First Furrow, jān James Taylor Harwood

Māe 17–23

Katak im Bujen Ko 51–57

“Ribōk eddo eo loe e Tiljek, e Jim̧we, im Mālōtlōt”

Jet iien im̧we kōn ta eo n̄an katakin emaron̄ itok ilo am̧ kōmeļeļe kōn jeje ko rekwojarjar n̄an ro uwaan baam̧le eo ak m̧ōttam̧.

Je En̄jake ko Rej Im̧we Eok

Kajjitōk bwe ren Kwaļo̧k

Ļōmņak n̄an kwaļo̧k naan kein jān Elder Quentin L. Cook: “Aō kōjatdikdik ej bwe kajjojo iaad jenaaj etale kajjojo im baam̧le ko āinwōt ribōk eddo ro kōn eddo ko ad im bōk eddo” (“Stewardship—a Sacred Trust,” Ensign ak Liahona, Nov. 2009, 94). Innem komaron̄ kajjitōk ippān ro uwaan kūļaaj eo ta eo rekar ekkatak jān sections 51–57 kōn ribōk eddo eo aer.

Katakin Katak eo

Katak im Bujen Ko 51:9, 15–20

Irooj ekōņaan bwe jen ribōk eddo ro retiljek, rejim̧we, im remālōtlōt.

• Ewi wāween am̧ jipan̄ ro uwaan kūļaaj eo ļōmņak kōn wāween an naan ko an Irooj ilo jekjen 51 iooļo̧k er? Komaron̄ je ioon bo̧o̧t eo Ta eo Irooj ekar kappeik eō kake? im kajjitōk ippān ro uwaan kūļaaj eo n̄an kōlaajrake uwaake ko aer (lale “Kein Jipan ko Jet” n̄an ļōmņak ko). Innem remaron̄ kappukot katak ko ilo eoon ko 9, 15–20 me ej katakin er wāween aer erom̧ ribōk eddo ro rem̧m̧anļo̧k ioon men ko rekar kōlaajraki. Ak komaron̄ mije naan ko “tiljek,” “jim̧we,” im “mālōtlōt” ilo eoon 19, ej kōmeļeļeik wāween an naan kein kajjojo maron̄ tōl kōj n̄an kakūrm̧ool eddo ko ad. Eļan̄n̄e emenin aikuj, etale ippān doon meļeļein “Steward, Stewardship” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org).

Bōlen emaron̄ in kar m̧ōttan ta eo ekar kan̄ōltok elōn̄ ro uwaan Kabun̄ in im̧aan tata.

Katak im Bujen Ko 52:10; 53:3; 55:1–3

Likūt pā ko ioon n̄an bōk mennin letok eo an Jetōb Kwojarjar.

• Elōn̄ eoon ko ilo revelesōn in ej kwaļo̧k kōn bōk Jetōb Kwojarjar kōn likūt pā ko ioon bōran. Eļan̄n̄e juon kōmeļeļe kōn unin kōnono in emaron̄ aorōk n̄an kūlaaj eo am̧, komaron̄ kajjitōk ippān ro uwaan kūlaaj eo ta eo rej ekkatak jān Katak im Bujen Ko 52:10; 53:3; 55:1–3 kōn menin letok eo an Jetōb Kwojarjar. N̄an meļeļe ko reļļapļo̧k kōn unin kōnono in, lale Jerbal 8:14–17; 19:1–6. Bōlen ro uwaan kūlaaj eo remaron̄ kōnono kōn en̄jake ko aer ke rekar bōk menin letok eo an Jetōb Kwojarjar ak ta eo remaron̄ kōm̧m̧ane n̄an wōnm̧aanļo̧k wōt n̄an bōk im̧we eo An ilo mour ko aer.

Katak im Bujen Ko 52:9–11, 22–27

Jemaron̄ kwaļo̧k gospel eo ijoko jabdewot jej pād ie.

• Ke Irooj ekar jilkinļo̧k jejjo ritōl an Kabun̄ in n̄an Missouri, ekar ba n̄an er n̄an kawōr tokjen iien ko rej juļo̧ki n̄an ito itak im “kwaļo̧k ilo iaļ eo” (eoon ko 25–27). Riiti Katak im Bujen Ko 52:9–11, 22–27 emaron̄ tōl n̄an juon kōmeļeļe kōn wāween ad maron̄ kwaļo̧k gospel eo “ilo iaļ eo,” ak ilo raan in mour ko ad. Ro uwaan kūlaaj eo remaron̄ kōnono kōn wāween aer kōm̧m̧ane kwaļo̧k gospel eo ej m̧ōttanļo̧k mour ko aer.

