« ថ្ងៃទី ១៦–២២ ខែ មករា ។ យ៉ូហាន ១ ៖ យើងបានឃើញព្រះមែស៊ីហើយ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១៦–២២ ខែ មករា ។ យ៉ូហាន ១ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣
ថ្ងៃទី ១៦–២២ ខែ មករា
យ៉ូហាន ១
យើងបានឃើញព្រះមែស៊ីហើយ
នៅពេលបងប្អូនអាន ហើយពិចារណា យ៉ូហាន ១ សូមកត់ត្រាចំណាប់អារម្មណ៍ខាងវិញ្ញាណ ដែលបងប្អូនបានទទួល ។ តើសារលិខិតអ្វីខ្លះដែលបងប្អូនរកឃើញថាមានតម្លៃបំផុតចំពោះបងប្អូន និងគ្រួសាររបស់បងប្អូន ? តើបងប្អូនអាចចែកចាយអ្វីខ្លះនៅក្នុងថ្នាក់រៀននៅឯព្រះវិហាររបស់បងប្អូន ?
កត់ត្រាចំណាប់អារម្មណ៍របស់បងប្អូន
តើបងប្អូនធ្លាប់ងឿងឆ្ងល់ថាតើបងប្អូននឹងទទួលស្គាល់ព្រះយេស៊ូវនៃស្រុកណាសារ៉ែតជាព្រះរាជបុត្រានៃព្រះឬទេ ប្រសិនបើបងប្អូនបានរស់នៅក្នុងជំនាន់នៃការបម្រើក្នុងជីវិតរមែងស្លាប់របស់ទ្រង់នោះ ? អស់រយៈពេលជាច្រើនឆ្នាំ ពួកអ៊ីស្រាអែលដ៏ស្មោះត្រង់ រួមមានទាំង អនទ្រេ ពេត្រុស ភីលីព និង ណាថាណែល បានរង់ចាំ ហើយអធិស្ឋានសម្រាប់ការយាងមករបស់ព្រះមែស៊ី ដែលបានសន្យានោះ ។ តើពួកគេបានជួបទ្រង់នៅពេលណា តើពួកគេស្គាល់ថាទ្រង់គឺជាព្រះដែលពួកគេកំពុងស្វែងរកដោយរបៀបណា ? យើងទាំងអស់គ្នាមកស្គាល់ព្រះអង្គសង្គ្រោះតាមរបៀបដូចគ្នា—ដោយការទទួលយកការអញ្ជើញឲ្យ « ចូរតាមខ្ញុំទៅមើល » ដោយខ្លួនយើង ( យ៉ូហាន ១:៣៩ ) ។ យើងអានអំពីទ្រង់នៅក្នុងបទគម្ពីរ ។ យើងស្ដាប់ឮគោលលទ្ធិរបស់ទ្រង់ ។ យើងសង្កេតមើលរបៀបដែលទ្រង់រស់នៅ ។ យើងទទួលអារម្មណ៍ពីព្រះវិញ្ញាណរបស់ទ្រង់ ។ នៅលើដំណើរនេះ យើងក៏បានរកឃើញ ដូចជាណាថាណែលបានរកឃើញដែរថា ព្រះអង្គសង្គ្រោះស្គាល់យើង ហើយស្រឡាញ់យើង ព្រមទាំងចង់រៀបចំយើងឲ្យទទួល « ការណ៍ដ៏ធំវិសេស » ( យ៉ូហាន ១:៥០ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើយ៉ូហានជានរណា ?
