« ថ្ងៃទី ៦–១២ ខែ កុម្ភៈ ។ យ៉ូហាន ២–៤ ៖ ‹ អ្នករាល់គ្នាត្រូវតែកើតជាថ្មី › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៦–១២ ខែ កុម្ភៈ ។ យ៉ូហាន ២–៤ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

រូបភាព

ព្រះយេស៊ូវកំពុងមានបន្ទូលជាមួយនីកូដេម

ថ្ងៃទី ៦–១២ ខែ កុម្ភៈ

យ៉ូហាន ២–៤

« អ្នករាល់គ្នាត្រូវតែកើតជាថ្មី »

នៅពេលបងប្អូនអាន យ៉ូហាន ២–៤ ព្រះវិញ្ញាណនឹងបង្រៀនបងប្អូននូវរឿងទាំងឡាយអំពីការប្រែចិត្តជឿរបស់បងប្អូនផ្ទាល់ ។ សូមកត់ចំណាំអំពីការបំផុសគំនិតរបស់ទ្រង់ ។ បងប្អូនអាចរកឃើញគំនិតខាងវិញ្ញាណបន្ថែមទៀតមកពីគំនិតយោបល់ការសិក្សានៅក្នុងគម្រោងមេរៀននេះ ។

កត់ត្រាចំណាប់អារម្មណ៍របស់បងប្អូន

នៅឯពិធីជប់លៀងក្នុងពិធីរៀបការមួយនៅស្រុកកាណា ព្រះគ្រីស្ទបានប្រែទឹកក្លាយទៅជាស្រា—ជាព្រឹត្តិការណ៍មួយដែលយ៉ូហានហៅថា « ទីសម្គាល់មុនដំបូង » ( យ៉ូហាន ២:១១ ) ។ នោះជាព្រឹត្តិការណ៍ពិតដែលមានច្រើនជាងម្តង ។ ខណៈដែលនេះជាអព្ភូតហេតុទីមួយ ដែលព្រះយេស៊ូវបានធ្វើជាសាធារណៈ វាក៏អាចជានិមិត្តរូបនៃការចាប់ផ្ដើមនូវអព្ភូតហេតុផ្សេងទៀត—ជាដំណើរការដែលដួងចិត្តរបស់យើងត្រូវបានផ្លាស់ប្រែ នៅពេលយើងប្រែក្លាយកាន់តែដូចជាព្រះអង្គសង្គ្រោះរបស់យើង ។ អព្ភូតហេតុក្នុងជីវិតនេះ ចាប់ផ្ដើមដោយការសម្រេចចិត្តដើម្បីដើរតាមព្រះយេស៊ូវគ្រីស្ទដើម្បីផ្លាស់ប្ដូរ ហើយរស់នៅក្នុងជីវិតដ៏ប្រសើរតាមរយៈទ្រង់ ។ អព្ភូតហេតុនេះអាចជាការផ្លាស់ប្ដូរអស់មួយជីវិត ដែលការ « កើតជាថ្មី » គឺជារបៀបមួយដ៏ល្អបំផុតដើម្បីពិពណ៌នាអំពីវា ( យ៉ូហាន ៣:៧ ) ។ ប៉ុន្តែការកើតជាថ្មី គឺគ្រាន់តែជាការចាប់ផ្ដើមនៃផ្លូវនៃភាពជាសិស្សប៉ុណ្ណោះ ។ ព្រះបន្ទូលរបស់ព្រះគ្រីស្ទទៅកាន់ស្ត្រីសាសន៍សាម៉ារី នៅឯអណ្ដូងទឹករំឭកយើងថា បើយើងបន្ដនៅលើផ្លូវនេះ នៅទីបំផុតដំណឹងល្អនឹងប្រែក្លាយជា « អណ្ដូងទឹក » នៅក្នុងខ្លួនយើង « រន្ធទឹក » នៅក្នុងយើងនោះ ដែលផុសឡើងដល់ទៅបានជីវិតអស់កល្បជានិច្ច » ( យ៉ូហាន ៤:១៤ ) ។

