Ngaahi Pulusinga Kimuʻá
Ngaahi Maʻuʻanga Tokoní

Ngaahi Maʻuʻanga Tokoní

Ko e hā ʻa e Nō PTFT?

Fili ha taha pea fakatātaaʻi ʻa e meʻa ko ʻení.

TANGATA PALĀSILA ʻI heʻeku foki mai mei heʻeku ngāue fakafaifekaú, naʻá ku fuʻu fie ako moʻoni. Naʻá ku feinga mo feinga, mei he taʻu ki he taʻu, ka naʻe ʻikai pē ke u lava ʻo hū ki he akó. Naʻá ku fakakaukau maʻu pē ʻe maʻamaʻa hono totongi ʻo e ngaahi kalasí, ka naʻe ʻikai pē haʻane mei maʻamaʻa. Naʻe mamafa ange maʻu pē, pea fakaʻau ke faingataʻa ange, maʻu pē.

FEFINE HAITI: Ka ʻikai ke te ako, ʻoku ʻikai lava ha meʻa ia ʻi Haiti. He ʻikai lava ke ke moʻui taʻe kau ai ʻa e akó.

TANGATA ʻĀSENITINA: ʻOku ou maʻu ʻa e ngaahi fakaʻānaua tatau mo ha toe talavou pē ʻi he Siasí—ke u mali mo ngāue ʻi he Siasí. ʻOku ou fie maʻu ha ngāue lelei kae lava ʻo fakahoko lelei ʻa e ngaahi meʻá ni.

PALESITENI HINGIKELĪ: ʻI heʻetau feinga ke fakaleleiʻi ʻa e tūkunga ko ʻení, ʻoku mau fokotuʻu atu ai ha palani—ko ha palani ʻa ia ʻoku mau tui ʻoku ueʻi mai ʻe he ʻEikí. … Te mau ui ia ko e Paʻanga Tokoni Fakaako Tuʻumaʻu.

VENITELEI: ʻI heʻeku foki mai mei heʻeku ngāue fakafaifekaú, naʻe ʻikai haku faingamālie ke ako. Pea, fakafokifā! Naʻe hoko mai ʻa e Paʻanga Tokoni Fakaako Tuʻumaʻú, pea naʻá ku fuʻu fiefia ʻaupito! Naʻá ku ʻalu ki he akó, lēsisita, mo totongi ʻa e kalasí. Naʻá ku fai hoku lelei tahá pea naʻá ku lavaʻi. Ko e tokotaha ako tuʻukimuʻa taha au ʻi heʻeku kalasí! Naʻá ku hoko ko e taha ngāue leipa kimuʻa peá u toki toʻo ʻa e kalasí. Naʻe puʻi ʻiate au ha kakai kehe. Ka ʻi heʻeku ʻosiki ʻa e kalasí, naʻe fakangāueʻi au ke u puleʻi ha timi ʻo ha kakai ʻe toko 450, pea ʻoku ou maʻu he ʻahó ni ha vāhenga mātuʻaki lelei ange. ʻOku ʻikai toe fie maʻu ia ke ngāue hoku uaifí. ʻOkú ne tokangaʻi ʻema fānaú, ʻa ia ko e meʻa mahuʻinga taha ia kiate kimauá. Pea ʻoku ou lava ke ngāue ʻi he Siasí ʻi he ʻofa. ʻOku ou lava ke u ngāue fai mateaki. Kuo liliu moʻoni ʻe he meʻá ni ʻeku moʻuí mo e moʻui ʻa hoku fāmilí.

NATINI: Kuo pau ke u fai ʻa e meʻa kotoa ʻoku ou lavá ke totongi fakafoki ʻa e noó, he ʻoku ou ʻiloʻi ʻe tokoni ia ki ha niʻihi kehe ke nau kau mo ako. Kuo pau ke ke faitotonu kapau ʻokú ke kau ʻi he polokalama ko ʻení.

KĀLOSI: ʻOku pehē ʻi hoku tāpuaki fakapēteliaké te u maʻu ʻa e faingamālie ko ʻení, pea naʻe hoko ia. Ko e Paʻanga Tokoni Fakaako Tuʻumaʻú kiate kimautolu, ʻoku ʻikai ko ha meʻa fakatuʻasino pē. Ko ha kikite ia kiate kimautolu. ʻOku toputapu.

