Mga Kanunayng Ipangutana

Sa ubos mao ang pipila ka komon nga mga pangutana mahitungod sa EnglishConnect. Ang dugang nga mga kanunayng ipangutana alang sa mga tigkat-on, mga magtutudlo, ug mga lider makita diha sa englishconnect.org/help.

Kinahanglan ba nga ako adunay kasinatian sa pagtudlo aron mahimong magtutudlo sa EnglishConnect?

Unsay akong itudlo sa mga tigkat-on kon ako dili kahibalo sa ilang pinulongan?

Mahimo ba kami nga mag-istoryahanay gamit ang among lumad nga pinulongan atol sa panag-istoryahanay sa grupo?

Unsaon nako sa pagtudlo sa grupo nga adunay daghang pinulongan?

Unsaon nako sa pagtabang sa mga tigkat-on sa pagpraktis og Iningles kada adlaw?

Unsaon nako sa pag-organisar og grupo sa EnglishConnect?

Unsa kadugay ang miting sa grupo sa EnglishConnect?

Kapila kinahanglan magmiting ang akong grupo?

Makatudlo ba ko og sobra sa usa ka leksiyon sa usa ka miting sa grupo?

Unsaon nako sa pagkahibalo kon asa nga lebel sa EnglishConnect ang tigkat-on kinahanglang paapilon?

Unsa ang EnglishConnect 3?

Unsaon nako sa pagtabang ang tigkat-on nga moapil sa grupo nga nagsugod na?

Unsay mahitabo kon ang tigkat-on nakasal-ang sa pagtambong sa miting sa grupo o mihunong sa pagtambong?

Unsaon nako sa pagsuporta sa mga tigkat-on nga mas hinay nga makat-on kaysa uban sa grupo?

Unsaon nako sa pagsuporta sa mga tigkat-on nga mas paspas ang pagkat-on?

Unsaon nako sa pagsuporta sa mga tigkat-on nga adunay lahi nga mga abilidad sa pag-istorya og Iningles?

Unsay akong buhaton kon ang tigkat-on mangutana mahitungod sa grammar?

Kinahanglan ba nakong korehian ang paglitok?

Unsaon nako sa pagrehistro ug sa pagdumala ang akong grupo sa EnglishConnect?

Sa unsang paagi nga ang mga tigkat-on makadawat og mga sertipiko sa EnglishConnect?

Kinahanglan ba nga ako adunay kasinatian sa pagtudlo aron mahimong magtutudlo sa EnglishConnect?

Dili kinahanglan nga ikaw adunay kasinatian sa pagtudlo aron mahimong magtutudlo sa EnglishConnect. Tingali wala pa gayod ka makatudlo og Iningles kaniadto ug mibati og kawalay kaseguroan kon unsaon pagsugod. Okey ra na. Ang mga leksiyon sa EnglishConnect mainampingon ug mahunahunaon nga gidesinyo gamit ang mga baroganan sa pagtudlo sa pinulongan ug espirituhanong mga baroganan aron matabangan ka nga magmalamposon. Wala kinahanglana nga eksperto ka. Wala kinahanglana nga nahibalo ka sa tubag sa matag pangutana. Ang imong tahas mao ang pagdumala sa pagpalambo sa pinulongan pinaagi sa paghatag og mga oportunidad alang sa pagpraktis. Wala kinahanglana nga motudlo ka og grammar o makasabot sa tanang butang mahitungod sa Iningles. Kondili, motutok sa pagmugna og usa ka kahimtang diin ang mga tigkat-on mobati nga komportable sa pag-istorya og Iningles ug sa pagkat-on gikan sa ilang mga sayop.

Unsay akong itudlo sa mga tigkat-on kon ako dili kahibalo sa ilang pinulongan?

