« ថ្ងៃទី ៦–១២ ខែ កុម្ភៈ ។ យ៉ូហាន ២–៤ ៖ ‹ ត្រូវតែកើតជាថ្មី › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ៦–១២ ខែ កុម្ភៈ ។ យ៉ូហាន ២–៤ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
ថ្ងៃទី ៦–១២ ខែ កុម្ភៈ
យ៉ូហាន ២–៤
« ត្រូវតែកើតជាថ្មី »
ការអាន យ៉ូហាន ២–៤ គឺជាវិធីដ៏ល្អមួយដើម្បីចាប់ផ្ដើមរៀបចំខ្លួនបង្រៀន ។ សូមកត់ត្រាចំណាប់អារម្មណ៍ខាងវិញ្ញាណណាមួយ ដែលបងប្អូនទទួលបាន ហើយប្រើគម្រោងមេរៀននេះដើម្បីស្វែងរកការយល់ដឹង និងគំនិតបន្ថែមទៀតសម្រាប់ការបង្រៀន ។
អញ្ជើញឲ្យចែកចាយ
សូមសរសេរចំណងជើងចំនួនបីនៅលើក្ដារខៀន ៖ យ៉ូហាន ២, យ៉ូហាន ៣ និង យ៉ូហាន ៤ ។ សមាជិកក្នុងថ្នាក់អាចចំណាយពេលវេលាពីរបីនាទី ដើម្បីរំឭកជំពូកទាំងនេះឡើងវិញ រួចហើយសរសេរនៅក្រោមចំណងជើងនីមួយៗនូវខគម្ពីរមួយ ដែលបានជួយពួកគេឲ្យយល់ពីគោលលទ្ធិ និងព្រឹត្តិការណ៍នានានៅក្នុងជំពូកនោះ ។ សូមពិភាក្សាអំពីខគម្ពីរដែលពួកគេបានសរសេរ ។
បង្រៀនគោលលទ្ធិ
អព្ភូតហេតុរបស់ព្រះយេស៊ូវគ្រីស្ទ « សម្ដែងសិរីល្អរបស់ទ្រង់ » ។
-
គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ណែនាំឲ្យអាន យ៉ូហាន ២:១–១១ ចេញពីទស្សនវិស័យរបស់នរណាម្នាក់ ដែលមានវត្តមាន នៅពេលព្រះយេស៊ូវបានបំប្លែងទឹកឲ្យទៅជាស្រាទំពាំងបាយជូរ ។ ប្រហែលជាសមាជិកក្នុងថ្នាក់អាចចែកចាយការយល់ដឹង ដែលពួកគេបានទទួលមកពីការធ្វើដូច្នេះ ។ តើយើងរៀនអ្វីខ្លះ អំពីព្រះអង្គសង្គ្រោះចេញមកពីខគម្ពីរទាំងនេះ ? តើអព្ភូតហេតុនេះបានបង្ហាញពីសិរីល្អរបស់ព្រះតាមរបៀបណា ? ( សូមមើល ខទី ១១ ) ។
យើងអាចការពារទីកន្លែង និងរឿងដ៏ពិសិដ្ឋទាំងឡាយ ។
-
ដើម្បីជួយសមាជិកក្នុងថ្នាក់ឲ្យរៀនមកពីដំណើររឿង ដែលព្រះយេស៊ូវបានបណ្ដេញអ្នកប្ដូរប្រាក់ឲ្យចេញពីព្រះវិហារបរិសុទ្ធ នោះបងប្អូនអាចសូមឲ្យពួកគេគិតអំពីរឿងផ្សេងទៀត បន្ថែមលើរឿងព្រះវិហារបរិសុទ្ធ ដែលព្រះអម្ចាស់ចាត់ទុកថាពិសិដ្ឋ ។ តើយើងអាចជួយរក្សាបរិសុទ្ធភាពនៃរឿងដ៏ពិសិដ្ឋទាំងនេះបានដោយរបៀបណា ?
