« ថ្ងៃទី ២–៨ ខែ មករា ។ ម៉ាថាយ ១; លូកា ១ ៖ ‹ សូមឲ្យបានសម្រេចដូចពាក្យលោកចុះ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២–៨ ខែ មករា ។ ម៉ាថាយ ១; លូកា ១ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
ថ្ងៃទី ២–៨ ខែ មករា
ម៉ាថាយ ១; លូកា ១
« សូមឲ្យបានសម្រេចដូចពាក្យលោកចុះ »
ពីមុនបងប្អូនអានសម្ភារសិក្សាបន្ថែមទៀតណាមួយ សូមអាន ហើយពិចារណា ម៉ាថាយ ១ និង លូកា ១ ហើយកត់ត្រាចំណាប់អារម្មណ៍ខាងវិញ្ញាណរបស់បងប្អូន ។ សូមឲ្យព្រះវិញ្ញាណដឹកនាំការរៀបចំខ្លួនរបស់បងប្អូន ។ បន្ទាប់មក សូមរុករកគំនិតនៅក្នុងគម្រោងមេរៀននេះ និងនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។
អញ្ជើញឲ្យចែកចាយ
គោលបំណងចម្បងមួយរបស់ម៉ាថាយ លូកា និងអ្នកនិពន្ធផ្សេងទៀតអំពីដំណឹងល្អ គឺដើម្បីថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។ សូមទុកពេលឲ្យសមាជិកក្នុងថ្នាក់ពីរបីនាទីដើម្បីរំឭក ម៉ាថាយ ១ ឬ លូកា ១ ហើយចែកចាយខគម្ពីរមួយ ដែលនឹងស្ថាបនាសេចក្ដីជំនឿរបស់ពួកគេលើព្រះយេស៊ូវគ្រីស្ទ ។ សូមផ្ដល់ជាយោបល់ដល់សមាជិកក្នុងថ្នាក់ថា នៅពេលពួកគេសិក្សាព្រះគម្ពីរសញ្ញាថ្មីនៅឆ្នាំនេះ នោះពួកគេអាចរក្សាជាបញ្ជីនៃវគ្គបទគម្ពីរដែលថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។ បងប្អូនក៏អាចរក្សាបញ្ជីនេះជាថ្នាក់រួមគ្នាផងដែរ ។
បង្រៀនគោលលទ្ធិ
ព្រះវរបិតាសួគ៌ធ្វើការតាមរយៈបុត្រាបុត្រីដ៏ស្មោះត្រង់របស់ទ្រង់ដើម្បីសម្រេចបានព្រះរាជបំណងរបស់ទ្រង់ ។
-
សមាជិកក្នុងថ្នាក់ទំនងជាមានបទពិសោធន៍កាន់តែមានន័យ កាលកំពុងសិក្សាព្រះគម្ពីរសញ្ញាថ្មីនៅឆ្នាំនេះ ប្រសិនបើពួកគេអាចរៀនមេរៀនចេញពីបទពិសោធន៍របស់មនុស្ស ដែលពួកគេបានអាននោះ ។ ដើម្បីជួយពួកគេឲ្យរៀនមេរៀនចេញពីបទពិសោធន៍របស់មនុស្សដែលពួកគេបានអាននោះ បងប្អូនអាចសរសេរឈ្មោះមនុស្សនៅក្នុង ម៉ាថាយ ១ និង លូកា ១ នៅលើក្ដារខៀនជាមួយនឹងសេចក្ដីយោងបទគម្ពីរអំពីបុគ្គលទាំងនេះដូចតទៅ ៖
-
ម៉ារា ( លូកា ១:២៦–៥៦ )
-
យ៉ូសែប ( ម៉ាថាយ ១:១៨–២៥ )
-
អេលីសាបិត ( លូកា ១:៥–៧, ២៤–២៥, ៤០–៤៥, ៥៧–៦០ )
-
សាការី ( លូកា ១:៥–២៣, ៥៩–៦៤ )
តើយើងអាចរៀនអ្វីខ្លះចេញពីដំណើររឿងទាំងនេះ ដែលនឹងជួយដល់យើងនៅសព្វថ្ងៃនេះ ?
