita ang mosunod nga mga pangutana, ug dapita ang mga estudyante sa pagpamalandong sa mga pangutana nga magamit ngadto sa ilang kasamtangan nga mga kahimtang. Hatagi ang mga estudyante og igo nga panahon sa paghunahuna ug tingali sa pagrekord sa ilang mga hunahuna.

1. Aduna bay mga kalinga o mga butang nga dili takus nga nagpugong kanako sa pagsulod sa templo? Unsa ang akong kinahanglan nga buhaton aron sa pagwagtang niini nga mga babag?

2. Unsa nga mga matang sa mga sakripisyo nga tingali gusto sa Ginoo nga akong buhaton aron makadawat pa og dugang nga mga panalangin nga anaa pinaagi sa pagsimba sa templo?

3. Unsaon kaha nako paghimo sa akong pagsimba diha sa templo nga mas makahuluganon?

4. Sa unsa nga mga paagi ang Ginoo gusto kanako nga motabang sa uban nga makasinati sa mga panalangin sa templo?

Alang sa Sunod nga Higayon

Ipasabut nga atol sa sunod nga klase, ang mga estudyante adunay higayon sa paghisgot sa kinahingpitan nga ordinansa sa mahangturong kaminyoon sa templo. Awhaga ang nga estudyante sa mabinantayong pagbasa sa materyal sa pagpangandam alang sa leksyon 21 ug sa paghunahuna kon ngano nga ang kaminyoon ug ang pamilya importante ngadto sa Langitnong Amahan nga plano sa kalipay.