ធនធាននានា
រាយការណ៍ពីការរីកចម្រើនរបស់ខ្ញុំ
សូមជ្រើសរើសតួ ហើយដើរតួដូចខាងក្រោម ៖
អ្នកសម្របសម្រួល ៖ យើងនឹងរាយការណ៍អំពីការរីកចម្រើនរបស់យើងនាពេលនេះ ។ រូប៊ើត សូមអ្នកចាប់ផ្ដើមបានទេ ?
រូប៊ើត ៖ បានយល់ព្រម ។ សំណួរដំបូងគឺថា « ហេតុអ្វីបានជាខ្ញុំចង់ក្លាយជាមនុស្សកាន់តែមានភាពខ្លួនទីពឹងខ្លួន ? » មែនហើយ អ្នកស្គាល់ស្ថានភាពខ្ញុំហើយ—ការធំឡើងនៅក្នុងគ្រួសារ ដែលមានទំនួលខុសត្រូវច្រើន—ដូច្នេះខ្ញុំត្រូវការការងារល្អមួយ ។ ខ្ញុំចង់មានភាពខ្លួនទីពឹងខ្លួន ដើម្បីមើលថែគ្រួសារខ្ញុំ និង បម្រើក្នុងកាន់តែល្អប្រសើរក្នុងការហៅរបស់ខ្ញុំ ។
រូប៊ើត ៖ ចំណុចបន្ទាប់គឺ « តើខ្ញុំត្រូវការចំណូលប៉ុន្មាន » ? វាល្អសម្រាប់យើងដើម្បីមើលដំណើរការថវិកា ។ យើងត្រូវការច្រើនជាងពីរដងនៃអ្វីដែលយើងរកបានឥឡូវនេះ ។ ហើយនោះវាមិនអីទេ វានឹងដោះស្រាយបាន ។
រូប៊ើត ៖ បន្ទាប់មក « តើការងារនាពេលអនាគតប្រភេទណា ដែលនឹងផ្ដល់នូវចំណូលនោះ ? » យើងមានអារម្មណ៍ល្អអំពីការងារមួយក្នុងការបកប្រែ ។ ឥឡូវខ្ញុំនិយាយពីរភាសា ។ ហើយការងារនោះ មានម៉ោងដែលអាចបត់បែនបាន ។
មេកាឡា ៖ តើវាមាននៅក្នុងបញ្ជីការងារដែលពេញចិត្តឬទេ ?
រូប៊ើត ៖ បាទ មែនហើយ ។ វាកំពុងមានតម្រូវការខ្ពស់ ហើយវាកំពុងរីកចម្រើនលឿនទៀត ។
រូប៊ើត ៖ « តើខ្ញុំត្រូវការការបំពាក់បំប៉នអ្វីខ្លះ ? » ខ្ញុំត្រូវការកែលម្អជំនាញភាសារបស់ខ្ញុំឲ្យប្រសើរឡើង ។ ថែមលើនោះ ខ្ញុំចាំបាច់ត្រូវរៀនជំនាញបច្ចេកវិទ្យា និង ជំនាញអាជីវកម្មខ្លះៗផងដែរ ។ ខ្ញុំក៏រកឃើញថា ខ្ញុំត្រូវការការហាត់រៀនធ្វើការដើម្បីទទួលបានការងារមួយ ។
ក្វាមី ៖ អ្នករកបានសាលាមួយដែលមានអ្វីទាំងអស់នោះហើយឬនៅ ?
រូប៊ើត ៖ បាទ មែនហើយ ។ ហើយទាំងជំនាញសិក្សា និងសាលារៀន គឺស្ថិតនៅក្នុងបញ្ជីកម្មវិធី និងសាលារៀនដែលពេញចិត្ត ។ ខ្ញុំសង្ឃឹមថា នឹងរៀនជំនាញសិក្សាបកប្រែថ្នាក់ខ្ពស់នៅ លីងហ្គា ស៊ីឡឺរី ។ ពួកគេមានកន្លែងរកការងារឲ្យធ្វើដ៏ល្អ មានការហាត់រៀនធ្វើការល្អ ហើយមានទំនាក់ទំនងល្អទៀតផង ។
ចានយ៉ា ៖ តើជំនាញសិក្សានេះតម្រូវរយៈពេលប៉ុន្មាន ហើយវាថ្លៃប៉ុន្មាន ?