Ang pagtudlo og Iningles nga naggamit lang og Iningles mao ang komon kaayo sa tibuok kalibotan. Gani, usa kini ka panalangin tungod kay makadugang kini sa gidaghanon sa Iningles nga nadungog ug gigamit sa mga tigkat-on. Hinumdomi nga mosulti og yano nga Iningles. Paggamit og mga biswal, mga sinyas sa kamot, ug lihok sa mga lawas aron matabangan ang mga tigkat-on nga makasabot sa bag-ong mga pulong sa bokabularyo ug mga sundanan. Mahimo ka nga mopakita og litrato, magdrowing og hulagway, o iaksiyon kini. Mahimo nimong itudlo ang mga tigkat-on ngadto sa gihubad nga mga kapanguhaan diha sa EnglishConnect 1 alang sa mga Tigkat-on o EnglishConnect 2 alang sa mga Tigkat-on, o mahimo ka nga mogamit og online nga diksiyonaryo. Kini usab motudlo sa mga tigkat-on kon unsaon sa paggamit ang anaa nga mga kapanguhaan sa pagpangita og mga tubag. Likayi ang taas nga mga pagpasabot. Kondili, ipakita lang sa mga tigkat-on unsay angay nga buhaton.

Hinumdomi nga dungan kamo nga nagkat-on. Kanunayng modapit sa mga tigkat-on nga modangop sa Ginoo alang sa suporta. Isip ilang magtutudlo, ikaw mahimong usa ka ehemplo sa hugot nga pagtuo ug paningkamot. Ang pag-istorya og Iningles ngadto sa mga tigkat-on usa ka buhat sa hugot nga pagtuo. Ang Ginoo mopanalangin nimo ug sa mga tigkat-on samtang kamo molihok inubanan sa hugot nga pagtuo sa pag-istorya og Iningles.

Mahimo ba kami nga mag-istoryahanay gamit ang among lumad nga pinulongan atol sa panag-istoryahanay sa grupo?

Labi nimong matabangan ang mga tigkat-on kon motutok ka sa pag-istorya og Iningles sa tibuok panag-istoryahanay sa grupo. Mahimo nimo kini pinaagi sa pagpakita og ehemplo. Buhata ang imong labing maayo sa pag-istorya og Iningles. Paggamit og yano nga mga pulong ug mubo nga mga kapahayag. Hinaya ang pag-istorya ug balik-balika ang mga hugpong sa mga pulong kanunay. Isulat ang importanteng mga pulong ug mga hugpong sa mga pulong diha sa pisara. Mahimo usab ka nga mogamit og biswal, magdrowing og hulagway, o iaksiyon kini. Likayi ang taas nga mga pagpasabot ug ang paghubad sa tanan nga imong isulti. Kon kinahanaglan gyod ka nga mogamit sa lumad nga pinulongan, pananghid una ug mogamit og gamay lang nga lumad nga pinulongan kutob sa mahimo ug mobalik dayon sa Iningles. Awhaga ang mga tigkat-on nga mosulti og daghang Iningles kutob sa ilang mahimo ug dili mahadlok nga masayop. Tabangi sila nga makasinati og kalamposan, ug daygon ang matag paningkamot. Kon ang mga tigkat-on nagkinahanglan og dugang nga tabang, itudlo sila ngadto sa mga manwal sa tigkat-on, diin ilang makita ang materyal diha sa ilang kaugalingong mga pinulongan. Samtang motutok ka sa pagtabang sa mga tigkat-on nga makat-on pinaagi sa pagbuhat, mamenosan ang imong panginahanglan nga mogamit sa lumad nga pinulongan.

Unsaon nako sa pagtudlo sa grupo nga adunay daghang pinulongan?

Ang pagtudlo sa grupo nga adunay daghang pinulongan usa ka talagsaong oportunidad sa pag-awhag sa pag-istorya og Iningles tungod kay ang Iningles mao ang komon nga pinulongan diha sa grupo. Isip magtutudlo, gamita ang Iningles nga bersiyon sa manwal sa tigkat-on. Tabangi ang mga tigkat-on nga mogamit sa manwal sa tigkat-on sa ilang lumad nga pinulongan, kon aduna, aron makabenepisyo sila gikan sa mga hubad. Kon mahimo, ibutang ang mga tigkat-on ngadto sa ginagmay nga mga grupo aron hisgotan ang baroganan sa pagkat-on sa ilang lumad nga mga pinulongan, apan seguroa nga walay usa nga dili paapilon. Kon adunay usa lang ka mamumulong sa piho nga pinulongan diha sa grupo, himoa nga kana nga grupo maghisgot sa baroganan sa pagkat-on sa yano nga Iningles aron ang tanan makaapil.

