Akó—Taimi Lōloa Tahá: Miniti ʻe 45

tuʻunga

Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:

Ngāue ʻi he Tui + Ngāue Mālohi + Ngāue Fakapotopoto = Lavameʻa

ʻI he vahe naʻe toki ʻosí, naʻá ke ako ai fekauʻaki mo e hoko ʻa e fengāueʻaki mo e kakaí ko e founga lelei taha ki he kumi ngāué. Ka ʻi hoʻo maʻu pē ha faingamālie ʻe ala iku ki ha ngāué, ko e hā ʻoku totonu ke ke ʻuluaki faí? Fakahoa ho ngaahi taukeí mo e ngaahi fiemaʻu ʻa e pule ngāué. Ko ha taukei kumi ngāue ʻeni ʻe taha ʻe tokoni atu ke ke ngāue fakapotopoto ai.

Kumi Ngāue ʻa Siuá

Lau:ʻI he kamata e kumi ngāue ʻa Siuá, naʻá ne fakaleleiʻi ʻene tohi aʻusia fakaako mo fakangāué ke fakakau kotoa ki ai ʻene ngaahi pōtoʻi ngāué pea fakatahaʻi ia mo ʻene ngaahi tohi kole ngāué. Neongo naʻe kole ngāue ki ha ngaahi ngāue lahi, ka ko e lahi tahá naʻe ʻikai ke ne toe maʻu ha tali meiate kinautolu. Meʻaní ʻoku ʻikai sio e kau pule ngāue ko ʻení ki he lelei te ne fakahoko ʻi he ngāué? ʻOku ʻi ai ha meʻa ʻoku kehe ʻi heʻene fakahokó?

Aleaʻi:Ko e hā ha ngaahi founga te ke lava ai ʻo fakafehokotaki kia Siua?

Lau:ʻOku tokolahi ha kau kumi ngāue ʻoku maumau honau ngaahi faingamālié ʻi he kamataʻangá ʻi he ʻikai ke nau tomuʻa ʻilo e ngaahi fiemaʻu ʻa e pule ngāué pea fakahoa ʻenau ngaahi taukei ngāué ki he ngaahi fiemaʻu ko iá. ʻOku nau ʻave pē e fakamatala tatau fekauʻaki mo kinautolu mo pehē ʻe toki fakakaukauʻi ia ʻe he pule ngāué. Meʻa pangó, ʻoku ʻikai pehē. Ko hono moʻoní, ʻoku hangē ʻeni ia ko ha ʻota (order) pisá.

Fakakaukauloto kuó ke fakakaukau he ʻahó kotoa ki ha foʻi pisa pepaloni. ʻOku ʻikai te ke toe fie maʻu ʻe koe ha foʻi pisa kehe–ka ko e pepaloní pē. Ko ia ʻokú ke ʻota (order) ha foʻi pisa pepaloni mei homou fale pisa fakakoló. ʻOkú ke fiekaia pea ʻikai ke ke faʻa tatali ke fai mo aʻu mai. ʻOku tatangi e fafangu he matapaá peá ke fakaava hake e matapaá, totongi e tokotaha tilivá, peá ke ʻalu mo e puha pisa teʻeki fakaavá ki peito. ʻOkú ke tuku hifo ia ʻi he tēpilé peá ke fakaava hake ia, pea ko e meʻa ʻeni ʻokú ke sio ki aí:

pisa

Aleaʻi:Ko e hā hono fuoloa peá ke toki ʻilo ʻoku ʻikai ko e meʻa ʻeni naʻá ke fie maʻú?

Lau:Kapau he ʻikai te ke tuku ha taimi ke ke ʻuluaki ʻiloʻi mo tokanga taha ki he ngaahi fiemaʻu ʻa e pule ngāué, mahalo ʻe vave ʻenau toʻo koe mei he lisí ʻo hangē ko hoʻo ʻiloʻi hifo ko e ʻota (order) pisa hala ia naʻá ke maʻú. Kuo hoko ʻeni ko ha konga ʻo e palopalema ʻa Siuá. Naʻe ʻikai te ne ʻilo e founga ke ne tokanga taha ai ki he ngaahi fiemaʻu ʻa e pule ngāué. Naʻá ne ʻave ha ngaahi tohi aʻusia fakaako mo fakangāue mo ha ngaahi tohi kumi ngāue mo ha fakamatala naʻe ʻikai tokanga ki ai e pule ngāué ia. ʻOku fakaʻaongaʻi ʻe he kau kumi ngāue ola leleí ha taimi ke feinga ke mahino kiate kinautolu ʻa e meʻa ʻoku fie maʻu ʻe he pule ngāué; pea ʻoku nau ʻoatu leva ʻa e tohi kumi ngāue, tohi aʻusia fakaako mo fakangāue, pe ʻinitaviu lelei tahá ke fenāpasi mo e ngaahi fiemaʻu ʻa e pule ngāué.

1. Feinga ke ʻIlo e Ngaahi Fiemaʻu ʻa e Pule Ngāué

Lau:ʻOku lahi ha ngaahi maʻuʻanga tokoni te ke lava ʻo fakaʻaongaʻi ke ʻiloʻi ai e ngaahi fiemaʻu ʻa e pule ngāué.

