« ថ្ងៃទី ៣០ ខែ មករា–ថ្ងៃទី ៥ ខែ កុម្ភៈ ។ ម៉ាថាយ ៤; លូកា ៤–៥ ៖ ‹ ព្រះវិញ្ញាណព្រះអម្ចាស់សណ្ឋិតលើខ្ញុំ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ៣០ ខែ មករា–ថ្ងៃទី ៥ ខែ កុម្ភៈ ។ ម៉ាថាយ ៤; លូកា ៤–៥ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣
ចូលទៅក្នុងទីរហោស្ថាន ដោយ អេវ៉ា ខូលេវ៉ា ធីម៉ូធី
ថ្ងៃទី ៣០ ខែ មករា–ថ្ងៃទី ៥ ខែ កុម្ភៈ
ម៉ាថាយ ៤; លូកា ៤–៥
« ព្រះវិញ្ញាណព្រះអម្ចាស់សណ្ឋិតលើខ្ញុំ »
នៅពេលបងប្អូនសិក្សា ម៉ាថាយ ៤ និង លូកា ៤–៥ សូមកត់ត្រាចំណាប់អារម្មណ៍ខាងវិញ្ញាណរបស់បងប្អូន ។ ការណ៍នេះនឹងធ្វើឲ្យមានការបំផុសគំនិត អំពីរបៀបបំពេញសេចក្ដីត្រូវការសមាជិកក្នុងថ្នាក់របស់បងប្អូនឲ្យបានល្អបំផុត ។ បងប្អូនក៏អាចពិចារណាប្រើ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ក៏ដូចជាគម្រោងមេរៀននេះផងដែរ ដើម្បីស្វែងរកគំនិតបន្ថែមទៀត ។
អញ្ជើញឲ្យចែកចាយ
ការអានសម្រាប់សប្ដាហ៍នេះរួមមាននូវសេចក្ដីថ្លែងការណ៍នេះ ៖ « គេក៏នឹកប្លែកពីសេចក្តីដែលទ្រង់បង្រៀនណាស់ ពីព្រោះទ្រង់មានព្រះបន្ទូលដោយអំណាច » ( លូកា ៤:៣២; សូមមើលផងដែរ ម៉ាកុស ១:២២ ) ។ សូមអញ្ជើញសមាជិកក្នុងថ្នាក់ឲ្យចែកចាយខគម្ពីរមកពី ម៉ាថាយ ៤ និង លូកា ៤–៥ ដែលបានជួយពួកគេឲ្យមានអារម្មណ៍ពីអំណាចខាងគោលលទ្ធិដោយខ្លួនពួកគេ ។
បង្រៀនគោលលទ្ធិ
ព្រះវរបិតាសួគ៌បានប្រទានអំណាច និងមធ្យោបាយឲ្យយើងដើម្បីតតាំងនឹងការល្បួង ។
-
ដំណើររឿងរបស់ព្រះអង្គសង្គ្រោះតតាំងនឹងសាតាំង អាចជួយសមាជិកថ្នាក់ឲ្យស្គាល់វិធីដែលសាតាំងព្យាយាមល្បួងពួកគេ ។ សមាជិកថ្នាក់អាចជ្រើសយកការល្បួងមួយនៅក្នុង ម៉ាថាយ ៤:១–១១ ឬ លូកា ៤:១–១៣ ហើយគិតអំពីការល្បួងមួយ ដែលទាក់ទងគ្នានឹងសម័យទំនើប ( សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » អាចជួយបាន ) ។ ហេតុអ្វីវាមានសារៈប្រយោជន៍ដើម្បីដឹងថា ព្រះអង្គសង្គ្រោះបានប្រឈមមុខនឹងការល្បួង ដែលស្រដៀងគ្នានឹងការល្បួងដែលយើងប្រឈមមុខនៅសព្វថ្ងៃដែរ ? ហេតុអ្វីព្រះគ្រីស្ទអាចតតាំងនឹងការល្បួងបាន ? សម្រាប់ឧទាហរណ៍ខាងបទគម្ពីរផ្សេងទៀតអំពីមនុស្សតតាំងនឹងសាតាំង សូមមើល លោកុប្បត្តិ ៣៩:៧–២០; នីហ្វៃទី២ ៤:១៦–៣៥ និង ម៉ូសេ ១:១០–២២ ។
-