Unsaon nako sa pagtabang sa mga tigkat-on sa pagpraktis og Iningles kada adlaw?

Aron makakat-on og Iningles, ang mga tigkat-on kinahanglang mopalambo og kinaiya sa pagpraktis kada adlaw. Awhaga ang mga tigkat-on sa pag-establisar niini nga kinaiya pinaagi sa pagpakita og yano nga mga paagi aron ilakip ang Iningles nganha sa ilang inadlaw nga mga kalihokan (tan-awa ang seksiyon sa “Inadlaw nga Pagpraktis”). Pananglitan, ang mga tigkat-on mahimong mopili sa pagtan-aw og mga pasundayag o sa pagpaminaw og musika sa Iningles. Mahimo nimong awhagon ang mga tigkat-on sa paggamit sa lista sa mga ideya sa pagpalambo sa inadlaw nga pagtuon nga makita human sa “Personal Study Tracker” diha sa pasiuna sa manwal sa tigkat-on. Gamita kini nga lista sa pagdasig sa mga tigkat-on nga mangita og mamugnaon, makahuloganon nga mga paagi sa pagpraktis kada adlaw.

Atol sa miting sa grupo, dapita ang mga tigkat-on sa pagtuon ug sa pagpraktis og Iningles kada adlaw ug i-follow up ang ilang mga paningkamot. Mahimo nimong hangyoon ang pipila ka tigkat-on sa pagpakigbahin og piho nga mga butang nga ilang gihimo alang sa inadlaw nga pagpraktis. Mahimo nimong ikonsiderar ang paghimo og virtual space, sama sa group chat, alang sa mga tigkat-on diha sa grupo. Pakigtambag sa imong mga lider aron makakita og maayong mga paagi nga matabangan ang grupo nga adunay komunikasyon kanunay sa usag usa sulod sa semana pinaagi sa group messaging o uban pang mga paagi. Mahimo nimong suportahan ang mga tigkat-on samtang naninguha sila sa pagkab-ot sa ilang mga tumong, apan hinumdomi, sila gayod mismo ang responsable sa ilang kaugalingong pagkat-on.

Unsaon nako sa pag-organisar og grupo sa EnglishConnect?

Pakigtambag sa lokal nga lider sa Simbahan sa paghimo og mga desisyon mahitungod sa pag-organisar ug pagdumala sa mga grupo sa EnglishConnect. Kasagaran, duha ka hingkod nga mga magtutudlo ang isangon ngadto sa matag grupo. Ikonsiderar ang mga panginahanglan ug ang lokal nga kapasidad sa mga tigkat-on kon maghimo ka og mga pagpili mahitungod sa lokasyon, eskedyul, ug gipaspason.

Unsa kadugay ang miting sa grupo sa EnglishConnect?

Ang mga leksiyon sa EnglishConnect mokabat gikan sa 60 ngadto sa 90 minutos. Sunda ang gibanabana nga mga oras nga nakalista alang sa matag kalihokan. Ayaw tangtanga ang bisan unsa nga mga kalihokan; gamita lang ang labing menos nga oras nga gisugyot alang sa mas mubo nga miting sa grupo ug gamita ang mas taas nga oras nga gisugyot kon aduna pay oras.

Pahinumdom: Pakigtambag niadtong nagdumala sa programa ug ikonsiderar ang mga panginahanglan ug ang lokal nga kapasidad sa mga tigkat-on kon maghimo ka niini nga mga desisyon.

Kapila kinahanglan magmiting ang akong grupo?

Kasagaran, ang mga grupo magkita kausa sa usa ka semana. Kon ganahan, ang mga grupo mahimong mas kanunay nga magkita. Aron ang mga miting sa grupo mahimong epektibo kaayo, ang mga tigkat-on kinahanglan nga adunay igong panahon sa tunga-tunga sa mga miting aron kompletohon ang seksiyon sa “Personal Study”.