• Ngaahi uepisaiti mo e ngaahi lipooti ʻa e kautahá

• ʻInitanetí

• Mītia fakasōsialé

• Kakai ʻoku nau ngāue ʻi ha ngaahi fatongia tatau

• Fakamatala ʻo e ngāué

Aleaʻi:ʻE tokoni fēfē atu e ngaahi meʻá ni pe ngaahi maʻuʻanga tokoni kehé ke ke ʻiloʻi ai e ngaahi fiemaʻu ʻa ha pule ngāue?

Kumi Ngāue ʻa Siuá

Lau:ʻOkú ke manatuʻi e fetuʻutaki ʻa Siua ki heʻene faʻētangata ko Tēvitá ʻi he vahe naʻe toki ʻosí? Sai, naʻe tokoni ʻaupito ʻa e Faʻētangata ko Tēvitá kiate ia. Naʻá ne ʻoange kia Siua ha fika fetuʻutaki ki hono kaungāmeʻa ko Sūliá, ʻa ia ko ha pule ʻi ha kautaha lahi fakalotofonua, ko e ABC Marketing.Naʻe fetuʻutaki leva ʻa Siua kia Sūlia ʻo fakafeʻiloaki ia ʻaki ʻene Ko Au ʻi ha Sekoni ʻe 30. Naʻe fiefia ʻa Sūlia! Naʻe talaange ʻe Sūlia kia Siua ʻoku nau lolotonga fakasio ha tokotaha ngāue fakakomipiuta, ka naʻe teʻeki ke nau tuʻuaki e foʻi lakangá koeʻuhí ne nau fuʻu moʻua. Naʻá ne ʻave kia Siua ʻa e fakamatala ʻo e ngāué mo kole ange ke ʻave ange haʻane tohi aʻusia fakaako mo fakangāue. Kimuʻa pea tohi ʻa Siua ki he foʻi lakangá, naʻá ne pehē ke fakapapauʻi ʻokú ne ʻilo e meʻa ʻoku fie maʻu ʻe he pule ngāué.

ʻEkitivitií _{(miniti ʻe 4)}

Ko e fakamatala ngāue ʻeni naʻe ʻave ʻe Sūlia kia Siuá. Te tau toe vakaiʻi fakataha ia.

Sitepu 1: ʻE lau leʻolahi ʻe ha tokotaha e fakamatala ʻo e ngāué. Lolotonga e lau ʻa e tokotaha ko iá, ʻe laineʻi pe fakaʻilongaʻi ʻe he kau mēmipa ʻo e kulupú e ngaahi taukei ngāue mo e ngaahi tuʻunga fakaako mo fakangāue te nau fanongo ki aí.

Sitepu 2: Te mou aleaʻi fakakulupu leva ʻa e meʻa ne mou fakaʻilongaʻí mo e ʻuhinga ne mou fakaʻilongaʻi ai iá.

fakamatala ʻo e ngāué

Lau:Fakahoa leva ʻa e meʻa naʻá ke fakaʻilongaʻí mo ʻeni. Naʻá ke meimei maʻu kotoa ia, pe naʻe hala ha ngaahi meʻa ʻe niʻihi? Kapau naʻe hala ha ngaahi meʻa ʻe niʻihi, toutou akoako ia pea ʻe fakaʻau ke ke toe lelei ange.

fakamatala ngāue naʻe fakaʻilongaʻí

ʻEkitivitií _{(miniti ʻe 5)}

Vakai ki he fakamatala ngāue naʻá ke haʻu mo iá, pe fakakaukau ki he ngāue ʻokú ke fie maʻú. Fakaʻaongaʻi ha miniti ʻe nima ke fai e meʻa tatau naʻá ke fai ʻi he fakamatala ngāue ʻa Siuá.

Sitepu 1: Kumi e ngaahi fiemaʻu ʻa e pule ngāué ʻaki hono laineʻi pe fakaʻilongaʻi e ngaahi taukei ngāue pe tuʻunga fakaako mo fakangāue mahuʻingá.

Sitepu 2: Toe vakaiʻi ia mo ho hoa ngāué, pea fakamahinoʻi e meʻa ʻokú ke pehē ko e ngaahi fiemaʻu ia ʻa e pule ngāué.

Tokoni:Ko e kautaha mo e fakamatala ngāue naʻá ke maʻú ko ha ongo maʻuʻanga tokoni fakatouʻosi ia.

2. Fakahoa Hoʻo Ngaahi Taukei Ngāué

Lau:ʻI hoʻo ʻilo pē e ngaahi fiemaʻu ʻa e pule ngāué, ko e meʻa hokó leva ke ke fakapapauʻi pe ʻoku tatau mo hoʻo ngaahi taukeí mo e pōtoʻi ngāué. ʻOku faingofua pē ʻeni ʻo hangē ko hoʻo fehuʻi hifo, “ʻOku ou maʻu nai e taukei ko iá?” pe “Ko e hā ha aʻusia ʻoku ou maʻu ʻi heʻeku fakahoko iá?” Ko e lahi ange e ngaahi sīpinga pe lavameʻa ʻokú ke lava ʻo fakakaukau ki aí, ko ʻene saí ange ia.

