Ang Simbahan makugihon nga nagtrabaho sa paghimo sa mga oportunidad sa edukasyon nga ma-akses sa daghan pa nga mga miyembro sa Simbahan sa tibuok kalibutan. Ang Church Educational System (CES) nagtanyag og pipila ka mga oportunidad sa edukasyon nga, sa ubang bahin sa kalibutan, mahimong mosangput sa mas maayong trabaho.
Sama sa tanang mga opsyon sa edukasyon nga inyong ikonsiderar, pagtimbang-timbang sa mainampuong paagi kon kini nga mga opsyon makatabang sa pagpauswag sa inyong mga oportunidad sa panarbaho ug mosangput ngadto sa mas maayo nga trabaho sa inyong lokasyon.
Mga Micro Course—Training sa mga Kahanas alang sa Tanan
Kon nagkinahanglan kamo og training aron makakuha og piho nga trabaho, o kon anaa kamoy trabaho ug nagkinahanglan og dugang nga training, ang mga micro course mahimong maayo kaayo nga opsyon. Ang mga micro course mahimong igrupo sa tulo ka mga kategoriya: mga kahanas sa panarbaho, mga kahanas alang sa mga tawo, ug mga kahanas sa kinabuhi. Kini nga mga kurso gituyo aron si bisan kinsa, bisan asa, nga adunay access sa internet makakat-on og bag-ong mga kahanas nga mapanginabuhian. Ang mga kurso naglangkob gikan sa 15 minutos nga instruksyon kabahin sa pagsulat og résumé, ngadto sa usa ka oras nga kurso kabahin sa pagsulat og mga tumong, ngadto sa 12 ka semana nga kurso kabahin sa computer programming nga moresulta sa usa ka sertipikasyon sa industriya.
Corporate Connect—Training sa Industriya nga adunay Garantisadong mga Interbyu alang sa Trabaho
Kon ang inyong tumong mao ang pagtrabaho sa pinakadali nga panahon sa natad nga mosangput sa maayo nga mga propesyon, ang Corporate Connect tingali ang labing maayong opsyon. Ang LDS Business College Corporate Connect Series nakigtambayayong sa mga employer sa pagtrain og mga miyembro sa Simbahan alang sa piho nga mga trabaho sa natad sa negosyo, IT, mga propesyon sa panglawas, ug mga pabrika. Kini nga mga trabaho maayo og sweldo ug adunay dakong kahigayunan sa pag-uswag ngadto sa mas taas nga mga posisyon. Ang training molungtad og duha ngadto sa tulo ka bulan nga dunay garantisadong interbyu sa trabaho alang niadtong makahuman sa programa. Sa pagkakaron, ang Corporate Connect adunay gidaghanon sa napahimutang sa trabaho nga hapit 90 porsyento.
Mga Sertipiko og Degree sa College/University—Mas Taas nga Edukasyon alang sa Mas Maayo nga Trabaho
Ang LDS nga mga institusyon alang sa mas taas nga edukasyon, lakip ang LDS Business College, BYU–Idaho, BYU–Hawaii, ug BYU, nagtanyag og lain-laing mga sertipiko ug degree, diin ang uban makab-ot diha sa internet. Kini nga mga programa naglangkob gikan sa usa ka semester nga sertipiko ngadto sa advanced ug propesyunal nga mga degree. Kadaghanan niini nga mga degree ug sertipiko gibase sa mga kahanas ug direktang nag-andam sa mga estudyante alang sa panarbaho ug propesyon.
Sa pagkakaron, kini nga mga opsyon anaa lamang sa Iningles. Alang sa dugang nga impormasyon kabahin niini, bisitaha ang churcheducation.lds.org.
Pathway/BYU–Idaho
Sa pagpakig-uban sa BYU–Idaho, ang Pathway usa ka barato nga programa sa edukasyon nga naghiusa sa online nga mga kurso ngadto sa lokal nga mga panagtigum. Ang katuyoan niini mao nga sayon nga makasulod ang mga estudyante nga gamay ra o walay kasinatian sa kolehiyo, o makasulod og balik kadtong dugay na nga nakaeskwela. Tungod kay kini usa ka online nga programa, ang kaduol sa campus wala kinahanglana. Ang mga estudyante makaangkon og kredit sa kolehiyo nga madawat sa pagbalhin ngadto sa BYU–Idaho ug pipila ka laing mga unibersidad.