Ang EnglishConnect 1 ug 2 adunay 25 ka leksiyon ang matag usa. Kon ang mga grupo magkita og kausa sa usa ka semana, moabot kini og unom ka bulan aron makompleto ang usa ka lebel. Kon ang mga grupo magkita og kaduha sa usa ka semana, moabot kini og tulo ka bulan. Kon ganahan, mahimo nimong bahinon ang programa ngadto sa ginagmay nga mga seksiyon, o mga modyul. Pananglitan, mahimo ka nga mopili nga magsugod og grupo nga magkita sulod lamang sa tulo ka bulan kausa sa usa ka semana aron kompletohon ang mga yunit 1 hangtod sa 3. Ang paggamit niini nga pamaagi makatabang sa mga tigkat-on nga magpabiling mapasaligon.

Pahinumdom: Kon mag-eskedyul og miting sa grupo nga dili magsugod sa yunit 1, ikonsiderar ang pagsugod sa eskedyul sa leksiyon sa imong grupo sa leksiyon 1. Motabang kini sa pagpahibalo sa mga tigkat-on kon unsaon sa paggamit ang manwal. Pakigtambag niadtong nagdumala sa programa ug ikonsiderar ang mga panginahanglan ug ang lokal nga kapasidad sa mga tigkat-on kon maghimo ka niini nga mga desisyon.

Makatudlo ba ko og sobra sa usa ka leksiyon sa usa ka miting sa grupo?

Kon ganahan, ang mga grupo mahimong motuki og sobra sa usa ka leksiyon atol sa usa ka miting sa grupo. Aron ang mga miting sa grupo mahimong epektibo kaayo, ang mga tigkat-on nagkinahanglan og igong oras sa dili pa ang miting sa grupo aron kompletohon ang seksiyon sa “Personal Study” alang sa matag leksiyon.

Tan-awa sa “Kapila kinahanglan magmiting ang akong grupo?” alang sa dugang nga impormasyon bahin sa eskedyul ug gipaspason sa leksiyon.

Unsaon nako sa pagkahibalo kon asa nga lebel sa EnglishConnect ang tigkat-on kinahanglang paapilon?

Ang EnglishConnect 1 nagkinahanglan sa kabatid sa lumad nga pinulongan sa tawo ug sa abilidad sa pagbasa sa alpabeto nga Iningles ug sa sukaranan nga mga pulong sa Iningles. Ang EnglishConnect 2 alang sa mga tigkat-on nga makasulti sa sukaranan nga mga kapahayag ug makatubag sa sukaranan nga mga pangutana sa Iningles. Sa pagdesisyon kon ang usa ka tigkat-on kinahanglan ba nga paapilon sa EnglishConnect 1 o EnglishConnect 2, mahimo nimong gamiton ang oral nga interbiyo sa kabatid sa pagsulti diha sa apendiks B.

Ang EnglishConnect 3 usa ka intermediate nga kurso nga makatabang sa mga tigkat-on nga mapalambo ang akademik nga kahanas sa Iningles nga pinulongan. Aron makaapil sa EnglishConnect 3, ang mga tigkat-on kinahanglan nga moaplay ug makakuha og eskor nga makapahimong kwalipikado atol sa eksamin sa pagpahimutang. Ang mga tigkat-on mahimong moaplay diha sa englishconnect.org/join.

Unsa ang EnglishConnect 3?

Ang EnglishConnect adunay daghang lebel aron matabangan ang mga partisipante nga mouswag. Ang EnglishConnect 1 ug 2 motabang sa mga tigkat-on nga mapalambo ang sukaranan nga mga kahanas sa pinulongan nga Iningles. Ang EnglishConnect 3 usa ka intermediate nga kurso nga makatabang sa mga tigkat-on nga mapalambo ang akademik nga kahanas sa Iningles nga pinulongan. Motabang kini sa mga tigkat-on sa pagpangandam alang sa BYU–Pathway Worldwide. (Pagkat-on pa og dugang mahitungod sa BYU–Pathway Worldwide diha sa byupathway.org.)

