Pagkat-on—Labing Dugay nga Oras: 60 Minutos

1. Unsa ang Kaugtas ug Kabalaka?

Basaha:

Ang kaugtas ug kabalaka mga normal nga mga bahin sa kinabuhi. Kini nga mga pulong naghulagway og mga paagi ang utok ug lawas nagtubag ngadto sa bisan unsay gipangayo, sama sa usa ka problema sa trabaho, usa ka eksamen sa eskwelahan, o usa ka importante nga desisyon. Ang normal nga mga gidak-on sa kaugtas ug kabalaka makatabang kaninyo sa pagtutok, pagkab-ot sa inyong mga tumong, ug sa pagpanalipod sa inyong lawas. Sama pananglitan, kon kamo adunay kaugtas mahitungod sa inyong trabaho, kamo may kalagmitan nga moadto sa trabaho nga andam og nakatutok sa inyong mga buluhaton.

Ang kaugtas ug kabalaka magtabang kaninyo nga magpabiling aktibo, apan ang magpamati og kaugtas ug kabalaka nga kasagaran kaayo o tungod sa kadugay makahimo og dakong mga problema ug moresulta ngadto og sakit sa pangisip. Kon kamo nagsugakod og grabe kaayo nga kaugtas ug kabalaka, mahimong kamo kanunay nga masakit, adunay mga labad sa ulo, mobati og kasuko, adunay kusog nga mga kausaban sa inyong mga gana sa pagkaon, o magsinati og kakulang sa pagtutok.

Mahimong magsugod kamo sa pagbati nga nasanapan sa inyong trabaho, o kamo dili na gustong motrabaho tungod kay nahadlok kamo nga adunay ngil-ad nga mahitabo o nga kamo dili igo sa ka maayo. Kini mga timaan nga kamo nagpamati og kaguol o makapaluya nga mga matang sa kaugtas ug kabalaka.

Ang kaugtas ug kabalaka makaapekto sa inyong abilidad sa pagbati sa Espiritu o pagtuis sa inyong pagsabot sa espirituhanong mga pag-aghat. Si Sister Reyna I. Aburto mingon, “Kon kanunay kita nga maguol ug kon ang atong kasakit mobabag sa atong abilidad nga mobati sa gugma sa atong Langitnong Amahan ug sa Iyang Anak ug sa impluwensya sa Espiritu Santo, tingali nag-antos na kita sa depresyon, kabalaka, o lain nga emosyonal nga kondisyon” (“Sa Dag-om ug Kahayag, Ginoo, Ubani Ako!” Liahona, Nob. 2019, 57).

Kini nga kapitulo nagpunting sa pagkat-on sa pagsagubang og mas maayo sa normal nga mga matang sa kaugtas ug kabalaka. Kamo makakat-on sa pag-ila kon kamo anaa ubos sa hilabihang kaugtas o kabalaka ug makapangita og angay nga panabang.

Hisgoti:

Giunsa sa kaugtas ug kaguol pagtabang o pagpasakit kaninyo?

2. Pagsabot sa mga Lebel sa Kaugtas

Basaha:

Sama sa mga instrumento diha sa dashboard sa sakyanan nga nagpahinumdom kaninyo sa pagpahinay, pagpagasolina, o pagpa-inspeksiyon sa makina, ang mga sintoma sa kaugtas mga sinyales sa pagpahinumdom kaninyo sa paghinay, pagpuno sa inyong espirituhanong “tangke,” ug sa pagpangita og bag-ong mga solusyon. Samtang kamo maninguha sa pagdumala sa inyong kaugtas sa epektibong paagi, kini mahimong makatabang sa pagkategoriya sa kaugtas ngadto sa upat ka lainlaing mga lebel. (Tan-awa ang tsart diha sa mosunod nga kalihokan.)

KALIHOKAN (5 minutos)

Lakang 1: Sa inyong kaugalingon, basaha ang upat ka lebel sa kaugtas. May kalagmitan nga inyong masinati ang lainlaing mga lebel sa kaugtas sa lainlaing mga panahon. Mahimong bation ninyo nga kamo anaa sa lebel nga kahil karong adlawa ug sa lebel nga berde ugma. Ang mahimong mas lig-on sa emosyonal nga paagi motabang kaninyo sa pagsinati mas kanunay og berde nga lebel sa kaugtas. Markahi ang lebel nga labing maayo nga naghulagway kon unsa ang inyong gibati gyod karon.