KĒVINI: Naʻá ku ongoʻi naʻe sio mai ʻa e palōfitá kiate au, naʻá ne ʻiloʻi ʻa e tuʻunga naʻá ku ʻi aí. Pea naʻá ku ongoʻi naʻá ne pehē mai, “ʻOku fie maʻu ke u tokoni atu.”

PALESITENI HINGIKELĪ: ʻOku mahino ʻa e hala ʻi muʻa ʻiate kitautolú, ʻoku lahi ʻa e fie maʻú, pea kuo tuhuʻi mai ʻe he ʻEikí ʻa e halá. ʻE hoko ia ko ha tāpuaki kiate kinautolu kotoa kuo alasi ʻenau moʻuí—ki he kau talavoú mo e kau finemuí, ki honau ngaahi fāmili he kahaʻú, ki he Siasí. ʻOku tau lotua ʻi he loto fakatōkilalo mo e loto houngaʻia ʻe faka-lakalakaimonū ʻa e ngāué ni ʻe he ʻOtuá.

Foki ki he peesi 60

Ko e hā ʻa e ngaahi fie Maʻu ke Maʻu ha Nō PTFT?

  • Kau ki ha Kulupu Ako Koeʻuhí ko ha Ngāue lelei Ange; fakakakato ʻa e laʻipepa ngāue ki he palani ʻo e nō PTFT.

  • Fili ha ngāue, ʻapiako, mo e polokalama mei he Lisi ke Fili Mei Ai ʻa e SRS; fakaʻatā makehé ke toki kole.

  • Fili ha taha fakataukei nō ke tokoni atu ki he akó, ngāué, mo e ngaahi tukupā ʻo e noó.

  • ʻAlu ki he ʻinisititiutí (kau tāutaha kei talavoú).

  • ʻOsi taʻu 18 pe motuʻa ange.

  • Ke moʻui taau mo e temipalé mo ngāue ʻi ha uiuiʻi.

  • Fakaongoongoleleiʻi ʻe ha taki lakanga fakataulaʻeiki.

Foki ki he peesi 61

ʻE founga Fēfē hano Fakaʻaongaʻi ha Nō PTFT? ʻOku Founga Fēfē hono fakahoko ʻo e Totongi Fakafokí?

ʻE lava ʻo fakaʻaongaʻi ʻa e nō PTFT ke totongi ʻaki e:

  • Akó mo e ako ngāue ʻokú ne tofa e hala ki ha ngāue pe pisinisi fakalotofonua.

  • Totongi akó, ngaahi tohí mo ha ngaahi nāunau (ʻoku totongi ʻa e totongi akó ki he ʻapiakó).

Ko e ngaahi fakahinohino ki hono totongi fakafoki ʻa e ngaahi noó ʻoku anga pehé ni:

  • ʻOku ʻi ai ʻa e lahi tuʻupau mo e ngaahi fakahinohino ki he totongi fakafokí he fonua takitaha.

  • ʻOku fua tautau ʻa e totongi fakafokí mei hono fakatahaʻi ʻo e ngaahi fakaʻaiʻai ke ngāué mo e lahi ʻo e paʻangá.

    • ʻOku hanga ʻe he ngaahi fakaʻaiʻai ke ngāué ʻo holoki ʻa e toenga noó ʻo hangē ko ʻení:

      • Holoki e lahi fakataʻu ʻo e noó ʻaki e 5% ʻi he lelei ʻa e māká he taʻu takitaha (vakai, kiʻi tohi tufa ʻo e PTFT ki he ʻuhinga lea ʻo e maaka leleí)

      • Holoki ʻaki ʻa e 10% ki hono lavaʻi ʻo e polokalama akó (ʻosi mei he akó)

      • Holoki ʻaki ʻa e peseti ʻe 10% ʻi hono lavaʻi ʻa e ngaahi taumuʻa ne palaní (ngāué mo e tuʻunga ʻo e paʻanga hū maí)

      • Totongi fakatatau atu ʻa e 25% ʻo e ngaahi totongi nō taimi totonú ko e fakaʻaiʻai.

      • Holoki ʻaki mo e 10% makehe ki he toenga noó kapau ʻoku ʻosi vave hono totongí.

    • Ngaahi totongi fakamāhina ʻo e noó lolotonga hoʻo ʻi he akó

      • ʻOku fie maʻu ke tomuʻa fakahoko ʻa e fuofua totongi fakafokí kimuʻa pea totongi ʻosi hoʻo akó

      • Kiʻi totongi fakamāhina siʻisiʻi ʻi he lolotonga hoʻo ʻi he akó, ki he ngaahi polokalama fakamole siʻisiʻi mo nounou angé

      • Lahi ange ʻa e totongi fakamāhiná he lolotonga hoʻo ʻi he akó, ki he ngaahi polokalama fakamole lahi mo lōloa angé.