យ៉ូហានគឺជាសិស្សមួយរូបរបស់យ៉ូហាន-បាទីស្ទ ហើយក្រោយមកក្លាយជាអ្នកដើរតាមម្នាក់នៃអ្នកដើរតាមដំបូងគេរបស់ព្រះយេស៊ូវគ្រីស្ទ និងជាសាវកម្នាក់ក្នុងចំណោមសាវកដប់ពីរនាក់របស់ទ្រង់ ។ លោកបានសរសេរដំណឹងល្អរបស់យ៉ូហាន បានសរសេរសំបុត្រជាច្រើនច្បាប់ និងបានសរសេរគម្ពីរនៃវិវរណៈ ។ នៅក្នុងដំណឹងល្អរបស់លោក លោកបានហៅខ្លួនលោកថាជាសិស្ស « ម្នាក់ដែលព្រះយេស៊ូវស្រឡាញ់ » និង « សិស្សមួយនោះ » ( យ៉ូហាន ១៣:២៣; ២០:៣ ) ។ ការខ្នះខ្នែងរបស់យ៉ូហានក្នុងការផ្សព្វផ្សាយដំណឹងល្អគឺខ្លាំងក្លាណាស់ លោកបានស្នើសុំនៅលើផែនដី រហូតដល់ការយាងមកជាលើកទីពីររបស់ព្រះអង្គសង្គ្រោះ ដើម្បីលោកអាចនាំព្រលឹងជាច្រើនមករកព្រះគ្រីស្ទ ( សូមមើល គោលលទ្ធិ និង សេចក្តីសញ្ញា ៧:១–៦ ) ។
សូមមើលផងដែរ សេចក្ដីណែនាំដល់បទគម្ពីរទាំងឡាយ « យ៉ូហាន » « យ៉ូហាន, កូនប្រុសរបស់សេបេដេ » ។
ព្រះយេស៊ូវគ្រីស្ទ « គង់នៅជាមួយនឹងព្រះតាំងអំពីដើមមក » ។
យ៉ូហានបានចាប់ផ្ដើមដំណឹងល្អរបស់លោកដោយការពិពណ៌នាអំពីកិច្ចការដែលព្រះគ្រីស្ទបានធ្វើពីមុនទ្រង់ប្រសូត ៖ « កាលដើមដំបូង…មានព្រះបន្ទូល [ ព្រះយេស៊ូវគ្រីស្ទ ] គង់នៅជាមួយនឹងព្រះ » ។ តើបងប្អូនរៀនអ្វីខ្លះមកពី ខទី ១–៥ អំពីព្រះអង្គសង្គ្រោះ និងកិច្ចការរបស់ទ្រង់ ? បងប្អូនអាចស្វែងរកការបញ្ជាក់ដ៏មានគុណប្រយោជន៍នៅក្នុង ការបកប្រែដោយយ៉ូសែប ស្ម៊ីធ យ៉ូហាន ១:១–៥ ( នៅក្នុង ការបកប្រែដោយយ៉ូសែប ស្ម៊ីធ ) ។ នៅពេលបងប្អូនចាប់ផ្ដើមការសិក្សារបស់បងប្អូនអំពីជីវិតរបស់ព្រះអង្គសង្គ្រោះ ហេតុអ្វីក៏វាសំខាន់ដើម្បីដឹងអំពីកិច្ចការនៃព្រះជន្មមុនផែនដីរបស់ទ្រង់ ?
សូមមើលផងដែរ Gospel Topics « Jesus Christ Chosen as Savior » នៅលើគេហទំព័រ topics.ChurchofJesusChrist.org ។
ព្រះយេស៊ូវគ្រីស្ទគឺជា « ពន្លឺដ៏ពិត » ជាព្រះរាជបុត្រារបស់ព្រះ ។
យ៉ូហានត្រូវបានបំផុសគំនិតឲ្យស្វែងរកព្រះអង្គសង្គ្រោះ ដោយសារតែទីបន្ទាល់របស់យ៉ូហាន‑បាទីស្ទ ដែលបានប្រកាសថា លោក « គឺមកគ្រាន់តែនឹងធ្វើបន្ទាល់ពី … ពន្លឺដ៏ពិត » ( យ៉ូហាន ១:៨–៩ ) ។ យ៉ូហានផ្ទាល់ក៏បានថ្លែងទីបន្ទាល់ដ៏មានអានុភាពអំពីព្រះជន្ម និងបេសកកម្មរបស់ព្រះអង្គសង្គ្រោះ ។
វាអាចនឹងគួរឲ្យចាប់អារម្មណ៍ដើម្បីធ្វើបញ្ជីអំពីសេចក្ដីពិតដែលយ៉ូហានបានដាក់បញ្ចូលនៅក្នុងទីបន្ទាល់ដំបូងរបស់លោកអំពីព្រះគ្រីស្ទ ( ខទី ១–១៨; សូមមើលផងដែរ ការបកប្រែរបស់យ៉ូសែប ស្ម៊ីធ, យ៉ូហាន ១:១–១៩ [ នៅក្នុង ការបកប្រែរបស់យ៉ូសែប ស្ម៊ីធ ] ) ។ ហេតុអ្វីបងប្អូនគិតថា យ៉ូហានបានចាប់ផ្ដើមដំណឹងល្អរបស់លោកជាមួយនឹងសេចក្ដីពិតទាំងនេះដូច្នេះ ? សូមពិចារណាធ្វើការសរសេរអំពីសាក្សីរបស់បងប្អូនចំពោះព្រះយេស៊ូវគ្រីស្ទ—តើបងប្អូននឹងចង់ចែកចាយអំពីអ្វីខ្លះ ? តើបទពិសោធន៍អ្វីខ្លះដែលបានជួយបងប្អូនឲ្យមកស្គាល់ ហើយដើរតាមព្រះអង្គសង្គ្រោះ ? តើនរណាខ្លះអាចនឹងត្រូវបានប្រទានពរ តាមរយៈការស្ដាប់ឭទីបន្ទាល់របស់បងប្អូន ?