រូប៊ើត ៖ វាគឺជាជំនាញសិក្សារយៈពេលពីរឆ្នាំ រួមទាំងមានការហាត់រៀនធ្វើការទៀតផង ។ ខ្ញុំអាចធ្វើវាភាគច្រើននៅពេលយប់ ដូច្នេះខ្ញុំអាចបន្ដជាមួយនឹងការហៅបម្រើរបស់ខ្ញុំ ។ យើងអាចបង់ថ្លៃបានប្រហែលជាពាក់កណ្ដាល ហើយខ្ញុំនឹងត្រូវការប្រាក់កម្ចី ភី.អ៊ី.អែហ្វ ក្នុងចំនួនពាក់កណ្ដាលទៀត ។
អ្នកសម្របសម្រួល ៖ យោបល់ល្អ រូប៊ើត ។ តើអ្នកមានកង្វល់ ឬសំណួរអ្វីទេ ?
រូប៊ើត ៖ មែនហើយ ភរិយាខ្ញុំ និង ខ្ញុំបារម្ភអំពី ពេលវេលាដែលយើងឃ្លាតពីគ្រួសារជាពិសេសឃ្លាតពីបម្រើក្នុងព្រះវិហាររបស់ខ្ញុំ ។ ប៉ុន្តែយើងសុំឲ្យកូនៗ និង អ្នកគ្រប់គ្នាគាំទ្រ ។ តាមពិត រឿងនេះអាចនឹងទទួលបានចំណូលគុណនឹងបីដង ។
អ្នកសម្របសម្រួល ៖ រាយការណ៍បានល្អណាស់ ។ តើមានមតិកែលម្អ ឬ ដំបូន្មានសម្រាប់រូប៊ើតឬទេ ?
ចានយ៉ា ៖ តើមានមធ្យោបាយធ្វើដំណើរល្អដើម្បីជិះទៅសាលារៀនឬទេ ហើយតើអ្នកមានផែនការអំពីរបៀបដើម្បីបង់ថ្លៃចំណាយទាំងនោះឬទេ ?
រូប៊ើត ៖ ខ្ញុំនឹងត្រូវជិះឡានក្រុងពីរបីតំណរ ពេលធ្វើដំណើរម្ដងៗ ហើយខ្ញុំពុំបានគិតអំពីរឿងនោះទេ ។ សូមអរគុណដែលសួររឿងនោះ ។
ក្វាមី ៖ ខ្ញុំគិតថា អ្នកនឹងក្លាយជាអ្នកបកប្រែល្អម្នាក់ ។ អ្នកគិតលឿន ហើយនិយាយបានល្អ ។ តើអ្នកមានការងារបកប្រែមួយចំនួន ខណៈដែលអ្នកនៅរៀន ដើម្បីអ្នកអាចមានបទពិសោធន៍បន្ថែមឬទេ ?
រូប៊ើត ៖ នោះជាយោបល់ល្អណាស់ ។ តើមាននរណាម្នាក់នាំមុខឬទេ ?