តើអ្វីទៅដែលអាចជួយដល់សមាជិកក្នុងថ្នាក់ឲ្យតតាំងនឹងការល្បួង ? បងប្អូនអាចសូមឲ្យពួកគេរំឭក ម៉ាថាយ ៤:១–១១ ឬ លូកា ៤:១–១៣ ដើម្បីរៀនពីរបៀបដែលព្រះប្រាជ្ញាញាណរបស់ព្រះអង្គសង្គ្រោះអំពីព្រះគម្ពីរ បានជួយទ្រង់ឲ្យឆ្លើយតបនឹងសាតាំង ដូចដែលទ្រង់បានធ្វើ នៅពេលទ្រង់មានបន្ទូលថា « មានសេចក្តីចែងទុកមក » ។ សូមទុកពេលឲ្យសមាជិកក្នុងថ្នាក់រកមើលនៅក្រោមប្រធានបទ « ការល្បួង » នៅក្នុងសេចក្ដីណែនាំដល់បទគម្ពីរទាំងឡាយ ដែលអាចពង្រឹងពួកគេបាន នៅពេលពួកគេមានអារម្មណ៍ថាត្រូវបានល្បួង ។
ព្រះយេស៊ូវគ្រីស្ទគឺជាព្រះមែស៊ីដែលបានព្យាករទុក ។
-
ដើម្បីជួយសមាជិកក្នុងថ្នាក់របស់បងប្អូនឲ្យយល់ពីដំណើររឿងនៅក្នុង លូកា ៤:១៦–៣២ បានកាន់តែប្រសើរឡើង បងប្អូនអាចពន្យល់ថា ព្រះបរមងារជាព្រះមែស៊ី និងព្រះគ្រីស្ទ មានន័យថា « បានចាក់ប្រេងតាំង » ។ នៅពេលពួកគេអាន លូកា ៤:១៨–២១ សូមឲ្យពួកគេគិតអំពីអត្ថន័យនៃការនិយាយថា ព្រះយេស៊ូវគឺជាព្រះគ្រីស្ទ ជាព្រះមែស៊ី ឬព្រះដែលបានចាក់ប្រេងតាំង ។ ពួកគេក៏អាចរកឃើញផងដែរថា វានឹងមានសារៈប្រយោជន៍ដើម្បីអាន « ព្រះដែលបានចាក់ប្រេងតាំង » នៅក្នុងសេចក្ដីណែនាំដល់បទគម្ពីរទាំងឡាយ ។ តើព្រះយេស៊ូវប្រកាសថា ទ្រង់គឺជាព្រះមែស៊ីនៅសព្វថ្ងៃនេះតាមរបៀបណា ? សូមអញ្ជើញសមាជិកក្នុងថ្នាក់ឲ្យចែកចាយរបៀបដែលពួកគេបានដឹងថា ព្រះយេស៊ូវគ្រីស្ទគឺជាព្រះអង្គសង្គ្រោះរបស់ពួកគេ ។
-
ប្រហែលជាមានមេរៀនដ៏មានសារៈប្រយោជន៍មួយចំនួនដើម្បីរៀនសូត្រ តាមរយៈការស្វែងយល់ពីហេតុផលដែលប្រជាជនណាសារ៉ែតពុំទទួលយកព្រះយេស៊ូវ ថាជាព្រះមែស៊ីដែលបានព្យាករទុក ។ ឧទាហរណ៍ តើមានមូលហេតុណាខ្លះដែលបានស្នើនៅក្នុង លូកា ៤:២២–២៤ ? បន្ទាប់មក សមាជិកនៅក្នុងថ្នាក់អាចប្រៀបធៀបឥរិយាបថទាំងនេះជាមួយស្រីមេម៉ាយនៅក្រុងសារិបតា និងលោកណាម៉ាននៅក្នុងព្រះគម្ពីរសញ្ញាចាស់ មនុស្សដែលមិនមែនជាសាសន៍អ៊ីស្រាអែល ( សូមមើល លូកា ៤:២៥–២៧ ) ។ បងប្អូនអាចទាក់ទងសមាជិកក្នុងថ្នាក់មួយចំនួនជាមុន ហើយសូមឲ្យពួកគេមកកាន់ថ្នាក់រៀនដោយបានរៀបចំខ្លួន ដើម្បីសង្ខេបដំណើររឿងទាំងនេះនីមួយៗ ( សូមមើល ពង្សាវតារក្សត្រ ទី១ ១៧:៨–២៤; ពង្សាវតារក្សត្រ ទី២ ៥:១–១៧; លូកា ៤:១៦–៣០ ) ។ តើដំណើររឿងទាំងនេះបង្រៀនយើងអ្វីខ្លះ អំពីការមានសេចក្ដីជំនឿលើព្រះយេស៊ូវគ្រីស្ទ ? តើយើងមើលឃើញសារលិខិតផ្សេងៗសម្រាប់យើង ចេញពីក្នុងព្រះបន្ទូលរបស់ព្រះអង្គសង្គ្រោះទៅកាន់ប្រជាជនណាសារ៉ែតដែរឬទេ ?