ព្រះយេស៊ូវគ្រីស្ទប្រទានដល់យើងនូវ « អំណាចឲ្យបានត្រឡប់ » ជាបុត្រា និងបុត្រីរបស់ព្រះ ។
ទោះបីជាយើងទាំងអស់គ្នាគឺជាបុត្រា និងបុត្រីខាងវិញ្ញាណរបស់ព្រះក្តី ក៏នៅពេលយើងមានអំពើបាប នោះយើងបានឃ្លាតឆ្ងាយ ឬបំបែកចេញពីទ្រង់ដែរ ។ ព្រះយេស៊ូវគ្រីស្ទប្រទានមធ្យោបាយដល់យើងតាមរយៈពលិកម្មដ៏ធួនរបស់ទ្រង់ ។ សូមពិចារណាពីអ្វី យ៉ូហាន ១:១១–១៣ បង្រៀនអំពីការបានត្រឡប់ជាបុត្រី និងបុត្រារបស់ព្រះ ។ សូមពិចារណាផងដែរពីអ្វីដែលបទគម្ពីរទាំងនេះបង្រៀន អំពីរបៀបដែលយើងទទួលបានអំណោយនេះ ៖ រ៉ូម ៨:១៤–១៨; ម៉ូសាយ ៥:៧–៩; គោលលទ្ធិ និង សេចក្ដីសញ្ញា ២៥:១ ។ តើការមាន « អំណាចឲ្យបានត្រឡប់ » ជាបុត្រី និងបុត្រារបស់ព្រះ មានន័យយ៉ាងដូចម្តេចចំពោះបងប្អូន ?
ព្រះវរបិតាថ្លែងទីបន្ទាល់អំពីព្រះរាជបុត្រារបស់ទ្រង់ ។
យ៉ូហាន ១:១៨ ចែងថាពុំមាននរណាម្នាក់បានឃើញព្រះនោះទេ ។ ទោះជាយ៉ាងណា ការបកប្រែដោយយ៉ូសែប ស៊្មីធ នៃខគម្ពីរនេះបញ្ជាក់ថា « គ្មានអ្នកណាដែលឃើញព្រះក្នុងពេលណាមួយឡើយ លើកលែងតែអ្នកនោះបានធ្វើទីបន្ទាល់ពីព្រះរាជបុត្រាប៉ុណ្ណោះ » ( សូមមើល ក.យ.ស., យ៉ូហាន ១:១៩ ) ។ សូមពិចារណាក្នុងការពិនិត្យមើលឧទាហរណ៍ដូចតទៅនេះ ដែលមនុស្សបានឮព្រះជាព្រះវរបិតាធ្វើបន្ទាល់អំពីព្រះរាជបុត្រារបស់ទ្រង់ ៖ ម៉ាថាយ ៣:១៧; ១៧:៥; នីហ្វៃទី៣ ១១:៦–៧; យ៉ូសែប ស៊្មីធ—ប្រវត្តិ ១:១៧ ។
ហេតុអ្វីវាគឺជាពរជ័យមួយក្នុងការមានកំណត់ត្រាទាំងនេះ ? តើកំណត់ត្រាទាំងនេះបង្រៀនបងប្អូនអ្វីខ្លះ អំពីទំនាក់ទំនងរបស់ព្រះយេស៊ូវគ្រីស្ទជាមួយនឹងព្រះវរបិតារបស់ទ្រង់ ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ
នៅពេលយើងសិក្សាព្រះគម្ពីរ នោះយើងនឹងទទួលបានការបំផុសគំនិតសម្រាប់ជីវិតរស់នៅរបស់យើង ។
-