Gikinahanglan usab:
Kinahanglang miyembro sa Ang Simbahan ni Jesukristo sa mga Santos sa Ulahing mga Adlaw.
Dili mominos sa 17 anyos ang panuigon nga dunay high school diploma o katugbang niini, o edad 19 anyos o pataas (aduna o walay high school diploma o katugbang niini).
Adunay regular nga akses sa computer nga dunay high-speed internet ug kapabilidad sa webcam/video chat.
Hanas sa pagsulti og Iningles (tan-awa ang dugang pa sa sunod nga pahina).
Nagpuyo nga dili kaayo layo gikan sa Pathway site; adunay daghang mga site sa tibuok kalibutan nga gitrabahoan sa mga service missionary.
Naka-enrol sa institute (niini nga rekisito alang niadtong nag-edad og 18–30 kinsa wala pa maminyo).
Ang Pathway program mokabat og usa ka tuig (o tulo ka semester) aron makompleto, diin ang mga estudyante mahimong mopadayon alang sa degree sa kolehiyo. Ang Pathway nag-abli sa mga pultahan sa oportunidad, nga naglakip sa pag-apil sa BYU–Idaho Online Degree Program, pagtambong sa BYU–Idaho isip usa ka on-campus nga estudyante, o pag-enroll sa lokal nga kolehiyo o unibersidad (ubos sa mga rekisito sa pagdawat [admission requirement] sa matag institusyon).
Ang mga estudyante nga nakakompleto sa Pathway ug gustong moeskwela sa BYU–Idaho sa campus sa Rexburg, Idaho, kinahanglang pormal nga mo-apply ug mobayad sa regular nga tuition sa campus. Kadtong gusto nga mopadayon sa online degree nga programa mokuha sa mga kurso sa samang ubos nga balayran sa Pathway tuition ug maningkamot padulong sa pipila o tanan niini nga mga opsyon:
Propesyonal nga mga sertipiko (15 ka mga kredit kada usa)
Associate’s degree (60 ka mga kredit)
Bachelor’s degree (120 ka mga kredit)
Alang sa mga estudyante nga hanas sa Iningles, ang sumbanan nga programa sa Pathway naghiusa sa online nga academic course sa BYU–Idaho uban sa institute o online nga religion course sa BYU–Idaho. Alang sa mga estudyante nga adunay kasarangan o ubos nga kahanas sa Iningles, ang “L” nga bersyon naglakip og mga academic course nga naglangkob og Iningles nga pinulongan nga instruksyon isip labing importante nga bahin sa buluhaton sa pagtuon [coursework]. Ang mga estudyante mag-abut kada semana uban sa usa ka lumad nga mamumulong sa Iningles sa tibuok programa aron mapalambo ang ilang kahanas sa Iningles. (Ang mga service missionary sa Pathway ang nagtrabaho dinhi niini nga mga center sa tibuok kalibutan.)
Pagtimbang-timbang sa Akong mga Opsyon sa Training
Mga Ipangutana
Mga tubag
Unsa man ang gidaghanon sa napahimutang og trabaho alang sa mga tawo nga nakakompleto sa programa?
Unsa ang kasagaran nga sweldo sa mga tawo nga nakakuha og trabaho?
Pila ka mga estudyante ang anaa sa programa sa miaging tuig?
Pila ka mga tawo ang mi-apply, ug pila ang gidawat?
Pila ka mga estudyante ang nangundang o wala kakompleto?
Aduna ba kamoy available nga panggabii ug katapusan sa semana nga mga klase?
Pila ang kantidad sa programa, lakip ang tuition, mga libro, bayranan, ug uban pang mga gasto?
Unsay gikinahanglan aron madawat sa programa?
Unsa kadugay aron ma-certify o maka-graduate?
Aduna bay pinansyal nga tabang nga makaabag sa pagbayad sa eskwelahan?
Unsa man ang workload sa mga klase o programa?
Unsa nga tambag ang imong ikahatag kanako aron sa pagtabang kanako nga magmalampuson sa programa?
Kinsa pa ang angay nakong kontakon aron makakuha og dugang impormasyon mahitungod sa programa?
Mahimo bang makuha ang imong contact information aron makakontak ko nimo kon dunay ubang pangutana?