« ថ្ងៃទី ២០–២៦ ខែ កុម្ភៈ ។ ម៉ាថាយ ៦–៧ ៖ ‹ ទ្រង់បង្រៀនដូចជាមានអំណាច › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០១៩ )

« ថ្ងៃទី ២០–២៦ ខែ កុម្ភៈ ។ ម៉ាថាយ ៦–៧ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

រូបភាព

ព្រះយេស៊ូវកំពុងបង្រៀននៅក្បែរឆ្នេរសមុទ្រ

ព្រះយេស៊ូវកំពុងបង្រៀនមនុស្សនៅក្បែរឆ្នេរសមុទ្រ ដោយ ជេមស៍ ធីសត

ថ្ងៃទី ២០–២៦ ខែ កុម្ភៈ

ម៉ាថាយ ៦–៧

« ទ្រង់បង្រៀនដូចជាមានអំណាច »

នៅពេលបងប្អូនរៀបចំខ្លួនបង្រៀន សូមចាប់ផ្ដើមដោយការរៀបចំខ្លួនរបស់បងប្អូន ។ សូមសិក្សា ម៉ាថាយ ៦–៧ ហើយកត់ត្រាចំណាប់អារម្មណ៍ខាងវិញ្ញាណរបស់បងប្អូន ។ ការណ៍នេះនឹងជួយបងប្អូនឲ្យទទួលវិវរណៈអំពីរបៀប ដើម្បីបំពេញសេចក្ដីត្រូវការសមាជិកក្នុងថ្នាក់របស់បងប្អូនឲ្យបានល្អបំផុត ។ បន្ទាប់មក សូមស្រាវជ្រាវគម្រោងមេរៀននេះដើម្បីទទួលបានគំនិតសម្រាប់ការបង្រៀន ។

រូបភាព

រូបតំណាងការចែកចាយ

អញ្ជើញឲ្យចែកចាយ

សូមអញ្ជើញសមាជិកក្នុងថ្នាក់ឲ្យចែកចាយថា តើវគ្គណាមួយនៅក្នុងទេសនកថានៅលើភ្នំ ដែលពួកគេមានអារម្មណ៍ថា ជារឿងចាំបាច់បំផុតសម្រាប់សព្វថ្ងៃនេះ ។ សូមលើកទឹកចិត្តសមាជិកក្នុងថ្នាក់ឲ្យដាក់បន្ថែមការយល់ដឹងពីគ្នាទៅវិញទៅមក ។

រូបភាព

រូបតំណាងការបង្រៀន

បង្រៀនគោលលទ្ធិ

ម៉ាថាយ ៦–៧

ប្រសិនបើយើងស្ដាប់ ហើយធ្វើតាមការបង្រៀនរបស់ព្រះអម្ចាស់ នោះជីវិតរបស់យើងនឹងបានស្ថាបនាឡើងនៅលើគ្រឹះដ៏រឹងមាំមួយ ។

តើការបង្រៀនជាក់លាក់អ្វីទៅនៅក្នុង ម៉ាថាយ ៦–៧ ដែលនឹងមានប្រយោជន៍បំផុតដល់មនុស្សដែលយើងបង្រៀន ? សូមពិចារណាសរសេរសេចក្ដីយោងបីបួននៅលើក្ដារខៀនដែលចេញពី ម៉ាថាយ ៦–៧ ដែលមាននូវការបង្រៀនទាំងនេះ ។ សមាជិកក្នុងថ្នាក់អាចជ្រើសយកសេចក្ដីយោងមួយមកសិក្សាដោយស្ងៀមស្ងាត់ រួចហើយសរសេរនៅលើក្ដារខៀននូវសេចក្ដីពិតខាងវិញ្ញាណនានាដែលពួកគេរៀន ។ តើការបង្រៀនទាំងនេះបានជះឥទ្ធិពលដល់ជីវិតរបស់យើងតាមរបៀបណា ?
ព្រះអង្គសង្គ្រោះបានបញ្ចប់ទេសនកថារបស់ទ្រង់ជាមួយនឹងពាក្យប្រៀបប្រដូចមួយ ដែលអាចនឹងជួយសមាជិកក្នុងថ្នាក់ឲ្យយល់កាន់តែច្បាស់ អំពីសារៈសំខាន់នៃការរស់នៅតាមការបង្រៀនរបស់ព្រះអង្គសង្គ្រោះ ( សូមមើល ម៉ាថាយ ៧:២៤–២៧; សូមមើលផងដែរ ហេលេមិន ៥:១២ ) ។ ដើម្បីស្រមៃឃើញពាក្យប្រៀបប្រដូចនេះ សមាជិកក្នុងថ្នាក់អាចធ្វើការរួមគ្នាដើម្បីសង់គ្រឹះដ៏រឹងមាំមួយដោយប្រើដុំឈើ ពែង ឬសម្ភារផ្សេងទៀត រួចហើយសាកល្បងពីភាពរឹងមាំនៃគ្រឹះរបស់ពួកគេ ។ ប្រហែលជាពួកគេក៏អាចបិទស្លាកលើសម្ភារសង់របស់ពួកគេនោះជាមួយនឹងអ្វីៗដែលពួកគេអាចធ្វើបាន ដើម្បីអនុវត្តតាមការបង្រៀនរបស់ព្រះអង្គសង្គ្រោះ ។ តើការធ្វើរឿងទាំងនេះអាចជួយយើងឲ្យតតាំងនឹងព្យុះភ្លៀងនៃជីវិតតាមរបៀបណា ?