យើងត្រូវតែកើតជាថ្មី ដើម្បីចូលទៅក្នុងនគរព្រះបាន ។
-
តើយើងអាចពន្យល់ដល់នរណាម្នាក់អំពីអត្ថន័យនៃការកើតជាថ្មីយ៉ាងដូចម្ដេច ? សូមពិចារណាអញ្ជើញសមាជិកក្នុងថ្នាក់ឲ្យហាត់អនុវត្តរបៀបដែលពួកគេនឹងឆ្លើយសំណួរនេះ ជាមួយនឹងមនុស្សដែលអង្គុយនៅក្បែរពួកគេ ។ នៅពេលពួកគេធ្វើដូច្នោះ ពួកគេអាចពិភាក្សាសំណួរទាំងនេះបាន ៖ តើយើងរៀនបានអ្វីខ្លះមកពីព្រះបន្ទូលរបស់ព្រះយេស៊ូវនៅក្នុង យ៉ូហាន ៣:៣–៧ ? តើការប្រែចិត្ត ពិធីបុណ្យជ្រមុជទឹក និងពិធីបញ្ជាក់ជួយយើងឲ្យកើតជាថ្មីដោយរបៀបណា ? សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » អាចបន្ថែមយោបល់ដល់ការពិភាក្សានេះបាន ។
-
មនុស្សមួយចំនួនជឿថា បុគ្គលម្នាក់មិនអាចផ្លាស់ប្ដូរបានទេ ។ ប៉ុន្ដែ នីកូដេមគឺជាគំរូមួយអំពីមនុស្ស ដែលពិតជាបានផ្លាស់ប្ដូរ ដោយសារការធ្វើតាមដំណឹងល្អរបស់ព្រះយេស៊ូវគ្រីស្ទ ។ ដើម្បីជួយសមាជិកក្នុងថ្នាក់ឲ្យមើលឃើញពីការណ៍នេះ បងប្អូនអាចអញ្ជើញពួកគេឲ្យស្រាវជ្រាវក្នុង យ៉ូហាន ៣:១–២; យ៉ូហាន ៧:៤០–៥២ និង យ៉ូហាន ១៩:៣៩–៤០ ។ តើយើងរៀនអ្វីខ្លះ ចេញពីវគ្គបទគម្ពីរទាំងនេះអំពីឥរិយាបថ និងជំនឿរបស់នីកូដេម ? តើគាត់បានផ្លាស់ប្ដូរបន្តិចម្ដងៗតាមរបៀបណា ? តើយើងអាចចែកចាយគំរូអ្វីខ្លះ អំពីមនុស្សដែលបានផ្លាស់ប្ដូរដោយសារតែដំណឹងល្អ ?
ព្រះយេស៊ូវគ្រីស្ទប្រទាន « ទឹករស់ » និង « ស្បៀងអាហារ » នៃការធ្វើកិច្ចការល្អដល់យើង ។
-
រូបកាយយើងចាំបាច់ត្រូវមានអាហារ និងទឹកជារៀងរាល់ថ្ងៃ ។ ព្រះយេស៊ូវបានថ្លែងអំពីសេចក្ដីត្រូវការជាសាកលទាំងនេះ នៅពេលទ្រង់បានបង្រៀនដល់ស្ត្រីសាសន៍សាម៉ារី និងពួកសិស្សរបស់ទ្រង់ ( សូមមើល យ៉ូហាន ៤:៥–៣៤ ) ។ ដើម្បីជួយសមាជិកក្នុងថ្នាក់ឲ្យយល់ពីអ្វីដែលព្រះអង្គសង្គ្រោះកំពុងបង្រៀន បងប្អូនអាចដាក់រូបភាពអាហារ និងទឹកនៅលើក្ដារខៀន ហើយអញ្ជើញសមាជិកក្នុងថ្នាក់ឲ្យសរសេរនៅក្រោមរូបភាពនីមួយៗនូវសេចក្ដីពិតនានាអំពីអាហារ និងទឹកខាងវិញ្ញាណដែលព្រះយេស៊ូវបានបង្រៀន ។ តើព្រះអង្គសង្គ្រោះចម្អែតការស្រេកឃ្លានខាងវិញ្ញាណរបស់យើងដោយរបៀបណា ?
រូបភាពទឹកជ្រោះហូរព្រះយេស៊ូវគ្រីស្ទប្រទានទឹករស់ដល់យើង ។
-
ការសញ្ជឹងគិតអំពីការរីកចម្រើននៃទីបន្ទាល់របស់ស្ត្រីសាសន៍សាម៉ារីអំពីព្រះយេស៊ូវគ្រីស្ទ អាចជួយសមាជិកក្នុងថ្នាក់របស់បងប្អូនឲ្យពិចារណាអំពីរបៀបដែលពួកគេបានស្គាល់ទ្រង់ថាជាព្រះមែស៊ី ។ សូមរកមើលទាំងអស់គ្នាក្នុងថ្នាក់នូវពាក្យដែលស្ត្រីសាសន៍សាម៉ារីបានប្រើ ដើម្បីនិយាយអំពីព្រះអង្គសង្គ្រោះនៅក្នុង យ៉ូហាន ៤:៦–៣០ ។ តើពាក្យទាំងនេះចង្អុលបង្ហាញអ្វីខ្លះ អំពីចំណេះដឹងរបស់គាត់ថាព្រះយេស៊ូវគឺជានរណា ? តើយើងបានរីកចម្រើននៅក្នុងទីបន្ទាល់របស់យើងថា ទ្រង់គឺជាព្រះអង្គសង្គ្រោះរបស់យើងតាមរបៀបណា ?
