« ថ្ងៃទី ២៣–២៩ ខែ មករា ។ ម៉ាថាយ ៣; ម៉ាកុស ១; លូកា ៣ ៖ ‹ ចូររៀបចំផ្លូវទទួលព្រះអម្ចាស់ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៣–២៩ ខែ មករា ។ ម៉ាថាយ ៣; ម៉ាកុស ១; លូកា ៣ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣
បង្អួចកញ្ចក់ក្បាច់ពណ៌ចម្លាក់នៅក្នុងព្រះវិហារបរិសុទ្ធ ណៅវូ អិលលីណោយ ដោយ ថម ហូលមែន
ថ្ងៃទី ២៣–២៩ ខែ មករា
ម៉ាថាយ ៣; ម៉ាកុស ១; លូកា ៣
« ចូររៀបចំផ្លូវទទួលព្រះអម្ចាស់ »
សូមចាប់ផ្ដើមដោយការអាន ម៉ាថាយ ៣; ម៉ាកុស ១ និង លូកា ៣ ។ នៅពេលបងប្អូនអធិស្ឋានទូលសូមព្រះវិញ្ញាណបរិសុទ្ធឲ្យជួយបងប្អូនយល់អំពីជំពូកទាំងនេះ នោះទ្រង់នឹងប្រទានការយល់ដឹងដល់បងប្អូន ដែលមានជាពិសេសសម្រាប់បងប្អូន ។ សូមកត់ត្រាចំណាប់អារម្មណ៍ទាំងនេះ ហើយធ្វើផែនការដើម្បីអនុវត្តចំណាប់អារម្មណ៍ទាំងនេះ ។
កត់ត្រាចំណាប់អារម្មណ៍របស់បងប្អូន
ព្រះយេស៊ូវគ្រីស្ទ និងដំណឹងល្អរបស់ទ្រង់អាចផ្លាស់ប្ដូរបងប្អូនបាន ។ លូកាបានដកស្រង់ការព្យាកររបស់លោកអេសាយពីបុរាណ ដែលបានពិពណ៌នាអំពីឥទ្ធិពលនៃការយាងមករបស់ព្រះអង្គសង្គ្រោះនឹងមាន ៖ « គ្រប់ទាំងច្រកភ្នំនឹងបានលុបឲ្យពេញ គ្រប់ទាំងភ្នំធំតូចនឹងត្រូវបន្ទាបទៅ ផ្លូវក្ងិចក្ងក់នឹងទៅជាត្រង់ ហើយផ្លូវរដិបរដុបនឹងបានរាបស្មើទៅវិញ » ( លូកា ៣:៥; សូមមើលផងដែរ អេសាយ ៤០:៤ ) ។ នេះគឺជាសារលិខិតមួយសម្រាប់យើងទាំងអស់គ្នា រួមទាំងអ្នកទាំងឡាយដែលគិតថាពួកគេពុំអាចផ្លាស់ប្ដូរបានផងដែរ ។ ប្រសិនបើមានអ្វីដែលនៅនឹងជាអចិន្ត្រៃយ៍ដូចជាភ្នំ អាចត្រូវបានរាបស្មើ នោះព្រះអម្ចាស់ពិតជាអាចជួយយើងឲ្យតម្រង់ផ្លូវរដិបរដុបរបស់យើងបាន ( សូមមើល លូកា ៣:៤–៥ ) ។ នៅពេលយើងទទួលយកការអញ្ជើញរបស់យ៉ូហាន‑បាទីស្ទ ឲ្យប្រែចិត្ត ហើយផ្លាស់ប្ដូរ នោះយើងរៀបចំគំនិត និងដួងចិត្តរបស់យើងដើម្បីទទួលព្រះយេស៊ូវគ្រីស្ទដើម្បីយើងអាច « នឹងឃើញសេចក្ដីសង្គ្រោះរបស់ព្រះ » ( លូកា ៣:៦ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើម៉ាកុសជានរណា ?