    • ʻOku kamata ʻa e totongi nō fakamāhiná ʻi he hili e māhina ʻe ono ʻene ʻosi ʻa e akó pe nofo mei he akó.

      • ʻE makatuʻunga ʻa e lahi ʻo e totongi noó mei he lahi ʻo e noó mo e lōloa ʻo e polokalamá

      • ʻO kau ki ai mo ha kiʻi totongi tupu siʻisiʻi pē

      • ʻE lava ʻo ʻosi hono totongí kotoa ʻi ha taʻu ʻe tolu pe fā ʻaki e founga fakaʻaiʻai kakato ʻo e ngāué.

Foki ki he peesi 62

Tokotaha Fakataukei ki he Nō PTFT

Ko e hā ʻa e tokotaha fakataukei Nō PTFT?

Ko e tokotaha fakataukei nō PTFT ko ha tokotaha lahi ʻokú ne tokoniʻi koe ke ke ikuna ʻi he akó, ngāué, mo e totongi fakafoki ʻo e noó. ʻOku ʻikai ko ha kaungā-fakamoʻoni kole nō ʻa e tokotaha fakataukei nō PTFT pe tokotaha maluʻi pea ʻoku ʻikai haʻane kaunga fakapaʻanga ki he nō PTFT.

ʻOku founga fēfē haʻaku fili ʻeku tokotaha fakataukei nō PTFT?

Kole ki ha taha lahi falalaʻanga ke hoko ko hoʻo tokotaha fakataukei nō PTFT. Mahalo te ke fili ha taha ʻokú ne ʻilo fekauʻaki mo hoʻo ngaahi palaní, kau ai ʻa kinautolu kuó ke talanoa ki ai ʻo kau ki he ngaahi ngāué pe ʻapiakó. ʻE lava pē ko ha taha ʻoku kau ki he Siasí pe teʻeki kau ki he Siasí.

Koeʻuhí ke lava ʻo hū ki he peesi ʻa e tokotaha fakataukei nō PTFT ʻi he uepisaiti ʻa e PTFT, ʻoku fie maʻu ʻa e tokotaha fakataukei PTFT ke ʻi ai haʻane ʻakauni LDS. Te ke fie maʻu ʻa e fakamatala ko ʻení mei hoʻo tokotaha fakataukei nō PTFT ke fakakakato hoʻo tohi kole nō ʻi he ʻinitanetí:

  1. Hingoa ngāue ki he ʻAkauni LDS (fili pē) (ʻOku ʻatā ʻa e ʻAkauni LDS ki he tokotaha kotoa)

  2. Telefoní (ngāue ʻakí)

  3. Telefoní (talifakí)

  4. ʻĪmeilí

ʻE fetuʻutaki atu ʻa e fakafofonga ʻo e PTFT ki hoʻo tokotaha fakataukei nō PTFT ke ne tali ʻa e fatongia ʻo e tokotaha fakataukeí.

Ko e hā ʻe fie maʻu ʻe heʻeku tokotaha fakataukei nō PTFT ke ne ʻilo mo fakahokó?

Ko hoʻo tokotaha fakataukeí:

  • ʻOku totonu ke ne ʻiloʻi ʻoku ʻikai ke ʻi ai haʻane kaunga fakapaʻanga ki hoʻo nō PTFT.

  • Te ne fakalotolahiʻi mo faleʻi koe ʻi hoʻo fehangahangai mo e ngaahi palopalema fakaakó, fakangāué pe ʻi he totongi fakafoki hoʻo noó mo tokoni atu ke ke tauhi hoʻo tukupā ke totongi fakafoki ʻa e nō PTFT.

  • ʻOku fie maʻu ke ne tali ʻa e ngaahi fetuʻutaki telefoni atú pe fetuʻutaki fakaʻilekitulōnika mei he kau fakafofonga ʻo e PTFT mo e kau taki lakanga fakataulaʻeikí ke aleaʻi hoʻo fakalakalaká.

  • ʻOku totonu ke ne tauhi ʻo ʻikai fakahāhāholo ʻa e fakamatala ki hoʻo noó.

  • Loto pea mo tali ke lava ʻa e PTFT ʻo hū, tānaki, mo fakaʻaongaʻi e fakamatala mei he lēkooti mēmipasipi ʻo e Siasí ki he ngaahi taumuʻa fekauʻaki mo hono fatongia ko e tokataha fakataukei nō PTFT.