សូមត្រឡប់ទៅទំព័រ ៨២ វិញ
ការអប់រំគឺជាគន្លឹះទៅរកឱកាស
សូមប្តូរវេនគ្នាអានសេចក្តីថ្លែងការណ៍ខាងក្រោមនេះ ។
សូមត្រឡប់ទៅទំព័រ ៨៤ វិញ
ការអប់រំក្នុងជីវិតពិត
សូមឲ្យសមាជិកក្រុមម្នាក់ អានរឿងនេះឲ្យឮៗ ខណៈដែលអ្នកផ្សេងទៀតក្នុងក្រុម មើលទៅកំណត់ចំណាំនៅទំព័រ ៨៥ ។
ហិនរី ប៊ី អាវរិង
ការផ្លាស់ប្រែចិត្តជឿមកដំណឹងល្អនៃព្រះយេស៊ូវគ្រីស្ទ នាំឲ្យមានបំណងប្រាថ្នារៀនសូត្រមួយ ។ …វាគឺជាផលពីធម្មជាតិនៃការរស់នៅតាមដំណឹងល្អនៃព្រះយេស៊ូវគ្រីស្ទ ។ …បើយើងបន្ដស្វែងរកការរៀនសូត្រ ដើម្បីបម្រើព្រះ និង កូនចៅរបស់ទ្រង់ ឲ្យកាន់តែប្រសើរ នោះវាគឺជាពរជ័យមួយដ៏មានតម្លៃមហិមា ។ …
ព្រះអម្ចាស់ និង សាសនាចក្ររបស់ទ្រង់ តែងតែលើកទឹកចិត្តចំពោះការអប់រំ ដើម្បីបង្កើនសមត្ថភាពរបស់យើង ដើម្បីបម្រើទ្រង់ និង កូនចៅ [ របស់ទ្រង់ ] ។ ចំពោះយើងម្នាក់ៗ មិនថាយើងមានទេពកោសល្យអ្វីទេ ទ្រង់មានការបម្រើសម្រាប់យើងបម្រើ ។ ហើយដើម្បីធ្វើវាបានល្អ នោះវាតែងតែជាប់ទាក់ទងនឹងការរៀនសូត្រ ពុំមែនតែម្ដង ឬ ក្នុងពេលមានកំណត់មួយនោះទេ ប៉ុន្តែវាមានជាបន្ដបន្ទាប់ ។
… តាមរយៈការអធិស្ឋាន ការតមអាហារ និង ការឧស្សាហ៍ ព្រមទាំងបំណងដើម្បីបម្រើទ្រង់ នោះយើងអាចរំពឹងថាព្រះគុណទ្រង់នឹងមានក្នុងយើង ។ …[ នេះ ] មានន័យថា យើងនឹងរៀនកាន់តែលឿន និង ពង្រីកជំនាញយ៉ាងឆាប់រហ័ស ហួសពីអ្វីដែលយើងអាចធ្វើ ប្រសិនបើធ្វើតាមរយៈលទ្ធភាពពីធម្មជាតិដែលគ្មានជំនួយរបស់យើង ។ …
អាទិភាពដំបូងរបស់យើង គួរតែជាការរៀនសូត្រខាងវិញ្ញាណ ។ …អ្នកមានចំណាប់អារម្មណ៍នៅក្នុងការអប់រំ ពុំគ្រាន់តែសម្រាប់ជីវិតរមែងស្លាប់នោះទេ តែសម្រាប់ជីវិតដ៏អស់កល្បជានិច្ច ។ នៅពេលអ្នកមើលឃើញភាពពិតនោះច្បាស់ហើយ នោះអ្នកនឹងដាក់ការរៀនសូត្រខាងវិញ្ញាណទីមួយ តែពុំទាត់ចោលការរៀនសូត្រក្រៅសាសនានោះទេ ។ តាមពិត អ្នកនឹងខំកាន់តែខ្លាំងចំពោះការរៀនសូត្រនៅក្រៅសាសនារបស់អ្នក បើអ្នកគ្មានទស្សនវិស័យខាងវិញ្ញាណនោះ ។ …
…ព្រះអម្ចាស់ជ្រាបដឹងទាំងអ្វីដែលទ្រង់នឹងត្រូវការឲ្យអ្នកធ្វើ និង អ្វីដែលអ្នកនឹងគួរតែដឹងដើម្បីធ្វើរឿងនោះ ។ អ្នកអាចរំពឹងដោយមានទំនុកចិត្តថា ទ្រង់បានត្រៀមជាស្រេចឱកាសសម្រាប់អ្នករៀនសូត្ររួចទៅហើយ ។ …
