Talateú
ʻE lava ʻe he kulupú ni ʻo fakahū au ki he akó?
ʻOku ʻikai faingofua maʻu pē ke te ako, ka ʻe tokoniʻi koe ʻe he kulupu moʻui fakafalala pē kiate kita ko ʻení ke ke ʻiloʻi ʻa e founga lelei taha te ke maʻu ai ʻa e ako ʻokú ke fie maʻu ki ha ngāue ʻoku lelei angé. Te ke tukupā ʻi he ngaahi fakataha fakakulupú, ke ke fai ha ngaahi ngāue pau, pea ʻe ʻoatu ʻe he kulupú ha ngaahi fakakaukau mo ha fakalotolahi. ʻOku ʻikai ko e taumuʻa pē ʻo e kulupú ni ke tokoni atu ke ke teuteu mo lavaʻi lelei hoʻo akó: ka ke tokoniʻi koe foki ke ke talangofua lahi ange mo tui ki he ʻEikí pea mo maʻu ʻEne ngaahi tāpuaki kuo talaʻofa ʻo e moʻui fakafalala pē kiate kita fakatuʻasino pea mo fakalaumālié.
Ko e hā ʻa e kulupu moʻui fakafalala pē kiate kita?
ʻOku kehe ʻa e kulupu moʻui fakafalala pē kiate kitá ia mei he ngaahi kalasi ʻa e Siasí, ngaahi lēsoní mo e ngaahi ako ngāué. ʻOku ʻikai ke ʻi ai ha kau faiako, kau taki, pe kau fai fakahinohino ia. ʻOku ako fakataha ʻa e kau mēmipa ʻo e kulupú pea fetokoniʻaki mo fepoupuaki. ʻOku tau ʻai ke tau fehaʻisiaʻaki ʻi heʻetau ngaahi tukupaá, pea ʻoku tau fealēleaʻaki fakataha ke fakaleleiʻi ʻa e ngaahi palopalemá.
Ko e hā ʻoku fai ʻe he kau mēmipa ʻo e kulupú?
ʻOku tukupā ʻa e kau mēmipa ʻo e kulupú ʻi he ngaahi fakataha fakakulupú ke ngāue. ʻOku ʻikai ngata pē ʻi heʻetau akó ka ke toe fai foki ʻa e ngaahi meʻa ʻokú ne ʻai ke tau moʻui fakafalala pē kiate kitautolú. ʻOku tau fai ha ngaahi tukupā, fetokoniʻaki ke tauhi ʻa e ngaahi tukupā ko iá, pea līpooti ʻetau fakalakalaká. Koeʻuhí ʻoku ngāue ʻa e kulupú hangē ha fakataha alēleá, ʻoku mahuʻinga leva ke te maʻu maʻu pē ʻa e ngaahi fakatahá ʻi he taimi totonu. ʻOmi maʻu pē ʻa e tohi ngāue ko ʻení mo e ongo kiʻi tohi Ko Hoku Fakavaʻé: Ngaahi Tefitoʻi Moʻoní, Taukeí mo e Tōʻonga Moʻuí mo e Ko Hoku Hala ki he Moʻui Fakafalala pē Kiate Kitá. Ko e fakataha fakakulupú takitaha ʻe meimei houa ʻe ua. Ko hono ngāueʻi ʻo ʻetau ngaahi tukupaá ʻe meimei houa ʻe taha pe ua ʻi he ʻaho.
Ko e hā ʻoku fai ʻe he tokotaha tokoní?
ʻOku ʻikai ko ha kau mataotao ʻi he akó pe faiakó ʻa e kau tokoní. ʻOku ʻikai te nau taki pe akoʻi ʻa e kulupú. ʻOku nau tokoniʻi pē ʻa e kulupú ke nau muimui pau ki he ngaahi fakamatalá hangē tofu pē ko honau hikí. ʻOku angamaheni ʻaki ke tokoniʻi ʻa e ngaahi fakataha fakakulupú ʻe ha mataotao he moʻui fakafalala pē kiate kitá; ka neongo ia, ʻe lava ke vahe ki he kau mēmipa ʻo e kulupú ke nau tokoniʻi ʻo ka ʻosi ha ngaahi uike, kapau ʻe fie maʻu. Koeʻuhí ke ke ʻilo lahi ange, vakai ki he Fakahinohino ʻa e Takí mo e ngaahi vitiō ʻoku ʻoatu ʻi he srs.lds.org.
Tohi Fakamoʻoni Kuo Kakató
Ko e kau mēmipa ko ia ʻo e kulupú ʻoku nau ō ki he ngaahi fakatahá mo tauhi ʻenau ngaahi tukupaá te nau feʻunga ke maʻu ha tohi fakamoʻoni he moʻui fakafalala pē kiate kitá mei he LDS Business College. Vakai ki he peesi 29 ʻi he Ko Hoku Fakavaʻé ki he ngaahi fie maʻú.