Mga Lebel sa Kaugtas

	Kon Kamo Mibati og …	Unsa ang Buhaton
Berde	Kon Kamo Mibati og … Masaligon Sulod Andam sa pagsagubang sa mga hagit Magkasinabot sa uban Makapamati og dali sa Espiritu	Unsa ang Buhaton Kini mao ang lebel nga ang mga tawo nagtinguha nga maanaa, apan normal kini nga mag-usab-usab. Pagpadayon. Diha sa berde nga lebel, kamo nagdala sa inadlaw nga mga kaugtas sa pamilya, trabaho, pagkat-on, ug sa pag-uswag sa maayong paagi.
Dalag	Kon Kamo Mibati og … Tensiyon Nabalaka Naguol Kahuyang Malisod sa pagkonektar ngadto sa uban Nalinga gikan sa pagbati sa Espiritu	Unsa ang Buhaton Kini normal sa paggahin og pipila ka panahon diha sa dalag nga lebel. Pagmabination sa inyong kaugalingon samtang kamo nagsagubang sa mga hagit sa kinabuhi. Apil sa makalingaw nga mga kalihokan, sama sa mga gisugyot niini nga kapitulo, sa pagtabang sa pagpalambo sa inyong abilidad sa pagdumala sa kaugtas.
Kahil	Kon Kamo Mibati og … Gikapoy (sa pisikal ug sa emosyonal nga paagi) Nasanapan Nasakit (sama pananglitan, sakit sa tiyan) Daling masuko Grabeng nawad-an og kadasig Naglisod nga mobati sa Espiritu	Unsa ang Buhaton Walay ganahan nga maanaa sa kahil nga lebel sa kaugtas, apan kini dili kinahanglan nga mahimong permanente. Apil sa makalingaw nga mga kalihokan ug hinumdomi ang maayong mga kasinatian. Kon kamo magpabilin diha sa kahil nga lebel sulod sa kapin sa pila ka adlaw o gibati nga nasanapan, pangayo og panabang.
Pula	Kon Kamo Mibati og … Kanunay nga nasanapan Nabulag gikan sa uban Walay Paglaom Maglisod sa pagkaon o pagkatulog sa normal nga paagi Dili makapadayon Ingon og kamo gitalikdan sa Dios	Unsa ang Buhaton Kon kamo ania niini nga lebel, pangayo og panabang. Kon kamo makahimo, hunahunaa ang pagpahulay o pagbuhat og usa ka butang nga nagtabang kaninyo sa emosyonal nga paagi hangtod kamo makakita og usa ka propesyonal sa pag-atiman sa kahimsog.

Lakang 2 Paghunahuna sa mga panahon sa dihang ang inyong lebel sa kaugtas diha sa berde nga lebel. Unsa ang mitabang kaninyo sa pagbati niana nga paagi?

Lakang 3: Isip usa ka grupo, hisgoti ang inyong mga tubag gikan sa lakang 2.

Basaha:

Kadto kinsa nagtan-aw niini nga malisod ang pagdumala sa inadlaw-adlaw nga kinabuhi mahimong adunay problema sa kahimsog. Ang emerhensiya mahimong makaingon kanimo sa pagbalhin og kalit ngadto sa kahil o pula nga lebel sa kaugtas. Ang mga tawo kinahanglang mangita dayon og propesyonal nga panabang kon ilang gibati nga dili sila makasagubang o naggamit og makadaot nga mga droga. Kadtong kinsa adunay mga hunahuna sa pagpakamatay kinahanglang moadto sa labing duol nga hospital emergency room ug magpahibalo sa pamilya, higala, o sa ilang bishop og ubang lider sa Simbahan. Tan-awa sa suicide.ChurchofJesusChrist.org alang sa linya sa panabang ug mga kapanguhaan.

Bisan kinsa sa Amihanang Amerika makatawag sa National Suicide Prevention Line sa 1-800-273-8255.

3. Gamit og Pagkamahunahunaon sa Pagkunhod sa Kaugtas

Basaha:

Ang kaugtas ug dili-tukma nga mga sundanan sa paghunahuna makapatigbabaw ug makatuis sa inyong mga hunahuna. Ang inyong atensiyon makalatagaw, o mahimo kamong dili maminaw ug motutok sa bisan unsa gawas sa unsay nagpanghitabo libot kaninyo.