Ang EnglishConnect 3 usa ka barato, online nga kurso nga adunay panagpundok sa panag-istoryahanay nga himoon pinaagi sa virtual o diha sa lokal nga meetinghouse. Ang EnglishConnect 3 naglakip sa online nga mga kapanguhaan sa pagkat-on nga adunay pang-indibidwal nga feedback sa pagpaminaw, pag-istorya, pagbasa ug pagsulat. Ang mga tigkat-on mahimong mag-una sa kurso sumala sa ilang kaugalingong gipaspason. Ang mga tigkat-on mahimong mobalik sa pag-eskwela sa EnglishConnect 3 bisan pila ka higayon kutob sa gusto aron makab-ot ang ilang tumong. Ang pagkompleto sa EnglishConnect 3 magtugot sa mga tigkat-on nga dili na iapil sa pagsusi ang Iningles kon moaplay sa BYU–Pathway Worldwide.

Aron maandam alang sa EnglishConnect 3, ang mga tigkat-on kinahanglan nga mokompleto sa EnglishConnect 1 ug 2—lakip na sa mga kalihokan sa workbook, labi na ang mga kalihokan sa pagbasa ug pagsulat. Awhaga ang mga tigkat-on sa EnglishConnect 2 nga moaplay sa EnglishConnect 3 diha sa englishconnect.org/join.

Ang EnglishConnect 3 gitanyag pinaagi sa BYU–Pathway Worldwide sa pakigtambayayong sa lokal nga mga lider ug sa pangserbisyo nga mga misyonaryo sa Simbahan. Ang interesado nga mga lider makigtinabangay sa mga manedyer sa welfare ug sa pagbarog pinaagi sa kinaugalingon nga paningkamot sa ilang area sa pagsangkap og EnglishConnect 3 diha sa ilang mga lokasyon.

Unsaon nako sa pagtabang ang tigkat-on nga moapil sa grupo nga nagsugod na?

Ang mga leksiyon gidesinyo aron ang bag-ong mga tigkat-on makaapil sa grupo sa EnglishConnect bisan kanus-a. Kon ang mga tigkat-on moapil human nga ang mga grupo nakasugod na, dawata sila, hatagi sila og EnglishConnect 1 alang sa mga Tigkat-on o EnglishConnect 2 alang sa mga Tigkat-on (o ipakita nila kon unsaon aron makaakses sila sa manwal diha sa Gospel Library), ug tabangi sila nga makaapil. Ikaw o ang laing tigkat-on makatabang sa bag-ong mga tigkat-on nga maapil sa grupo pinaagi sa pagpakita nila kon unsaon sa pagpangandam sa sunod nga leksiyon. Usab, ang mga tigkat-on makapili sa pagbalik sa lebel kon nagkinahnaglan pa sila og dugang nga pagpraktis.

Unsay mahitabo kon ang tigkat-on nakasal-ang sa pagtambong sa miting sa grupo o mihunong sa pagtambong?

Usahay ang mga tigkat-on adunay mga hagit nga makapalisod nga motambong sa grupo, ug kasagaran magpanagana sila sa pagbalik tungod sa kaulaw o sa kahadlok. Magtuo sila nga daghan na sila og nalaktawan ug dili na makaapas. Tabangi ug dapita ang wala motambong nga mga tigkat-on nga moapil sa sunod nga leksiyon bisan unsa pa ka daghan ang ilang nalaktawan. Motanyag og suporta ug pagdasig. Ipaneguro nila nga ang EnglishConnect gidesinyo aron ang mga tigkat-on makaapil og balik bisan kanus-a. Ang mga tigkat-on makasugod pag-usab pinaagi sa pagtambong sa grupo ug sa pagpangandam alang sa sunod nga leksiyon. Ikonsiderar ang pagdapit og usa o mas daghan pa nga mga sakop sa grupo sa pagkontak sa tigkat-on nga wala motambong ug sa pagpahayag og pagsuporta.

Pahinumdom: Ayaw ipakigbahin ang impormasyon sa pagkontak sa usa ka tawo kon walay pagtugot niya.

Unsaon nako sa pagsuporta sa mga tigkat-on nga mas hinay nga makat-on kaysa uban sa grupo?

