Eprōļ 26–Māe 2

Katak im Bujen Ko 45

“Kallim̧ur ko….Renaaj Kūrm̧ool”

Ilo am̧ ekkatak jān Katak im Bujen Ko 45, ļōmņak kōn ta eoon ko, kout ko jān ritōl ro an Kabun̄ in, en̄jake ko, kajjitōk ko, im kein jipan̄ ko jet me komaron̄ kōjerbali n̄an katakin katak eo. Ilo am̧ katakin, kajjitōk ippān ro uwaan kūlaaj eo n̄an rekoote im̧we ko me rej bōki im kōm̧m̧ane juon karōk n̄an kōm̧m̧an ekkar n̄an er.

Je En̄jake ko Rej Im̧we Eok

Kajjitōk bwe ren Kwaļo̧k

Ro uwaan kūlaaj eo remaron̄ je ilo juon pepa num̧ba in eoon eo jān Katak im Bujen Ko 45 me ekar im̧we er. Innem komaron̄ aini pepa ko, ekkāleel tak wōt ilo am̧ kālet jejjo, im kajjitōk ippān ro uwaan kūlaaj eo ro me raar jeikier n̄an riiti eoon ko aer n̄an kūlaaj eo im kwaļo̧k etke rekar kāleti. Rōjan̄ ro jet n̄an kwaļo̧k ļōmņak ko aer.

Katakin Katak eo

Katak im Bujen Ko 45:1–5

Jisōs Kraist ej ad Rijojomar ippān eo Jemen.

• Juon ilo kūlaaj eo am̧ emaron̄ kōmeļeļeik ta jerbal eo an juon rijojomar? Emaron̄ lukkun jipan̄ n̄an kappukot meļeļe in rijojomar ilo juon tikjinede. Kōn jeļā in, ro uwaan kūlaaj eo remaron̄ riiti Katak im Bujen Ko 45:3–5 ilo pea. Remaron̄ kwaļo̧k n̄an doon jabdewōt naan ko ak jentōj ko jān eoon ko me ej jipan̄ er meļeļe kōn eddo ko an Jisōs Kraist āinwōt ad Rijojomar ippān Jemān. (Bar lale 2 Nipai 2:8–9; Mosaia 15:7–9; Moronai 7:27–28; Katak im Bujen Ko 29:5; 62:1.) Ļōmņak in kajjitōk ippān ro uwaan kūlaaj eo n̄an kwaļo̧k en̄jake ko aer kōn Rilo̧mo̧o̧r āinwōt juon aer Rijojomar.

Katak im Bujen Ko 45:11–75

Jejjab aikuj mijak itok eo Kein Karuo.

• Ewi wāween am̧ jipan̄ ro uwaan kūlaaj eo loe jim̧or kōkaļļe ko reļļap im kallim̧ur ko eļap kōjatdikdik kaki ilo jekjen 45? N̄an waanjon̄ak, komaron̄ je ioon bo̧o̧t eo taitōļ ko Kanaan ko im Kōjeram̧m̧an ko kar Kallim̧ur Kaki , im ro uwaan kūlaaj eo remaron̄ je ium̧win taitōļ ko, katak ko me rej loi ilo Katak im Bujen Ko 45:11–75. Etke Irooj ekōņaan bwe jen jeļā kōn men kein m̧okta? Ta eo jemaron̄ kōm̧m̧ane n̄an bōk kōjeram̧m̧an ko kar kallim̧ur kaki?

• Bōlen ro uwaan kūlaaj eo remaron̄ kapilōk ippān doon kōn wāween n̄an itok limo im kōjatdikdik ilo ad jeļā jorrāān ko kar kanaan kaki kōn raan kein (āinwōt ko me kar kōmeļeļeiki ilo Katak im Bujen Ko 45:11–75). N̄an jipan̄ ro uwaan kūlaaj eo reim̧aanļo̧k n̄an Itok eo Kein Karuo kōn tōmak ijjeļo̧kin mijak, komaron̄ kōjo̧ pijaan alooj eo “Men’s Hearts Shall Fail Them” (ChurchofJesusChrist.org). Ilo wāween ta buruōn armej rej likjab ilo raan kein ad? (lale eoon 26). Ta kapilōk eo Būreejtōn Nelson ej letok ilo pijaan alooj in n̄an jipan̄ kōj jelm̧ae jekjek ko rekamijak kōn aenōm̧m̧an?