-
-
ដើម្បីជួយសមាជិកក្នុងថ្នាក់ឲ្យគិតអំពីម៉ារា និងតួនាទីរបស់នាងនៅក្នុងផែនការរបស់ព្រះវរបិតាបានកាន់តែស៊ីជម្រៅជាងនេះ បងប្អូនអាចបង្ហាញវីដេអូ « An Angel Foretells Christ’s Birth to Mary » និង « Mary and Elisabeth Rejoice Together » ( នៅលើគេហទំព័រ ChurchofJesusChrist.org ) ។ ឬបងប្អូនអាចអានរួមគ្នាក្នុង លូកា ១:២៦–៣៨, ៤៦–៥៦ ហើយរកមើលអ្វីដែលម៉ារាបាននិយាយ ដែលបង្ហាញអំពីបុគ្គលិកលក្ខណៈរបស់នាង ។ តើយើងរៀនបានអ្វីផ្សេងទៀតមកពីម៉ារា ?
ពរជ័យរបស់ព្រះប្រទានឲ្យតាមពេលវេលារបស់ទ្រង់ផ្ទាល់ ។
-
នៅក្នុងថ្នាក់របស់បងប្អូនប្រហែលជាមានមនុស្សជាច្រើនដែលកំពុងរស់នៅយ៉ាងសុចរិត ប៉ុន្តែពុំបានទទួលពរជ័យដែលសង្ឃឹមចង់បាន ដូចជាអេលីសាបិត និង សាការីដែរ ។ សូមពិចារណាអញ្ជើញសមាជិកក្នុងថ្នាក់ឲ្យស្រាវជ្រាវក្នុង លូកា ១:៥–២៥ រកមើលមេរៀនដែលពួកគេអាចរៀនពីអេលីសាបិត និងសាការីអំពីការរង់ចាំព្រះអម្ចាស់ ។ តើគំរូនៃការរង់ចាំតាមកាលវេលារបស់ព្រះអម្ចាស់អ្វីខ្លះទៀត ដែលសមាជិកក្នុងថ្នាក់អាចចែកចាយចេញពីជីវិតរបស់ពួកគេផ្ទាល់ ឬចេញពីដំណើររឿងនៅក្នុងព្រះគម្ពីរ ? តើយើងអាចរៀនអ្វីខ្លះមកពីគំរូទាំងនេះ ? សមាជិកក្នុងថ្នាក់ក៏អាចរកឃើញការយល់ដឹងដ៏មានអត្ថប្រយោជន៍ផ្សេងទៀតនៅក្នុង « ធនធានបន្ថែមទាំងឡាយ » ផងដែរ ។
« ការអ្វីដែលព្រះទ្រង់ធ្វើពុំបាន នោះគ្មានសោះឡើយ » ។
-
នៅពេលខ្លះ សមាជិកក្នុងថ្នាក់អាចមានការងឿងឆ្ងល់—ដូចជាម៉ារាដែរ—ថាតើផែនការរបស់ព្រះសម្រាប់ពួកគេ ឬការសន្យាចំពោះពួកគេអាចបំពេញបានតាមរបៀបណា ។ ដើម្បីជួយសមាជិកក្នុងថ្នាក់ឲ្យយល់ថា តាមរយៈព្រះចេស្ដារបស់ព្រះ គ្រប់ការណ៍ទាំងអស់នឹងកើតឡើងបាន បងប្អូនអាចបង្ហាញរូបភាព ការប្រកាស ៖ ទេវតាកាព្រីយ៉ែលបង្ហាញព្រះកាយដល់ម៉ារា ( សៀវភៅរូបភាពដំណឹងល្អ ល.រ. ២៨ ) ហើយសូមអញ្ជើញពួកគេឲ្យអាន លូកា ១:២៦–៣៨ រួមគ្នា ។ តើយើងអាចរៀនអ្វីខ្លះអំពីការយកឈ្នះលើអ្វី ដែលហាក់ដូចជាពុំអាចទៅរួចដោយការសិក្សាពាក្យសម្ដី និងសកម្មភាពរបស់ម៉ារា ? សូមឲ្យសមាជិកក្នុងថ្នាក់ចែកចាយបទពិសោធន៍ ដែលព្រះបានជួយពួកគេឲ្យសម្រេចបាននូវរឿងមួយ ដែលពួកគេបានគិតថាវាពុំអាចទៅរួចនោះ ។
