Akó—Taimi Lōloa Tahá: Miniti ʻe 45

tuʻunga

ʻEkitivitií _{(miniti ʻe 5)}

Tuʻu kotoa ki ʻolunga. Talanoa mo ha mēmipa ʻe tolu ʻo e kulupú, pea mou fevahevaheʻaki ha aʻusia naʻá ke talaange ai ki ha taha ʻokú ke kumi ngāue pe naʻá ke talanoa hangatonu ai ki ha taha ʻe ngali hoko ko hoʻo pulé. Ko e hā hono olá?

Aleaʻi:Ko e hā ne mou feakoʻaki mei hoʻomou ngaahi aʻusiá?

Lau:ʻOku muimui ʻa e kumi ngāue ola leleí ʻi ha founga faingofua:

Ngāue ʻi he Tui + Ngāue Mālohi + Ngāue Fakapotopoto = Lavameʻa

ʻI he vahe naʻe toki ʻosí, naʻá ke ako ai fekauʻaki mo e tuí mo e ngāue mālohí. ʻI he vahe ko ʻení, te tau kamata ako ai fekauʻaki mo e ngaahi taukei ki he ngāue fakapotopotó. Te tau kamata ʻaki e fengāueʻaki mo e kakaí.

Kumi Ngāue ʻa Siuá

Lau:Kuo kumi ʻeni ʻe Siua e ngaahi ngāue ʻataá ʻi he ʻinitanetí pe ngaahi kautaha kumi ngāué. Ka neongo ia, ne ʻikai mei ʻi ai hano ola, pea taimi lahi, ne ʻikai pē toe fai mai ha fetuʻutaki ia. Kuó ne ʻilo eni ʻoku ʻi ai ha founga lelei ai ki hono kumi ha ngāué. Kuó ne fanongo fekauʻaki mo e ngaahi meʻa hangē ko e fengāueʻaki mo e kakaí ka ʻoku ʻikai ke ne fakapapauʻi ko e hā ia pe ko e founga hono kamataʻí.

Aleaʻi:ʻOku felāveʻi fēfē nai hoʻo aʻusia kumi ngāué mo e aʻusia ʻa Siuá?

1. Founga ʻOku Maʻu Moʻoni ai ʻe he Kakaí ha Ngāué

Lau:ʻE vave ange haʻo maʻu ha ngāue kapau te ke fekumi ʻi he ngaahi founga lelei tahá.

Mamataʻi:“How Jobs Are Really Filled [Founga ʻOku Maʻu Moʻoni ai e Ngaahi Ngāué],” maʻu ʻi he srs.lds.org/videos. (ʻIkai ha vitiō? Lau ʻa e peesi 35.)

video icon

Lau:Fakafehoanaki e ongo kalafi ko ʻení:

maʻu e ngaahi saati ʻo e kumi ngāué

Aleaʻi:Ko e hā ʻe liliu ʻi hoʻo kumi ngāué kapau ʻe lahi ange hoʻo fengāueʻaki mo e kakaí?

2. Talanoa mo e Tokotaha Kotoa Pē

Lau:Ko e fengāueʻaki mo e kakaí ʻa e founga lelei taha ke maʻu ai ha ngāué. ʻOku ʻuhinga ʻa e fengāueʻaki mo e kakaí ki he talanoa ki he kakai te nau lava ʻo tokoni atu ke ke maʻu ai ha kakai mo ha ngaahi kautaha ʻoku nau fie maʻu hoʻo ngaahi taukei ngāué. Talanoa ki he tokotaha kotoa pē fekauʻaki mo hoʻo kumi ngāué. ʻE tokoniʻi koe ʻe he kakaí. Naʻe pehē ʻe Palesiteni Sipenisā W. Kimipolo: “ʻOku ʻafioʻi kitautolu ʻe he ʻOtuá, pea ʻokú Ne tokaimaʻananga mai. Ka ʻokú Ne faʻa feau ʻetau ngaahi fiemaʻú ʻo fakafou mai ʻi ha taha kehe” (“Small Acts of Service Ensign, Dec. 1974,5).