Katak im Bujen Ko 45:31–32

“Jutak ilo jikin ko rekwōjarjar,” im jab em̧m̧akūt.

• Ro uwaan kūlaaj eo remaron̄ kōņaan kwaļo̧k ļōmņak ko aer kōn wāween aer kajjeon̄ n̄an “jutak ilo jikin ko rekwōjarjar,” āinwōt an Irooj kar kapilōk ilo Katak im Bujen Ko 45:31–32. Ewi wāween ad ejaake jikin ko rekwōjarjar ilo mour ko ad? Naan in “Kein Jipan̄ ko Jet” im pijaan alooj eo “Stand Ye in Holy Places—Bloom Where You’re Planted” (ChurchofJesusChrist.org) emaron̄ bar kakkobaba ļōmņak ko n̄an kōmeļeļe in

  

  Parable of the Ten Virgins, jān Dan Burr

Kein Jipan̄ ko Jet

“Jutak ilo jikin ko rekwōjarjar.”

Sister Ann M. Dibb, juon eo kar uwaan Būreejtōnji eo Eutiej an Jiron̄ ro, kar katakin bwe kōmeļeļe ko n̄an jutak ilo jikin ko rekwōjarjar im rejāmin em̧m̧akūt “ej kōmeļeļeik wāween ad maron̄ bōk kōjparok, kajoor, im aenōm̧m̧an ilo iien ko renana.” Ālkin jeļā bwe jikin ko rekwojarjar emaron̄ koba tampeļ ko, mōn jar ko, im m̧ōko, e ekar ba bwe “kōj kajjojo maron̄ loe jikin ko rellōn̄ ļo̧k.” Ekar wōnm̧aanļo̧k wōt:

“Jemaron̄ kile naan in jikin āinwōt juon peļaak ak juon jikin. Kōn menin, juon jikin emaron̄ ‘juon jekjek ejjab epaak, jikin, ak paaktokin armej’ [Merriam-Webster.com Dictionary, “place,” merriam-webster.com]. Meļeļein bwe jikin ko rekwojarjar remaron̄ barāinwōt iien ko raorōk—iien ko raorōk me Jetōb Kwojarjar ej kam̧ool n̄an kōj, iien ko raorōk n̄e jej en̄jake iakwe an Jemedwōj Ilan̄, ak iien ko raorōk n̄e jej bōk juon uwaak n̄an jar ko ad. Ejja wōt, ij tōmak jabdewōt iien kwoj aikuj peran n̄an jutak kōn ta eo ejim̧we, eļaptata ilo jekjek ko ijo ejjeļo̧k juon ej m̧ōņōņō in kōm̧m̧ane, kwoj kōm̧m̧ane juon jikin ekwojarjar” (“Jikin ko Am̧ Rekwojarjar,” Ensign ak Liaona, Māe 2013, 115).

Kōkōm̧anm̧anļo̧k Ad Katakin

Kwon juon naan in kam̧ool emour. Ilo am̧ mour kōn katak eo kwoj katakin, konaaj maron̄ kwaļo̧k kam̧ool eo am̧ make ekajoor bwe ej m̧ool. Jetōb Kwojarjar enaaj kapene naan in kam̧ool eo am̧ n̄an buruōn ro uwaan kūlaaj eo am̧ Ļōmņak kōn pedped in katak ko me konaaj katakin ilo wiik in im ilo wiik ko rej itok. Ewi wāween am̧ maron̄ koļapļo̧k am̧ mour kaki?? (Lale Teaching in the Savior’s Way, 13–14.)