Ang pagkamahunahunaon usa ka kahanas nga motabang kaninyo nga mas malig-on sa emosyonal nga paagi. Kini ang paghatag og atensiyon sa unsay gisulti sa inyong lawas kaninyo niini nga oras ug niini nga sitwasyon. Kini makatabang sa pagpakunhod sa kaugtas ug kabalaka ug pagdugang sa inyong pagbati og kamaayo ug pagsalig. Ang pagkamahunahunaon nagtabang usab kaninyo sa paglikay og sobra nga pagsumbalik o nasanapan sa unsay nahitabo sa naglibot kaninyo.

Hisgoti:

Unsa ang nagtabang kaninyo sa pagtutok, bisan og kamo naugtas?

Palandonga:

Sa timbangan nga 1 ngadto sa 10, unsa kaugtas ang akong gibati sa karon gyod?

KALIHOKAN (5 minutos)

Pahinumdom sa Facilitator: Sama sa tanang mga kalihokan, ayaw ilisi o dugangi kini nga kalihokan. Basaha lamang ang mga paagi alang niini nga kalihokan sa kalma nga tingog ug igo ka hinay nga ang mga sakop sa grupo makasabot kaninyo.

Niini nga ehersisyo sa pagkamahunahunaon, kamo magbansay og kahilom. Kini nga kalihokan usa lamang ka ehemplo. Basahon sa facilitator ang mga lakang sa ubos samtang ang mga sakop sa klase magsunod.

Lakang 1: Lingkod sa usa ka komportable nga dapit diin ikaw makahimo sa paghilom sulod sa pipila ka minutos. (Kon buhaton kini sa panimalay, kamo makahimo sa paglingkod o paghigda.) Piyonga ang inyong mga mata.

Lakang 2: Sugdi pinaagi sa paghimo og daghan, taas, hinay nga mga ginhawa, paghanggab og maayo sa hangin pinaagi sa inyong ilong ug pagbuga og maayo sa hangin pinaagi sa inyong ba-ba. Tugoti ang inyong ginhawa sa pagkaplag sa kaugalingon niining natural nga kakusgon. Timan-i ang mga pisikal nga mga pagbati sa inyong mga baga nga modako ug mohiyos samtang kamo nagginhawa pasulod ug paggawas. Kon ang inyong mga hunahuna naglatagaw ngadto sa ubang mga butang, ayaw kaguol; kana mahitabo. Kon ikaw nalinga, timan-i lamang ang mga klase sa mga hunahuna, mga pagbati, nga nakapalinga kaninyo. Obserbahi kini nga dili mosulay sa pagpugong niini o paghukom niini, ug sa yano ibalik ang inyong atensiyon ngadto sa inyong pagginhawa. Ang inyong pagginhawa naghatag og kasigurohan ngadto diin kamo makabalik-balik pag-usab.

Lakang 3: Pagpraktis sa pagtutok sa inyong sitwasyon karon ug sa paghunahuna sa inyong pagginhawa. Sa makausa pa, kon ang inyong mga hunahuna naglatagaw, timan-i ang mga hunahuna, mga pagbati nga nagpalatagaw kaninyo ug tugoti kini sa pagpalabay kaninyo sama sa mga panganod sa langit. Ginhawa uban niini nga panglantaw sulod sa usa ka minuto.

Lakang 4: Ingon nga moabot ang pagkahuman niini nga ehersisyo, sa hinay-hinay tugoti ang inyong atensiyon sa pagpalambo, ug timan-i ang inyong lawas ug ang kwarto nga naglibot kaninyo. Kon kamo andam, bukaha ang inyong mga mata ug balik sa hingpit nga magpakabana sa inyong mga palibot. Hinumdomi nga ang pagginhawa usa ka himan nga makatabang kaninyo nga marelaks ug maanaa diha sa bisan unsa nga panahon.

Lakang 5: Sa timbangan nga 1 ngadto sa 10, isipa unsa kamo ka ugtas karon.

Hisgoti:

Ang pagkamahunahunaon ba nga ehersisyo nagtabang sa pagpakunhod sa mga matang sa inyong kaugtas?

Sugyot:

Makahimo kamo sa pagkamahunahunaon nga ehersisyo sa inyong kaugalingon bisan kanus-a nga panahon. Hunahunaa ang pagkat-on pa mahitungod sa pagkamahunahunaon ug ubang makalingaw nga mga paagi pinaagi sa paggamit sa mga tinubdan diha sa kataposan niini nga kapitulo.

4. Paggamit sa Diosnong Gahom

Tan-awa:

“Reach Up to Him in Faith,” anaa sa https://churchofjesuschrist.org/study/video/self-reliance-videos [3:54].