Taimi ʻe niʻihi ʻe fie maʻu ke ke fengāueʻaki mo e kakaí ʻi ha ngaahi tuʻunga kehekehe ke maʻu ʻa e tokotaha mo e fakamatala ʻokú ke fie maʻú. ʻOku ʻuhinga ʻa e fengāueʻaki mo e kakaí ʻi ha ngaahi tuʻunga kehekehé ki he kole ki he kakaí ke nau ʻoatu e hingoa ʻo e kakai kehe ʻoku nau ala maʻu e fakamatala ʻe lava ʻo tokoni atu kiate koé. Te ke lava ʻo fengāueʻaki hangatonu mo e kakaí, pe ʻi he telefoní, pe ʻīmeili. Te ke lava foki ʻo fakaʻaongaʻi ha ngaahi uepisaiti fakapalōfesinale mo fakasōsiale ki he fengāueʻaki mo e kakaí.

connections diagram

ʻEkitivitií _{(miniti ʻe 2)}

Ko ha feʻauhi ʻeni! Ko ia pē ʻe tokolahi taha ʻene ngaahi fetuʻutaki ʻe hiki maí, ʻe mālohi ia.

Sitepu 1: Seti e taimí ki ha sēkoni pē ʻe 60. ʻI he pehē atu ʻa e tokotaha fai fakahinohinó ke kamatá, mou takitaha tohi hifo ki he lahi taha te mou lava ʻo fakakaukau ki aí, ʻa e kakai pe niʻihi ʻe malava ke hoko ko haʻamou pule ngāué. Fakaʻaongaʻi e lisi fetuʻutaki ʻi hoʻo telefoní, ngaahi fetuʻutaki ʻi he mītia fakasōsialé, ʻinitanetí, mo ha ngaahi meʻa kehe.

Teuteu, kamata!

Niʻihi ʻe Malava ke Hoko ko ha Ngaahi Fetuʻutakí

Sitepu 2: Lau hoʻomou ngaahi lisí. Ko hai naʻe lahi tahá? Ko ia ʻe mālohí!

Tokoni:ʻOku lau e tokotaha pe pisinisi kotoa pē naʻá ke hiki hifó ki hoʻo taumuʻa fakaʻaho ʻo hono kumi ha ngaahi maʻuʻanga tokoní.

Aleaʻi:

• Ko e hā ʻe lava ke hoko kapau naʻá ke talanoa ki he tokotaha kotoa pē he kakai mo e ngaahi pisinisi ko ʻení fekauʻaki mo e ngāue ʻokú ke kumí?

• Fēfē kapau naʻá ke talanoa ki he kakai kehe kotoa pē ʻokú ke ʻiló?

3. Ko Au ʻi ha Sekoni ʻe 30

Lau:ʻE lelei ʻaupito hoʻo fengāueʻaki mo e kakai kehé kapau ʻokú ke ʻilo e meʻa ke ke lea ʻakí. ʻOku hoko ʻa e Ko Au ʻi ha Sekoni ʻe 30 ko e founga lelei taha ia ki he fetuʻutaki mo e kakaí pe ngaahi pisinisí. ʻOku tokoni ke mahino ki he kakaí ʻa e faʻahinga ngāue ʻokú ke fekumi ki aí mo e founga ʻe lava ke nau tokoni aí. ʻOku muimui ia ʻi he sitepu ʻe fā ko ʻení.

me in 30 seconds model

Tokoni:Ngaahi Fehuʻi ʻe Malava ke ʻEke Fekauʻaki mo e Ko Au ʻi ha Sekoni ʻe 30

• Ko hai te ke fakaongoongoleleiʻi ke u talanoa ki ai?

• Ko e hā ha ngaahi faingamālie ʻokú ke ʻilo maʻá ha taha hangē ko aú?

• Ko e hā ʻokú ke ʻilo fekauʻaki mo e (kautahá, ngāueʻangá)?

• Ko e hā ha ngaahi pisinisi ʻi he feituʻú ʻoku nau kumi ha (faʻahinga ngāué pe lakangá)?