នៅក្នុងចំណោមអ្នកនិពន្ធដំណឹងល្អទាំងឡាយ នោះយើងស្គាល់ម៉ាកុសតិចតួចណាស់ ។ យើងដឹងថាលោកគឺជាដៃគូផ្សព្វផ្សាយសាសនារបស់ប៉ុល ពេត្រុស និងពួកអ្នកផ្សព្វផ្សាយសាសនាដទៃច្រើនទៀត ។ មានអ្នកប្រាជ្ញខាងគម្ពីរបរិសុទ្ធជាច្រើនបានជឿថា ពេត្រុសបានដឹកនាំម៉ាកុសឲ្យកត់ត្រាព្រឹត្តិការណ៍នានាអំពីជីវិតរបស់ព្រះអង្គសង្គ្រោះ ។ ដំណឹងល្អរបស់ម៉ាកុសទំនងជាត្រូវបានសរសេរពីមុនដំណឹងល្អបីក្រោយទៀត ។
សូមមើលផងដែរ សេចក្ដីណែនាំដល់បទគម្ពីរទាំងឡាយ « ម៉ាកុស » ។
ម៉ាថាយ ៣:១–១២; ម៉ាកុស ១:១–៨; លូកា ៣:២–១៨
ការប្រែចិត្តគឺជាការផ្លាស់ប្តូរដ៏ធំមួយក្នុងគំនិត និងដួងចិត្ត ។
បេសកកម្មរបស់យ៉ូហាន‑បាទីស្ទ គឺត្រូវរៀបចំដួងចិត្តមនុស្សឲ្យទទួលព្រះអង្គសង្គ្រោះ ហើយប្រែក្លាយកាន់តែដូចជាទ្រង់ ។ តើលោកធ្វើបានតាមរបៀបណា ? លោកបានប្រកាស « ឲ្យប្រែចិត្តចុះ » ( ម៉ាថាយ ៣:២ ) ។ ហើយលោកបានប្រើប្រាស់រូបភាពដូចជាផ្លែឈើ និងស្រូវសាលី ដើម្បីបង្រៀនអំពីការប្រែចិត្ត ( សូមមើល លូកា ៣:៩, ១៧ ) ។
តើមានរូបភាពអ្វីផ្សេងទៀត ដែលបងប្អូនរកឃើញនៅក្នុងកំណត់ត្រានៃការងារបម្រើរបស់ យ៉ូហាន បាទីស្ទ ? ( សូមមើល ម៉ាថាយ ៣:១–១២; ម៉ាកុស ១:១–៨; លូកា ៣:២–១៨ ) ។ សូមពិចារណាធ្វើការគូសចំណាំវានៅក្នុងព្រះគម្ពីររបស់បងប្អូន ឬគូររូបវា ។ តើរូបភាពទាំងនេះបង្រៀនអំពីគោលលទ្ធិ និងភាពចាំបាច់នៃការប្រែចិត្តយ៉ាងណាខ្លះ ?
ការប្រែចិត្តពិតប្រាកដគឺជា « ការផ្លាស់ប្តូរគំនិត ការយល់ដឹងថ្មីអំពីព្រះ អំពីខ្លួនរបស់យើងផ្ទាល់ និងអំពីពិភពលោកនេះ ។ … [ វាមានន័យថា ] គឺ « ការបែរដួងចិត្ត និងឆន្ទៈទៅរកព្រះ » ( សេចក្ដីណែនាំដល់បទគម្ពីរទាំងឡាយ ប្រែចិត្ត, ការប្រែចិត្ត » ) ។ នៅក្នុង លូកា ៣:៧–១៤ តើមានការផ្លាស់ប្ដូរអ្វីខ្លះ ដែលយ៉ូហានអញ្ជើញមនុស្សឲ្យផ្លាស់ប្ដូរ ដើម្បីរៀបចំខ្លួនទទួលព្រះគ្រីស្ទ ? តើការប្រឹក្សានេះអាចអនុវត្តចំពោះបងប្អូនយ៉ាងដូចម្ដេច ? តើបងប្អូនអាចបង្ហាញថា បងប្អូនពិតជាបានប្រែចិត្តយ៉ាងដូចម្ដេច ? ( សូមមើល លូកា ៣:៨ ) ។
សូមមើលផងដែរ រ័សុល អិម ណិលសុន « We Can Do Better and Be Better » Liahona ខែ ឧសភា ឆ្នាំ ២០១៩ ទំព័រ ៦៧–៦៩; ដាល្លិន អេក អូក « Cleansed by Repentance » Liahona ខែ ឧសភា ឆ្នាំ ២០១៩ ទំព័រ ៩១–៩៤ ។
តើពួកផារិស៊ី និងពួកសាឌូស៊ីជានរណា ?