Basaha:

Si Presidente Dallin H. Oaks mitudlo sa abilidad ni Kristo sa paglig-on kanato dih sa bisan unsa nga sitwasyon nga kita nag-atubang: “Busa Siya nasayod sa atong mga panlimbasog, mga kasubo, atong mga pagtintal, ug sa atong mga pag-antos, kay Siya andam nga misinati niining tanan isip mahinungdanong bahin sa Iyang Pag-ula. Ug tungod niini, ang Iyang Pag-ula nakahatag Kaniya og gahom sa pagtabang kanato—sa paghatag nato sa kalig-on aron makalahutay niining tanan. …

“… Ang Pag-ula sa atong Manluluwas nakahimo og labaw pa kay sa pagpasalig kanato sa pagka-imortal pinaagi sa pagkabanhaw sa tanan ug paghatag kanato sa oportunidad aron kita malimpyohan gikan sa sala pinaagi sa paghinulsol ug bunyag. Ang Iyang Pag-ula nakahatag usab kanato sa oportunidad nga modangop Kaniya kinsa nakasinati sa tanan natong mga kahuyang sa kinabuhi aron sa pag-ayo kanato ug paghatag kanato sa kalig-on nga modala sa mga palas-anon sa mortalidad. Siya nahibalo sa atong mga kasakit, ug Siya anaa aron mosuporta kanato. Sama sa maayong Samarianhon, kon makita Niya kita nga samdan diha sa daplin sa dalan, Iyang bugkosan ang atong mga samad ug atimanon kita (tan-awa sa Lucas 10:34). Ang makaayo ug ang makapalig-ong gahom ni Jesukristo ug ang Iyang Pag-ula para sa tanan nga mangayo” (““Nalig-on pinaagi sa Pag-ula ni Jesukristo,” Liahona, Nob. 2015, 61, 64).

Hisgoti:

Unsaon nga ang kanunay nga paghinumdom sa Manluluwas makatabang kaninyo sa mas maayong pagdumala sa kaugtas ug sa kabalaka?

KALIHOKAN (10 minutos)

Lakang 1: Sa inyong kaugalingon, basaha ang mosunod nga mga paagi sa pagdumala sa kaugtas ug kabalaka. Lingini ang ideya nga mahimo ninyong sulayan.

1. Pakigsulti sa Dios. Hibaloi nga Siya nakasabot. Hunahunaa Siya nga naglingkod sikit kanimo, naminaw ug nagtanyag og suporta.

2. Palandonga. Palandonga ang mga panahon nga kamo mibati nga napanalanginan pinaagi sa Ginoo ug nakakita sa Iyang impluwensiya ug kalooy sa inyong kinabuhi. “Humilom kamo, ug ilhon ninyo nga ako mao ang Dios” (Salmo 46:10).

3. Tan-awa ang inyong mga gipaabot. Usahay ang atong labing dako nga mga kaguol ug kaugtas moabot kon ang kinabuhi wala mahitabo sa paagi nga atong gilauman o giplano. Makakat-on kita gikan sa atong maugtasong mga kasinatian. “Kining tanan nga mga butang makahatag kanimo og kasinatian, ug alang sa imong kaayohan. … Busa, padayon sa imong pamaagi” (Doktrina ug mga Pakigsaad 122:7, 9).

4. Pahulay og kadiyot. Paghimo og daghang hinay, lawom nga mga pagginhawa; huyatid; ug pahulay sa pisikal nga paagi. Kon ang inyong lawas ug hunahuna makalma og balik, makahimo kamo sa paghunahuna nga mas klaro. Paglakaw, pagkuha og pipila ka pagkaon o mainom, o lingkod lamang ug paghunahuna sulod sa pipila ka minuto.

5. Pagbantay kon kanus-a kamo maugtas. Usahay mahimong kamo dili makaamgo nga kamo naugtas. Mahimo nga magsinati kamo og kalisod sa pagkatulog, dali nga masuko, mobati og kasubo, o mubo og enerhiya. Susiha ang inyong kaugalingon sa dili mominos og kausa sa usa ka adlaw sa pagtan-aw kon naunsa ka.

6. Tutok sa pagpasalamat. Tan-awa kon unsa ang anaa sa inyong palibot. Tutoki sulod sa pipila ka minutos ang unsay matarong, maayo, ug positibo mahitungod sa inyong kaugalingon ug sa kalibotan. Pagsugod og journal sa pasalamat, ug pagsulat sa dili mominos sa lima ka piho nga mga butang nga kamo mapasalamaton alang sa matag adlaw.