• Ko hai ʻokú ke ʻilo ʻokú ne fai e meʻa ʻoku ou faí?

Kumi Ngāue ʻa Siuá

Lau:Ko e founga ʻeni naʻe fakaʻaongaʻi ai ʻe Siua ʻene Ko Au ʻi ha Sekoni ʻe 30, ke fengāueʻaki mo ʻene faʻētangata ko Tēvitá. Fakatokangaʻi ange hono fakaʻaongaʻi e ngaahi konga ʻe faá.

“Tēvita, ko hoʻo fakafotu au ko ➀ Siuá. Fēfē hake? ʻOku ʻi ai nai hao faingamālie?Mahalo ʻoku ʻikai ke ke ʻiloʻi ʻeni, ka ➁ ʻoku ou lolotonga kumi ha ngāue foʻou ʻi he tafaʻaki tokoni fakakomipiutá. ➂ Kuó u maʻu ha taukei ngāue taʻu ʻe ua mo maʻu ha ngaahi fakamoʻoni ako lahi ʻi he tafaʻaki fakatekinikalé. ʻI he kautaha fakamuimui naʻá ku ngāue aí, naʻá ku hoko ko e tokotaha ngāue fakatekinikale lelei tahá koeʻuhí ko e lelei ʻeku ngāué. ʻOku ou lelei ʻaupito ʻi he ngāue ʻoku ou faí mo fiefia ai.➃ Ko hai ʻokú ke ʻilo ʻe lava ke u fetuʻutaki ki ai fekauʻaki mo ha ngaahi faingamālie?”

ʻEkitivitī (miniti ʻe 5–8.)

Te ke faʻu leva he taimí ni haʻo Ko Au ʻi ha Sekoni ʻe 30, peá ke akoako ia.

Sitepu 1: Mou takitaha tohi e ngaahi konga ʻe fā ʻo e Ko Au ʻi ha Sekoni ʻe 30, ʻi he konga ʻoku ʻatā ʻi laló.

ko e ngaahi konga ʻo e Ko Au ʻi he Sekoni ʻe 30

Sitepu 2: ʻI he ʻosi pē hoʻomou takitaha tohi hoʻomou Ko Au ʻi ha Sekoni ʻe 30, mou tuʻu tahataha hake ʻo fakafeʻiloaki kimoutolu mo hoʻomou fakamatala Ko Au ʻi ha Sekoni ʻe 30. Vahe ha tokotaha ke ne tokangaʻi e taimi ʻo e fakafeʻiloaki takitaha koeʻuhí ke mou ʻilo hoʻomou mei aʻu ki he sēkoni ʻe 30. Pasipasi mo poupou lelei hili ʻa e fakafeʻiloaki takitaha.

Lau:ʻI he vahe naʻe toki ʻosí, ne tau ako fekauʻaki mo e ngaahi fetuʻutakí. Manatuʻi, ko e fetuʻutakí ko ha faʻahinga fetuʻutaki fakangāue ia mo ha maʻuʻanga tokoni. ʻOku ʻikai tatau e founga naʻe maʻu ai e ngaahi fetuʻutaki kotoa pē. Ko e lahi ange hoʻo ʻai ke fakataautaha hoʻo ngaahi fetuʻutakí, ko ʻene leleí ange ia. ʻOku lelei ange ʻa e talanoa mata ki he mata mo ha tahá ʻi ha ʻīmeili pe ko ha pōpoaki he telefoní. Fakapapauʻi pē ʻoku aʻu ʻo toko ua hoʻo ngaahi fetuʻutaki mata ki he mata fakaʻahó. Ko hono ʻuhinga ia ʻoku mahuʻinga fau ai ʻa e Ko Au ʻi ha Sekoni ʻe 30.

ʻOku kau hoʻo Ko Au ʻi ha Sekoni ʻe 30, ʻi he ngaahi taukei kumi ngāue ʻokú ke malava ai ʻo ngāue fakapotopotó. Te ke ʻilo ʻoku lelei hoʻo Ko Au ʻi ha Sekoni ʻe 30 ʻi he taimi ʻoku iku maʻu ai pē ki he tokoni ʻokú ke fie maʻú. Toutou akoako hoʻo Ko Au ʻi ha Sekoni ʻe 30, pea feinga ke maʻu ha feedback. Tau kamata he taimí ni!