Kumi Ngāue ʻa Siuá

Lau:Ko e founga ʻeni naʻe kamata ai hono fakahoa ʻe Siua ʻene ngaahi taukeí ki he ngaahi fiemaʻu ʻa e pule ngāué. Naʻá ne fakaʻilongaʻi e sētesi ko ʻení ʻi he fakamatala ngāué:

• Fakaleleiʻi e ngaahi palopalema fakatekinikale ʻa e kau kasitomaá fakahangatonu pē ʻi he telefoní.

Naʻá ne pehē loto pē, “ʻOku ou sai ʻaupito au ai. ʻI heʻeku ngāueʻanga fakamuimuí, naʻe ʻi ai ha polokalama naʻe fie maʻu ke fakaleleiʻi, pea naʻe liunga ua e lahi ʻo e meʻa ne u lava ʻo ʻosikí he kau ngāue fakatekinikale kehé.” Naʻá ne toe vakai foki ki ha ngaahi taukei mahuʻinga mo ha ngaahi fiemaʻu angamaheni ʻokú ne lavaʻi. Naʻá ne siakaleʻi kotoa e ngaahi taukei pe pōtoʻi ngāue naʻá ne pehē ʻokú ne lavaʻí. Naʻá ne hiki hifo foki mo ha kiʻi fakamatala fekauʻaki mo ʻene aʻusia mo e ngaahi pōtoʻi ngāue ʻoku felāveʻi mo iá.

ʻEkitivitií _{(miniti ʻe 5)}

Ko e fakamatala ngāué ʻeni hili hono fakahoa ki ai ʻe Siua ʻene ngaahi taukeí mo e ngaahi fakamatala kehé.

Sitepu 1: ʻI ha miniti ʻe taha pe siʻi ange ai, vakaiʻi fakataautaha e founga naʻe fakaʻilongaʻi ai ʻe Siua ʻene fakamatala ngāué.

Sitepu 2: Aleaʻi fakakulupu e meʻa naʻá ke saiʻia ai fekauʻaki mo e founga naʻe fakahoa ai ʻe Siua ʻene ngaahi taukeí ki he ngaahi fiemaʻu ʻa e pule ngāué.

job description with circled terms

Lau:Manatuʻi ko e lahi taha ʻo e ngaahi fakamatala ngāué, ko ha ngaahi meʻa ia ʻoku fakaʻamu ki ai e pule ngāué. ʻOku sai pē ia kapau ʻoku ʻikai ke ke maʻu e taukei pe tuʻunga aʻusia kotoa pē ʻi he lisí. ʻOua naʻá ke loi pe faʻufaʻu ha ngaahi meʻa ke ke maʻu ai ha ʻinitaviu pe ngāue. Kapau ʻokú ke vakai hifo ki ha fakamatala ngāue peá ke pehē ʻoku aʻu ʻo pēseti ʻe 50 ʻa e ngaahi meʻa ʻokú ke lavaʻí ʻi he ngaahi fiemaʻu ʻa e pule ngāué, pea ʻoku totonu ke ke kole ngāue ki ai. Kapau ʻoku aʻu ʻo pēseti ʻe 75 ʻa e meʻa ʻokú ke lavaʻí, mahalo ʻokú ke kau koe he niʻihi ʻoku māʻolunga honau faingamālié.

ʻEkitivitií _{(miniti ʻe 5)}

Sio ki hoʻo fakamatala ngāué, pe fakakaukau ki he ngāue ʻokú ke fie maʻú. Fakaʻaongaʻi ha miniti ʻe 5 ke fai e meʻa naʻe fakahoko ʻe Siuá ʻaki hono siakaleʻi e ngaahi taukei ʻokú ke maʻú mo hiki hifo ha kiʻi fakamatala ʻe ala tokoni. Ngāue fakataha leva mo ho hoa ngāué, peá ke vahevahe mo ia.

Aleaʻi:ʻE tokoni fēfē hono fakahoa peheni ʻo e ngaahi taukeí ki hoʻo kumi ngāué?

Fakaʻosí

Mamataʻi:“The 16th Time Is the Charm [Ola Lelei ʻi Hono Tuʻo 16],” maʻu ʻi he srs.lds.org/videos. (ʻIkai ha vitiō? Lau ʻa e peesi 54.)

video icon

Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ʻení?

Lau:ʻI hono fakahoa hoʻo ngaahi taukeí ki he ngaahi fiemaʻu ʻa e pule ngāué, ko e ngāue fakapotopotó ia.

Ngāue ʻi he Tui + Ngāue Mālohi + Ngāue Fakapotopoto = Lavameʻa

Fakahoa hoʻo ngaahi taukeí kimuʻa peá ke tohi kole ngāue ki ha lakanga, faʻu ha tohi aʻusia fakaako mo fakangāue, pe ʻalu ki ha ʻinitaviu. Kapau te ke fai ia, te ke aʻusia ha lavameʻa lahi ange ʻi hoʻo kumi ngāué.