7. Pag-aktibo. Kita gihatagan og usa ka lawas ug usa ka kalibotan nga malingaw. Paghimo og plano sa paggamit sa inyong lawas nga makagawas ug malingaw niini nga mga gasa. Bisan pila ka minuto nga paglakaw makatabang sa pagpasaka sa inyong buot ug pagkunhod sa kaugtas.

8. Pugngi ang paggamit sa teknolohiya. Ang paggamit sa social media, mga computer, ug mga TV, ilabi na sa sinugdanan ug kataposan sa adlaw, makadugang sa mga pagbati og kabalaka o kaugtas. Pagsulay og sugod ug pagtapos sa inyong adlaw nga walay mga telepono o mga computer. Palabya ang adlaw o semana nga walay social media o TV ug tan-awa kon unsay inyong gibati.

9. Pagmabination sa inyong kaugalingon. Pakigsulti sa inyong kaugalingon uban sa samang mabination, makahupay nga mga pulong nga inyong gamiton ngadto sa usa ka minahal. Ang mga hunahuna sa pagkawalay mahimo, walay paglaom, o grabe nga pagsilot dili gikan sa Dios ug mahimong hinungdan nga mas maugtas ug mabalaka.

10. Tabangi ang laing tawo. Itutok pag-usab ang imong enerhiya pinaagi sa pagserbisyo sa laing tawo. Ang atong kataposang tumong mao ang paghigugma sa uban sama sa gibuhat ni Kristo, bisan kon kita nanlimbasog. Mihatag si Kristo kanato og panig-ingnan niini nga gugma sa dihang Iyang gipasaylo ang Iyang mga tiglutos ug gipaniguro nga ang Iyang inahan maamumahan bisan Siya diha nag-antos sa krus. Kutob sa mahimo, kita makakuha og mas maayong panglantaw sa atong mga kinabuhi kon mohunong kita ug mohunahuna sa uban ug mangita og mga paagi sa pagtabang.

11. Sulayi ang usa ka makapalingaw nga kalihokan. Ang tanan naglingaw sa lainlaing mga paagi. Tingali kamo malingaw sa pagpintal, pagpaminaw og musika, pagbasa og libro, o pagkaanaa sa gawas. Kon kamo naugtas o nabalaka, paggahin og panahon sa paghinumdom kon unsa ang nagdala kaninyo og kalipay ug nagkalma kaninyo. Paghimo og higayon sa pagbuhat niadtong mga butanga, bisan og kamo naghunahuna nga kamo nagkapuliki.

12. Pagpabiling nakakonektar ngadto sa mga higala ug pamilya. Ang pagkaanaa uban niadtong kinsa nahigugma ug nagsuporta kaninyo makatabang sa pagpakunhod sa kaugtas. Gihimo kamo aron sa pagkonektar. Dili ikaulaw ang pagpakigbahin kon unsay inyong naagian. Tabangi ang inyong mga higala ug pamilya sa pagsabot kon unsay inyong gisinati.

13. Buhata kini og tinagsa matag higayon. Makapangutana kamo sa inyong kaugalingon, “Unsa ang labing importanting butang ako makahimo sa pagbuhat karon dayon?” Ang inyong tubag tingali mahimong sama sa “Ang tanang kinahanglan kong buhaton karon dayon mao ang paghulat sa akong bus” o “Ang gikinahanglan ko lang buhaton karon mao ang paghugas sa mga plato.” Paghukom kon unsa ang kinahanglan gayod nga buhaton karon ug unsa ang makahulat. Pagkat-on nga dili mobati og nakasala tungod sa pagsulti og “dili” ngadto sa usa ka butang nga makahulat.

14. Pagpraktis og pagkamahunahunaon. Gamita ang mga ehersisyo sa milabay nga kalihokan ug sa kataposan niini nga kapitulo sa pagpraktis nga maanaa. Pangita og mga paagi sa pagpahinumdom sa inyong kaugalingon nga mahimong mas maanaa sa tibuok adlaw.

Lakang 2: Diha sa talaan sa ubos, sa tinagsa pagsulat og pipila sa mga ideya sa pagkunhod sa kaugtas ug kabalaka nga inyong gusto nga sulayan. Paghimo og plano alang sa kanus-a ug unsaon ninyo sa paggamit ang paagi.