ʻEkitivitií _{(miniti ʻe 5)}

Sitepu 1: Mou tuʻu kotoa ki ʻolunga pea vahevahe ki ha foʻi laine ʻe ua ʻo fehangaaki.

Sitepu 2: Vahevahe mo e tokotaha ʻokú mo fehangaākí hoʻo Ko Au ʻi ha Sekoni ʻe 30.

Sitepu 3: Mo fefakahokoʻaki vave pē ha feedback.

• Naʻe vahevahe atu ho hoá ki he ngāue ʻoku fekumi ki aí?

• Naʻe vahevahe atu ho hoá ki he ʻuhinga ʻoku lelei ai he ngāue ko iá?

• Naʻe kole nai ho hoá ha tokoni? ʻO anga fēfē?

• Naʻe ofi nai ki he sekoni ʻe 30?

Sitepu 4: Tuʻu laine taha kotoa pea ʻunu leva ki he tokotaha hokó. ʻE vilo hake leva e tokotaha ʻi he ngataʻangá ki he kamataʻanga ʻo e lainé. He ʻikai ngaue e laine ʻe tahá. Toutou fakahoko e sitepu 1–3 kae ʻoua kuo mou vahevahe hoʻomou Ko Au ʻi ha Sekoni ʻe 30 mo e tokotaha kotoa pē pea maʻu mo ha feedback.

fakatātā ʻo ha fakamatala tākiekina mālohi

Aleaʻi:ʻE hoko fēfē hoʻo fengāueʻaki mo e kakai kehé kae ngāue ʻaki hoʻo Ko Au ʻi ha Sekoni ʻe 30 ko ha ngāue ʻo e tuí?

ʻEkitivitií _{(miniti ʻe 5)}

Sitepu 1: Mou takitaha fili ha taha mei hoʻo lisi ʻo e niʻihi ʻe lava ke mou fetuʻutaki ki ai ʻi he peesi 28 peá ke tā ki ai. Vahevahe hoʻo Ko Au ʻi ha Sekoni ʻe 30 mo ia pea sio pe ko e hā ʻe hokó.

Sitepu 2: Mou foki kotoa mai ko ha kulupu pea vahevahe hoʻomou ngaahi aʻusiá.

Fakaʻosí

Mamataʻi:“Basketball Got Me a Job [Ne u Maʻu ha Ngāue Tupu mei he Pasiketipoló],” maʻu ʻi he srs.lds.org/videos. (ʻIkai ha vitiō? Lau ʻa e peesi 36.)

video icon

Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ʻení?

Lau:ʻOku muimui ʻa e kumi ngāue ola leleí ʻi he kiʻi founga ko ʻení:

Ngāue ʻi he Tui + Ngāue Mālohi + Ngāue Fakapotopoto = Lavameʻa

ʻOku fie maʻu ʻa e tuí mo e ngāue mālohí ki he fengāueʻaki mo e kakaí. ʻOku hoko foki e fengāueʻaki mo e kakaí ko ha founga fakapotopoto ange hono kumi ha ngāué, pea kuó ke maʻu ʻeni ha founga lelei, Ko Au ʻi ha Sekoni ʻe 30, ke tokoni atu ke ke kamata ʻaki. Kuo talaʻofa mai e ʻEikí, “Fakaava [homou] ngutú pea ʻe fakafonu ia” (T&F 33:8). ʻAlu atu leva pea fokotuʻu ʻa e fengāueʻaki mo e kakaí ko ha meʻa angamaheni ʻi hoʻo kumi ngāué.

Ki ha ngaahi fakakaukau lahi ange fekauʻaki mo e fengāueʻaki mo e kakaí, lau ʻiate koe pē ʻa e peesi 197–202 ʻi he fakamatala fakalahí he uiké ni.