យ៉ូហាន ១:៤–១០ ។តើបងប្អូនអាចជួយគ្រួសាររបស់បងប្អូនឲ្យមើលឃើញអ្វីដែលពួកគេអានអំពីពន្លឺនៅក្នុងខគម្ពីរទាំងនេះបានយ៉ាងដូចម្ដេច ? បងប្អូនអាចឲ្យសមាជិកគ្រួសារបងប្អូនបើកពន្លឺភ្លើងបំភ្លឺនៅក្នុងបន្ទប់ងងឹតមួយ ហើយចែកចាយអំពីរបៀបដែលព្រះអង្គសង្គ្រោះ គឺជាពន្លឺនៅក្នុងជីវិតរស់នៅរបស់ពួកគេ ។ បន្ទាប់មក នៅពេលបងប្អូនអាន យ៉ូហាន ១:៤–១០ សមាជិកគ្រួសារអាចមានគំនិតបន្ថែមចំពោះទីន្ទាល់របស់យ៉ូហានអំពីព្រះយេស៊ូវគ្រីស្ទ ថាជាពន្លឺនៃលោកិយ ។
-
យ៉ូហាន ១:៣៥–៣៦ ។ហេតុអ្វីបានជា យ៉ូហាន‑បាទីស្ទ ហៅព្រះយេស៊ូវថាជា « កូនចៀមនៃព្រះ » ? តើយើងរៀនអ្វីខ្លះអំពីព្រះគោរមងានេះមកពីសារលិខិតរបស់អែលឌើរ ជែហ្វ្រី អ័រ ហូឡិន « Behold the Lamb of God » ឬសារលិខិតរបស់អែលឌើរ ហ្គើរីត ដបុលយូ ហ្គង « Good Shepherd, Lamb of God » ? (Liahona ខែ ឧសភា ឆ្នាំ ២០១៩ ទំព័រ ៤៤–៤៦, ៩៧–១០១ ) ។
-
យ៉ូហាន ១:៣៥–៤៦ ។តើអ្វីទៅជាលទ្ធផលនៃទីបន្ទាល់របស់យ៉ូហាន ? តើគ្រួសាររបស់បងប្អូនអាចរៀនអ្វីខ្លះមកពីមនុស្សដែលបានពិពណ៌នានៅក្នុងខគម្ពីរទាំងនេះអំពីរបៀបចែកចាយដំណឹងល្អ ? សូមមើលវីដេអូ « Inviting Others to ‹ Come and See ›» ផងដែរ ( នៅលើគេហទំព័រ ChurchofJesusChrist.org ) ។
-
យ៉ូហាន ១:៤៥–៥១ ។តើណាថាណែលបានធ្វើអ្វីខ្លះ ដើម្បីជួយគាត់ទទួលបានទីបន្ទាល់មួយអំពីព្រះអង្គសង្គ្រោះ ? សូមឲ្យសមាជិកគ្រួសារនិយាយអំពីរបៀបដែលពួកគេបានទទួលទីបន្ទាល់របស់ពួកគេ ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។
សូមមើលផងដែរ « ទ្រង់ជាពន្លឺខ្ញុំ » ទំនុកតម្កើង លេខ ៣៩ ។
ការកែលម្អការបង្រៀនរបស់យើង
ចែកចាយមេរៀនប្រើវត្ថុ ។ សូមអញ្ជើញសមាជិកគ្រួសារឲ្យស្វែងរកកម្មវត្ថុទាំងឡាយដែលពួកគេអាចប្រើដើម្បីជួយពួកគេឲ្យយល់គោលការណ៍ទាំងឡាយដែលបានរកឃើញនៅក្នុងព្រះគម្ពីរដែលពួកគេកំពុងអានជាមួយនឹងគ្រួសារមួយ ។ ជាឧទាហរណ៍ ពួកគេអាចប្រើទៀនដើម្បីតំណាងឲ្យពន្លឺនៃព្រះគ្រីស្ទ ( សូមមើល យ៉ូហាន ១:៤) ។
ព្រះយេហូវ៉ាបង្កើតផែនដី ដោយ វ៉លធើរ រ៉េន