Paagi sa Pagkunhod sa Kaugtas ug Kabalaka	Kanus-a ug Unsaon
Paagi sa Pagkunhod sa Kaugtas ug Kabalaka Ehemplo Pahulay og kadiyot.	Kanus-a ug Unsaon Mobutang ako og pahinumdom diha sa akong telepono sa paggahin og lima ka minutos nga pahulay sa tingpaniudto ug sa dili pa mopauli sa panimalay gikan sa trabaho.
Paagi sa Pagkunhod sa Kaugtas ug Kabalaka	Kanus-a ug Unsaon
Paagi sa Pagkunhod sa Kaugtas ug Kabalaka	Kanus-a ug Unsaon
Paagi sa Pagkunhod sa Kaugtas ug Kabalaka	Kanus-a ug Unsaon

5. Ang Pagkamahingpit

Basaha:

Ang pagkamahingpit mao ang pagtuo nga kon kita dili hingpit sa tanan, kita usa ka kapakyasan ug dili igo ka maayo alang sa Dios o ni bisan kinsa pa. Hinoon, nahibalo kita nga ang Ginoo naghatag kanato og kahuyang sa pagtabang kanato nga magpabiling magpaubos ug matudloan (tan-awa sa Ether 12:27).

Kabahin sa kahingpitan, si Elder Jeffrey R. Holland mitudlo:

“Ang atong bugtong paglaom alang sa tinuod nga kahingpitan mao ang pagdawat niini isip gasa gikan sa langit—dili kini nato ‘mapaningkamotan’. Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon. …

Mga kaigsoonan, ang matag usa kanato nagtinguha og mas Kristohanon nga kinabuhi kay sa kasagaran natong makab-ot sa pagpuyo. Kon matinuoron kitang moangkon niana ug naningkamot nga molambo, dili kita mga hipokrito; kita tawhanon. … Kon kita magpadayon, nan diha sa kahangtoran ang paghashas kanato mahuman ug makompleto—nga mao ang kahulogan sa kahingpitan diha sa Bag-ong Tugon” (“Busa, Kamo Kinahanglan Magmahingpit—sa Kataposan,” Liahona, Nob. 2017, 41–42).

Basaha:

Aniay upat ka baroganan alang sa pagdugang og kalooy sa kaugalingon ug pagkunhod sa pagkamahingpit:

1. Pagmatngon sa pagkamahingpit diha sa atong mga hunahuna, pagbati, ug mga lihok.

2. Hagita kadtong mga hunahuna, mga pagbati, ug mga lihok.

3. Dawata ang atong mga sayop isip kabahin sa kinabuhi, ug ayaw kahadlok sa paghimo og mga sayop.

4. Pagpalambo og kalooy sa kaugalingon; dawata ug higugmaa ang inyong kaugalingon, lakip ang inyong mga pagkadili hingpit.

Tan-awa:

“Perfectionism: Will I Ever Be Good Enough?” anaa sa https://churchofjesuschrist.org/study/video/self-reliance-videos [3:54].

Hisgoti:

Diha sa video, giunsa ni Olivia paghimo nga mas may kalooy sa kaugalingon ug sa paghagit sa iyang pagkamahingpit?

Pagtimbang-timbang sa Grupo (10 minutos)

Kita kanunay nga nagmiting isip usa ka grupo sulod sa kataposang upat ka semana. Sa inyong kaugalingon, tubaga ang matag mosunod nga mga pangutana sa minatarong nga paagi mahitungod sa inyong kasinatian hangtod karon.

Unsay Akong Gibati Mahitungod Niini nga Kasinatian?	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 1. Ang matag sakop sa grupo nagreport sa iyang mga pasalig.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 2. Ang among grupo magsugod ug mahuman sa hustong oras.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 3. Ang tanan diha sa grupo nag-apil.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 4. Akong gibati ang Espiritu sa among mga miting sa grupo.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 5. Wala ako magpalabaw sa mga panaghisgot sa grupo.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 6. Akong gibati ang panaghiusa sa akong mga sakop sa grupo.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 7. Akong gibati nga ako nahimong mas lig-on sa emosyonal nga paagi.	Wala gayod	Usahay	Kasagaran	Kanunay
Unsay Akong Gibati Mahitungod Niini nga Kasinatian? 8. Akong gibati nga gidawat ako sa mga sakop sa grupo.	Wala gayod	Usahay	Kasagaran	Kanunay

Hisgoti:

Unsay atong mahimo aron molambo ang atong kasinatian sa grupo?

Mubo nga mga Sulat