ម៉ាថាយ ៦:៥–១៣

ព្រះអង្គសង្គ្រោះបានបង្រៀនយើងអំពីរបៀបអធិស្ឋាន ។

ការសិក្សាអំពីការអធិស្ឋានរបស់ព្រះអម្ចាស់អាចនឹងជួយសមាជិកក្នុងថ្នាក់ឲ្យស្គាល់អំពីរបៀប ដែលពួកគេអាចកែលម្អការអធិស្ឋានរបស់ពួកគេផ្ទាល់ តាមរយៈការធ្វើតាមគំរូរបស់ព្រះអម្ចាស់ ។ បងប្អូនអាចអញ្ជើញពួកគេឲ្យសរសេរនៅលើក្ដារខៀននូវឃ្លាដកស្រង់ចេញពី ម៉ាថាយ ៦:៩–១៣ ( ឬ លូកា ១១:១–៤ ) ដែលសំខាន់ចំពោះពួកគេ ។ នៅពេលយើងសញ្ជឹងគិតអំពីព្រះបន្ទូលរបស់ព្រះអង្គសង្គ្រោះ តើយើងរៀនបានអ្វីខ្លះអំពីការអធិស្ឋាន ? វាអាចជួយសមាជិកក្នុងថ្នាក់ឲ្យចេះថ្លែងឡើងវិញនូវឃ្លាមួយចំនួនរបស់ព្រះអង្គសង្គ្រោះ ដូចជាអ្វីដែលពួកគេអាចនឹងនិយាយ នៅក្នុងការអធិស្ឋានរបស់ពួកគេផ្ទាល់ ។ ឧទាហរណ៍ ឃ្លាថា « សូមប្រទានអាហារដែលយើងខ្ញុំត្រូវការនៅថ្ងៃនេះ » អាចថ្លែងឡើងវិញថា « សូមជួយទូលបង្គំនៅក្នុងការខិតខំរបស់ទូលបង្គំដើម្បីផ្គត់ផ្គង់ដល់គ្រួសាររបស់ទូលបង្គំ » ។
បន្ទាប់ពីអាន ម៉ាថាយ ៦:៥–១៣ រួមគ្នាក្នុងថ្នាក់ហើយ បងប្អូនអាចពិភាក្សាពីសំណួរទាំងនេះបាន ៖ តើការអធិស្ឋានបានពង្រឹងដល់ទំនាក់ទំនងរបស់បងប្អូនជាមួយនឹងព្រះវរបិតាសួគ៌ដោយរបៀបណា ? តើការអធិស្ឋានបានជួយបងប្អូនឲ្យដឹងពីព្រះទ័យរបស់ព្រះយ៉ាងដូចម្ដេច ?

ម៉ាថាយ ៧:៧–១១

ព្រះវរបិតាសួគ៌ឆ្លើយតបការអធិស្ឋាន ។

ដើម្បីជួយសមាជិកក្នុងថ្នាក់ឲ្យពង្រឹងសេចក្ដីជំនឿរបស់ពួកគេថា ព្រះនឹងស្ដាប់ឮ ហើយឆ្លើយតបការអធិស្ឋានរបស់ពួកគេ នោះបងប្អូនអាចសរសេរពាក្យ ទូលសូម ស្វែងរក និង គោះ ដាក់នៅលើក្ដារខៀន ។ បន្ទាប់មក សមាជិកក្នុងថ្នាក់អាចស្រាវជ្រាវបទគម្ពីររកគំរូរបស់មនុស្សដែល « បានទូលសូម » « បានស្វែងរក » ហើយ « បានគោះ » ( ឧទាហរណ៍ សូមមើល នីហ្វៃទី១ ១១:១; អេធើរ ២:១៨–៣:៦; យ៉ូសែប ស្ម៊ីធ—ប្រវត្តិ ១:១១–១៧ ) ។ តើយើងរៀនបានអ្វីខ្លះមកពីគំរូទាំងនេះ អំពីការទទួលបានចម្លើយចំពោះការអធិស្ឋានរបស់យើង ?
បរិបទសំខាន់មួយចំនួនសម្រាប់ ម៉ាថាយ ៧:៧–១១ អាចរកឃើញនៅក្នុង ការបកប្រែដោយយ៉ូសែប ស្ម៊ីធ ម៉ាថាយ ៧:១២–១៧ ( នៅក្នុងសេចក្ដីណែនាំដល់បទគម្ពីរទាំងឡាយ ) ។ នៅក្នុងខគម្ពីរទាំងនេះ ពួកសិស្សរបស់ព្រះយេស៊ូវបានរំពឹងរកមើលនូវហេតុផលមួយចំនួនដែលមនុស្សអាចមាន ដើម្បីពុំខិតខំស្វែងរកសេចក្ដីពិតមកពីព្រះវរបិតាសួគ៌ ។ បងប្អូនអាចសូមឲ្យសមាជិកក្នុងថ្នាក់នឹកស្រមៃថា ពួកគេមានមិត្តម្នាក់ដែលរុញរាក្នុងការស្វែងរកការដឹកនាំ ឬពរជ័យមកពីព្រះអម្ចាស់ ។ តើសមាជិកក្នុងថ្នាក់អាចនឹងនិយាយអ្វីខ្លះ ដើម្បីលើកទឹកចិត្តមិត្តម្នាក់នេះ ? តើពួកគេអាចនឹងប្រើប្រាស់ព្រះបន្ទូលរបស់ព្រះអង្គសង្គ្រោះនៅក្នុង ម៉ាថាយ ៧:៧–១១ តាមរបៀបណា ?

