Unsaon Nako sa Pagpangandam alang sa usa ka Panag-istoryahanay sa Grupo?

Ang panag-istoryahanay sa grupo mahinungdanon sa kasinatian sa EnglishConnect. Diha sa panag-istoryahanay sa grupo, ang mga tigkat-on adunay oportunidad sa pagpraktis og makahuloganon nga mga panag-istoryahanay. Sa ilang panagkita, ang mga tigkat-on makabaton og pagsalig, makakat-on gikan sa Espiritu, ug makasuporta sa usag usa.

Ang pag-istorya og Iningles makatabang sa mga tigkat-on nga mouswag ug usa kini ka importante nga paagi sa pagtinguha sa gasa sa mga pinulongan. Makadumala ka og panag-istoryahanay sa grupo gamit ang yano nga Iningles. Kon gikinahanglan, ang mga tigkat-on mahimong motan-aw sa mga hubad diha sa mga manwal sa EnglishConnect sa tigkat-on sa ilang lumad nga pinulongan. Ang hubad gihatag alang sa mga tumong, mga baroganan sa pagkat-on, bokabularyo, ug mga instruksiyon.

Sa dili pa ang imong panag-istoryahanay sa grupo magkita, rebyoha ang matag seksiyon diha sa mga manwal sa tigkat-on sa EnglishConnect. Sa ubos mao ang pipila ka lakang aron matabangan ka sa pagpangandam:

1. Mag-ampo ug magtinguha sa tabang sa Dios.

2. Maghunahuna kon unsaon nimo sa pagpasiugda og hugot nga pagtuo, pakigdait, ug paglambo diha sa grupo.

   1. Unsaon nako sa pagdapit sa Epiritu?

   2. Unsaon nako sa pagtabang sa mga tigkat-on nga magtinguha ug moila sa tabang sa Ginoo?

   3. Unsaon nako sa pagtabang sa mga tigkat-on sa paghigugma ug pagsuporta sa usag usa?

   4. Unsaon nako pagtabang sa mga tigkat-on sa pag-istorya og Iningles ug molambo?

3. Magtuon sa baroganan sa pagkat-on.

   1. Sa unsang paagi nga ako nakasinati niini nga baroganan?

   2. Unsaon nako sa pagtabang sa mga tigkat-on sa paggamit niini nga baroganan?

   3. Unsaon nako sa paggamit sa baroganan diha sa akong pagtudlo?

4. Magrebyo sa bokabularyo ug mga sundanan.

   1. Masaligon ba ko sa paggamit sa bokabularyo ug mga sumbanan diha sa panag-istoryahanay?

5. Mobasa sa mga kalihokan 1–3.

   1. Unsaon nako sa pagpakita ang matag kalihokan?

   2. Unsaon nako sa pagpares-pares sa mga tigkat-on alang sa pagpraktis?

   3. Unsaon nako sa pagsuporta sa mga tigkat-on samtang nagpraktis sila?

6. Morebyo sa seksiyon sa “Pag-ebalwar”.

   1. Unsaon nako sa pagtabang sa mga tigkat-on nga mobati nga malamposon?

   2. Unsaon nako sa pagtabang sa mga tigkat-on sa paggamit sa “Tracker sa Personal nga Pagtuon” diha sa manwal sa tigkat-on?

7. Morebyo sa seksiyon sa “Molihok inubanan sa Hugot nga Pagtuo sa Pagpraktis og Iningles Kada Adlaw”.

   1. Unsaon nako sa pag-awhag sa mga tigkat-on sa pagbuhat sa seksiyon sa “Personal nga Pagtuon” sa dili pa magkita ang grupo ug magpraktis og Iningles kada adlaw?

   2. Unsaon nako sa pag-awhag sa mga tigkat-on nga mosalig sa Ginoo?

Rebyoha ang seksiyon sa “Mga Kapanguhaan sa Grupo” dinhi niini nga manwal. (Kini nga mga kapanguhaan gilakip usab diha sa mga manwal sa EnglishConnect sa tigkat-on.) Planoha kon unsaon nimo sa paggamit kini nga mga kapanguhaan. Ang seksiyon nga “Mga Hugpong sa mga Pulong sa Panag-istoryahanay sa Grupo” naglakip sa yano nga mga hugpong sa mga pulong nga makatabang sa grupo sa pagpakighinabi gamit ang Iningles. Ang “Pag-ampo gamit ang Iningles” naglakip sa yano nga mga sundanan aron matabangan ang mga tigkat-on sa pag-ampo gamit ang Iningles. Mahimo nimong dapiton ang mga partisipante sa pagrebyo niini nga seksiyon sa pagpangandam sa paghatag sa pangbukas ug panapos nga mga pag-ampo.

Ang dugang nga mga kapanguhaan ug mga ehemplo sa pagtudlo makita diha sa Gospel Library ug diha sa englishconnect.org/teacher.

Mga Higala sa Lain nga mga Tinuohan

Ang pagtutok sa nakabase sa hugot nga pagtuo nga pagkat-on mao ang usa sa mga butang nga nakapahimong talagsaon sa EnglishConnect. Mahimo nimong paapilon ang mga tawo gikan sa lainlaing mga tinuohan pinaagi sa pagtabang nila sa pagpamalandong kon unsaon nga ang baroganan sa pagkat-on magamit nila. Mahimo nimong gamiton ang “Glossary sa mga Baroganan sa Pagkat-on” diha sa mga manwal sa EnglishConnect sa tigkat-on aron matabangan sila nga makasabot sa mga termino sa ebanghelyo. Ingon nga gigiyahan sa Espiritu, ikonsiderar ang pagdapit nila sa pagpakigbahin sa unsay ilang nakat-onan samtang naghisgot ka sa baroganan sa pagkat-on. Kanunay nga mopakita og pagtahod sa mga gituohan sa uban samtang bukas nga mopakigbahin sa imong hugot nga pagtuo nga ang Dios makatabang nila sa pagkat-on og Iningles.

Mahimo nimong makita ang dugang nga mga ideya diha sa pasiuna sa manwal sa Isangyaw ang Akong Ebanghelyo; tan-awa ang seksiyon sa “Paggamit sa Isangyaw ang Akong Ebanghelyo sa mga Miyembro sa Simbahan.”

Pagtrabaho uban sa Kabatan-onan

Ang EnglishConnect makapanalangin sa mga kinabuhi sa kabatan-onan. Ang mga stake, mga ward, ug mga misyon makaorganisar og mga grupo nga alang lamang sa kabatan-onan. Kon ang mga grupo sa kabatan-onan ug mga hingkod gisagol, ikonsiderar ang paggrupo sa kabatan-onan alang sa mga kalihokan sa pagpraktis.

Hinumdomi ang pagsunod sa mga palisiya sa Simbahan sa pagpanalipod sa kabatan-onan. Ang mga menor de edad (nag-edad og 18 o mas ubos pa ug nagpuyo sa panimalay) kinahanglan adunay gipirmahan nga porma sa pagtugot sa ginikanan sa dili pa motambong sa grupo. Ang mga porma anaa sa daghang pinulongan sa online diha sa englishconnect.org/resources/leader. Dugang pa, ang mga kurso sa EnglishConnect kinahanglang mosunod sa palisiya sa Simbahan nga labing menos duha ka responsable nga mga hingkod anaa kanunay atol sa mga miting sa grupo. Kinahanglan nimong sundon kini nga mga palisiya bisan kon ang grupo virtual nga magmiting.