Ngaahi Maʻuʻanga Tokoní

Founga ʻOku Maʻu Moʻoni ai Ngaahi Ngāué

Fanongo ki hono fakamatalaʻi ʻe he pule ngāue ko ʻení e founga ʻoku maʻu ʻaki ai e ngaahi ngāué.

“Ko e fehalaaki ʻoku fakahoko ʻe he tokolahi taha ʻo e kau kumi ngāué ko e fakamoleki honau taimí he tufa ʻo e ngaahi tohi aʻusia fakaako mo fakangāué, hili iá ʻoku totonu ke fakaʻaongaʻi honau taimí he fengāueʻaki mo e kakaí, fetuʻutaki mo e kakai mahuʻinga ʻi honau malaʻe ngāué mo fakatupulaki honau ngaahi vā fetuʻutakí.

“ʻI heʻeku hoko ko e tokotaha kumi e kau ngāué, naʻá ku tokoni ki heʻemau kautahá ke fakakakato ha ngaahi lakanga ʻe meimei 1,000 he taʻu kuo ʻosí. Ko e founga ʻeni ne fakakakato aí.

“Ne ʻikai tuʻuaki e konga lahi taha ʻo ʻemau ngaahi lakangá. He naʻe ʻosi maʻu pē ʻe he pule ki hono fakangāueʻi [e kakaí] ha taha, pe mahalo ne ʻoange ʻe ha mēmipa ʻo ʻene timí ha tokotaha kiate ia. Naʻá ne fetuʻutaki mai kiate au ʻo talamai ʻoku ʻi ai ha tokotaha ʻoku loto ke fakangāueʻi peá u hoko atu leva au mei ai.

“Ki he ngaahi lakanga naʻe tuʻuakí, ʻoku faʻa aʻu pē ʻo toko teau ʻa e kakai ʻoku tala ngāue mai ki he lakangá. Ne u faʻa maʻu ha ngaahi fetuʻutaki telefoni mei he kau pule ki hono fakangāueʻi e kakaí ke ʻoange ha ngaahi tohi tala ngāue pau ʻo e kakai naʻa nau fie maʻu ke ʻinitaviú. Ko ha kakai pē ʻeni ia ne nau ʻiloʻi, ʻa ia naʻe fakahā ange kiate kinautolu, pe kuo ʻosi fetuʻutaki ange kiate kinautolu. Koeʻuhí kuo ʻilo ʻe he pulé fekauʻaki mo e kakai ko ʻení, naʻá ne ʻilo ai te nau feʻunga mo e ngāué. Ko e kakai ʻeni naʻa nau faʻa maʻu e ngāué. Ne mau fakangāueʻi ha kakai ʻe niʻihi mei he kakai kuo nau tohi tala ngāue maí, ka ko ha pēseti nai pē ia ʻe 25.

“Ko ʻeku faleʻí: fengāueʻaki mo e kakaí. Fakatupulaki hoʻo fengāueʻaki mo e kakaí. Tauhi ho vā fengāueʻaki mo e kakaí. Fetuʻutaki mo e kakai ʻoku nau fakahoko e ngaahi tuʻutuʻuni ki hono fakangāueʻi ha tahá, pe ʻe fakahangatonu pe fakafou ʻi ha niʻihi kehe. Kapau ʻe fai ʻeni ʻe he kau kumi ngāué, te nau maʻu ha ngaahi ngāue.”

Foki ki he peesi 26

Ne u Maʻu ha Ngāue Tupu mei he Pasiketipoló

Tau lau e founga naʻe iku ai ʻa e Ko Au ʻi ha Sekoni ʻe 30 ʻa Lūpení ki ha ngāue lelei mei heʻene fengāueʻaki mo e kakaí.

“Kuó u ngāue mālohi maʻu pē, kae taimi ʻe niʻihi ʻoku ʻikai feʻunga ia. Naʻe tupu mei hono fakatokosiʻi ʻo e kau ngāué ha mole ai ʻeku ngāué, peá u pehē koeʻuhí ko ʻeku ngāue mālohí ʻe faingofua pē hano maʻu haʻaku ngāue. Ko e palopalemá, naʻe ʻi ai ha ngaahi meʻa ʻi hoku puipuituʻá naʻe faingataʻa ai ʻeku maʻu ha ngaahi ʻinitaviú. Ne hangē ne ʻikai pē ha fakalakalaka ia ʻi heʻeku kumi ngāué. Naʻe ʻosi atu ha ngaahi uike lahi, pea naʻá ku puputuʻu mo loto-foʻi. Naʻá ku toki ʻilo fekauʻaki mo e fengāueʻaki mo e kakaí peá u pehē mahalo ko e meʻa ʻeni ʻe maʻu ai haku faingamālié. Naʻá ku toutou ako ʻeku Ko Au ʻi ha Sekoni ʻe 30, pea kamata ke u talanoa ki he tokotaha kotoa pē—ʻo fakamatala kiate kinautolu ʻoku ou kumi ngāue ʻi he tafaʻaki tokangaʻi ʻo e ngaahi meʻa fakalangá pea mo ʻeku ngaahi taukeí mo e pōtoʻi ngāue ne u maʻú.

“ʻI ha efiafi ʻe taha, naʻá ku vaʻinga pasiketipolo ai mo haku ngaahi kaungāmeʻa ʻe niʻihi. Naʻá ku ʻilo ai ʻoku nau takitaha ʻilo ha kakai tokolahi pea ʻe lava ke nau tokoniʻi au ke maʻu haʻaku ngāue, ko ia naʻá ku vahevahe ange ai ʻeku Ko Au ʻi ha Sekoni ʻe 30. Naʻá ku ʻohovale ʻi he pehē mai hanau taha ʻoku ngāue hono malí ʻi ha kautaha langa pea ke ʻave kiate ia ʻeku tohi aʻusia fakaako mo fakangāué. Naʻá ku fai ia peá u toe vakaiʻi he ʻaho hono hokó. Naʻá ne talamai te ne ʻave ia ki ha kulupu langa naʻe ngāue ki ai. Hili ha ngaahi ʻaho siʻi mei ai naʻe tā mai ha tangata ne ʻikai te u ʻilo. Naʻá ne maʻu ʻeku tohi aʻusia fakaako mo fakangāué pea naʻe fie talanoa mai kiate au. Naʻá ne puleʻi ha kautaha langa lahi. Ko hono aofangatukú, ne iku ia ki ha ngāue lelei ʻauptio. Naʻe ʻikai tuʻuaki ʻeku ngāué ki he kakaí, pea naʻe maʻu ia mei ha taha ne fika ua pe tolu ki loto ʻi he kakai ne u fengāueʻaki mo iá. Naʻe ʻikai ke u mei maʻu e faingamālie ko ʻení kapau ne ʻikai ke u lea mo vahevahe ʻeku Ko Au ʻi ha Sekoni ʻe 30. ʻOku fengāueʻaki e tokotaha kotoa pē mo e kakaí; fakaʻaongaʻi ia ke ʻiloʻi ai e meʻa ʻokú ke fie maʻú.”

Foki ki he peesi 32.