ធនធានបន្ថែមទាំងឡាយ
តើការកើតជាថ្មីមានន័យដូចម្ដេច ?
អែលឌើរ ដេវីឌ អេ បែដណា បានបង្រៀន ៖ « ការប្រែចិត្តជឿ … គឺធំ មិនមែនតូចទេ—ជាការកើតជាថ្មីខាងវិញ្ញាណ និងជាការផ្លាស់ប្ដូរជាមូលដ្ឋាននៃអ្វីដែលយើងមានអារម្មណ៍ និងប្រាថ្នា ជាអ្វីដែលយើងគិត ហើយធ្វើ ព្រមទាំងអ្វីដែលជាអត្តសញ្ញាណរបស់យើងផងដែរ ។ ពិតណាស់ សារៈសំខាន់នៃដំណឹងល្អរបស់ព្រះយេស៊ូវគ្រីស្ទតម្រូវឲ្យមានការផ្លាស់ប្ដូរជាមូលដ្ឋាន និងជាអចិន្ដ្រៃយ៍នៅក្នុងនិស្ស័យរបស់យើង ដែលកើតមានតាមរយៈការពឹងផ្អែករបស់យើងទៅលើ ‹ បុណ្យគុណ និងសេចក្ដីមេត្តាករុណា និងព្រះគុណនៃព្រះមែស៊ីដ៏បរិសុទ្ធ › ( នីហ្វៃទី២ ២:៨ ) ។ នៅពេលយើងជ្រើសរើសធ្វើតាមលោកចៅហ្វាយ នោះយើងជ្រើសរើសការផ្លាស់ប្តូរ—ដើម្បីបានកើតជាថ្មីខាងវិញ្ញាណ » ( « Ye Must Be Born Again » Liahona ខែ ឧសភា ឆ្នាំ ២០០៧ ទំព័រ ២០ ) ។
ប្រធាន ដាល្លិន អេក អូក បានបង្រៀន ៖ « យើងបានកើតជាថ្មី នៅពេលយើងចូលទៅក្នុងទំនាក់ទំនងសេចក្ដីសញ្ញាមួយជាមួយនឹងព្រះអង្គសង្គ្រោះរបស់យើង ដោយការកើតអំពីទឹក ហើយអំពីព្រះវិញ្ញាណ ហើយដោយលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ។ យើងអាចរំឭកការកើតជាថ្មីនោះនៅរាល់ថ្ងៃឈប់សម្រាក នៅពេលយើងទទួលទានសាក្រាម៉ង់ ។ ពួកបរិសុទ្ធថ្ងៃចុងក្រោយបញ្ជាក់ថា អស់អ្នកដែលបានកើតជាថ្មីតាមរបៀបនេះគឺជាបុត្រាបុត្រីជាទីស្រឡាញ់ខាងវិញ្ញាណរបស់ព្រះយេស៊ូវគ្រីស្ទ ( សូមមើល ម៉ូសាយ ៥:៧; ១៥:៩–១៣; ២៧:២៥ ) ។ ទោះជាយ៉ាងណាក៏ដោយ ដើម្បីស្គាល់ពរជ័យដែលចង់បាននៃស្ថានភាពកើតជាថ្មីនេះ យើងត្រូវតែបន្តរក្សាសេចក្ដីសញ្ញារបស់យើង ហើយស៊ូទ្រាំដរាបដល់ចុងបញ្ចប់ » ( « Have You Been Saved? » Ensign ខែ ឧសភា ឆ្នាំ ១៩៩៨ ទំព័រ ៥៦ ) ។
ការកែលម្អការបង្រៀនរបស់យើង
គ្រូបង្រៀនពុំមែនពូកែជាងសិស្សនោះទេ ។ តួនាទីរបស់បងប្អូនក្នុងនាមជាគ្រូបង្រៀនមានសារៈសំខាន់ ប៉ុន្តែបងប្អូនពុំមែនជាប្រភពតែមួយនៃការបំផុសគំនិតនៅក្នុងថ្នាក់រៀនឡើយ ។ សូមជួយសមាជិកក្នុងថ្នាក់ឲ្យរៀនមកពីព្រះវិញ្ញាណ ហើយចែកចាយនឹងគ្នានូវអ្វីដែលពួកគេរៀន ។