ពួកផារិស៊ីគឺជាសមាជិកនៃបក្សសាសនាយូដាមួយ ដែលមានអំនួតលើខ្លួនឯងក្នុងការប្រតិបត្តិតាមច្បាប់របស់ម៉ូសេ និងពិធីនានានៃច្បាប់ម៉ូសេយ៉ាងតឹងរឹង ។ ពួកសាឌូស៊ីគឺជាពួកសាសន៍យូដាដែលមានទ្រព្យសម្បត្តិស្ដុកស្ដម្ភ ដែលមានឥទ្ធិពលយ៉ាងខ្លាំងខាងសាសនា និងខាងនយោបាយ ។ ពួកគេមិនបានជឿលើគោលលទ្ធិនៃការរស់ឡើងវិញទេ ។ ក្រុមទាំងពីរនេះបានវង្វេងចេញពីគោលបំណងដើមនៃក្រឹត្យវិន័យរបស់ព្រះ ។
សូមមើលផងដែរ ម៉ាថាយ ២៣:២៣–២៨; សេចក្ដីណែនាំដល់បទគម្ពីរទាំងឡាយ « ពួកផារីស៊ី » « ពួកសាឌូស៊ី » ។
ម៉ាថាយ ៣:១១, ១៣–១៧; ម៉ាកុស ១:៩–១១; លូកា ៣:១៥–១៦, ២១–២២
ព្រះយេស៊ូវគ្រីស្ទបានជ្រមុជទឹកដើម្បី « បំពេញសេចក្ដីសុចរិតគ្រប់យ៉ាង » ។
នៅពេលបងប្អូនជ្រមុជទឹក បងប្អូនបានដើរតាមគំរូរបស់ព្រះអង្គសង្គ្រោះ ។ សូមប្រៀបធៀបអ្វីដែលបងប្អូនរៀនមកពីដំណើររឿងនៃពិធីបុណ្យជ្រមុជទឹករបស់ព្រះអង្គសង្គ្រោះ ទៅនឹងអ្វីដែលបានកើតឡើងអំឡុងពេលនៃពិធីបុណ្យជ្រមុជទឹករបស់បងប្អូន ។
|
ពិធីបុណ្យជ្រមុជទឹករបស់ព្រះអង្គសង្គ្រោះ |
ពិធីបុណ្យជ្រមុជទឹករបស់ខ្ញុំ |
|---|---|
ពិធីបុណ្យជ្រមុជទឹករបស់ព្រះអង្គសង្គ្រោះ តើនរណាជ្រមុជទឹកថ្វាយព្រះយេស៊ូវ ហើយលោកកាន់សិទ្ធិអំណាចអ្វី ? | ពិធីបុណ្យជ្រមុជទឹករបស់ខ្ញុំ តើនរណាបានជ្រមុជទឹកឲ្យបងប្អូន ហើយគាត់កាន់សិទ្ធិអំណាចអ្វី ? |
ពិធីបុណ្យជ្រមុជទឹករបស់ព្រះអង្គសង្គ្រោះ តើព្រះយេស៊ូវបានជ្រមុជទឹកនៅទីណា ? | ពិធីបុណ្យជ្រមុជទឹករបស់ខ្ញុំ តើបងប្អូនបានជ្រមុជទឹកនៅទីណា ? |