Pipila sa mga tigkat-on nagkinahanglan og dugang nga panahon nga makasabot ug makasulti sa pinulongan. Kini nga mga tigkat-on labing makabenepisyo gikan sa pagkompleto sa seksiyon “Personal Study” sa dili pa moapil sa matag panag-istoryahanay sa grupo. Dapita sila sa pagpraktis sa bokabularyo ug sa mga sundanan sa kapahayag sa dili pa magkita ang grupo. Atol sa leksiyon, ipares-pares kini nga mga tigkat-on ngadto sa ubang mga tigkat-on nga makahatag og pagdasig ug suporta. Awhaga ang tanang tigkat-on sa paghimo og daghan kutob sa ilang mahimo ug sa pagdawat sa mga sayop isip kabahin sa proseso sa pagkat-on. Mahimo usab ka nga mopili sa pagrebyo ug sa pagbalik sa mga kalihokan. Pahinumdomi ang tanang tigkat-on nga ang pagkompleto sa seksiyon sa “Personal Study” sa dili pa moapil sa sunod nga panag-istoryahanay sa grupo mahinungdanon sa ilang pag-uswag.

Unsaon nako sa pagsuporta sa mga tigkat-on nga mas paspas ang pagkat-on?

Sa imong pag-apil uban sa mga tigkat-on, tingali imong mamatikdan nga ang uban nakasabot gayod ug dali nga nakakompleto sa mga kalihokan sa pagpraktis. Ikonsiderar ang paghagit niini nga mga tigkat-on nga palawman pa ang ilang pagkat-on pinaagi sa paglakip og dugang pa nga mga detalye o sa paghimo sa mao gihapon nga kalihokan diha sa lahi nga konteksto. Pananglitan, kon ang mga tigkat-on magpraktis sa pakighimamat sa usa ka tawo, hangyoa sila sa pagpraktis sa lahi nga mga sitwasyon sama sa pakighimamat sa bag-ong higala o bag-ong boss. Kini nga mga tigkat-on makapalig-on usab sa ilang kahibalo sa Iningles pinaagi sa pagsuporta sa mga tigkat-on nga mas hinay ang pagkat-on. Ang tanang tigkat-on makabenepisyo gikan sa pagtudlo sa kagrupo ug sa pagtabang sa uban sa pagpraktis sa bokabularyo ug sa mga sundanan sa Iningles.

Unsaon nako sa pagsuporta sa mga tigkat-on nga adunay lahi nga mga abilidad sa pag-istorya og Iningles?

Ang pagbaton og mga tigkat-on nga adunay lainlaing mga lebel sa abilidad sa pagsulti og Iningles natural lang ug usa kini ka oportunidad alang nila aron makatabang sa usag usa. Ang pagtabang sa usag usa makapasiugda og pakigdait ug paglambo. Ang tanan adunay ikatabang. Pananglitan, ang ubang mga tigkat-on makatabang sa uban nga mobati og pagsalig tungod kay andam sila nga masayop. Ipares-pares ang mga tigkat-on sa lainlaing mga paagi. Mahimo nimong ipares-pares ang mga tigkat-on ngadto sa usa ka tawo nga anaa sa susama nga lebel aron matabangan sila nga magdungan sa pagpalambo sa ilang mga abilidad. O mahimo nimong ipares-pares ang mga tigkat-on ngadto sa usa ka tawo nga anaa sa lahi nga lebel. Ang tigkat-on nga anaa sa mas ubos nga lebel makabenepisyo gikan sa feedback ug suporta. Ang tigkat-on nga anaa sa mas taas nga lebel makabenepisyo gikan sa pagtudlo sa kagrupo ug sa pagpasabot gamit ang Iningles. Hinumdomi, ang pagbaton og usa ka grupo nga adunay lainlaing mga abilidad sa pagsulti og Iningles normal ra ug mahimong usa ka talagsaong oportunidad alang sa mga tigkat-on nga makabenepisyo gikan sa pagtabang sa usag usa.

Unsay akong buhaton kon ang tigkat-on mangutana mahitungod sa grammar?