ការធ្វើតាមព្រះគ្រីស្ទមានន័យថា ការបោះបង់ឆន្ទៈរបស់យើង និងការទទួលយកព្រះទ័យរបស់ទ្រង់ ។
-
ពេលខ្លះ ទិសដៅដែលព្រះអម្ចាស់ប្រទានឲ្យយើង ពីដំបូងឡើយវាហាក់ដូចជាពុំសមហេតុផលនោះទេ ។ សមាជិកក្នុងថ្នាក់អាចស្រាវជ្រាវក្នុង លូកា ៥:១–១១ ដោយរកមើលអ្វីដែលព្រះអង្គសង្គ្រោះបានសួរដល់ពេត្រុស និងហេតុផលដែលពេត្រុសប្រហែលជាមានការសង្ស័យពីសេចក្ដីបង្គាប់របស់ទ្រង់ ។ តើបទពិសោធន៍នេះអាចនឹងជះឥទ្ធិពលលើអារម្មណ៍របស់ពេត្រុសអំពីព្រះអង្គសង្គ្រោះ និងខ្លួនលោកយ៉ាងដូចម្ដេច ? បងប្អូនអាចអញ្ជើញសមាជិកក្នុងថ្នាក់ឲ្យចែកចាយបទពិសោធន៍នានា ដែលពួកគេបានបង្ហាញសេចក្ដីជំនឿរបស់ពួកគេលើការដឹកនាំដ៏ទេវភាព ទោះជាពុំមានការយល់ពេញលេញក្ដី ។ តើមានអ្វីបានកើតឡើង នៅពេលពួកគេបានអនុវត្តសេចក្ដីជំនឿរបស់ពួកគេ ?
រូបភាពព្រះយេស៊ូវគង់នៅឆ្នេរសមុទ្រមានបន្ទូលហៅពេត្រុស និងអនទ្រេ« ចូរមកតាមខ្ញុំៗ នឹងតាំងអ្នកឲ្យជាអ្នកនេសាទមនុស្សវិញ » ( ម៉ាថាយ ៤:១៩ ) ។
-
ដូចជាពួកនេសាទត្រីបាន « ទុករបស់ទាំងអស់ចោល » ( លូកា ៥:១១ ) ដើម្បីដើរតាមព្រះយេស៊ូវគ្រីស្ទដែរ មានរឿងដែលយើងត្រូវបោះចោលដើម្បីក្លាយជាពួកសិស្សរបស់ទ្រង់ ។ តើយើងរៀនអ្វីខ្លះមកពី ម៉ាថាយ ៤:១៨–២២ អំពីឥរិយាបថ និងសេចក្ដីជំនឿរបស់ពេត្រុស អនទ្រេ យ៉ាកុប និងយ៉ូហាន ? វាអាចនឹងមានសារៈប្រយោជន៍ដើម្បីយកសំណាញ់បង់ត្រីមកកាន់ថ្នាក់រៀន ។ បន្ទាប់មក សូមអញ្ជើញសមាជិកក្នុងថ្នាក់ឲ្យកត់ត្រាទុករឿង ដែលពួកគេស្ម័គ្រចិត្តដើម្បីបោះបង់ ឬបានបោះបង់រួចហើយដើម្បីដើរតាមព្រះគ្រីស្ទ និងដាក់វាទៅក្នុងសំណាញ់ ។ សូមពិចារណាអញ្ជើញសមាជិកក្នុងថ្នាក់ពីរបីនាក់ឲ្យចែកចាយ អំពីរបៀបដែលជីវិតរបស់ពួកគេបានផ្លាស់ប្ដូរ នៅពេលពួកគេបានជ្រើសរើសបោះបង់ចោលរបស់ទាំងអស់ដើម្បីធ្វើតាមព្រះគ្រីស្ទ ។
ធនធានបន្ថែមទាំងឡាយ
ប្រភេទនៃការល្បួង
ក្រោយពីថ្លែងអំពីការល្បួង ដែលព្រះអង្គសង្គ្រោះបានប្រឈមនៅក្នុងវាលរហោស្ថានរួចមក ប្រធាន ដេវីឌ អូ មិកឃេ បានកំណត់ពីការល្បួងបីប្រភេទ ៖
« ( ១ ) ការល្បួងនៃសេចក្ដីស្រេកឃ្លាន ឬតណ្ហា
« ( ២ ) ការបន្ទន់ទៅរកអំនួត ម៉ូតសម្លៀកបំពាក់ ឬភាពឥតប្រយោជន៍
« ( ៣ ) បំណងប្រាថ្នាចង់បានទ្រព្យសម្បត្តិខាងលោកិយ ឬអំណាច និងការគ្រប់គ្រងលើដែនដី ឬទ្រព្យសម្បត្តិរបស់មនុស្សលើផែនដី » ( Teachings of Presidents of the Church: David O. McKay [ ឆ្នាំ ២០០៣ ] ទំព័រ ៨២ ) ។
ការកែលម្អការបង្រៀនរបស់យើង
អរគុណដល់សិស្សរបស់បងប្អូន ។ « សូមកុំផ្តោតអារម្មណ៍តែលើមេរៀនខ្លាំងពេក រហូតដល់បងប្អូនភ្លេចអរគុណដល់អ្នករៀនចំពោះការចូលរួមចំណែករបស់ពួកគេ ។ ពួកគេចាំបាច់ត្រូវដឹងថា បងប្អូនមានអំណរគុណចំពោះការស្ម័គ្រចិត្តរបស់ពួកគេដើម្បីចែកចាយអំពីគំនិតយោបល់ និងទីបន្ទាល់របស់ពួកគេនោះ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៣ ) ។