« ថ្ងៃទី ២៣–២៩ ខែ មករា ។ ម៉ាថាយ ៣; ម៉ាកុស ១; លូកា ៣ ៖ ‹ ចូររៀបចំផ្លូវទទួលព្រះអម្ចាស់ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៣–២៩ ខែ មករា ។ ម៉ាថាយ ៣; ម៉ាកុស ១; លូកា ៣ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣
ចម្លាក់ជាកញ្ចក់បង្អួចនៅក្នុងព្រះវិហារបរិសុទ្ធ ណៅវូ អិលលីណោយ ដោយ ថម ហូលមែន
ថ្ងៃទី ២៣–២៩ ខែ មករា
ម៉ាថាយ ៣; ម៉ាកុស ១; លូកា ៣
« ចូររៀបចំផ្លូវទទួលព្រះអម្ចាស់ »
នៅពេលបងប្អូនអាន ហើយពិចារណាអំពី ម៉ាថាយ ៣; ម៉ាកុស ១ និង លូកា ៣ សូមកត់ត្រាចំណាប់អារម្មណ៍ដែលបងប្អូនបានទទួល ។ ការធ្វើបែបនេះនឹងយាងព្រះវិញ្ញាណ នៅពេលបងប្អូនរៀបចំខ្លួនបង្រៀន ។ បន្ថែមលើគំនិតសម្រាប់ការបង្រៀនដែលមាននៅក្នុងគម្រោងមេរៀននេះ ការសិក្សាគំនិតផ្សេងៗនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចយកមកសម្រួលដើម្បីប្រើនៅក្នុងថ្នាក់របស់បងប្អូនបាន ។
អញ្ជើញឲ្យចែកចាយ
ដើម្បីជួយសមាជិកក្នុងថ្នាក់ឲ្យចែកចាយអំពីរបៀប ដែលការរៀនសូត្រចេញពីព្រះគម្ពីរសញ្ញាថ្មីកំពុងផ្ដល់ពរជ័យដល់ជីវិតរបស់ពួកគេ បងប្អូនអាចសរសេរសំណួរដូចតទៅនេះដាក់នៅលើក្ដារខៀន ៖ តើបងប្អូនបានធ្វើអ្វីខ្លះ ដោយសារតែអ្វីដែលបងប្អូនបានអាននៅក្នុងព្រះគម្ពីរសញ្ញាថ្មីនៅសប្ដាហ៍នេះ ? សូមអញ្ជើញសមាជិកក្នុងថ្នាក់ឲ្យចែកចាយចម្លើយរបស់ពួកគេ ។
បង្រៀនគោលលទ្ធិ
ពួកសិស្សរៀបចំខ្លួនឯង និងមនុស្សដទៃទៀតឲ្យទទួលព្រះយេស៊ូវគ្រីស្ទ ។
-
តើយើងរៀបចំខ្លួនបែបណា ដើម្បីទទួលភ្ញៀវដ៏សំខាន់ម្នាក់ ? សំណួរមួយបែបនេះអាចជួយបងប្អូនឲ្យបង្កើតជាការពិភាក្សាមួយ អំពីរបៀបដែលយ៉ូហាន‑បាទីស្ទ បានរៀបចំមនុស្សឲ្យទទួលព្រះយេស៊ូវគ្រីស្ទ ។ បន្ទាប់មក បងប្អូនអាចបែងចែកសិស្សក្នុងថ្នាក់ទៅជាបីក្រុម ។ ក្រុមនីមួយៗអាចអាន ម៉ាថាយ ៣:១–៦; ម៉ាថាយ ៣:៧–១២ ឬ លូកា ៣:១០–១៥ ក៏បាន ហើយរកមើលរបៀបដែលយ៉ូហាន‑បាទីស្ទ បានរៀបចំមនុស្សឲ្យទទួលព្រះយេស៊ូវគ្រីស្ទចូលទៅក្នុងជីវិតរបស់ពួកគេ ។ សូមឲ្យក្រុមនីមួយៗប្ដូរវេនគ្នាចែកចាយ អ្វីដែលពួកគេបានរកឃើញ ។
យ៉ូហាន‑បាទីស្ទកំពុងផ្សាយក្នុងទីរហោស្ថាន ដោយ រ៉ូប៊ើត ធី បារែត
យើងចាំបាច់ត្រូវនាំមកនូវ « ផលដែលសំណំនឹងការប្រែចិត្ត » ។
-