Imbes mohatag og taas mga instruksiyon bahin sa grammar o mogahin og taas nga panahon sa paghisgot mahitungod sa mga lagda, itudlo ang mga tigkat-on balik ngadto sa mga sundanan. Ang mga tigkat-on makalikay sa daghang sayop pinaagi sa pagsunod sa mga sundanan. Mas epektibo ang pagkat-on pinaagi sa pagpraktis sa pinulongan, imbes nga mag-istorya kabahin sa pinulongan. Ang bisan unsa nga mga pagpasabot kabahin sa grammar kinahanglan nga yano, mubo, ug mahimo rang iaksiyon. Kon magtudlo ka og usa ka baroganan, paghatag og ehemplo nga mga kapahayag ug dapita ang mga tigkat-on sa pagpraktis gamit ang baroganan. Ang mga tigkat-on labing makabenepisyo gikan sa pagpaminaw ug sa pagpraktis og Iningles.

Kinahanglan ba nakong korehian ang paglitok?

Ayaw paggahin og taas nga panahon sa pagkorehir sa paglitok. Pahinumdomi ang mga tigkat-on nga ang masabtan mas importante kaysa perpekto nga paglitok. Awhaga ang mga tigkat-on sa pagpraktis sa paglitok atol sa ilang personal nga pagtuon aron makapraktis sila sumala sa ilang kaugalingong gipaspason. Hinumdomi nga kon ang mga tigkat-on masobrahan sa kabalaka sa ilang paglitok, magpanagana sila sa pagpraktis sa pag-istorya. Dapita ang mga tigkat-on sa paggamit sa online nga modyul bahin sa paglitok diha sa englishconnect.org/learner/resources.

Unsaon nako sa pagrehistro ug sa pagdumala ang akong grupo sa EnglishConnect?

Gamita ang tool nga QuickReg (quickreg.englishconnect.org) sa pagrehistro ug sa pagdumala sa imong grupo sa EnglishConnect. Ang QuickReg usa ka tool sa pagrehistro sa grupo nga gipasiugdahan sa Ang Simbahan ni Jesukristo sa mga Santos sa Ulahing mga Adlaw. Mahimo nimong gamiton ang QuickReg sa:

• Paghimo og usa ka grupo: Pilia ang adlaw, oras, ug lokasyon sa imong grupo.

• Pagdumala og usa ka grupo: Tan-awa ang impormasyon sa partisipante ug i-update ang impormasyon sa grupo.

• Pagdapit sa mga tawo nga moapil: Ang imong grupo ilista sa online diha sa englishconnect.org/join. Mahimo nimong ipakigbahin ang link sa pagdapit sa mga tawo sa pagparehistro alang sa imong grupo.

• Pag-apod-apod sa mga sertipiko: Inighuman sa imong grupo, makaakses ug makaprinta ka sa mga sertipiko.

Sa unsang paagi nga ang mga tigkat-on makadawat og mga sertipiko sa EnglishConnect?

EnglishConnect 1 ug 2: Inighuman sa grupo, ang mga tigkat-on makadawat og mga sertipiko sa partisipasyon. Ang mga lider, mga espesyalista, o mga magtutudlo mahimong moapod-apod sa sertipiko. Ang ubang mga nasod tingali dili aprobahan nga mag-apod-apod sa mga sertipiko sa EnglishConnect. Palihog rebyoha ang lokal nga legal nga mga kinahanglanon sa dili pa mohatag og mga sertipiko (tan-awa sa englishconnect.org/leader/approved-locations).

Pahinumdom: Aron makaakses ug makaapod-apod sa mga sertipiko, ang imong grupo kinahanglang marehistro sa QuickReg tool diha sa quickreg.englishconnect.org. (Tan-awa sa “Unsaon nako sa pagrehistro ug sa pagdumala ang akong grupo sa EnglishConnect?” niini nga seksiyon sa FAQ.)

EnglishConnect 3: Ang mga tigkat-on makakuha og sertipiko sa pagkompleto kon sila nakakompleto sa gikinahanglan nga mga lebel sa kurso. Ang pagkompleto sa EnglishConnect 3 magtugot sa mga tigkat-on nga dili na iapil sa pagsusi ang Iningles kon moaplay sa BYU–Pathway Worldwide.