រូបភាព

រូបសញ្ញាការសិក្សាផ្ទាល់ខ្លួន

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

យ៉ូហាន ២:១–១១

អព្ភូតហេតុរបស់ព្រះយេស៊ូវគ្រីស្ទ « សម្ដែងសិរីល្អរបស់ទ្រង់ » ។

កាលដែលបងប្អូនអានអំពីព្រះអង្គសង្គ្រោះផ្លាស់ប្ដូរទឹកទៅជាស្រានៅក្នុង យ៉ូហាន ២:១–១១ បងប្អូនអាចទទួលបានការយល់ដឹងបន្ថែមទៀត ដោយការពិចារណាពីទស្សនវិស័យរបស់មនុស្សផ្សេងទៀត ដែលបាននៅទីនោះ រួមមានទាំង ម៉ារា ពួកសិស្ស និងមនុស្សដទៃទៀត ។ ប្រសិនបើបងប្អូនបានធ្វើជាសាក្សីនៃព្រឹត្តការណ៍ទាំងឡាយដែលបានពិពណ៌នានៅទីនេះ តើអ្វីទៅជាចំណាប់អារម្មណ៍របស់បងប្អូនអំពីព្រះយេស៊ូវ ។ តើអព្ភូតហេតុនេះបង្រៀនបងប្អូនអ្វីខ្លះអំពីទ្រង់ ?

យ៉ូហាន ៣:១–២១

ខ្ញុំត្រូវកើតជាថ្មីដើម្បីចូលក្នុងនគររបស់ព្រះ ។

នៅពេលនីកូដេមបានមករកព្រះយេស៊ូវជាសម្ងាត់ គាត់ជាអ្នកសង្កេតមើលយ៉ាងប្រុងប្រយ័ត្ន ។ ទោះជាយ៉ាងណាក៏ដោយ ក្រោយមកគាត់បានការពារព្រះយេស៊ូវជាសាធារណៈ ( សូមមើល យ៉ូហាន ៧:៤៥–៥២ ) ហើយចូលរួមនឹងពួកអ្នកជឿនៅឯទីបញ្ចុះព្រះសពរបស់ព្រះអង្គសង្គ្រោះ ( សូមមើល យ៉ូហាន ១៩:៣៨–៤០) ។ តើបងប្អូនរកឃើញការបង្រៀនអ្វីខ្លះនៅក្នុង យ៉ូហាន ៣:១–២១ ដែលអាចបំផុសគំនិតនីកូដេមដើម្បីធ្វើតាមព្រះយេស៊ូវ ហើយត្រូវបានកើតជាថ្មីឡើងវិញ ?

ព្យាការី យ៉ូសែប ស្ម៊ីធ បានបង្រៀនថា « ការកើតជាថ្មីកើតមកពីព្រះវិញ្ញាណនៃព្រះតាមរយៈពិធីបរិសុទ្ធ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ៩៥ ) ។ តើពិធីបុណ្យជ្រមុជទឹក និងពិធីបញ្ជាក់របស់បងប្អូន—ការ « កើតអំពីទឹក ហើយអំពីព្រះវិញ្ញាណ » ( យ៉ូហាន ៣:៥ )—ដើរតួអ្វីខ្លះនៅក្នុងការកើតជាថ្មីរបស់បងប្អូន ? តើបងប្អូនកំពុងធ្វើអ្វីខ្លះដើម្បីបន្ដដំណើរការនៃការផ្លាស់ប្ដូរនេះ ? ( សូមមើល អាលម៉ា ៥:១១–១៤ ) ។

សូមមើលផងដែរ ម៉ូសាយ ៥:៧; ២៧:២៥–២៦; ដេវីឌ អេ បែដណា « Ye Must Be Born Again » Liahona ខែ ឧសភា ឆ្នាំ ២០០៧ ទំព័រ ១៩–២២ ។