ពិធីបុណ្យជ្រមុជទឹករបស់ព្រះអង្គសង្គ្រោះ តើព្រះយេស៊ូវបានជ្រមុជទឹកយ៉ាងដូចម្ដេច ? | ពិធីបុណ្យជ្រមុជទឹករបស់ខ្ញុំ តើបងប្អូនទទួលបុណ្យជ្រមុជទឹកយ៉ាងដូចម្ដេច ? |
ពិធីបុណ្យជ្រមុជទឹករបស់ព្រះអង្គសង្គ្រោះ ហេតុអ្វីបានជាព្រះយេស៊ូវគ្រីស្ទជ្រមុជទឹក ? | ពិធីបុណ្យជ្រមុជទឹករបស់ខ្ញុំ ហេតុអ្វីបងប្អូនជ្រមុជទឹក ? |
ពិធីបុណ្យជ្រមុជទឹករបស់ព្រះអង្គសង្គ្រោះ តើព្រះវរបិតាសួគ៌បង្ហាញថា ទ្រង់សព្វព្រះទ័យនឹងព្រះយេស៊ូវយ៉ាងដូចម្ដេច ? | ពិធីបុណ្យជ្រមុជទឹករបស់ខ្ញុំ តើព្រះវរបិតាសួគ៌បង្ហាញថា ទ្រង់សព្វព្រះទ័យនៅពេលបងប្អូនជ្រមុជទឹកយ៉ាងដូចម្ដេច ? តើទ្រង់បានបង្ហាញពីការអនុញ្ញាតរបស់ទ្រង់ចាប់តាំងពីពេលនោះមកយ៉ាងដូចម្ដេច ? |
សូមមើលផងដែរ នីហ្វៃទី២ ៣១; ម៉ូសាយ ១៨:៨–១១; គោលលទ្ធិ និង សេចក្ដីសញ្ញា ២០:៣៧, ៦៨–៧៤; « The Baptism of Jesus » ( វីដេអូ ) នៅលើគេហទំព័រ ChurchofJesusChrist.org ។
ម៉ាថាយ ៣:១៦–១៧; ម៉ាកុស ១:៩–១១; លូកា ៣:២១–២២
សមាជិកក្នុងក្រុមព្រះគឺជាតួអង្គផ្សេងពីគ្នា ។
ព្រះគម្ពីរបរិសុទ្ធមាននូវភស្ដុតាងជាច្រើនដែលបង្ហាញថា សមាជិកនៃក្រុមព្រះគឺជាតួអង្គបីផ្សេងពីគ្នា ។ ដំណើររឿងនៃបុណ្យជ្រមុជទឹករបស់ព្រះអង្គសង្គ្រោះគឺជាឧទាហរណ៍មួយ ។ នៅពេលបងប្អូនអានដំណើររឿងទាំងនេះ សូមពិចារណាពីអ្វីដែលបងប្អូនរៀនអំពីក្រុមព្រះ ។ ហេតុអ្វីគោលលិទ្ធិទាំងនេះសំខាន់ចំពោះបងប្អូន ?
សូមមើលផងដែរ លោកុប្បត្តិ ១:២៦; ម៉ាថាយ ១៧:១–៥; យ៉ូហាន ១៧:១–៣; កិច្ចការ ៧:៥៥–៥៦; គោលលទ្ធិ និង សេចក្តីសញ្ញា ១៣០:២២ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ
-
ម៉ាថាយ ៣ ។យ៉ូហាន‑បាទីស្ទកាន់បព្វជិតភាពអើរ៉ុន ។ តើយើងអាចរៀនអ្វីខ្លះ មកពីគំរូរបស់យ៉ូហានអំពីគោលបំណងនៃបព្វជិតភាពអើរ៉ុន ? តើពរជ័យអ្វីខ្លះដែលយើងទទួលបានតាមរយៈបព្វជិតភាពអើរ៉ុន ? ប្រសិនបើបងប្អូនមានយុវជនម្នាក់នៅក្នុងគ្រួសារបងប្អូន បងប្អូនអាចនឹងចំណាយពេលជួយគាត់ឲ្យយល់ពីរបៀបដែលគាត់អាចប្រើប្រាស់បព្វជិតភាពអើរ៉ុនរបស់គាត់ ដើម្បីផ្ដល់ពរជ័យដល់មនុស្សដទៃទៀត ។ ( សូមមើលផងដែរ គោលលទ្ធិ និង សេចក្តីសញ្ញា ១៣:១; ២០:៤៦–៦០ ) ។
នៅពេលយើងជ្រមុជទឹក នោះអំពើបាបរបស់យើងគឺត្រូវលាងជម្រះ ។
-
ម៉ាថាយ ៣:១១–១៧; ម៉ាកុស ១:៩–១១; លូកា ៣:២១–២២ ។តើសមាជិកនៃគ្រួសាររបស់បងប្អូនធ្លាប់បានឃើញបុគ្គលម្នាក់ទទួលបុណ្យជ្រមុជទឹក និងពិធីបញ្ជាក់ជាសមាជិកនៃសាសនាចក្រដែរឬទេ ? តើសមាជិកគ្រួសារមានអារម្មណ៍យ៉ាងណាដែរ ? បងប្អូនប្រហែលជាអាចបង្រៀនពួកគេអំពីនិមិត្តសញ្ញានៃពិធីបុណ្យជ្រមុជទឹក និងពិធីបញ្ជាក់ ។ តើការទទួលពិធីបុណ្យជ្រមុជទឹក និងពិធីបញ្ជាក់គឺដូចជាការកើតជាថ្មីដោយរបៀបណា ? ហេតុអ្វីយើងត្រូវជ្រមុជទៅក្នុងទឹកទាំងស្រុង នៅពេលយើងទទួលពិធីបុណ្យជ្រមុជទឹក ? ហេតុអ្វីយើងស្លៀកពាក់ពណ៌ស នៅពេលយើងទទួលពិធីបុណ្យជ្រមុជទឹក ? ហេតុអ្វីអំណោយទាននៃព្រះវិញ្ញាណបរិសុទ្ធ ត្រូវបានពិពណ៌នាថាជា « ពិធីបុណជ្រមុជទឹកដោយភ្លើង » ? ( គោលលទ្ធិ និង សេចក្ដីសញ្ញា ២០:៤១; សូមមើលផងដែរ សេចក្ដីណែនាំដល់បទគម្ពីរទាំងឡាយ « បុណ្យជ្រមុជទឹក, ធ្វើបុណ្យជ្រមុជទឹក » « ព្រះវិញ្ញាណបរិសុទ្ធ » ) ។
-
ម៉ាថាយ ៣:១៧; ម៉ាកុស ១:១១; លូកា ៣:២២ ។តើនៅពេលណាដែលយើងមានអារម្មណ៍ថា ព្រះសព្វព្រះទ័យនឹងយើង ? តើយើងអាចធ្វើអ្វីខ្លះជាគ្រួសារដើម្បីឲ្យព្រះសព្វព្រះទ័យ ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។
ចម្រៀងដែលលើកទឹកចិត្តឲ្យប្រើ ៖ « ពិធីបុណ្យជ្រមុជទឹក » សៀវភៅចម្រៀងកុមារ ទំព័រ ៥៤ ។
ការកែលម្អដល់ការសិក្សាផ្ទាល់ខ្លួន
សូមជំនួយពីព្រះអម្ចាស់ ។ ព្រះគម្ពីរត្រូវបានប្រទានឲ្យតាមរយៈវិវរណៈ ហើយដើម្បីយល់ដឹងអំពីវាបានពិតប្រាកដ នោះយើងត្រូវការវិវរណៈផ្ទាល់ខ្លួន ។ ព្រះអម្ចាស់សន្យាថា « ចូរសូម នោះតែងនឹងឲ្យមកអ្នក ចូររក នោះតែងនឹងឃើញ ចូរគោះនោះ តែងនឹងបើកឲ្យអ្នក » ( ម៉ាថាយ ៧:៧ ) ។
យ៉ូហាន‑បាទីស្ទកំពុងជ្រមុជទឹកថ្វាយព្រះយេស៊ូវ ដោយ ហ្គ្រេក ខេ អុលសិន