ការអប់រំរបស់យើង ពុំត្រូវឈប់ឡើង ។ …តាមជីវិតពិត គឺយើងកំពុងត្រៀមខ្លួនសម្រាប់ជីវិតអស់កល្បជានិច្ច ។ …ការផ្លាស់ប្រែចិត្តជឿរបស់យើង គឺថាព្រះជាព្រះវរបិតាសួគ៌របស់យើង ចង់ឲ្យយើងរស់នៅក្នុងជីវិតដែលទ្រង់គង់នៅ ។ អ្វីៗដែលយើងអាចរៀនក្នុងជីវិតនេះ នឹងមាននៅជាមួយនឹងយើង ក្នុងដំណើររស់ឡើងវិញដែរ ។ ហើយអ្វីៗដែលយើងអាចរៀន នឹងពង្រីកសមត្ថភាពរបស់យើងដើម្បីបម្រើ ។ …
ខ្ញុំអធិស្ឋានថា អ្នកនឹងមានអារម្មណ៍ជំពាក់គុណលោកគ្រូ ជាព្រះអង្គសង្គ្រោះរបស់យើង ព្រះយេស៊ូវគ្រីស្ទ ។ ខ្ញុំអធិស្ឋានថា អ្នកនឹងដឹងពីការបម្រើដ៏អស្ចារ្យ ដែលព្រះវរបិតាសួគ៌ជាទីស្រឡាញ់រំពឹងឲ្យអ្នកផ្ដល់ដល់កូនចៅរបស់ទ្រង់ ហើយថា អ្នកនឹងរកឃើញឱកាសរៀនសូត្រ ដែលទ្រង់បានរៀបចំសម្រាប់អ្នក ។ (“Real-Life Education,” New Era, ខែ មេសា ឆ្នាំ ២០០៩ ទំព័រ ២–៨ )
សូមត្រឡប់ទៅទំព័រ ៨៥ វិញ
ការរៀនសូត្រ និងពួកបរិសុទ្ធថ្ងៃចុងក្រោយ
សូមឲ្យសមាជិកក្រុមម្នាក់អានរឿងនេះឲ្យឭៗ ខណៈដែលអ្នកផ្សេងក្នុងក្រុម អនុវត្តការកត់ចំណាំនៅទំព័រ ៨៦ ។
ដាលីន អេក អូក និង គ្រីស្ទីន អិម អូក
ក្នុងនាមជាពួកបរិសុទ្ធថ្ងៃចុងក្រោយ យើងជឿលើការអប់រំ ។ ជំនឿខាងសាសនារបស់យើង បង្រៀនយើងថា យើងគួរស្វែងរកការរៀនសូត្រដោយព្រះវិញ្ញាណ ហើយថាយើងមានទំនួលខុសត្រូវដើម្បីប្រើចំណេះដឹងរបស់យើង សម្រាប់ជាប្រយោជន៍ដល់មនុស្សលោក ។ …ព្រះវិញ្ញាណ [ របស់ព្រះវរបិតាសួគ៌ ] អាចដឹកនាំ និង ពង្រឹងដល់កិច្ចខិតខំរៀនសូត្ររបស់យើង ហើយតម្កើងលទ្ធភាពរបស់យើងដើម្បីដាក់បញ្ចូលសេចក្ដីពិត ។ …
កិច្ចខិតខំរបស់យើង ដើម្បីរៀនសូត្រ ត្រូវតែបញ្ចូលគ្នាជាមួយនឹងភាពសក្ដិសមផ្ទាល់ខ្លួន ដើម្បីយើងអាចទទួលបានការណែនាំពីព្រះវិញ្ញាណបរិសុទ្ធ ។ …អំពើបាប បណ្ដេញព្រះវិញ្ញាណនៃព្រះអម្ចាស់ឲ្យចេញ ហើយពេលរឿងនោះកើតឡើង នោះការបំភ្លឺជាពិសេសរបស់ព្រះវិញ្ញាណនឹងចេញបាត់ទៅ ហើយចង្កៀងនៃការរៀនសូត្រនឹងភ្លឺភ្លឹបភ្លែតៗ ។ …
…យើងមានការសន្យាមួយថា បើសិនជាភ្នែករបស់យើងស្មោះស្ម័គ្រទាំងស្រុងចំពោះសិរីល្អនៃព្រះ ដែលរួមមានទាំងភាពសក្ដិសមផ្ទាល់ខ្លួន នោះ « រូបកាយអ្នកទាំងមូលនឹងបានពោរពេញទៅដោយពន្លឺ ហើយនឹងពុំមានសេចក្ដីងងឹតនៅក្នុង [ យើង ] ឡើយ ហើយរូបកាយនោះ ដែលបានពោរពេញទៅដោយពន្លឺ យល់គ្រប់ទាំងអស់ » ( គ. និង ស ៨៨:៦៧ ) ។ …