នៅក្នុង លូកា ៣:៨ យ៉ូហាន‑បាទីស្ទបានបង្រៀនមនុស្សថា ពីមុនពួកគេអាចជ្រមុជទឹកបាន ពួកគេចាំបាច់ត្រូវបង្ហាញ « ផល » ឬភស្តុតាងនៃការប្រែចិត្តរបស់ពួកគេសិន ។ តើបងប្អូនអាចជួយសមាជិកក្នុងថ្នាក់ឲ្យស្គាល់ភស្តុតាងនៃការប្រែចិត្តរបស់ពួកគេផ្ទាល់តាមរបៀបណា ? បងប្អូនអាចនឹងសុំពួកគេឲ្យស្រាវជ្រាវនៅក្នុង លូកា ៣:៨–១៤ ហើយរកមើលអ្វីដែលយ៉ូហានបានចាត់ទុកថាជា « ផល » នៃការប្រែចិត្ត ។ ពួកគេក៏អាចរំឭកឡើងវិញក្នុង មរ៉ូណៃ ៦:១–៣ និង គោលលទ្ធិ និង សេចក្តីសញ្ញា ២០:៣៧ ផងដែរ ។ បងប្អូនអាចនឹងគូរដើមឈើហូបផ្លែមួយដើមដាក់នៅលើក្ដារខៀន ហើយឲ្យសមាជិកក្នុងថ្នាក់សរសេរអក្សរនៅលើផលផ្លែនៃដើមឈើនោះថា « ផល » នៃការប្រែចិត្តដែលពួកគេរកឃើញ ។ ការធ្វើដូច្នេះក៏អាចជាពេលមួយដ៏ល្អ ដើម្បីពិភាក្សាអំពីអត្ថន័យនៃការប្រែចិត្តដ៏ពិតផងដែរ ។
យើងធ្វើតាមព្រះយេស៊ូវគ្រីស្ទ តាមរយៈការទទួលពិធីបុណ្យជ្រមុជទឹក និងការទទួលព្រះវិញ្ញាណបរិសុទ្ធ ។
-
ដើម្បីរំឭកឡើងវិញនូវដំណើររឿងអំពីពិធីបុណ្យជ្រមុជទឹករបស់ព្រះយេស៊ូវគ្រីស្ទ សូមសាកល្បងគំនិតនេះ ៖ សូមឲ្យសមាជិកក្នុងថ្នាក់ប្រាប់អំពីរបៀបដែលពួកគេប្រើ ម៉ាថាយ ៣:១៣–១៧ ដើម្បីបង្រៀនអំពីពិធីបុណ្យជ្រមុជទឹកដល់មនុស្សម្នាក់ ដូចជាកុមារម្នាក់ ឬមនុស្សម្នាក់ដែលកាន់សាសនាផ្សេង ។ ( ពួកគេក៏អាចប្រើរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ផងដែរ ) ។ តើពួកគេនឹងគូសបញ្ជាក់កត្តាសំខាន់អ្វីខ្លះនៃពិធីបុណ្យជ្រមុជទឹក ? ពួកគេអាចអនុវត្តគំនិតរបស់ពួកគេតាមរយៈការបង្រៀនគ្នាទៅវិញទៅមក ។
-
ដើម្បីជួយសមាជិកក្នុងថ្នាក់ឲ្យពិចារណាពីសារៈសំខាន់នៃការរស់នៅតាមសេចក្ដីសញ្ញានៃពិធីបុណ្យជ្រមុជទឹករបស់ពួកគេ នោះបងប្អូនអាចអញ្ជើញនរណាម្នាក់ឲ្យអានសេចក្ដីថ្លែងការណ៍របស់អែលឌើរ បែដណា ដែលមាននៅក្នុង « ធនធានបន្ថែមទាំងឡាយ » ។ សមាជិកក្នុងថ្នាក់ទំនងជារីករាយនឹងចែកចាយអារម្មណ៍អំពីពិធីបុណ្យជ្រមុជទឹករបស់ពួកគេផ្ទាល់ និងសេចក្ដីសញ្ញានៃពិធីបុណ្យជ្រមុជទឹករបស់ពួកគេ ។ ពួកគេក៏អាចច្រៀងទំនុកតម្កើងអំពីការធ្វើតាមព្រះអង្គសង្គ្រោះផងដែរ ដូចជាបទ « ចូរមកតាមខ្ញុំ » ( ទំនុកតម្កើង ល.រ. ៦៣ ) ។
-