យ៉ូហាន ៣:១៦–១៧

ព្រះវរបិតាសួគ៌បង្ហាញសេចក្ដីស្រឡាញ់របស់ទ្រង់ចំពោះខ្ញុំតាមរយៈព្រះយេស៊ូវគ្រីស្ទ ។

អែលឌើរ ជែហ្វ្រី អ័រ ហូឡិន បានបង្រៀនថា « សេចក្តីពិត ដ៏មហិមាបំផុតនៃគ្រប់ទាំងភាពអស់កល្បជានិច្ចគឺថា ព្រះស្រឡាញ់ យើង ដោយអស់ពីដួងហឫទ័យ គំនិត ពលំ ហើយអស់ពីកម្លាំងរបស់ទ្រង់ » ( « Tomorrow the Lord Will Do Wonders among You » Liahona ខែ ឧសភា ឆ្នាំ ២០១៦ ទំព័រ ១២៧ ) ។ តើបងប្អូនទទួលអារម្មណ៍ពីសេចក្ដីស្រឡាញ់របស់ព្រះតាមរយៈអំណោយនៃព្រះរាជបុត្រារបស់ទ្រង់យ៉ាងដូចម្ដេច ?

ពិធីសាក្រាម៉ង់ផ្ដល់ជាពេលមួយដើម្បីនឹកគិតអំពីសេចក្ដីស្រឡាញ់របស់ព្រះ និងអំណោយទានជាព្រះរាជបុត្រារបស់ទ្រង់ ។ តើទំនុកតម្កើងសាក្រាម៉ង់ណាខ្លះ ជួយបងប្អូនឲ្យទទួលអារម្មណ៍នៃសេចក្ដីស្រឡាញ់នេះ ? តើបងប្អូនអាចធ្វើអ្វីខ្លះដើម្បីធ្វើឲ្យពិធីសាក្រាម៉ង់កាន់តែមានអត្ថន័យ ?

កាលដែលបងប្អូនបន្តអានអំពីការបង្រៀន និងការងារបម្រើរបស់ព្រះអង្គសង្គ្រោះ សូមសួរខ្លួនឯងថាតើអ្វីៗដែលបងប្អូនអានជួយបងប្អូនឲ្យយល់ និងទទួលអារម្មណ៍នៃសេចក្ដីស្រឡាញ់របស់ព្រះយ៉ាងដូចម្ដេចដែរ ?

យ៉ូហាន ៤:២៤

តើព្រះទ្រង់ជាវិញ្ញាណឬ ?

មនុស្សមួយចំនួនអាចនឹងភាន់ច្រឡំដោយសេចក្ដីថ្លែងរបស់ព្រះយេស៊ូវថា ព្រះគឺជាវិញ្ញាណ ។ ការបកប្រែដោយយ៉ូសែប ស្ម៊ីធអំពីខគម្ពីរនេះផ្ដល់នូវការបញ្ជាក់អះអាងយ៉ាងសំខាន់មួយ ៖ « ចំពោះអស់អ្នកដែលបានធ្វើដូច្នោះ នោះព្រះបានសន្យានឹងប្រទានព្រះវិញ្ញាណរបស់ទ្រង់ » ( សូមមើល ការបកប្រែដោយយ៉ូសែប ស៊្មីធ យ៉ូហាន ៤:២៦ ) ។ វិវរណៈសម័យទំនើបក៏បង្រៀនផងដែរថា ព្រះមានព្រះកាយជាសាច់ និងឆ្អឹង ( សូមមើល គោលលទ្ធិ និង សេចក្ដីសញ្ញា ១៣០:២២–២៣; សូមមើលផងដែរ លោកុប្បត្តិ ៥:១–៣; ហេព្រើរ ១:១–៣ ) ។

យ៉ូហាន ៤:៥–២៦

ព្រះគ្រីស្ទបានប្រទានទឹករស់របស់ទ្រង់ដល់ខ្ញុំ ។

តើព្រះយេស៊ូវចង់មានន័យយ៉ាងណា ពេលទ្រង់ប្រាប់ដល់ស្ត្រីសាសន៍សាម៉ារីថាតែអ្នកណាដែលផឹកទឹកទ្រង់ឲ្យ នោះនឹងមិនស្រេកទៀតឡើយ ? តើដំណឹងល្អដូចជាទឹករស់យ៉ាងដូចម្ដេច ?

ដំណឹងល្អរបស់ព្រះគ្រីស្ទគឺជាទឹករស់ដែលបីបាច់ដល់ព្រលឹងរបស់យើង ។

សារលិខិតមួយរបស់ព្រះអង្គសង្គ្រោះទៅដល់ស្ត្រីសាសន៍សាម៉ារី គឺថារបៀបដែលយើងថ្វាយបង្គំគឺសំខាន់ជាងកន្លែងដែលយើងថ្វាយបង្គំ ( សូមមើល យ៉ូហាន ៤:២១–២៤ ) ។ តើបងប្អូនធ្វើអ្វីខ្លះដើម្បី « ថ្វាយបង្គំព្រះវរបិតាដោយវិញ្ញាណ និងសេចក្តីពិត » ? ( យ៉ូហាន ៤:២៣ ) ។

សូមមើលផងដែរ សេចក្ដីណែនាំដល់បទគម្ពីរទាំងឡាយ « ថ្វាយបង្គំ, ការថ្វាយបង្គំ » នៅគេហទំព័រ scriptures.ChurchofJesusChrist.org; ឌីន អិម ដេវីស « The Blessings of Worship » Liahona ខែ វិច្ឆិកា ឆ្នាំ ២០១៦ ទំព័រ ៩៣–៩៥ ។

រូបភាព

រូបសញ្ញាការសិក្សាជាគ្រួសារ

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

យ៉ូហាន ២–៤ ។នៅពេលគ្រួសាររបស់បងប្អូនអានជំពូកទាំងនេះក្នុងសប្ដាហ៍នេះ សូមផ្ដោតយកចិត្តទុកដាក់ជាពិសេសទៅលើរបៀបដែលព្រះអង្គសង្គ្រោះប្រើអ្វីៗក្នុងជីវិតប្រចាំថ្ងៃ—កំណើត ខ្យល់ ទឹក និងអាហារ—ដើម្បីបង្រៀនអំពីសេចក្ដីពិតខាងវិញ្ញាណ ។ តើវត្ថុអ្វីខ្លះនៅក្នុងផ្ទះរបស់បងប្អូន ដែលបងប្អូនអាចប្រើដើម្បីបង្រៀនអំពីសេចក្ដីពិតខាងវិញ្ញាណ ?

កាលដែលបងប្អូនសិក្សាជំពូកទាំងនេះ សូមពិចារណាក្នុងការមើលវីដេអូទាំងនេះជាមួយគ្នា ដែលពិពណ៌នាអំពីព្រឹត្តិការណ៍ទាំងនេះ ៖ « Jesus Turns Water into Wine » « Jesus Cleanses the Temple » « Jesus Teaches of Being Born Again » និង « Jesus Teaches a Samaritan Woman » ( នៅលើគេហទំព័រ ChurchofJesusChrist.org ) ។

យ៉ូហាន ២:១៣–១៧ ។តើឥទ្ធិពលមិនបរិសុទ្ធអ្វីខ្លះ ដែលគ្រួសារបងប្អូនចាំបាច់ត្រូវចៀសវាងកុំឲ្យមានក្នុងផ្ទះបងប្អូន ដើម្បីវានឹងក្លាយជាកន្លែងពិសិដ្ឋមួយ—ដូចជាព្រះវិហារបរិសុទ្ធនោះ ? តើបងប្អូននឹងធ្វើអ្វីខ្លះដើម្បីចៀសវាងពីរឿងទាំងនោះ ?