Foki ki he peesi 62

Palani ʻo e Nō PTFT

Ko e Palani Nō PTFT (hoko atu)

Tohi poupou ʻa e Tokotaha Tokoní

Kuo fakakakato ʻe (hingoá) ʻa e lēsoni ʻe fā ʻo e Ako Koeʻuhí ko ha Ngāue lelei Angé pea ʻokú ne mateuteu ke kole ki ha nō PTFT.

Hingoa ʻo e Tokotaha Tokoní

Fakamoʻoni hingoa ʻa e Tokotaha Tokoní

ʻAhó

Tohi Poupou ʻa e Taki Lakanga Fakataulaʻeikí

ʻOku maʻu ʻa e foomu ko ʻení ʻi he senitā ki he moʻui fakafalala pē kiate kita homou siteikí pe ʻinitanetí ʻi he srs.lds.org/pef. ʻOmi hoʻo palani ʻo e nō PTFT (peesi 73–74) ki ho ʻinitaviu ki he tohi fakaongoongolelei mo e taki lakanga fakataulaʻeikí.

ʻĪmisi
interview and endorsement form

Ngaahi Tokāteline Mahuʻinga ʻo e Moʻui Fakafalala pē Kiate Kitá Maʻá e kau Taki Lakanga Fakataulaʻeikí mo e Kau Kolé

Tui kia Sīsū Kalaisi
T&F 104:15; ʻEta 12:27

Falala ko e taumuʻa ʻa e ʻOtuá ke tokonaki maʻá e ngaahi fie maʻu fakatuʻasino ʻa ʻEne kau Māʻoniʻoní pea ʻokú Ne maʻu ʻa e mālohi kotoa pē ke fai pehē.

Talangofua
T&F 130:21; Mātiu 7:21

ʻOku fakafalala ʻa e tāpuaki ʻo e moʻui fakafalala pē kiate kitá ʻi he talangofua ki he ngaahi fono mo e ngaahi ouau ʻoku makatuʻunga ai ʻa e moʻui fakafalala pē kiate kitá.

Kuo pau Ke Ngāue ʻa e Fakafoʻituituí
2 Nīfai 19:16, 26

Ko e moʻui fakafalala pē kiate kitá ko ʻete tokoniʻi kita, ʻo ʻikai ko e totonu. Kuo pau ke ke ngāue. Kuo pau ke ke ngāue kae ʻikai fakakounaʻi.

Uouongatahá mo e Ngāué
Mosese 7:18; T&F 56:16–17

Kuo pau ke taha ʻa e masivá mo e koloaʻiá. Kuo pau ke fekoekoeʻi mo feʻofaʻaki ʻa e taha kotoa.

Foki ki he peesi 62

Ko hono fakafehokotaki mo e Kole Nō PTFT he ʻInitanetí

Kuo pau ke ke fakafonu ha kole nō ʻi he ʻinitanetí ʻi he srs.lds.org/pef ʻo ngāue ʻaki hoʻo ʻakauni LDS ka ke lava ʻo nō PTFT.

ʻE lava ke hū ʻa e kau fakataukei nō PTFT ʻoku ʻi ai ʻenau ʻakauni LDS ki heʻenau peesi fakataukei nō PTFT ʻi he uepisaiti ʻa e PTFT.

Kapau naʻá ke ngāue fakafaifekau kimuí ni mai, mahalo kuo ʻosi ʻi ai hao ʻAkauni LDS. Kapau ʻoku ʻikai, ʻe lava ke ke maʻu hao ʻAkauni LDS ʻi he ldsaccount.lds.org.

Ngaahi Fehuʻi Fakalūkufua

  1. Ko e hā ʻa e ʻAkauni LDS?

    Ko e ʻAkauni LDS ko e polokalama ia ke hū ʻaki (hingoa ngāué mo e lea fufuú) ki he ngaahi uepisaiti lahi ʻa e Siasí, kau ai ʻa e ldsjobs.org, hisitōlia fakafāmilí, tohi kole ngāue fakafaifekau ʻi he ʻinitanetí, mo e ngaahi uepisaiti ʻa e uōtí pe siteikí.

  2. ʻOku fie maʻu nai ke u hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ka u toki ngāue ʻaki ha ʻAkauni LDS ?