ម៉ាថាយ ៧:១៥–២០

យើងអាចស្គាល់ព្យាការីពិត និងព្យាការីក្លែងក្លាយដោយផលរបស់ពួកគេបាន ។

សមាជិកក្នុងថ្នាក់របស់បងប្អូនទំនងជាបានឃើញទស្សនៈខុសឆ្គង និងការបញ្ឆោតផ្សេងទៀតរបស់មារសត្រូវ មិនថានៅលើអ៊ីនធឺណិត ឬមកពីប្រភពផ្សេងទៀតនោះទេ ។ ពួកគេក៏អាចបានស្ដាប់ឮមនុស្សដទៃទៀតរិះគន់ពួកអ្នកបម្រើរបស់ព្រះអម្ចាស់ផងដែរ ។ តើបងប្អូនអាចជួយពួកគេឲ្យយល់ពីរបៀបបែងចែកព្យាការី និងការបង្រៀនក្លែងក្លាយ ចេញពីព្យាការី និងការបង្រៀនពិតតាមរបៀបណា ? បងប្អូនអាចដាក់បង្ហាញផ្លែឈើបីបួនចំណិត ហើយសួរថា តើយើងអាចទាយថា ផ្លែឈើនេះមកពីដើមណាបានទេ ។ តើលំហាត់នេះជួយយើងឲ្យយល់ពី ម៉ាថាយ ៧:១៥–២០ ដោយរបៀបណា ? បងប្អូនក៏អាចអានរួមគ្នានូវសារលិខិតមួយចំនួនថ្មីៗមកពីព្យាការីដែលនៅរស់ផងដែរ ។ តើ « ផល » ឬលទ្ធផលអ្វីខ្លះដែលកើតចេញពីការទូន្មានរបស់ពួកលោក ?

រូបភាព
ផ្លែក្រូច

យើងអាចស្គាល់ព្យាការីពិតតាមរយៈផលរបស់ពួកលោក ។
ម៉ាថាយ ៧:១៥–២០ អាចជួយស្ថាបនាសេចក្ដីជំនឿរបស់សមាជិកក្នុងថ្នាក់ទៅលើបេសកកម្មដ៏ទេវភាពរបស់ព្យាការី យ៉ូសែប ស្ម៊ីធ ។ តើផលផ្លែនៃកិច្ចការដែល យ៉ូសែប ស្ម៊ីធ សម្រេចបានមានអ្វីខ្លះ ? សម្រាប់គំនិតមួយចំនួន សូមមើលសារលិខិតរបស់អែលឌើរ នែល អិល អាន់ឌើរសិន « Joseph Smith » ( Liahona ខែ វិច្ឆិកា ឆ្នាំ ២០១៤ ទំព័រ ២៨–៣១ ) ។ តើយើងអាចប្រើពាក្យប្រៀបប្រដូចរបស់ព្រះអង្គសង្គ្រោះនៅក្នុង ម៉ាថាយ ៧:១៥–២០ ដើម្បីថ្លែងទីបន្ទាល់ទៅកាន់មិត្តភក្ដិ និងគ្រួសាររបស់យើងអំពីព្យាការី យ៉ូសែប ស្ម៊ីធ តាមរបៀបណា ?

ការកែលម្អការបង្រៀនរបស់យើង

កុំខ្លាចភាពស្ងៀមស្ងាត់ ។ « សំណួរល្អត្រូវការពេលវេលាដើម្បីឆ្លើយ ។ វាតម្រូវឲ្យមានការពិចារណា ការស្រាវជ្រាវ និងការបំផុសគំនិត ។ ពេលវេលាដែលបងប្អូនចំណាយពេលរង់ចាំចម្លើយចំពោះសំណួរមួយ អាចជាពេលដ៏ពិសិដ្ឋមួយដើម្បីធ្វើការពិចារណា ។ សូមចៀសវាងពីការល្បួងឲ្យបញ្ចប់ពេលវេលានេះឆាប់ពេក តាមរយៈការឆ្លើយនឹងសំណួរនោះដោយខ្លួនឯង ឬបន្ដទៅធ្វើអ្វីផ្សេងទៀត » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣១ ) ។