Pōpoaki mei he Kau Palesitenisī ʻUluakí

Siʻi Kāinga ʻOfeina:

Kuo fakahā mai ʻe he ʻEikí, “Ko ʻeku taumuʻá ke tauhi ʻa ʻeku kau māʻoniʻoní” (T&F 104:15). Ko e fakahā ko ʻení ko ha talaʻofa ia mei he ʻEikí te Ne ʻomi ha ngaahi tāpuaki fakatuʻasino pea mo fakaava e matapā ʻo e moʻui fakafalala pē kiate kitá, ʻa ia ko e malava ke tau maʻu ʻa e ngaahi fiemaʻu ʻo e moʻuí maʻatautolu mo e kau mēmipa hotau fāmilí.

Kuo teuteuʻi ʻa e kiʻi tohi ko ʻení ke tokoniʻi ʻa e kau mēmipa ʻo e Siasí ke ako pea moʻui ʻaki ʻa e ngaahi tefitoʻi moʻoni ʻo e tuí, akó, ngāue mālohí, pea falala ki he ʻEikí. ʻI hoʻo tali mo moʻui ʻaki ʻa e ngaahi tefitoʻi moʻoni ko ʻení, te ke lava lelei ange ai ʻo maʻu ʻa e ngaahi tāpuaki fakatuʻasino kuo talaʻofa mai ʻe he ʻEikí.

ʻOku mau fakaafeʻi koe ke ako faivelenga pea mo fakaʻaongaʻi ʻa e ngaahi tefitoʻi moʻoni ko ʻení pea akoʻi kinautolu ki he kau mēmipa ho fāmilí. ʻI hoʻo fai iá, ʻe faitāpuekina hoʻo moʻuí. Te ke ako ʻa e founga ke ngāue ai ʻi ho hala ki he moʻui fakafalala lahi ange kiate kitá. ʻE tāpuakiʻi koe ʻaki ʻa e ʻamanaki leleí, melinó, mo ha fakalakalaka lahi ange.

ʻOku mau fakapapauʻi atu ko e fānau kimoutolu ʻa ʻetau Tamai Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea mo mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá.

Fakaʻapaʻapa atu,

Ko e Kau Palesitenisī ʻUluakí