…ការប្រែចិត្ត ដែលអាចសម្អាតយើងពីអំពើបាប តាមរយៈពលិកម្មធួននៃព្រះយេស៊ូវគ្រីស្ទ គឺជាជំហានសំខាន់មួយនៅតាមផ្លូវនៃការរៀនសូត្រចំពោះមនុស្សទាំងអស់ដែលស្វែងរកពន្លឺ និង សេចក្ដីពិត តាមរយៈអំណាចនៃការបង្រៀនរបស់ព្រះវិញ្ញាណបរិសុទ្ធ ។ …
នៅក្នុងជម្រើសការអប់រំរបស់យើង យើងគួរតែត្រៀមខ្លួនដើម្បីគាំទ្រខ្លួនយើង និង អ្នកទាំងឡាយដែលអាចនឹងពឹងផ្អែកមកលើយើង ។ វាចាំបាច់ដែលយើងមានជំនាញផ្នែកទីផ្សារ ។ ការអប់រំ គឺជាកាតព្វកិច្ចចាំបាច់ ចំពោះសុវត្ថិភាព និងសុខុមាលភាពផ្ទាល់ខ្លួន ។
ព្រះវរបិតាសួគ៌របស់យើង រំពឹងឲ្យយើងប្រើសិទ្ធិជ្រើសរើសរបស់យើង និង ការបំផុសគំនិតដើម្បីពិនិត្យខ្លួនយើង និង លទ្ធភាពរបស់យើង ហើយសម្រេចចិត្តអំពីវគ្គសិក្សាអប់រំ ដែលយើងគួរតែធ្វើតាម ។ …ចូរអានពររបស់លោកអយ្យកោរបស់អ្នក សូមពិចារណាអំពីសមត្ថភាព និងទេពកោសល្យពីកំណើតរបស់អ្នក ហើយបោះជំហានទៅមុខ ។ ចូរធ្វើការបោះជំហានទីមួយ នោះទ្វារនឹងបើកឡើង ។ …ជាមួយនឹងព្រះអម្ចាស់ « គ្រប់ការទាំងអស់ផ្សំគ្នា សម្រាប់សេចក្ដីល្អ [ របស់យើង ] » (រ៉ូម ៨:២៨) ។ …
យើងអាចនឹងពិបាកដើម្បីសម្រេចគោលដៅរបស់យើង តែការពិបាករបស់យើង អាចឲ្យផលជាការរីកចម្រើនក្នុងការរៀនសូត្ររបស់យើងយ៉ាងច្រើនផងដែរ ។ ភាពរឹងមាំដែលយើងបានបង្កើតឡើងក្នុងពេលយកឈ្នះលើឧបសគ្គ នឹងនៅជាមួយនឹងយើងក្នុងភាពអស់កល្បជានិច្ចដែលនឹងមកដល់ ។ …
ដែលសំខាន់បំផុតនោះ យើងមានកាតព្វកិច្ចដើម្បីបន្ដការអប់រំខាងវិញ្ញាណរបស់យើង ដោយការសិក្សាបទគម្ពីរ និង អក្សរសាស្ត្ររបស់សាសនាចក្រ និង ដោយការចូលរួមក្នុងសាសនាចក្រ និង ព្រះវិហារបរិសុទ្ធ ។ ការទទួលទានពាក្យនៃជីវិត នឹងពង្រីកយើង បង្កើនលទ្ធភាពរបស់យើង ដើម្បីបង្រៀនដល់អស់អ្នកដែលយើងស្រឡាញ់ ហើយរៀបចំយើងសម្រាប់ជីវិតអស់កល្បជានិច្ច ។
គោលដៅចុងបំផុតនៃការអប់រំ គឺដើម្បីធ្វើឲ្យយើងក្លាយជាឪពុកម្ដាយ និង ជាអ្នកបម្រើកាន់តែល្អប្រសើរ នៅក្នុងនគរ ។ …ការអប់រំ គឺជាអំណោយមួយមកពីព្រះ វាគឺជាថ្មជ្រុងយ៉ាងឯកនៃសាសនារបស់យើង ពេលយើងប្រើវាដើម្បីជាប្រយោជន៍ដល់អ្នកដទៃ ។ ( « Learning and Latter-day Saints » Liahona, ខែ មេសា ឆ្នាំ ២០០៩ ទំព័រ ២៦–៣១ )
សូមត្រឡប់ទៅទំព័រ ៨៦ វិញ