    ʻIkai, ʻoku ʻikai ke pehē. Neongo ʻoku maʻu ʻe he kāingalotu ʻo e Siasí ʻa e faingamālie ke hū ki ha ngaahi maʻuʻanga tokoni pau koeʻuhí ko ʻenau mēmipá (fie maʻu ki ha nō PTFT), ʻoku ʻatā ki ha taha pē ke lēsisita ha ʻakauni ko ha “kaungāmeʻa” (kau ai ʻa e kau fakataukei nō ʻoku ʻikai ke nau siasí).

  3. Ko e hā ʻa e fakamatala te u fie maʻu ke fokotuʻu ʻaki haʻaku ʻAkauni LDS?

    Kapau ʻokú ke kau ki he Siasí, ʻe fie maʻu ho fika lekooti mēmipasipí, ho ʻaho fāʻeleʻí, mo ha tuʻasila ʻīmeili ʻoku ngāue. Te ke lava ʻo ʻiloʻi ho fika lēkooti mēmipasipí ʻi hoʻo lekomeni temipalé pe hao talanoa mo hoʻomou kalake fakauōtí pe fakakoló. Kapau ʻoku ʻikai ko ha mēmipa ʻo e Siasí ʻa hoʻo tokotaha fakataukei noó, ʻe fie maʻu ke ne ʻomi hono hingoá, ʻaho fāʻeleʻí, tangata pe fefine, mo e fonuá.

    Te tau fie maʻu ʻeni ke lava ʻo hū ki he foomu kole nō PTFT ʻi he ʻinitanetí:

    1. Tefitoʻi fakamatala fekauʻaki mo kita mo hoto fāmilí

    2. Tohi fakaongoongolelei kuo fakamoʻoni hingoa ai ʻa e taki lakanga fakataulaʻeikí

    3. “Palani Nō PTFT” kuo ʻosi fakakakato

      • Fakamatala ki he tokotaha fakataukeí

      • Palani ngāué

      • Palani akó

      • Palani Fakapaʻanga ʻo e Akó

      • Tohi fakaongoongolelei ʻa e Tokotaha Tokoní

Foki ki he peesi 62

ʻOku ou Maʻu ʻa e Nima ʻe Ua ke Ngāue

Taufetongi ʻi hono lau ʻa e talanoa ko ʻeni fekauʻaki mo ʻAtuló, ko ha mēmipa ʻo e Siasí mei Pelū.

Naʻe ʻikai ke faingofua ʻa e mavahe mei he malaʻe ngāue fakafaifekaú. Naʻe lahi ʻeku ngaahi taumuʻá mo e fakaʻānauá; ka ʻi he taimi naʻá ku foki mai aí naʻe pau ke u fehangahangai mo e meʻa moʻoní. Naʻe ʻikai ke u maʻu ha pōtoʻi ngāue pea ʻikai lahi fēfē ha paʻanga hū mai. Naʻe ʻikai ke faingofua ʻa e kumi ʻo ha ngāué.

Ne faifai peá u fokotuʻu ha fakatauʻanga fuaʻiʻakau, peá u totongi ʻeku akó ʻaki ʻa e paʻanga ko iá, tokoni ʻaki ʻi ʻapi, pea mo totongi ʻeku vahehongofulú mo e ngaahi foakí.

Naʻá ku fai ia ʻo aʻu mai ki Sepitema. Lolotonga ʻeku fakatau ʻeku fuaʻiʻakaú, kuo haʻu ha loli uaine ia ʻo tuiʻi au mei mui. Naʻá ne fakangūsiaʻi au ki he ʻaá mo motuhi hoku vaʻe mataʻú. Ne motu hoku vaʻe toʻomataʻú pea kui mo hoku mata ʻe taha. Naʻe lavea foki mo hoku nima toʻomataʻú mo hoku vaʻe toʻohemá.

Naʻá ku fanongo ʻi he ʻosi kotoa iá ki he pehē ʻe he palōfitá ʻoku totonu ke fakangata ʻa e masivá, pea ʻe lava ʻa e kau ʻosi ngāue fakafaifekau naʻe ʻikai ke nau maʻu ha ngaahi maʻuʻanga tokoni fakapaʻangá ʻo ako. ʻE fokotuʻu ha Paʻanga Tokoni Fakaako Tuʻumaʻu maʻá e toʻu tupu ʻoku fakaʻamu taukakapá. ʻOku moʻoni naʻe mole hoku vaʻé mo hoku matá kae ʻikai ko e holi ke moʻui ʻaki pe kei fakaʻānauá. Naʻá ku fakakaukau ke u fakafekiki ke aʻusia ʻeku ngaahi taumuʻá.