Katak im Bujen Ko 52:14–19

Anij ekar leļo̧k juon jon̄ak n̄an kattoļo̧k riab.

• N̄an kwaļo̧k kadkadin jon̄ak eo Irooj ekar kwaļo̧k ilo Katak im Bujen Ko 52:14–19, komaron̄ kwaļo̧k waanjon̄ak ko kōn jon̄ak ko jet me ro uwaan kūlaaj eo rejeļā kaki, āinwōt jon̄ak in ekkaļ men ak jon̄ak in m̧wil ko. Ro uwaan kūlaaj eo emaron̄ wōr aer make waanjon̄ak n̄an kwaļo̧k. Etke jon̄ak ko reaorōk? Ewi wāween ad kōjerbal jon̄ak eo ilo eoon ko 14–19 n̄an kattoļo̧k riab n̄e jej lo ilo laļ in rainin?

Katak im Bujen Ko 54

Imaron̄ oktak n̄an Irooj n̄e ij metak kōn jokālet ko an ro jet.

• Elōn̄ iaad rekar en̄taan kōn inepata n̄e juon eo jej pedped ioon ejjab kōjparok kallim̧ur ko an. Menin ekar waļo̧k n̄an Rikwojarjar ro jān Colesville, New York, ro rekar kōtmene n̄an jukjuk im amņak ilo ijo jikin Leman Copley ilo Ohio. N̄an ekkatak jān en̄jake in, ro uwaan kūlaaj eo remaron̄ etale taitōl in ilo jekjen 54 (bar lale Saints, 1:125–28; “A Bishop unto the Church,” Revelations in Context, 78–79). Remaron̄ antooņeļo̧k n̄e en kar wōr juon m̧ōttāer ilubwiljin Rikwojarjar ro ilo Colesville innem kappukot kapilōk in jekjen 54 me remaron̄ kwaļo̧k n̄an ro m̧ōttāer. Ak remaron̄ kappukot revelesōn kōn juon men eo me emaron̄ jipan̄ juon eo ej inepata kōn jokālet eo an bar juon armej. (Komaron̄ kalikkar ļo̧k kallim̧ur in ilo eoon 6 n̄an ro rej kōjparok bujen ko aer.)

• Katak im Bujen Ko 54:10 ewōr ie naan ko me ro uwaan kūlaaj eo am̧ remaron̄ kappukot meļeļe in āinwōt “kijenmej ilo en̄taan,” “rekar kappukot Eō im̧aan,” im “kakkije n̄an jetōb ko aer.” Ro uwaan kūlaaj eo remaron̄ bōk juon naan n̄an kejokļo̧kjeņ im ekkatak kake, kōjerbal footno̧o̧t ak kein jipan̄ ko jet n̄an kappukot eoon ko me rej iookļo̧k. Kajjitōk ippāer n̄an kwaļo̧k en̄jake ko aer.

Kein Jipan̄ ko jet

Ad ribōk eddo.

Būreejtōn Spencer W. Kimball ekar kōmeļeļeik: “Ilo Kabun̄ in juon ribōk eddo ej juon lōke an mour in jetōb im ānbwin jim̧or an mour in ijo jej bōk eddo ie. Kōnke aolep men ko rej an Irooj, jej ribōk eddo ro ioon ānbwinid, kōļmenļo̧kjeņ, baam̧le ko, im meļan ko. (Lale Katak im Bujen Ko 104:11–15.) Juon ribōk eddo eo etiljek ej juon eo ej kōjerbal bōkjab eo ewānōk, kea kōn e make, im kea kōn ro ri jeramōl im ri aikuj” (“Welfare Services: The Gospel in Action,” Ensign, Nov. 1977, 78).

Kōkōm̧anm̧anļo̧k Ad Katakin

Jipan̄ rikkatak ro n̄an rie doon. Ejaake juon mejatoto in kūlaaj eo ijo rikatak ro rej rie im kōketak doon. Kajjitōk ippāer n̄an kwaļo̧k ļōmņak ko im karōk ko me ej kōkm̧anm̧anļo̧k ekkatak ko aer make im baam̧le eo aer. (Lale Teaching in the Savior’s Way, 36.)