Akong Pundasyon: Pagpuyo og Balanse nga Kinabuhi—Labing Dugay nga Oras: 20 Minutos

Palandonga:

Unsaon ko pagpadayon ang inadlaw nga mga panginahanglan sa kinabuhi nga balanse?

Tan-awa:

“Of Regrets and Resolutions,” anaa sa https://churchofjesuschrist.org/study/video/self-reliance-videos [1:25]. (Walay bidyo? Basaha ang transcript sa “Of Regrets and Resolutions.”)

Of Regrets and Resolutions

Kon kamo dili makatan-aw sa bidyo, basaha kini nga script.

Presidente Dieter F. Uchtdorf

Presidente Dieter F. Uchtdorf

Dili ba kini tinuod nga kita kanunay busy? Ug, makaguol man, atong gikonsiderar ang pagkanagkapuliki isip usa ka halangdong buluhaton, ingon og ang pagkanagkapuliki, sa kaugalingon niini, usa ka kalamposan o timaan sa superyor nga kinabuhi.

Dili ba?

Naghunahuna ko sa atong Ginoo ug Ehemplo, si Jesukristo, ug sa Iyang mubo nga panahon uban sa mga tawo sa Galilea ug Jerusalem. Naghunahuna ako Kaniya nga nagdali-dali sa mga miting o nagbuhat og daghan sa samang higayon aron mahuman ang gikinahanglang mga butang.

Wala ako makakita niini.

Hinoon akong nakita ang manggiloy-on ug maamumahong Anak sa Dios nga nagpakabuhi nga may katuyoan. Kon Siya makig-istorya niadtong nagpalibot Kaniya, sila mibati nga importante ug gihigugma. Siya nasayod sa mahangturong bili sa mga tawo nga Iyang nahimamat. Siya mipanalangin kanila, mialagad kanila. Siya mibayaw kanila, miayo kanila. Siya mihatag kanila sa bililhong gasa nga mao ang Iyang panahon.

(“Mga Pagmahay ug Resolusyon,” Liahona, Nob. 2012, 22)

Hisgoti:

Unsa ang atong makat-onan gikan sa kinabuhi sa Manluluwas sa pagtabang kanato sa pagkab-ot og balanse nga kinabuhi?

Basaha:

Ang mosunod nga mga tudling sa kasulatan ug mga pamahayag sa mga lider sa Simbahan:

“Tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog” (Mosiah 4:27).

“Ayaw kahadlok; kay ania ako uban kanimo: ayaw pagtalaw; kay ako mao ang imong Dios; palig-onon ko ikaw; oo, buligan ko ikaw” (Isaias 41:10).

“Buhata lamang ang kutob sa imong mahimo matag adlaw. Buhata ang mahinungdanong mga butang ug, dili lang ninyo kini mabantayan nga, puno na ang inyong kinabuhi sa espirituhanong panabot nga mopamatuod kaninyo nga gihigugma kamo sa Langitnong Amahan. Kon mahibalo ang usa ka tawo niini, ang kinabuhi mapuno sa katuyoan ug kahulogan, nga mas sayon mamintenar ang pagkabalanse” (M. Russell Ballard, “Pagbalanse sa Inyong Kinabuhi,” Liahona, Sept. 2012, 50).

“Ang balanse sa dakong bahin mao ang pagkahibalo sa mga butang nga mahimong mausab, magbutang niini sa hustong panglantaw, ug pag-ila sa mga butang nga dili mausab” (James E. Faust, “The Need for Balance in Our Lives,” Ensign, Mar. 2000, 5).

Hisgoti:

Unsa nga mga butang ang mahimong mapayano o wagtangon gikan sa atong mga kinabuhi aron kita makasinati og dugang nga hingpit nga kalipay?

Kalihokan

Lakang 1: Basaha ang kutlo ni Presidente Dallin H. Oaks: “Ang gidaghanon sa maayong mga butang nga atong mahimo misobra kaayo sa panahon nga magamit sa pagbuhat niini. Pipila sa mga butang mas maayo kay sa maayo, og kini mao ang mga butang nga nagkinahanglan nga unang hatagan ug pagtagad sa atong kinabuhi” (“Maayo, Mas Maayo, Labing Maayo,” Liahona, Nob. 2007, 104).

Lakang 2: Sa inyong kaugalingon, paghunahuna mahitungod kon unsaon ninyo pagpuyo ang inyong kinabuhi sa kada semana. Karon handurawa nga kamo 25 ka tuig ang panuigon ug sa gihapon kamo nagpuyo gihapon sa samang paagi. Kompletoha ang duha ka pamahayag sa ubos mahitungod sa inyong kinabuhi:

Wala lamang ako migahin og igong panahon

Migahin ako og dakong panahon

Lakang 3: Aron malikayan ang mga pagmahay sa umaabot, pagsulat og usa o duha ka butang nga kamo makahimo sa pagdala og dugang pa nga balanse nganha sa inyong kinabuhi.

Pasalig:

Akong lihokon ang akong ideya sa pagdala pa og dugang nga balanse sa akong kinabuhi.