យ៉ូហាន‑បាទីស្ទបានបង្រៀនថា ព្រះអង្គសង្គ្រោះបានជ្រមុជទឹក « ដោយព្រះវិញ្ញាណបរិសុទ្ធ និង ដោយភ្លើង » ( ម៉ាថាយ ៣:១១ ) ។ ពិធីបុណ្យជ្រមុជទឹកដោយភ្លើងកើតឡើង នៅពេលយើងទទួលបានការបញ្ជាក់ និងពេលយើងទទួលបានអំណោយទាននៃព្រះវិញ្ញាណបរិសុទ្ធ ។ ហេតុអ្វីយើងត្រូវមានអំណោយទាននៃព្រះវិញ្ញាណបរិសុទ្ធដើម្បីរីកចម្រើននៅក្នុងនគរព្រះ ? តើឥទ្ធិពលអ្វីខ្លះដែលពិធីបុណ្យជ្រមុជទឹកដោយភ្លើង និងដោយព្រះវិញ្ញាណបរិសុទ្ធមានមកលើយើង ? ( សូមមើល អាលម៉ា ៥:១៤ ) ។ វីដេអូ « Baptism of the Holy Ghost » ( នៅលើគេហទំព័រ ChurchofJesusChrist.org ) អាចជួយដល់ការពិភាក្សានេះបាន ។
ធនធានបន្ថែមទាំងឡាយ
សេចក្តីសញ្ញានៃពិធីបុណ្យជ្រមុជទឹករបស់យើង ។
អែលឌើរ ដេវីឌ អេ បែដណា បានបង្រៀន ៖ « សេចក្ដីសញ្ញាបុណ្យជ្រមុជទឹក រួមមាននូវការតាំងចិត្តគ្រឹះចំនួនបី ៖ (១) មានឆន្ទៈលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ (២) ចងចាំទ្រង់ជានិច្ច ហើយ (៣) រក្សាព្រះបញ្ញត្តិទំាងឡាយរបស់ទ្រង់ ។ ពរជ័យដែលបានសន្យាមកពីការគោរពតាមសេចក្ដីសញ្ញានេះ គឺ ‹ ថា [ យើង ] នឹងបានព្រះវិញ្ញាណរបស់ទ្រង់ គង់នៅជាមួយនឹង [ យើង ] ជាដរាប › [ គោលលទ្ធិ និង សេចក្ដីសញ្ញា ២០:៧៧ ] ។ ដូច្នេះ ពិធីបុណ្យជ្រមុជទឹកគឺជាការរៀបចំដ៏សំខាន់ដើម្បីទទួលឱកាសដែលបានអនុញ្ញាត ដើម្បីមានភាពជាដៃគូដ៏ខ្ជាប់ខ្ជួនមកពីសមាជិកទីបីនៃក្រុមព្រះ » ( « Always Retain a Remission of Your Sins » Liahona ខែ ឧសភា ឆ្នាំ ២០១៦ ទំព័រ ៦០ ) ។
សម្រាប់ឧទាហរណ៍អំពីយុវជនម្នាក់ដែលបានរក្សាសេចក្ដីសញ្ញានៃពិធីបុណ្យជ្រមុជទឹករបស់គាត់ សូមមើលដំណើររឿងនៅដើមសារលិខិតរបស់ស៊ីស្ទើរ ខារូល អិម ស្ទីវិន « We Have Great Reason to Rejoice » ( Liahona ខែ វិច្ឆិកា ឆ្នាំ ២០១៣ ទំព័រ ១១៥–១៧ ) ។
ការកែលម្អការបង្រៀនរបស់យើង
បង្រៀនគោលលទ្ធិគ្រឹះ ។ ហៃរុម ស៊្មីធ បានបង្រៀនថា « សូមប្រកាសគោលការណ៍ទីមួយនៃដំណឹងល្អ—ប្រកាសវាម្ដងហើយម្ដងទៀត បងប្អូននឹងឃើញថា ពីមួយថ្ងៃទៅមួយថ្ងៃ គំនិតថ្មី និងពន្លឺបន្ថែមទៀតទាក់ទងនឹងគោលការណ៍ទាំងនេះនឹងត្រូវបានបើកសម្ដែងទៅកាន់បងប្អូន ។ បងប្អូនអាចពង្រីកគោលការណ៍ទាំងនោះ ដើម្បីយល់វាឲ្យកាន់តែច្បាស់ ។ បន្ទាប់មក បងប្អូននឹងអាចធ្វើឲ្យសិស្សដែលបងប្អូនបង្រៀន យល់វាកាន់តែច្បាស់បន្ថែមទៀត » ( នៅក្នុង History, 1838–1856 [ Manuscript History of the Church ] វ៉ុល E-1, ឆ្នាំ ១៩៩៤ នៅលើគេហទំព័រ josephsmithpapers.org ) ។