ធនធានបន្ថែមទាំងឡាយ
ការរង់ចាំព្រះអម្ចាស់ ។
ដោយទទួលស្គាល់ថា ពួកយើងជាច្រើននាក់មានសំណួរអំពីមូលហេតុដែលយើងត្រូវរង់ចាំពរជ័យរបស់ព្រះ នោះអែលឌើរ ជែហ្វ្រី អ័រ ហូឡិន បានមានប្រសាសន៍ ៖
« ចម្លើយចំពោះសំណួរបែបនោះគឺ ‹ បាទ ព្រះអាចប្រទានអព្ភូតហេតុភ្លាមៗបាន ប៉ុន្តែមិនយូរមិនឆាប់យើងនឹងរៀនថា មានតែទ្រង់មួយអង្គប៉ុណ្ណោះ ដែលអាចដឹកនាំពេលវេលា និងរដូវកាលនៃដំណើរក្នុងជីវិតរមែងស្លាប់របស់យើងបាន › ។ … សេចក្ដីជំនឿមានន័យថា ជាការទុកចិត្តលើព្រះទាំងក្នុងគ្រាល្អ និងគ្រាអាក្រក់ សូម្បីតែបើវាមានការរងទុក្ខខ្លះៗ រហូតទាល់តែយើងឃើញព្រះហស្ដរបស់ទ្រង់បើកសម្ដែងមកឲ្យឃើញក៏ដោយ ។ …
« … អស់អ្នកណាដែល ‹ សង្ឃឹមដល់ព្រះយេហូវ៉ា វិញ នោះនឹងមានកម្លាំងចម្រើនជានិច្ច [ ហើយ ] គេនឹងហើរឡើងទៅលើដោយស្លាប ដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ … › [ អេសាយ ៤០:៣១; បានបន្ថែមការគូសបញ្ជាក់ ] ។ ខ្ញុំសូមអធិស្ឋានថា ‹ នៅមិនយូរមិនឆាប់ ›—នាពេលខាងមុខនេះ—ពរជ័យទាំងនោះនឹងមកដល់បងប្អូនគ្រប់គ្នាដែលស្វែងរកការធូរស្បើយពីទុក្ខព្រួយរបស់បងប្អូន និងសេរីភាពពីគ្រោះមហន្តរាយរបស់បងប្អូន ។ ខ្ញុំសូមថ្លែងទីបន្ទាល់អំពីសេចក្ដីស្រឡាញ់របស់ព្រះ និងអំពីការស្ដារឡើងវិញនៃដំណឹងល្អដ៏រុងរឿងរបស់ទ្រង់ ដែលតាមមធ្យោបាយមួយណាក៏ដោយ វាជាចម្លើយចំពោះគ្រប់បញ្ហាដែលយើងជួបក្នុងជីវិតយើង » ( « Waiting on the Lord » Liahona ខែ វិច្ឆិកា ឆ្នាំ ២០២០ ទំព័រ ១១៦–១៧ ) ។
ការកែលម្អការបង្រៀនរបស់យើង
លើកទឹកចិត្តសមាជិកថ្នាក់ឲ្យសិក្សាព្រះគម្ពីរនៅគេហដ្ឋាន ។ វិធីមួយដែលបងប្អូនអាចលើកទឹកចិត្តឲ្យសិក្សាព្រះគម្ពីរនៅឯគេហដ្ឋានគឺ ត្រូវផ្ដល់ពេលវេលាឲ្យសមាជិកក្នុងថ្នាក់ចែកចាយការរកឃើញ និងគំនិតនានាមកពីការសិក្សាផ្ទាល់ខ្លួនរបស់ពួកគេ និងជាគ្រួសារ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៩ ) ។