Mālō mo e Paʻanga Tokoni Fakaako Tuʻumaʻú, kuo lava ʻeku ako pōtoʻi ngāué ʻi he taʻu ʻe tolu, pea kuó u fie maʻu ke toe hoko atu. Naʻá ku tohi kole pea naʻe tali au ʻi he ʻunivēsití.

ʻOku ou lolotonga ngāue pē kiate au, ko ha fakafofonga tesi tokoni. ʻOku ou fai ha tokoni ki he kakaí mo e tokoni fakakomipiuta ki ha ngaahi kautaha ʻi he pongipongí ʻo aʻu ki he 4:00 p.m. nai. ʻOku ou toe fakaleleiʻi foki ʻa e ngaahi komipiutá ʻi ʻapi. ʻOku ou ako ʻi he efiafí. ʻOku ou mavahe ʻi he 5:00 pea kamata ʻeku ngaahi kalasí ʻi he 6:00. ʻOku aʻu ʻa e ngaahi kalasí ki he 11:00 p.m. ʻOku ou foki tekisī ʻi he laini ʻo e 11:30 ke u aʻu ki ʻapi ʻi he vahaʻa ʻo e tuʻuapoó mo e 12:30. ʻOku ou kai, vakaiʻi ʻeku ngāue fakaakó peá u ʻalu leva ʻo mohe. ʻI he ʻaho hono hokó, ʻoku ou ʻā pongipongia ke ʻalu ki he ngāué pe kumi ngāue. ʻOku ou ngāue ai ʻo aʻu ki he 2:00 pe 3:00 p.m. peá u hangatonu leva ki he ʻunivēsití.

ʻOku ou fakafetaʻi ki he ʻOtuá ʻi he meʻa kotoa pē ʻoku ou maʻú. ʻOku ou fie totongi kiate Ia ʻi ha faʻahinga founga ʻa e meʻa kotoa kuó ne fai maʻakú. ʻOku ʻikai ke u fai ha meʻa lahi fēfē pea te u kei moʻua maʻu ai pē kiate Ia. ʻOku ou hoko ko ha tokotaha ngāue tokoni ʻi he ngaahi ʻōfisi ʻo e Siasí ki he Paʻanga Tokoni Fakaako Tuʻumaʻú.

ʻOku ou sioloto atu ki ha taʻu ʻe ua mo e konga mei heni ki haʻaku ʻosi ko ha taha ʻenisinia ki he polokalama fakakomipiutá. Pea ʻi ha taʻu ʻe nima, te u ngāue ʻi ha kautaha mahuʻinga ke tauhi hoku fāmilí pea mo hoku fāmili ʻi he kahaʻú mo e fānaú.

Ko ʻeku taumuʻá ke u mali ʻi he temipalé. Ko hono ʻuhinga ia ʻoku ou ako aí, pea ko e ʻuhinga ia ʻoku ou ngāue aí. Pea ko hono ʻuhinga ia ʻoku ou vilitaki ai ʻi he ʻaho kotoa peé.

ʻOku ou ʻilo he ʻikai ke faingofua, ka kuó u ako ʻoku ʻikai teitei tuku mai ʻe he ʻEikí kiate kitautolu ʻa e ngaahi fekaú taʻe te Ne teuteu ʻa e halá.

Kuó Ne foaki mai kiate au ʻa e moʻuí. Kuó ne foaki mai kiate au ʻa e Paʻanga Tokoni Fakaako Tuʻumaʻú. Kuó ne foaki mai kiate au ha nima ʻe ua ke u lava ʻo ngāue, ha ʻatamai ke u fakakaukau, ha ngutu ke lea, mo ha loto ke u ongoʻi pea mo laka atu ʻi heʻeku ngaahi fakaʻānauá.

ʻOku ou ʻilo ʻoku malava ʻa e meʻa kotoa pē, hangē ko e lau ʻa Paulá: “He kuo fakakakato hoku mālohí ʻi ho vaivaí.” Kuo tokoniʻi au ʻe he ʻEikí.

Ko e meʻa kotoa pē ʻoku ou maʻú—ʻa hoku fāmilí, hoku ʻapiakó, pea naʻa mo ʻeku moʻuí—ʻoku ou kōpano ia ki he ʻOtuá. ʻOku mei Hono ongo toʻukupú ʻa e meʻa kotoa pē pea ʻoku ou fakafetaʻi ai.

Foki ki he peesi 64