យ៉ូហាន ៣:១–៦ ។សូមនិយាយជាមួយគ្រួសាររបស់បងប្អូនអំពីអព្ភូតហេតុនៃការពពោះ និងការផ្ដល់កំណើត—ដំណើរការនៃការបង្កើតជីវិតនិងសតិបញ្ញា ។ ព្រះគ្រីស្ទបានបង្រៀនថា យើងត្រូវតែកើតជាថ្មីពីមុនចូលទៅក្នុងនគររបស់ព្រះ ។ ហេតុអ្វីការកើតជាថ្មីគឺជាការប្រៀបធៀបដ៏ល្អមួយដែលតម្រូវឲ្យយើងត្រូវផ្លាស់ប្ដូរពីមុនយើងអាចចូលទៅក្នុងនគររបស់ព្រះ ? តើយើងដកពិសោធន៍អំពីដំណើរការនៃការកើតជាថ្មីខាងវិញ្ញាណដោយរបៀបណា ?

យ៉ូហាន ៣:១៦–១៧ ។សូមអញ្ជើញសមាជិកគ្រួសារឲ្យថាខគម្ពីរទាំងនេះឡើងវិញជាពាក្យសម្តីរបស់ពួកគេផ្ទាល់ ដូចជាពួកគេកំពុងពន្យល់វាទៅមិត្តម្នាក់ ។ តើព្រះយេស៊ូវគ្រីស្ទបានជួយយើងឲ្យទទួលអារម្មណ៍នៃសេចក្ដីស្រឡាញ់របស់ព្រះតាមរបៀបណា ?

យ៉ូហាន ៤:៥–១៥ ។តើព្រះអង្គសង្គ្រោះកំពុងបង្រៀនយើងអ្វីខ្លះ នៅពេលទ្រង់ប្រៀបធៀបដំណឹងល្អរបស់ទ្រង់ទៅនឹងទឹករស់ ? ប្រហែលជាគ្រួសាររបស់បងប្អូនអាចរកមើលទឹកដែលកំពុងហូរ ហើយពិពណ៌នាអំពីគុណភាពនៃទឹកនោះ ។ ហេតុអ្វីយើងត្រូវការទឹកទទួលទានប្រចាំថ្ងៃ ? តើដំណឹងល្អរបស់ព្រះយេស៊ូវគ្រីស្ទ ដូចជា« រន្ធទឹកនៅក្នុងអ្នកនោះ ដែលផុសឡើងដល់ទៅបានជីវិតអស់កល្បជានិច្ច » យ៉ាងដូចម្ដេច ? ( យ៉ូហាន ៤:១៤ ) ។

សម្រាប់គំនិតបន្ថែមដើម្បីបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ខ្ញុំស្គាល់ក្ដីស្នេហ៍ព្រះសង្គ្រោះ » សៀវភៅចម្រៀងកុមារ ទំព័រ ៤២ ។

ការកែលម្អដល់ការសិក្សាផ្ទាល់ខ្លួន

ស្វែងរកនិមិត្តសញ្ញា ។ ជាញឹកញាប់ ព្រះគម្ពីរប្រើវត្ថុ ព្រឹត្តិការណ៍ ឬសកម្មភាពដើម្បីតំណាងឲ្យសេចក្ដីពិតខាងវិញ្ញាណ ។ ͔͔និមិត្តសញ្ញាទាំងនេះអាចពង្រីកការយល់ដឹងរបស់បងប្អូនអំពីគោលលទ្ធិដែលត្រូវបានបង្រៀន ។ ឧទាហរណ៍ ព្រះអង្គសង្គ្រោះបានប្រៀបប្រដូចការប្រែចិត្តជឿទៅនឹងការកើតជាថ្មី ។